Dɩyuoli ná há ká taŋá
91
1 Nɛ́ŋ ná há mɩŋ Wɩɩsɛ ná há kɛ́ oŋ wuu dɩmɩnɩ́,ʋ mɩŋ Doe wuu tɩna Wɩɩsɛ fɩ́ɛ́l sɩɛrʋ nɛ́.
2 Ŋ bʋl Nyuutɩna Wɩɩsɛ a bʋlɛ́: «Ʋ nɛ́ káŋ dɩyuoli, ŋ nɛ́ káŋ zeŋkɛrɛ,
ʋ nɛ́ káŋ Wɩɩsɛ: ŋ́ yɩɛlʋ́ nɛ́.»
3 Ʋ nɛ́ lɛ́ɩ́ aá tá naballɔ bara mɛ́,
arɩ́ pʋɔlɩbɔmɔ ná haá zɔkɩ́ mɛ́.
4 Ʋ kiŋkeru ní hé fɩ́ɛ́l a pɛ́ɩ́,
ʋ pʋsɛ mʋ́l nɛ́ ɩ féŋsi.
Ʋ nɩtɩcɩkɔ́ nɛ́ ká hɔkɛrɛ arɩ́ lalyooricɩka.
5 Tɩtáŋ héwíŋ to wɩ́ɩ́ a pɛ́ɩ́,
tuhɛ́ŋ ná háá fil wɔhɔ to bacɩyoolo a pɛ́ɩ́,
6 bino sɩɛrʋ pʋɔlɩbɔmɔ wɩ héwíŋ kené a pɛ́ɩ́,
pʋɔlɩtaarɩ́ ná háá ɓʋ́ wɔhɔ totoŋ to héwíŋ wɩ́ɩ́ pɛ́ɩ́.
7 Rɩ nɩɛ bʋ́ɩ́ có ɓa sʋ́sɩ́ laka,
ká rɩ bʋ́ɩ́ fí má sʋ́sɩ́ néduu,
wɩ́ɩ́ wuu wɩ́ɩ́ é peri.
8 Ɩ é há wúrí sɩ́ɛ́,
ɩ sɩ́ ná nɩbɔma tume há nɛ́ ɛ́.
9 Ʋ ká ɛ́ nɛ́, ɩ nɛ́ káŋ dɩyuoli Nyuutɩna Wɩɩsɛ.
Ɩ há pi Wɩɩsɛ ná há kɛ́ oŋ wuu dɩmɩnɩ́ nɛ́ a makɩ́ jaa,
10 wɩ́hala wuu wɩ́ɩ́ pú,
wɩ́ɩ́la oro wuu wɩ́ɩ́ taŋtɛ sɩɛrʋ zʋ́,
11 beé wɩ́ɛ́, ʋ bʋ́lʋ́ malɩkawa rɩ́,
rɩ́wɔ́ pɔ́ɩ́ mɛ́ ɩ ŋmɛ́sɛ wuu sɩɛrʋ.
12 Ɓa calɩ́ ɓa nɛ́ŋsa mɛ́
a makɛ rɩ́ɩ́ naa sɩ́ dɔ́wɩ́ gɛrʋ;
13 ɩ vaa kɩ́ŋkáná arɩ́ bɔsɔ daha,
ɩ sɩ́ nʋ́ɔ́sɛ ɓee arɩ́ dɩragɔŋ (dʋŋ).
14 Ŋ sɩ́ lɔ́ʋ́ a tá, beé wɩ́ɛ́, ʋ vɔ́wʋ́ tɩɩ cɔ́ŋ mɛ́,
ŋ sɩ́ pɔ́ʋ́ mɛ́, beé wɩ́ɛ́ ʋ ɩ̃́ŋ yɩr.
15 Rʋ́ʋ́ nɛ́ yɩ́rɩ́ŋ, ŋ sɩ́ saŋ,
ŋ mɩnʋ́ har ʋ sazɔkɔ́ sɩɛrʋ,
ŋ sɩ́ lɔ́ʋ́ tá, rʋ́ʋ́ yɩr lɛ́;
16 ŋ sɩ́ a rʋ́ʋ́ dí tɔ́ɔ́ vɔkɛ
ká rɩ́ŋ a rʋ́ʋ́ náŋ laatɛ́ má.