Ko láŋ tá ŋ sazɔkɔ́ kal
86
1 Davidi wɩsʋlɔ́.
Nyuutɩna Wɩɩsɛ, ɓílí dɩllɛ a caasɩ́ŋ, saŋɩ́ŋ sʋ́lɛ́,
beé wɩ́ɛ́, ŋ ká suumo, a a yaartɩ́ŋ.
2 Lo rɩ́ŋ ká mɩɩsɛ, beé wɩ́ɛ́, ŋ cɩ́nɔ́ tɩkɩ́.
Ɩ nɛ́ káŋ Wɩɩsɛ, lɛ́ɩ́ tʋtʋnnɔ a tá,
ŋ́ yɩɛlɩ́ nɛ́.
3 Nyuutɩna, fáŋ susu,
tápʋ́l wuu ŋ ŋmɔwɛ búŋse aá pɛ́ɩ́ nɛ́.
4 Lo rɩɩ tʋtʋnna sɩɛrʋ tɔrɛ,
beé wɩ́ɛ́, Nyuutɩna, ŋ bɩ́rɩ́ŋ sɩ́ɛ́ caasɩ́ nɛ́.
5 Nyuutɩna, ɩ nɛ́ wéré, a ká suúri,
a cɩ aá tɩkɛ nɩɛ ná wuu há ŋmɔwɛ búŋse aá pɛ́ɩ́,
6 Nyuutɩna Wɩɩsɛ, lo rɩ́ŋ sʋ́lɛ́ zʋ́ɩ́ dɩllɛ,
zésíŋ jɛ́nnɛ́.
7 Kal ná rɩ́ŋ sɩɛrʋ zɔkɔ́, ŋ́ yɩrɩ́ nɛ́,
beé wɩ́ɛ́, ɩ nɛ́ saŋɩ́ŋ sʋ́lɛ́.
8 Nyuutɩna, ɩ nɩ́ɛ́sɛ nɔ́ŋɔ to venni sɩɛrʋ.
Ɩ wɩ́állɛ waá pɛksɛ (máŋsɛ).
9 Nyuutɩna, duówa ná ɩ há mɛ́ɛ́,
wuu sɩ́ ko a ɓírmí sɩ́ɛ́,
a píŋsí yɩr.
10 Beé wɩ́ɛ́, ɩ zeno, ɩɩ́ a wɩ́nyaŋsɛ,
ɩ dʋŋɔ léŋ ní ká Wɩɩsɛ.
11 Nyuutɩna Wɩɩsɛ, makɩ́ ŋmɛ́nɔ páŋ
a makɛ rɩ́ŋ tɩkɩ́ taŋá ná.
Lo rɩ́ŋ ká sabála
a makɛ rɩ́ŋ fɩfɛ́ɩ́.
12 Nyuutɩna, ŋ Wɩɩsɛ ŋ có rɩ́ŋ dɛ́nnɩ́ arɩ́rɩ́ŋ sɩɛrʋ wuu,
a píŋsí yɩr tɛ́ŋ wuu mí,
13 beé wɩ́ɛ́, ɩ nɩcɩtɩkɔ́ ná zeno a páŋ
ɩ nɛ́ lɩsɛ lɛlɛtɔ́ɔ́ dɩluŋo sɩɛrʋ.
14 Ŋ Wɩɩsɛ, nyʋktɩ́ɩ́na cɩ́nɩ́ŋ mɛ́,
nɩbɔma nɩ́ɩ́ já rɩ́wɔ́ lɩ́sɩ́ŋ mɩɩsɛ;
ɓa wɩ́ɩ́ wɩ́ɛ́ kéné.
15 Amá ɩ é Nyuutɩna ká Wɩɩsɛ ná há kéŋ zile arɩ́ sawér,
ɩ fɩɛlɔ́ ɩ cɔwɩɩlɔ́ díí mí, ɩ nɩcɩtɩkɔ́ arɩ́rɩ́ɩ́ colle zeno,
16 bɩrɩ́ sɩ́ɛ́ caasɩ́ŋ; a fáŋ susú,
pɛ́ɩ́ tʋtʋnnɔ dóé,
lɛ́ɩ́ hátʋtʋnnɔ bio a tá.
17 A wɩ́nyana a páŋ,
ŋ dɩŋdɔma sɩ́ ná ɛ́ a yieki,
a zɩ́ŋ rɩɩ é Nyuutɩna Wɩɩsɛ
nɛ́ káŋ laataarɔ arɩ́rɩ́ŋ sɩsaŋnɔ́.