Wɩɩsɛ píŋ mɩŋ dunie sɩɛrʋ. Nyuutɩna Wɩɩsɛ wɩ́bile wɩ́ɛ́
19
1 Davidi yɩl nɛ́. Ʋ mɩŋ yɩɩla nyúútɩ́na yɩɩla kɛnɔ sɩɛrʋ nɛ́.
2 Bána píŋsi Wɩɩsɛ,
rɩ caŋwʋllɛ wuu búú mɛ́, ʋ wɩ́allɛ yɩr mɛ́.
3 Tapʋ́l wuu máŋsɛ ɛ́, a pa tápʋ́l ná há sɩ́ tʋkʋ́ mɛ́,
ká rɩ tɩtáŋ má wuu máŋsɛ a pa tɩtáŋ ná há sɩ́ tʋkʋ́ mɛ́.
4 Ʋ to liŋó, ʋ to wɩ́bʋlɩ́,
dɩllɛ wɩ dɔ́mɛ́ nɛ́.
5 Amá ɓa liŋó ná céŋ tíé wuu,
ɓa wɩ́bʋlɛ́ mʋ́ɔ́ yakɛ dúníé tokó mí.
Wɩɩsɛ ciki táŋtɛ a pá wɩpomí bána daha.
6 Cɩcʋɔ, ʋʋ́ isi dɩpɩnɛ́
a ko lɩ anɛ kɩ́ŋkáŋɓʋɔl sɩɛ́ nɛ́ há já háálɔ,
anɛ fɩfáárɔ bɩbar há lɩ́ɛ́ satɔrɔ́ rʋ́ʋ́ fa.
7 Ʋʋ́ póŋ bána cɔɔ nɔ́ŋɔ nɛ́,
ká ko mʋ́ zʋ́ bána cɔɔ nɔ́ŋɔ,
kɔ́ʋ́ lʋmɔ sɩɛ́ wɩ oŋ wuu múri.
8 Nyuutɩna Wɩɩsɛ wɩ́bile wɩ dɩfuolí wuu kené,
ʋ nɛ́ ká waána.
Nyuutɩna Wɩɩsɛ wɩ́makɛ́ mɔhɔ̃́ laadí,
ɓa nɩ́ɩ́ pá nɩɛ ná zɩ́mɛ́ há múrwó zɩ́mɛ́.
9 Nyuutɩna Wɩɩsɛ há máŋsɛ wɩ́ɛ́ ná ká taŋá nɛ́,
ɓa nɩ́ɩ́ pá satɔrɔ́.
Nyuutɩna Wɩɩsɛ (kɩ́ŋse) ŋmɛ́ŋsɛ ká pʋmmʋ (ɓɩlɓɩl),
ɓa nɩ́ɩ́ pá sɩ́puró.
10 Nyuutɩna Wɩɩsɛ fɛ́ɛ́ ká pʋmmʋ,
ʋ mɩnɔ́ bɩnakati.
Nyuutɩna Wɩɩsɛ wɩ́máŋsɛ́ ká taŋá nɛ́,
oro wuu toó ʋ wɩ mʋ́l kéné,
11 ʋ nyʋ́ɔ́rɛ kɛ́ salmɛ, oŋwéré rɩ́wɔ́ duó wuu,
ʋ ŋmɔ́ŋ kɛ́ tʋʋ, tʋkɩkɔfɛlɛ́ má tɩɩ.
12 Ɓa ká cáánɛ́ rɛ́ a pá ŋ é, ɩ tʋtʋnnɔ;
ɩ wɩ́makɛ́ tɩŋɛ́ kéŋ nyʋɔrɛ́.
13 Nɛ́ŋ toó, ʋ wɩ wɩ́bɔmá a, ɩ táŋa waá zɩŋ nɛ́:
wɩ́ɛ́ ná ŋ há zɔkɛ́ ká wɩ ɛ̃́, píí cɛ́ ŋ.
14 Kɛ́rɩ́ŋ mɛ́ rɩ́ɩ́ nɩbɔma,
rɩ́wɔ́ sɩ́ɩ́ sɩ́ ŋ zʋ́.
A makɛ rɩ́ŋ sɩ́ yɩtɔ́k kánʋ́, kɛ́rɩ́ŋ mɛ́ rɩ́ŋ sɩ́ wɩ́tɔ́k a.
15 Nyuutɩna Wɩɩsɛ, ŋ Bʋ́tal, ŋ Laataarɔ,
lo rɩ́ŋ wɩ́bʋlɛ́ arɩ́rɩ́ŋ wɩ́bɩ́ɛ́nɛ́ tɔ́rɩ́ sɩɛrʋ.