5
1 Sɩ́ pɛrmʋ́ wurí nʋɔ, ɛrá má a bɩɩnɛ rɩ́ a wɩ́ɩ́ Wɩɩsɛ sɩ́ɛ́. Bee wɩ́ɛ́, ɩ ka nɩbííno ní a mɩŋ tíé nyuu, ká Wɩɩsɛ nɛ́ mɩŋ bána nyúú. Ɛ wɩ́ɛ́, kanɩ́ nʋɔ a sɩ́ wɩ́káná cesú. 2 Hiĩne (Wɩ́ɛ́) kɩ́ŋkáŋ bɩɩnɛ́ keŋ duose,ká wɩ́kaná bʋlɛ́ mɩ́ nɛ́ ɓaá zɩŋ nɩcʋ́ʋ́lɛ́. 3 Rɩ́ tá nʋɔ Wɩɩsɛ rɩ́, sɩ́ ló rʋ́ daanɛ́ ka rɩ́ lɩsɛ nʋɔ ná. Bee wɩ́ɛ́, cʋʋlɛ́ wɩ nyʋɔ́rɛ kene; ɛ wɩ́ɛ́, lɩsɛ nʋɔ ná ɩ há tɛɛ́. 4 Ɩ wɩ nʋɔ tɛɛ́ nɛ́ cɩ́có; ɩ há tá nʋɔ ká wɩ wólle lɩsɛ nʋɔ ná. 5 Sɩ́ lo rɩ́ nʋɔ wɩ́bʋlɛ pɔ́sɛ wɩ́bɔma a cɩ́ɩ́nɩ́; ká sɩ́ Wɩɩsɛ wɩ́laabʋllɔ wɩ́bʋlɛ ka tɔ́ tɩ́ŋtɔ́ɛ́. Bee rɩ́ tɛ́ ɩ wɩ́bʋlɛ ná isí Wɩɩsɛ cɔ́ɛ́, ʋ zɔkɩ́ nɛ́sɛ tʋtʋmɛ́? 6 Wɩ́bʋlkána há wɩ́ nyʋ́ɔ́rɛ kene, nɩhɛ̃ duosewa há wɩ mʋ́l kene ɛ nɛ́. Ɛ wɩ́ɛ́, fa Wɩɩsɛ heŋwɩ́ŋ nɛ́ keŋ nyʋ́ɔ́rɛ.
Tɩ́ŋ tɩ́náwa wɩ́ɛ́
7 Dɩ́tɩllɛ mɛ́, rɩ́ nóú ɓaá bɛŋsɛ nɩyaarɔ, ɓa sariya dídí ʋ wɩ yɛrɛ rɩ́ taŋá kene; sɩ́ ló rʋ́ ɛ wálmɩ́ŋ. Bee wɩ́ɛ́, nɔhɔ̃́ rɩ́ mɩ́nɛ́ aá pɛɛ́ ɛ nɩɛ mɛ́ ɓaá tʋ́ŋ ɛ, ká nɩhɩɛ̃sɛ má naŋá baá mɩŋ aá pɛɛ ɛ nɔhɔ̃́ mɛ́. 8 Nɩɛ wuu nɛ́ dí tíé nyʋɔ́rɛ, kuóro má tɩɩ dí tíé nyʋɔ́rɛ rɛ́. 9 Nɛrɔ ná meéwíé cólle há mɩ́nʋ́ mɛ́, wɩ meéwíé vɔ́kɛ; ká nɛrɔ ná má há keŋ ɓɩɛ bʋlʋ́ wɩ oŋ kene. Ɓa wuu ka wɩ́yɔ́ɔ́wa. 10 Rɩ́ nɛrɔ keŋ ɓɩɛ kɩ́ŋkáŋ, ʋ nɛ́sɛ nɩɛ má ɔsɛ pul ní; ɛ nɛ́ tɛ́, ʋ ɓɩɛ ná nyʋɔ́rɛ nɛ́ ká bee pɔʋ́, ʋ nɛ́ tó ʋ ɩɔ̃ rʋ́ keŋ ɓɩɛ? 11 Tʋtʋnnʋ ná kɩ́ŋkáŋ dídí, ʋ wɩ naá dí, dóŋ pɩ́nɛ ŋmɔ́mɔ a pɔ́ʋ́; amá ɓɩɛ tɩ́na wɩ dóŋ pɛ́ ʋ ɓɩɛ wɩ́ɛ́. 12 Wɩ́tɔk nɔ́ŋɔ nɛ́ ŋ ná dúníé né mɩ́: Ʋ nɛ́ ká nɛrɔ kuóɓɩɛ aá gɩrɛ aá wálmʋ́. 13 Ɛ kuóɓɩɛ wuu dé tenni wɩ́yɔ́ɔ́wa har nɛ́. Kɔ́ʋ́ bio ke rɩ́ náwuole. 14 Ʋ há luú maá luóru mí rɩ́ tɛŋbíí ɛ, tɛŋbíí nɩ́ rʋ́ káá bɩrɛ. Ʋ tʋtʋmɛ́ oŋ wuu wʋʋ́ mɩ́ tɩ́ŋɛ́ cól. 15 Wɩɩla tɩɩ pã nɛ́ ɓɩɛná. Ʋ sɩ́ bɩrɛ cól yɔ́ɔ́, a nɛ́ ʋ há kué ɛ́. Ʋ nyʋɔ́rɛ mɩŋ nɛɛ́, ʋ wɩhála ná wuu tó poo dʋŋɔ́ nɛ́ rɛ́? 16 Ká ʋ dúníé nyuu mɩ́ mɩ́nɛ tapʋ́lɛ ná wuu dé ká wɩɩla, sazɔkɔ, arɩ́ cɔwɩɩlɔ́ dʋŋɔ́ nɛ́. 17 Noú ná ŋ há neé: Ʋ nɛ́ ká dúníé né mí nɩbííno hiẽso tapʋlɛ ná wuu Wɩɩsɛ há pɔʋ́; rʋ́ ná dí kaá nyɔ́ɔ́, kɔ́ʋ́ nɛ́sɛ tʋtʋmɛ́ má wuu cɛrɛ a pɔʋ́. Ʋ wɩ́cólli ɓóŋ nɛ́ ɛ́. 18 Rɩ́ Wɩɩsɛ pá nɛrɔ kuóɓɩɛ rɩ́ lúri meéwíé bɔnnɛ a pɔ́ʋ́, ká a rʋ́ tɩ́na tɩɩ bɩrɛ díwó vɔkɛ ɛ ná ʋ há jɛ́ɛ́, a tʋ́mʋ́ tɛŋpɔ́ɔ́rɩ́wɩ́ɛ́; ʋ ɛ ká Wɩɩsɛ zílé rɩ́. 19 Ɛ tɩ́na sɩ́ sʋ́llɛ́ rʋ́ dúníé nyúú hiẽso wɩ gbesi, bee wɩ́ɛ́ Wɩɩsɛ ɔɔ ʋ hiẽso a satɔrɔ dʋŋɔ́.