Nyuutɩna Wɩɩsɛ wɩ́bile wɩ dɩtoo kéné
(Kɩɛlɛ Yɩɩla 19. 8-15)
119
1 Nɩɛ ná háá vá taŋá sɩɛrʋ,aá tɩ́ŋ Nyuutɩna Wɩɩsɛ wɩ́bile, ɓa ná wér.
2 Nɩɛ ná háá tɩ́ŋʋ́ wɩ́bile ná
a jɔ́ʋ́ arɩ́wɔ́ sɩɛnnɛ wuu, ɓa ná wér.
3 Ɓa to bɔ́ŋbɔ́ŋ sɩɛrʋ,
ɓáá tɩ́ŋʋ́ ŋmɛ́ŋsɛ nɛ́.
4 Ɩ nɛ́ makɩ́ wɩ́bile
a makɛ rɩ́wɔ́ tɩ́ŋwɔ́ rɩ́ taŋá.
5 Rɩ́ŋ wolli cɛ́ weri
aá tɩ́ŋɩ́ŋ wɩ́bile;
6 ɛ́ é hɩ̃́ɩ̃́sɛ wɩ́ŋ ká
ɩ kíŋse ná wuu tɩ́ŋɛ́ mɛ́.
7 Ŋ sɩ́ ká sapʋmmɩ́ a bɩ́ɩ́ mɛ́
káá kɩɛlɩ́ ɩ wɩ́makɛ́ ná.
8 Ŋ haasɩ́ wɩ́bile ná ɓarɩ́ŋ tɩɩ weri,
sɩ́ŋ vɛ́ɛ́ tá ɓóŋ.
9 Ɛ́ rɛ́ɛ́ rɛ́ nɩpʋɔsɩ́ sɩ́ a ká rʋ́ʋ́ mala a weri>>
Ʋ nɛ́ ká rʋ́ʋ́ zílí wɩ́bʋlɛ.
10 Ŋ jɛ́ɩ́ arɩ́rɩ́ŋ sɩɛrʋ wuu,
sɩɛ́ sɩ́ ló rɩ́ŋ kɛ́kɩ́ kíŋse mí a mʋ́ dɩboli.
11 Lɛ́ɩ́ wɩ́bʋlɛ ná a bílíŋ sɩɛrʋ
a makɛ rɩ́ŋ sɩ́ aa zɔkɩ́ mɛ́.
12 Lá cʋɔla, Nyuutɩna Wɩɩsɛ,
makɩ́ kíŋsɛ ná páŋ.
13 Ɩ nʋɔ há sɛ́ wɩ́ɛ́ (wɩ́makɛ́) ná wuu ní,
ŋ nʋɔ cesi.
14 Ɩ wɩ́bile tɩ́ŋɛ́ páŋ satɔrɔ́
anɛ kuóɓɩɛ́ ɓɩkana.
15 Ɩ wɩ́bile ná mɩnɩ́ŋ ŋ káá fʋfɔ́nnɛ
ŋ sɩ́ɛ́ mɩnɩ́ ŋmɛ́ŋsɛ ná mɛ́.
16 Ŋ wɩ́bile ná caasɔ́ ká tɛŋpɔrɔ́ a páŋ,
ŋ wɩ́ɩ́ wɩ́bʋlɛ mɩ́ɩ́ sʋllɛ.
17 A weri pɛ́ɩ́ tʋtʋnnɔ:
ŋ sɩ́ ká mɩɩsɛ aá tɩ́ŋɩ́ wɩ́bʋlɛ ná.
18 Wúríŋ sɩ́ɛ́, rɩ́ŋ néí
wɩ́bile ná wɩwéré.
19 Ŋ ká nɩhʋ́ɔ́r tíé nyúú,
sɩ́ɩ́ kíŋse káá féŋsíŋ mí.
20 Ŋ caasɔ cóí wɩ́bile ná
tɛ́ŋ wuu mi.
21 Ɩ gáásɛ wɩ́ɛ́ nyʋktɩɩna nyáŋ bʋra há díwó rí,
há tɛ́lɔ́ a kɛ́kɩ́ kíŋse mí.
22 Láŋ tá zóŋ arɩ́ guone mí,
beé wɩ́ɛ́, ŋ tɩ́ŋɩ́ŋ wɩ́bile.
23 Rɩ́ kuoré có rɩ́wɔ́ ké aá bʋ́lɩ́ŋ má,
ɩ tʋtʋnnɔ háá bɩ́ɩ́nɩ́ wɩ́bile ná wɩ́ɛ́.
24 Wɩ́bile ná kéŋ tɛŋpɔrɔ́ a páŋ,
ɓa nɛ́ káŋ cɩcaana.
25 Ná ŋ rɩ́ kúŋkulo nɛ́ mɔ́ naŋa,
lo rɩ́ŋ bɩr ná waana a tɩ́ŋɩ́ wɩ́bʋlɛ ná mɛ́.
26 Ŋ máŋsɛ ŋmɛ́ŋsɛ pɛ́ɩ́, ɛ́ nɛ́ ɩ saŋɩ́ŋ sʋ́lɛ́,
makɩ́ wɩ́bile a páŋ.
27 A rɩ́ŋ zɩ́mɩ́ wɩ́bile ná tɩ́ŋɛ́,
ŋ sɩ́ bɩbɩɩnɩ́ŋ wɩ́wéré ná wɩ́ɛ́.
28 Sazɔkɔ́ ɔ́ɔ́ ŋ sɩ́mɩ́ɩ́rʋ yuori;
kánɩ́ŋ cuoli, a tɩ́ŋɩ́ wɩ́bʋlɛ mɛ́.
29 Kánɩ́ŋ kɛ́kɛ nyɩɛrʋ ŋmɛ́nɔ́ mɛ́
a ló rɩ́ŋ tɩ́ŋɩ́ wɩ́bile, ɩ zile yɩr mɛ́.
30 Ŋ bɛ́llɔ́ pi taŋá ŋmɛ́nɔ́,
ŋ mɩnɩ́ wɩ́bʋlɛ ná har nɛ́.
31 Ŋ vɔ́wɩ́ŋ tɩɩ cɔ́ɩ́ wɩ́bile mí,
Nyuutɩna Wɩɩsɛ, sɩɛ́ sɩ́ lo rɩ́ŋ dí hɩ̃́ɩ̃́sɛ.
32 Ɩ wɩ́makɛ́ há sʋ́ʋ́ ná sɩɛrʋ nɛ́ ŋ fɩfa,
beé wɩ́ɛ́, ɩ páŋ sabɩɩna.
33 Nyuutɩna Wɩɩsɛ makɩ́ wɩ́bile ŋmɛ́nɔ́ a páŋ,
ká rɩ́wɔ́ tɩŋɛ́ nɛ́ áŋ má ker.
34 Páŋ wɩ́zɩmɛ, rɩ́ŋ tɩ́ŋɩ́ wɩ́bile ná
rɩ́ŋ tɩ́ŋɩ́wɔ́ arɩ́rɩ́ŋ sɩɛrʋ wuu.
35 Ló rɩ́ŋ tɩ́ŋɩ́ wɩ́makɛ́ há sʋ́ʋ́ ná,
beé wɩ́ɛ́, ɓa kéŋ satɔrɔ́ a páŋ.
36 Bɩrɩ́ŋ sɩɛrʋ caasɩ́ wɩ́bile ná,
ká táŋ tɩɩ wɩ́jaalɛ́.
37 Ká wɩ́yɔ́ɔ́wa kɛ́kɩ́ŋ sɩ́ɛ́ mɛ́,
ló rɩ́ŋ valɩ́ ŋmɛ́ŋsɛ ná sɩɛrʋ.
38 Ɩ há sʋ́ʋ́ ná pɛ́ɩ́ tʋtʋnnɔ, ló rʋ́ʋ nʋɔ sú,
a makɛ rɩ́wɔ́ fɩ́fɛ́ɩ́.
39 Kɛ́rɩ́ŋ mɛ́ rɩ́ɩ́ zóŋ ná ŋ háá fɛ́ɛ́,
beé wɩ́ɛ́, ɩ sɛ́ wɩ́ɛ́ ná nɛ́ wéré.
40 Ʋ ká ɛ́ nɛ́, ŋ cóí wɩ́bile ná;
ló rɩ́ŋ ká mɩɩsɛ a tɩ́ŋɩ́ taŋá ná mɛ́.
41 Nyuutɩna Wɩɩsɛ, lo rɩ́ɩ́ wɩ́wéré ná péríŋ,
rɩ́ŋ ná laatɛ́ a tɩ́ŋɩ́ makɛ́ mɛ́.
42 A makɛ rɩ́ŋ ká sɛ́ nɛrɔ ná háá tʋksɩ́ŋ rɩ́,
beé wɩ́ɛ́, ŋ kéníŋ wɩ́bʋlɛ ná yɩɛla.
43 Sɩ́ lo rɩ́ taŋá wɩ́bʋlɛ ná oro kɛ́kɩ́ŋ nʋɔ mɛ́,
beé wɩ́ɛ́, ŋ kéní wɩ́bile ná yɩɛla.
44 Ŋ sɩ́ tɩ́ŋɩ́ŋ wɩ́bile ná tɛ́ŋ wuu mí,
a káá mʋ́ wuu.
45 Ŋ sɩ́ tɩllɩ́ŋ tɩɩ aá va,
beé wɩ́ɛ́, wɩ́bile ná nɛ́ káŋ wɩ́jaalɛ́.
46 Ŋ sɩ́ bʋlɩ́ wɩ́bile ná wɩ́ɛ́ kuóre sɩ́ɛ́
ká sɩ́ hɩ̃́ɩ̃́sɛ fá.
47 Ɩ wɩ́makɛ́ ná kéŋ tɛŋpɔrɔ́ a páŋ,
beé wɩ́ɛ́, ŋ cówó weri.
48 Ŋ ɓɔ́ŋ nɛ́ŋsa
a caasɩ́ wɩ́makɛ́ ná ŋ há caasɛ colli,
ɩ wɩ́bile ná wɩ́ŋ sabɩɩna mɩ́ɩ́ lɩ́ɩ́ ná.
49 Líísi wɩ́bʋlɛ ná ɩ há bʋlɛ́ a pɛ́ tʋtʋnna,
ʋ kánʋ́ yɩɛla wɩ́ɛ́.
50 Ʋ nɩ́ɩ́ bʋɔlɩ́ŋ ŋ wɩ́hala sɩɛrʋ,
ɩ wɩ́makɛ́ ná nɛ́ káŋ mɩɩsɛ.
51 Nyʋktɩ́ɩ́na mɔmɩ́ŋ weri,
amá ŋ wɩ́ɩ́ wɩ́bile ná mɛ́ cʋrɛ.
52 Nyuutɩna Wɩɩsɛ, ŋ bɩ́ɩ́nɩ́ fól wuu wɩ́bile ná wɩ́ɛ́ rɛ́,
ɓa nɩ́ɩ́ bʋɔlɩ́ŋ.
53 Ŋ cɩ́nɔ́ rɩ́ŋ gáásɛ nɛ́,
nɩbɔma há vɛ́ɩ́ wɩ́bile tɩ́ŋɛ́ wɩ́ɛ́.
54 Ɩ wɩ́bile ná bɩ́rmɛ yɩɩla a páŋ
dɩhɩ̃́ ná ŋ há ká zʋzʋʋlɛ mɛ́.
55 Nyuutɩna Wɩɩsɛ, tɩ́táŋ, ɩ bɩ́ɩ́nɩ́ yɩr wɩ́ɛ́,
ŋ sɩ́ tɩ́ŋɩ́ wɩ́bile ná.
56 Ʋ ná há káŋ kér
ʋ nɛ́ ká rɩ́ŋ tɩ́ŋɩ́ wɩ́bile.
57 Ŋ nɛ́ bʋlɛ́, Nyuutɩna Wɩɩsɛ,
ŋ kér ní ká rɩ́ŋ tɩ́ŋɩ́ wɩ́bʋlɛ.
58 Ŋ héŋ taŋá wuu ní rɩ́ɩ́ sɩɛrʋ tɔrɛ,
sɩɛ́ makɩ́ sawer páŋ ɩ wɩ́bʋlɛ ná yɩr mɛ́.
59 Ŋ kɩɛlɩ́ŋ navalɛ́ mɛ́,
ká bɩr aá tɩ́ŋɩ́ wɩ́bile ná.
60 Ŋ tɩ́ŋɩ́ wɩ́bile ná mɛ́ kɩ́kɛlɛ,
wɩ wʋ́ɔ́ mɛ́ tɩ́ŋɛ́ kéné daanɛ.
61 Nɩbɔma ŋmɛ́sɛ vɔ́sɩ́ŋ,
káŋ há wɩ́ɩ́ wɩ́bile ná mɛ́ sʋllɛ.
62 Tɩtafɩɛl nɛ́ ŋ isi aá dɛ́nnɩ́,
ɩ wɩ́bile ná há ká taŋá yɩr mɛ́.
63 Ŋ mɩ́ŋ nɩɛ ná wuu háá fɛ́ɛ́
aá tɩ́ŋɩ́ wɩ́bile ná har.
64 Nyuutɩna Wɩɩsɛ, ɩ nɩcɩtɩkɔ́ ná tɔ́ tíé wuu mí;
píí wɩ́bile ná karmɩ́ŋ.
65 Nyuutɩna Wɩɩsɛ, ɩ tɛ́ tʋtʋnnɔ nɩ́ná wér
ɩ wɩ́bʋlɛ ná yɩr mɛ́.
66 A rɩ́ŋ zɩ́mɩ́ wɩ́bile ná wɩ́wéré,
beé wɩ́ɛ́, ŋ kéní wɩ́makɛ́ ná yɩɛla.
67 Ká rɩ́ŋ zɩ́ŋ dí hɩ̃́ɩ̃́sɛ, ŋ fá lá sɩ́ɛ́ tɛ́l nɛ́,
mʋ́l né mí, ŋ mɩnɩ́ wɩ́bʋlɛ ná har.
68 Ɩ wero, ɩ keŋ sawer má,
makɩ́ŋ wɩ́bie ná páŋ.
69 Nyʋktɩɩna nyɛ́ nyɩɛnnɛ a zɔkɩ́ŋ yɩr,
amá ŋ é há mɩnɩ́ wɩ́bile ná har.
70 Ɓa baŋcɩllɛ ɓaŋɔ anɛ naŋnʋnnɛ;
amá ɩ wɩ́bile ná nɩ́ɩ́ pɔrɛ é tɛŋ.
71 Ʋ sɩ́ɩ́ mɛ́ nɛ́ ŋ́ dí hɩ̃́ɩ̃́sɛ,
a makɛ rɩ́ŋ zɩ́mɩ́ wɩ́bile ná.
72 Wɩ́bile ná há lɩ́ɩ́ nʋɔ nɛ́ were a páŋ
a kɩ́llɛ salmɛ arɩ́ warɛ onni mɩlyɔŋwa.
73 Ɩ nɛ́ŋsa nɛ́ fɔ́rɩ́ŋ, a páŋ dóé má,
sɩɛ́ páŋ wɩ́zɩmɛ rɩ́ŋ gʋnnɩ́ wɩ́makɛ́ ná.
74 Rɩ́ nɩɛ ná háá fɛ́ɛ́ héwíŋ nínéŋ
ɓáá jɩ́jʋ́ɔ́sɛ nɛ́,
beé wɩ́ɛ́, ŋ kéní wɩ́bʋlɛ ná yɩɛla.
75 Nyuutɩna Wɩɩsɛ, ŋ ɩ́ɔ̃́ rɩ́ɩ́ wɩ́bile ká taŋá,
ɩ fá kéŋ taŋá rɩ́ɩ́ a rɩ́ŋ dí hɩ̃́ɩ̃́sɛ.
76 Ló rɩ́ɩ́ nɩcɩtɩkɔ́ ná bʋɔlɩ́ŋ,
anɛ ɛ́ ɩ há makɛ pɛ́ɩ́ tʋtʋnnɔ.
77 Ló rɩ́ɩ́ susúfɔ́ɔ́ ná mɩ́nɩ́ŋ mɛ́, rɩ́ŋ ká mɩɩsɛ,
beé wɩ́ɛ́, ɩ wɩ́bile ná nɛ́ ká tɛŋpɔɔrɛ wɩ́ɛ́ (wɩ́colle).
78 Rɩ́ hɩ̃́ɩ̃́sɛ dí nyʋktɩɩna ná há nyɛ nyɩɛnnɛ hé mí,
ɩ wɩ́bile ná mɩnɩ́ŋ é sɩɛrʋ ŋ ká bɩbɩ́ɩ́nɛ.
79 Rɩ́ nɩɛ ná háá fɛ́ɛ́ héwíŋ bɩrkóŋ rí,
ɓa sɩ́ zɩ́mɩ́ wɩ́bile ná.
80 Rɩ́ŋ wolli tɩ́ŋɩ́ wɩ́bile ná ɓa sɩ́ɩ́ mɛ́,
a makɛ rɩ́ŋ sɩ́ hɩ̃́ɩ̃́sɛ dí.
81 Ŋ caasɔ́ dí bɔl ɩ laatɛ́ ná wɩ́ɛ́
ŋ yɩɛlɩ́ wɩ́bʋlɛ nɛ́.
82 Ŋ sɩ́ɛ́ cɔ́ɩ́ wɩ́makɛ́ ná mɛ́ a bɔl,
ká bʋlɛ́: «Tɛ́ŋ beé rí ɩ sɩ́ bʋ́ɔ́lɩ́ŋ>>»
83 Ŋ fá nɩhɩ̃́ nyipúr há ɓel nyʋɔsɛ sɩɛrʋ nɛ́,
ká arɩ́ ɛ́ má, ŋ há wɩ́ɩ́ wɩ́bile ná mɛ́ sʋllɛ.
84 Tápʋ́lɛ nyáŋ bɛ́ŋŋmɛ́ŋ nɛ́ ɩ tʋtʋnnɔ sɩ́ dí>>
Tɛ́ŋ beé rɩ́ɩ́ dí nɩɛ ná háá bɛ́ŋsɩ́ŋ sarɩ́yá
85 Nyʋktɩɩna píí wɩ́bile yɩr yɔ́ɔ́
ká lú bɔnnɛ a cɩ́nɩ́ŋ mɛ́.
86 Ɩ kíŋse ná wuu ká taŋá;
ɓa cɩ́nɩ́ŋ mɛ́ káŋ wɩ wɩ́ɩ́ zɔkɛ, sɩɛ́ láŋ tá.
87 Mʋɔ́ nɛ́ too, ká rɩ́wɔ́ ɓʋ́ŋ
ká ɛ́ má, ŋ há wɩ́ɩ́ wɩ́bile ná vɛ́ɛ́ tá.
88 A rɩ́ŋ ká mɩɩsɛ, ɩ nɩcɩtɩkɔ́ ná yɩr mɛ́,
a makɛ rɩ́ŋ cɛ́ tɩkɩ́ nʋɔ há sʋ́ʋ́ ná.
89 Nyutɩna Wɩɩsɛ, ɩ wɩ́bʋlɛ ná
mɩ́ŋ baná nyúú a káá mʋ́ wuu.
90 Ɩ nɩcɩtɩkɔ́ ká dɩŋɛ:
ɩ nɛ́ ɛ́ɛ́ tíé mɩ́ŋ;
91 a tɩ́ŋɩ́ makɛ́ mɛ́, oŋ wuu cɩ́nɛ́ wero arɩ́ zaa
beé wɩ́ɛ́, dúníé wuu tʋmɔ aá pɛ́ɩ́ nɛ́.
92 Rɩ́ɩ́ wɩ́bile ná há káŋ tɛŋpɔɔrɩ́wɩ́ɛ́ yɩr mɛ́ ráá nɛ́,
nyɛ́ mɛ́ wɩɩla fá díŋ.
93 Ŋ wɩ́ɩ́ wɩ́bile ná mɩ́ɩ́ sʋllɛ abádá,
beé wɩ́ɛ́, ɓa yɩr mɛ́ nɛ́ ŋ ká mɩɩsɛ.
94 Ŋ píŋ tɩɩ pɛ́ɩ́, láŋ tá,
beé wɩ́ɛ́, ŋ́ tɩ́ŋɩ́ wɩ́bile ná rɛ́.
95 Nɩbɔma fá bɩ́ɩ́nɩ́ŋ mɩɩsɛ lɩ́sɛ,
amá ŋ é há mɩnɩ́ wɩ́bile ná har.
96 Ŋ noú rɩ oŋwér é wuu kénú dɩtenni,
amá ɩ wɩ́makɩ́ wɩ dɩtenni kéné.
97 Ŋ sɩɛ́ caasɔ cóí wɩ́bile ná é,
tápʋ́l é wuu, ŋ́ bɩ́ɩ́nɩ́wɔ́ wɩ́ɛ́.
98 Ɩ wɩ́makɛ́ ɔ́ɔ́ ŋ ká zɩmɛ́ a kɩ́llɩ́ŋ dɩ́ŋdɔma,
ŋ vɔ́wɔ́ a ɓarɩ́ŋ tɩɩ a káá mʋ́ wuu.
99 Ŋ wɩ́zɩmɛ kɩ́ŋ karmɩ'ánáwa,
beé wɩ́ɛ́, ɩ wɩ́bile ná mɩnɩ́ŋ sɩɛrʋ ŋ kaa bɩbɩ́ɩ́nɛ.
100 Ŋ kéŋ sabɩɩna a kɩ́llɛ nɩhɩ́ɛ̃́sɛ,
beé wɩ́ɛ́, ŋ́ tɩ́ŋɩ́ wɩ́makɛ́ ná nɛ́.
101 Ŋ vɛ́ bɔ́ŋbɔ́ŋ ŋmɛ́ŋsɛ wuu ní a tá
ká makɛ rɩ́ŋ zílí wɩ́bʋlɛ.
102 Ŋ wɩ́ɩ́ wɩ́bile ná mɛ́ cʋrɛ,
beé wɩ́ɛ́, ɩ nɛ́ píwó karmɩ́ŋ.
103 Ɩ wɩ́mkɛ́ ná ŋmɔmɔ ŋ nʋɔ sɩɛrʋ
a kɩllɛ tʋʋ ŋ nʋɔ sɩɛrʋ.
104 Ŋ́ kéŋ zɩmɛ́, ɩ wɩ́bile ná yɩr mɛ́,
a súúri ɛ́ mɛ́, ŋ bɛrɛ nyɩɛrʋ ŋmɛ́ŋsɛ wuu.
105 Ɩ wɩ́bʋlɛ nɛ́ ká caanɔ́ a ŋ naasɛ mʋ́l,
ʋ nɛ́ ká pʋmmɔ ŋ ŋmɛ́nɔ́ mɛ́.
106 Ŋ ŋmɩ́ɛ́sɔ́, ŋ sɩɛ́ mɩnɩ́ŋ nʋɔ har má,
ŋ sɩ́ tɩ́ŋɩ́ŋ wɩ́bile ná há ká taŋá.
107 Ŋ caasɔ́ dí hɩ̃́ɩ̃́sɛ kɩ́ŋkáŋ,
Nyuutɩna Wɩɩsɛ, lo rɩ́ŋ ká mɩɩsɛ ɩ wɩ́bʋlɛ ná yɩr mɛ́.
108 Saŋɩ́ŋ cʋɔla, ŋ satɔrɩ́pala nɛ́ ɛ́,
píí wɩ́bile ná karmɩ́ŋ.
109 Ŋ rɩ́ sʋʋ ká lɛ́rɛ́lɛ́rɛ́ tɛ́ŋ wuu mí,
ká ɛ́ má, ŋ wɩ́ɩ́ wɩ́bile ná mɛ́ sʋllɛ́.
110 Nɩbɔma hé bára rɩ́wɔ́ kánɩ́ŋ,
amá ŋ wɩ́ɩ́ wɩ́bile ná mɛ́ cʋrɛ.
111 Ɩ wɩ́bile ná nɛ́ káŋ kér aá káá mʋ́ wuu:
ɓa nɛ́ káŋ satɔ́rwɩ́ɛ́.
112 Ɩ wɩ́bile ná tɩ́ŋɛ́ nɛ́ fɛ́lɩ́ŋ sɩ́ɩ́,
ɓa nɛ́ káŋ siile, a káá mʋ́ wuu.
113 Sabammawa nɛ́ káŋ wɩ́bɩrɛ
kɛ́ɩ́ wɩ́bile áŋ wɩ́colle.
114 Ɩ nɛ́ káŋ dɩyuoli arɩ́rɩ́ŋ hɔkɛ́rɛ́
ŋ kéní wɩ́bʋlɛ yɩɛla.
115 Nɩbɔma, ɩ́ bɩ́rɩ́ŋ har
ká rɩ́ŋ tɩ́ŋɩ́ŋ Wɩɩsɛ wɩ́makɛ́.
116 Ló rɩ́ŋ tɩ́ɛ́kɩ́ mɛ́ a ká mɩɩsɛ, ɩ wɩ́bʋlɛ ná yɩr mɛ́;
sɩ́ ló rɩ́ŋ dí hɩ̃́ɩ̃́sɛ.
117 Pɛ́ŋ mɛ́ rɩ́ŋ ná laatɛ́,
a makɛ rɩ́ŋ hé sɩ́ɛ́ ɩ wɩ́makɛ́ ná mɛ́.
118 Nɩɛ ná wuu há kɛ́kɩ́ wɩ́makɛ́ ná, ɩ vɛ́wɔ́ tá,
beé wɩ́ɛ́, ɓa lɩ́ŋwɩ́ɛ́ ná ká nyɛ́wɩ́ɛ́.
119 Ɩ piesi tɔ́ɔ́ ná nɩbɔma wuu anɛ kʋɔra,
ɛ́ nɛ́ tɛ́ ŋ colli wɩ́bile.
120 Ɩ wɩ́bile ná héwíŋ kéníŋ ŋ tɛŋ vɩvaklɛ,
ɩ wɩ́bile ná kéŋ baŋcɩpiilo páŋ.
121 Ŋ tʋŋ yɛ́rɛ́ arɩ́ taŋá;
sɩ́ŋ káá páŋ dɔma.
122 Pɔ́ɩ́ tʋtʋnnɔ wer mí;
rɩ́ nyʋktɩɩna sɩ́ŋ bɛ́ŋsʋ́.
123 Ɩ dɛ́llɩ́ laatɛ́ ná, ŋ sɩ́ɛ́ píí fieli (bɔl)
ŋ jɛ́ɩ́ taŋá wɩ́makɛ́ ná a bɔl.
124 Makɩ́ nɩcɩtɩkɔ́ a pɛ́ɩ́ tʋtʋnnɔ,
píí wɩ́bile ná karmɩ́ŋ.
125 Ŋ kɛ́ɩ́ tʋtʋnnɔ nɛ́, páŋ wɩ́zɩmɛ́,
a makɛ rɩ́ŋ zɩ́mɩ́ wɩ́bile ná.
126 Nyuutɩna Wɩɩsɛ, tɛ́ŋ péró rɩ́ɩ́ a wɩ́ɩ́:
ɓa zʋ́ɩ́ wɩ́bile gɛ́sɔ́.
127 Ŋ cóí wɩ́makɛ́ ná
a kɩllɛ salmɛ cʋɔrɩ́ má tɩɩ.
128 Ŋ kɩɛlɔ́ má rɩ́ɩ́ wɩ́bile cɛ́rɔ́ rɩ́ wɩ́ɩ́ wuu,
ŋ bɛ́rɛ nyɩɛnnɛ ŋmɛ́ŋsɛ wuu.
129 Ɩ wɩ́bile ká wɩ́wéré ní,
ŋ mɩ́ŋwɔ́ há sʋ́ʋ́ ná sɩɛrʋ nɛ́.
130 Ɩ wɩ́bʋlɛ ná zɩmɛ́ nɛ́ ká pʋmmɔ,
ʋ nɩ́ɩ́ pá nɩɛ ná há wɩ́zɩmɛ kéné wɩ́zɩmɛ.
131 Ŋ wúríŋ nʋɔ wuu, aá líŋ mɩŋtʋɔrɛ,
ɩ wɩ́makɛ́ ná hɩ́ɛ̃́ŋ há kéné wɩ́ɛ́.
132 Bɩ́rɩ́ sɩ́ɛ́ cáásɩ́ŋ, a yɛ́rɛ́ páŋ,
anɛ ɛ́ ɩ há vɔwɛ bílí nɩcolle mí.
133 Duórɩ́ŋ naasɛ a tɩ́ŋɩ́ wɩ́makɛ́ ná mɛ́
ká sɩ́ ló rɩ́ bɔ́ŋbɔ́ŋ oro wuu dóé dukíŋ.
134 Láŋ tá nɩɛ ná háá bɛ́ŋsɩ́ŋ nɛ́sɛ mɛ́,
a makɛ rɩ́ŋ tɩ́ŋɩ́ wɩ́bile.
135 Wúrí sɩ́ɛ́ caasɩ́ tʋtʋnnɔ:
píí wɩ́bile karmɩ́ŋ.
136 Ŋ sɩ́ɛ́ pal sɩ́mɩɩrʋ́
ɓa há wɩ́ɩ́ wɩ́bile náá tɩ́ŋ wɩ́ɛ́.
137 Nyuutɩna Wɩɩsɛ, ɩ nɛ́ ká taŋá,
ɩ wɩ́bile má cɛ́rɔ́.
138 Ɩ nɛ́ makɩ́ wɩ́bile, ɓa ká taŋá,
ɓa wuu ká pʋmmɩ́.
139 Cɔwɩɩlɔ́ kéníŋ,
ŋ dɩ́ŋdɔma há sʋ́llɩ́ wɩ́bʋlɛ ná wɩ́ɛ́.
140 Ɩ wɩ́bʋlɛ́ ká pʋmmɩ́,
ɩ tʋtʋnnɔ sɩ́ɛ́ cówó wɩ́ɛ́.
141 Tɛŋ múríŋ, ɓa píŋ yɩr yɔ́ɔ́
amá ŋ wɩ́ɩ́ wɩ́bile ná mɛ́ sʋllɛ.
142 Ɩ taŋá ná ká taŋá ná há ká dɩŋɛ nɛ́,
ɩ wɩ́bile ná má ká taŋá nɛ́.
143 Wɩ́hala arɩ́ sazɔkɔ́ kéníŋ,
amá ɩ wɩ́makɛ́ ná nɛ́ káŋ satɔrɩ́wɩ́ɛ́.
144 Ɩ wɩ́bile ná taŋá nɛ́ a káá mʋ́ wuu;
páŋ wɩ́zɩmɛ́, rɩ́ŋ ká mɩɩsɛ.
145 Nyuutɩna Wɩɩsɛ, ŋ sɩɛrʋ wuu ní ŋ kaa yɩ́rɩ́;
saŋɩ́ŋ yɩrɛ́, a makɛ rɩ́ŋ tɩ́ŋɩ́ wɩ́bile.
146 Ɩ nɛ́ ŋ yɩyɩrɛ, láŋ tá,
a makɛ rɩ́ŋ zílí wɩ́bile ná.
147 Ŋ ísó rí wɩɩsɛ há wɩ pɔsɛ aá ŋmɔ́wɛ búŋse,
ŋ kéní wɩ́bʋlɛ yɩɛla.
148 Ŋ wúríŋ sɩ́ɛ́, rɩ tɔ́ɔ́ há wɩ pʋlɛ́
aá kɩ́ɛ́lɩ́ wɩ́bʋlɛ.
149 Ɩ nɩcɩtɩkɔ́ ná yɩr mɛ́, zésíŋ liŋó;
Nyuutɩna Wɩɩsɛ, ló rɩ́ŋ ká mɩɩsɛ, a tɩ́ŋɩ́ wɩ́makɛ́ ná mɛ́.
150 Nɩbɔma kiro tɩ́ŋɩ́ŋ mɛ́,
ɓa kɛ́kɩ́ wɩ́bile ná mɛ́.
151 Nyuutɩna Wɩɩsɛ, ɩ é mɩnɩ́ŋ laka,
ɩ wɩmakɛ́ wuu ká taŋá.
152 Ŋ ɩ́ɔ̃́ fól wuu rɩ́ɩ́ wɩ́bile ná mɩnɔ́
a káá mʋ́ wuu.
153 Bélíŋ wɩ́hala ká láŋ tá,
beé wɩ́ɛ́, ŋ wɩ́ɩ́ wɩ́bile ná mɛ́ sʋllɛ.
154 Pɛ́ŋ mɛ́ a láŋ tá;
lo rɩ́ŋ ká mɩɩsɛ a tɩ́ŋɩ́ wɩ́makɛ́ ná mɛ́.
155 Nɩbɔma rɩ́ laatɛ́ pɛ́kɛ ból,
beé wɩ́ɛ́, ɓa wɩ́ɩ́ wɩ́bile ná jɛ́ɛ́.
156 Nyuutɩna Wɩɩsɛ, ɩ susufɔ́ɔ́wa duó káŋ,
ɩ wɩ́makɛ́ ná yɩr mɛ́, ló rɩ́ŋ ká mɩɩsɛ.
157 Nɩɛ ná há bɛ́rɩ́ŋ arɩ́ŋ dɩŋdɔma káŋ,
amá ŋ wɩ́ɩ́ wɩ́bile ná mɛ́ cʋrɛ.
158 Ŋ sɩɛrʋ lɩ zaŋbatɩɩna,
beé wɩ́ɛ́, ɓa wɩ́ɩ́ wɩ́makɛ́ náá mɩ́ɩ́ tɩ́ŋ.
159 Náŋ há cóí wɩ́bile a mɔ́ ɛ́,
Nyuutɩna Wɩɩsɛ, ló rɩ́ŋ ká mɩɩsɛ ɩ nɩcɩtɩkɔ́ ná yɩr mɛ́.
160 Ɩ wɩ́bʋlɛ ná sɩ́dííro ní ká taŋá;
ɩ wɩ́bile ná wuu ká taŋá, ɓa ká dɩŋɛ má.
161 Sɩ́dííre cɩ́nɩ́ŋ mɛ́ yɔ́ɔ́,
amá ɩ wɩ́bʋlɛ dʋŋɔ nɛ́ káŋ baŋcɩyoolo.
162 Ɩ wɩ́bʋlɛ́ kéŋ satɔrɔ́ a páŋ,
anɛ ɛ́ lal ɓɩ́ɛ́ há kéŋ a pá nɛ́ŋ ná há tukwó mí.
163 nyɩɛrʋ kéŋ sakuóso páŋ, ŋ bɛ́rɛ nyɩɛrʋ,
ɩ wɩ́bile ní káŋ wɩ́colle.
164 Tápʋ́l wuu naasɩ́ balpɛ nɛ́ ŋ dɩdɛnnɩ́,
ɩ wɩ́bile ná há ká taŋá yɩr mɛ́.
165 Nɩɛ ná há cóí wɩ́bile ná tɛŋfɩ́ɛ́l zeŋ:
dɩgɛrɛ tówó sɩ́ɛ́.
166 Nyuutɩna Wɩɩsɛ, ŋ kéní laatɛ́ ná yɩɛla
ŋ́ tɩ́ŋɩ́ wɩ́makɛ́ ná nɛ́.
167 Ŋ́ zili wɩ́bile ná,
ŋ caasɔ́ cówó.
168 Ŋ tɩ́ŋɩ́ wɩ́bile arɩ́rɩ́ wɩ́makɛ́,
ɩ ɩ̃́ŋ ŋmɛ́ŋsɛ wuu ní.
169 Nyuutɩna Wɩɩsɛ, ló rɩ́ŋ búŋse zʋ́ɩ́ dɩllɛ,
páŋ wɩ́zɩmɛ ɩ wíbʋlɛ ná yɩr mɛ́.
170 Ló rɩ́ŋ jɛ́nnɛ́ ná zɩ yakɩ́ mɛ́;
láŋ tá ɩ wɩ́bʋlɛ ná yɩr mɛ́.
171 Rɩ gɔkɩ́ lɩ́ŋ nʋɔ mɛ́ lɛ́,
beé wɩ́ɛ́, ɩ píí wɩ́bile aá karmɩ́ŋ.
172 Ŋ neŋduli sɩ́ dɛ́nnɩ́ ɩ wɩ́bʋlɛ́ ná yɩr mɛ́,
beé wɩ́ɛ́, ɩ wɩ́makɛ́ wuu ká taŋá.
173 Tɛ́rɩ́ nɛ́sɛ a pɛ́ŋ mɛ́,
beé wɩ́ɛ́, ŋ bɛllɔ́ pii wɩ́bile ní.
174 Nyuutɩna Wɩɩsɛ, ŋ caasɔ́ aá hɩ́ɛ́nɩ́ laatɛ́ ná,
ɩ wɩ́bile ní káŋ satɔrɩ́wɩ́ɛ́
175 Ló rɩ́ŋ mɩɩsɛ a píŋsí,
ló rɩ́ɩ́ wɩ́bile ná pɛ́ŋ mɛ́.
176 Ŋ ká nɩbaarɩ́ anɛ pieŋso há yʋ́ksɛ:
já kanɩ́ tʋtʋnnɔ,
beé wɩ́ɛ́, ŋ wɩ́ɩ́ wɩ́makɛ́ ná mɛ́ sʋllɛ.