Héŋ wɩ́zɔkɛ́ suúri ká lo rɩ́ŋ zɩ́mɩ́ colle
25
1 Davidi yɩl.
Nyuutɩna Wɩɩsɛ, ŋ bɩ́rɩ́ŋ sɩ́ɛ́ a cáásɩ́ nɛ́;
2 Ŋ píŋ tɩɩ a pɛ́ɩ́ nɛ́, ŋ Wɩɩsɛ, sɩ́ lo rɩ́ŋ bʋl fá'ɩ́ɔ̃́.
Sɩ́ lo rɩ́ŋ dɩŋdɔma mɔ́mɩ́ŋ.
3 Nɩɛ ná yɩ́ɛ́la há mɩ́nɩ́ mɛ́, oro wuu wɩ fá'ɩ́ɔ̃́ bʋ́lɩ́ ná.
Amá hɩ̃́ɩ̃́sɛ pú nɩɛ ná há baasɩ́!
Rɩ́wɔ́ nɛ́ŋsa a nɛ́wuolé!
4 Nyuutɩna Wɩɩsɛ, makɩ́ŋ ŋmɛ́nɔ́ ná ŋ há mɔhɛ̃́ rɩ́ŋ tɩ́ŋ,
karmɩ́ŋ ɛ́ ná ɩ há có rɩ́ŋ va.
5 Karmɩ́ŋ, ló rɩ́ɩ́ táŋa ná nɛ́ bɩrmɩ́ŋ ŋmɛ́nɔ́,
beé wɩ́ɛ́ ɩ nɛ́ ká Wɩɩsɛ ná há láŋ aá tá,
ŋ sɩɛ́ yɩ́ɛ́lɩ́ nɛ́ tápʋ́l wuu.
6 Nyuutɩna Wɩɩsɛ, sɩ́ sʋ́llʋ́ rɩ fól wuu,
rɩ́ɩ́ nɛ́ ká Wɩɩsɛ ná há có nɩɛ, rɩ́ɩ́ nɛ́ wéré.
7 Baá sɩ́ŋ pʋ́ɔ́sɛ́ tɛ́ŋ mɛ́ wɩ́zɔkɛ́ ná wɩ́ɛ́ bɩ́ɩ́nʋ́,
baá sɩ́ŋ wɩ́nyɔ́rkɛ́ ná wɩ́ɛ́ bɩ́ɩ́nʋ́.
Nyuutɩna Wɩɩsɛ, ɩ wér to ɓɩmáŋsɛ,
sɩɛ́ bɩ́ɩ́nɩ́ŋ wɩ́ɛ́ ɩ zile sɩɛrʋ.
8 Nyuutɩna Wɩɩsɛ nɛ́ wéré wuu, ʋ nɛ́ ká táŋa
rʋʋ makɛ ŋmɛ́nɔ́ ná há wéré a pá nɩtɛlɩ́.
9 Ʋ nɛ́ makɛ táŋa ŋmɛ́nɔ́ aá pá múúrɩ́ŋ tɩɩ nɩɛ, ɓaá tɩŋ,
ʋ nɛ́ mákʋ́ colle aá pɔ́wɔ́.
10 Nyuutɩna Wɩɩsɛ wɩ́makɛ́ ná
ɓa nɛ́ kɔ́ʋ́ táŋa arɩ́rʋ́ sawér nyɩ́nɛ́,
a pá nɩɛ ná haá tɩ́ŋʋ́ nʋtʋmɛ ŋmɛ́ŋsɛ ná.
11 Nyuutɩna Wɩɩsɛ, ɩ nɛ́ ká Wɩɩsɛ,
ŋ wɩ́zɔkɛ́ kánɔ́, héŋ suúri.
12 Nyuutɩna Wɩɩsɛ makɛ ŋmɛ́nɔ́ ná há mɔhɛ̃́ tɩŋɛ́
aá pá nɛrɔ ná há cɩ́nɛ́ tɩkʋ́.
13 Ʋ tɩ́na sɩ́ dí wér
ká rʋ́ʋ́ bɛlɛ tɩ́llɛ tɔ́ɔ́.
14 Nyuutɩna Wɩɩsɛ mákʋ́ wɩ́féŋse aá pá nɩɛ ná há cɩ́nɛ́ tɩ́kʋ́ nɛ́,
ʋ makɛ nʋtʋmɛ wɩ́'állɛ aá pɔ́wɔ́ nɛ́.
15 Tɛ́ŋ wuu mí, ŋ sɩ́ɛ́ cɔ́ Nyuutɩna Wɩɩsɛ mɛ́ nɛ́,
beé wɩ́ɛ́, ʋ nɛ́ lɩsɩ́ŋ bará ná ŋ há zʋ́ɛ́ sɩɛrʋ.
16 Nyuutɩna Wɩɩsɛ, zilíŋ a birí sɩ́ɛ́ cáásɩ́ŋ,
beé wɩ́ɛ́, ŋ dʋŋɔ nɛ́, ká baa a wɩ́lnaarɛ má.
17 La wɩ́ɛ́ ná háá mɩ́lmɩ́ŋ baŋcɩla
lɩsɩ́ŋ sazɔkɔ́ sɩɛrʋ.
18 Bélíŋ wɩ́ɩ́la arɩ́rɩ́ŋ sazɔkɔ́,
ká héŋ wɩ́zɔkɛ́ wuu suúri.
19 Bélíŋ dɩŋdɔma há kánɔ́ a mɔ́ ɛ́,
a ná ɓa há cáásɛ bɛ́rɩ́ŋ a mɔ́ ɛ́ ná.
20 Pɔ́ŋ mɛ́, a láŋ tá;
rɩ́ŋ sɩ́ bʋ́lɛ rɩ́ŋ fá'ɩ́ɔ̃́ ŋ wɩ́ŋ tɩɩ píé a yúólí mí.
21 Ŋ yɩ́ɛ́lɩ́ nɛ́,
rɩ́ɩ́ pɔ́ŋ mɛ́ rɩ́ŋ sɩ́ wɩ́ɩ́ zɔ́kʋ́ ká mɩ́ŋ táŋa sɩɛrʋ.
22 Á tɩ́na Wɩɩsɛ, lá Ɩzɩrayɛl tá,
lɔ́ʋ́ tá ʋ wɩ́hala wuu sɩɛnnɛ!