Hamaŋ mʋ́l wúlle rɩ́rʋ́ sʋʋ wɩ́ɛ́
7
1 Kuóro rɩ́ Hamaŋ sɩɛ́ mʋ́ hákuóro Ɛsɩtɛɛrɛ dɩhɩ̃́ rɩ́wɔ́ dí cana. 2 Ɛ́ tápʋlɛ bɛllɛ nyúú mí, ɓa há dí ɓɩɛ tenni, kuóro báá bʋ́l Ɛsɩtɛɛrɛ rɩ́ bʋlɛ́: <<Beé rí ká ɩ sʋlɛ́? Ŋ sɩ́ pɛ́ɩ́. Ɩɩ́ ja beé? Rʋʋ nɛ́ káŋ dɩtɩ́llɛ ɓaamɔnáŋá má ŋ sɩ́ pɛ́ɩ́.>> 3 Ɛ́ nɛ́ hákuóro Ɛsɩtɛɛrɛ sɛ́: <<Rɩ kuóro sɩɛrʋ nɛ́ weré arɩ́rɩ́ŋ é, rʋʋ nɛ́ ká kuóro cólle, ŋ sʋlɛ́ nɛ́ ká, rʋ́ʋ́ a rɩ́ŋ ná waana, rɩ́ŋ dunɩɛ má ná waana. 4 Bee wɩ́ɛ́, ɓa yɛ́llɩ́ŋ rɩ́rɩ́ŋ dunɩɛ rɩ́wɔ́ zɔ́kɩ́rá, a ɓʋ́ʋ́sɩ́rá, a a ráá nyɩ́ɩ́kɛ. Rɩ ɓa fa yɛ́llɩ́rá ráá bɩrmɛ yósí má rɛ́, ŋ wɩ wɩ́ɩ́ wuu bʋl, ʋ ɛ́ wɩ kuóro wɔ́lmɛ péré.>>5 Ɛ́ nɛ́ kuóro Asuerusi bɔsɛ hákuóro Ɛsɩtɛɛrɛ bʋlɛ́: <<Nɛrɔ ná há bɩ́ɩ́nɛ́ nyɛ wɩ́ɩ́, ʋ mɩŋ nɛɛ́? Áŋ rɛ́ ká tɩ́na?>> 6 Ɛsɩtɛɛrɛ sɛ́: <<Á nɩbɛ́rɛ, á dɩŋdɔmɔ nɩ́ ká Hamaŋ, sahɔtɩɩnɔ né!>> Ɛ́ nɛ́ Hamaŋ de mʋʋnɛ ké kuóro rɩ́ hákuóro sɩ́ɛ́. 7 Kuóro cɔ́ɛ́ há wɩ́ɛ́ daarɛ, ʋ ísí cana dɩhɩ̃́ ná a mʋ́ zʋʋ mɩŋ kuóro zʋ́ɔ́ tuuni sɩɛrʋ. Hamaŋ há ɩ́ɔ̃́ rɩ́ kuóro sɩ́ a rɩ́wɔ́ ɓʋ́ʋ́, ɛ́nɛ́ ʋ sɩɛ́ ké sʋ́sʋl hákuóro Ɛsɩtɛɛrɛ rʋ́ʋ́ lɔ́ʋ́ tá. 8 Ʋ sɩɛ́ fóri ɓal dacakgóó ná daha Ɛsɩtɛɛrɛ fa há pɩ́nɛ́, rɩ kuóro má bɩ́rɔ́ lɛ tuuni ná sɩɛrʋ aá ko cana ná dɩhɩ̃́. Kuóro há ná ɛ́, ʋ cáásó bʋlɛ́: <<Nyɛ nɛrɔ nɛ́ báá háá já rʋ́ʋ́ ka hákuóro pɛ́ ŋ sɩ́ɛ́ mɛ́, ŋ jaa sɩɛrʋ.>> Kuóro há dé mɩŋ ɛ́ bʋlɛ́ mɛ́, rɩ tʋtʋnna já ɓɩnɔ vɔwɛ tɔ́ Hamaŋ sɩ́ɛ́ mɛ́. 9 Kuóro minísiwa nɔ́ŋɔ ɓaá yɩ́rʋ́ Harɩbɔna, ʋ de cɛ́ kuóro sɩ́ɛ́ mɛ́ bʋlɛ́: <<Kuóro, Hamaŋ tɩɩ bɩ́rmɛ́ dalíŋi ʋ jaa mɛ́ rʋ́ʋ́ ka Mardose hé zúgléŋ; báálɔ ná die há sóé a lɛ́ɩ́ mɩɩsɛ. Dalíŋi ná gbési ní mɛ́ɛ́tɩr mɛrɛ́ rɩ́ bɔmmʋ́ɔ́.>> Kuóro sɛ́: <<Ɩ́ ka Hamaŋ hé zúgléŋ ɛ́ dalíŋi mí!>> 10 Ɓa ka Hamaŋ hé zúgléŋ líŋi ná mɛ́ ʋ fa há bɩ́rmɛ́ bil Mardose mí. Ɛ́ nɛ́ kuóro cɔwɩɩlɔ́ sɩɛ́ pɔrɛ.