Zɔɔbɛ nʋlɩsɔ́ tʋkɛ́: Wɩɩsɛ nɛ́ tá nɩbɔma ɓaá a
24
1 Beé rí tɛ́, Wɩɩsɛ ná há kɛ oŋ wuu,wɩ tápʋ́lɛ́ lɩ́sɛ́, rʋ́ʋ́ dí (nɩbɔma) sarɩ́ya,
ká rʋ́ʋ́ laadííre bibel>>
2 Ká nɩɛ káŋwɔ́ baksɛ bɔnnɛ aá golli,
naŋá má gá pieŋse a tɩ́llwɔ́ aá nʋɔlɛ.
3 Naŋá maá fonni bisíŋsi kokusi,
ɛ́ rá aá lá yúháála nɛsɛ, ká rɩ́wɔ́ pɔ́wɔ́ kɩ́ma.
4 A yiki nɛ́mútɩ́ɩ́na aá tá ŋmɛ́nɔ́ laka,
tɔ́ɔ́ nɩyaara gúl ká fá aá féŋsi.
5 Nɩyaara cɔ́ŋ fól aá mʋ́ baksɛ, anɛ gɩrbétéke sɩɛrʋ kokusi,
aá tʋ́ŋ, rɩ́wɔ́ ná ɓɩdííle
a kaá ko dɩ́ɛ́sɩ́wɔ́ bɛlɛ.
6 Ʋ ká dooli ká rɩ́wɔ́, mʋ́ baka a coki nyɔɔ,
ká kuuni ɓɩdííle (ɛ́llɛ́wa) nɩbɔmɔ baka mɛ́.
7 Ɓa wɩ gɛsuulí wuu kéné, aá tɔ́wɔ́ tɩɩ mɛ́ tɩtáŋ,
gɛbasa tó, aá kɛrɛ waarʋ mɛ́.
8 Ɓa wɩ dɩzʋ́ɩ́ kéné, kaá pɛ́llɛ pallɛ mɛ́;
pallɛ duónyii cɩ́ɩ́rɛ, aá héwó mí.
9 Ɓa kéŋ bisime maá ɩ́l, aá lɩsʋ́ nʋɔ mɛ́.
Ɓaá fɩkɛ nɩyaarɔ, rʋ́ʋ́ bil oŋ ká dí kíŋ.
10 Ɓaá fɩkʋ́, ʋ ká tɛŋbíí aá va,
a fɩkʋ́, ʋ ká losu aá cɩ́ɩ́nɛ bilewa (mɩ́ɛ́),
11 aá háásɛ olívi aá lɩ́sɛ nʋʋ, nɩɛ naŋá nʋʋ dɩháásɩ́,
ɛ́ rá má aá háásɛ dɩvɛ́ŋ, ká wʋ́ʋ́ kɔwɛ kaá mʋ́ʋ́ nʋɔ.
12 Tɔ́ɔ́ sɩɛrʋ, nɩɛ gaasɛ wɩ́ɛ́,
wɩ́lnaara búŋsi, aá já saŋɛ,
ká Wɩɩsɛ sikli, a wɩ ɛ́ wɩ́lɔrɛ bel.
13 Nɩbɔma wɩ pʋmmɔ có,
ɓa wɩ ŋmɛ́ŋsɛ ná há kéŋ pʋmmɔ tɩ́ŋ,
ɓa wʋ́ɔ́ daha cɛ́.
14 Nɩɓʋ́ʋ́rɔ isi cʋcɔpʋlla nɛ́,
a ɓʋ́ nɩyaarɔ, wɩ́lnaarɔ́,
ká rɩ tɔ́ɔ́ kúó biri, ʋ bɩrmɛ gár.
15 Bácɔ́rmɔ má dɛ́llɛ tɩtáŋ,
beé wɩ́ɛ́ ʋʋ́ bʋ́lɛ́: «Nɛ́ŋ wɩ́ŋ valɛ́ ná.»
Ʋ sɩɛ́ pi gɛrɔ a tɔ́ʋ́ sɩ́ɛ́ mɛ́.
16 Tɩtáŋ nɛ́, gaarɔ ko aá luri zeŋ;
ká wɔhɔ, ʋ féŋsú tɩɩ jaa sɩɛrʋ,
pʋmmɔ wɩ nyʋɔrɛ kéné a pɔ́ʋ́.
17 Tɩtáŋ nɛ́ ká ɛ́ nɩɛ má wuu cɩcʋɔ,
ɓa há cáásɛ mal tɩtáŋ wɩ́lɔrɛ́ ná wɩ́ɛ́.
18 Amá ɩ́ é sɛ́:
«Nyii wɩ dáánɛ́ kaá pá nɩbɔma,
bʋra díwó dɩ́tɩllɛ́,
ɓa baá wɩ baksɛ ŋmɛ́ŋsɛ pi.
19 Nɩɛ ná wuu há tʋ́ŋ bɔ́ŋbɔ́ŋ
ɓa sɩ́ sʋsɛ a mʋ́ lɛ́lɛ́tɔ́ɔ́, a nyɩ́ɩ́kɛ
anɛ ɛ́ wɩɩsɛ haá ŋmɔ́wɛ́ duódɔ́wʋ́ɔ́ ɓa nyɩ́ɩ́kɛ.
20 Háála ná lʋlwɔ́, sʋ́llɩ́wɔ́ wɩ́ɛ́,
ká ɓa bɩrmɛ deŋdule satɔ́rɩɓɩdííle;
nɛ́ŋ baá wɩ ɛ́ nɩɛ yɩr má tɩɩ yɩrɛ.
Bɔ́ŋbɔ́ŋ nɛ́ bore ɛ́, anɛ daa.
21 Ɛ́ nɩɛ bɛ́ŋsɛ háálɔ ná
fa há wɩ lʋ́la kéné,
a wɩ wɩ́wér má ɛ́ɛ́ pá yúháálɔ.
22 Amá Wɩɩsɛ kéŋ dóé, aá kiri bɩbara.
Rʋ́ʋ́ nɛ́ nyɩ́ɩ́sʋ́ tɩɩ, nɩbɔma baá wɩ waana yɩ́ɛ́la kéné.
23 Ʋ píwó tá fɛ́lɛ́lɛ́,
amá, ʋ sɩ́ɩ́ cɔ́wɔ́ wɩ́'állɛ mɛ́.
24 Ɓa cuolé (isé) waá dáánɛ́, ká ɓaá nyɩ́ɩ́kɛ.
Ɓaá ɓallɛ anɛ tuu ɓa há coke ní,
a hɩl anɛ mɩ́nyúnni ɓa há conne.»
25 Ʋ ká ɛ́ nɛ́!
Áŋ rɛ́ sɩ́ sáánɛ a bʋ́lɩ́ŋ ká nyɛ́tɩ́ŋ,
ká píŋ há bʋ́lʋ́ ná a yɩr yɔ́ɔ́>>