Ezekiyasɛ yɩrɛ Ɩzɩrayɛl rɩ́ Ziida nɩɛ wuu rɩ́wɔ́ dí pakɛ cana
30
1 Ezekiyasɛ yɩrɛ́ Ɩzɩrayɛl rɩ́ Ziida nɩɛ wuu, ká pʋ́ŋsɛ kɛnnɛ má tɩɩ nɛ́ pá Ɩfɩrayɩŋ arɩ́ Manase nɩɛ rɩ́wɔ́ ko Zerizalɛmɛ Nyuutɩna Wɩɩsɛ jaa sɩɛrʋ; rɩ́wɔ́ dí Nyuutɩna Wɩɩsɛ Ɩzɩrayɛl Wɩɩsɛ pakɛ cana. 2 Kuóro rɩ́rʋ́ tʋtʋnɩhɩɛ̃́sɛ arɩ́ Zerizalɛmɛ nɩɛ, sáŋɔ́ rɩ́wɔ́ dí ɛ́ pakɛ cana, bɩna sɩɛrʋ caŋsɛ bɛllɛ nyúú mí. 3 Ɓee wɩ́ɛ́, ɓa fa wɩ wóllé díú ʋ tɛ́ŋ mɛ́, bee wɩ́ɛ́ vʋ́k'ɔɔsa ná há mʋ́ʋ́rɩ́wɔ́ tɩɩ tenni fa wɩ kaŋ, ká nɩɛ má wuu há wɩ naŋá mɛ́ hé Zerizalɛmɛ mɛ́. 4 Ɛ́ vʋʋrɛ́ tɔ́rɛ́ kuóro rɩ́ nɩɛ ná wuu sɩɛnnɛ. 5 Ɓa sáŋɔ́ rɩ́wɔ́ ka yɩ́rɛ kɛnnɛ ná a mʋ́ Ɩzɩrayɛl wuu mí a pɔ́ Bɛrseba a kaa mʋ́ Daŋ; rɩ́wɔ́ wuu ko Zerizalɛmɛ, a dí Nyuutɩna Wɩɩsɛ, Ɩzɩrayɛl Wɩɩsɛ pákɛ cana ná. Bee wɩ́ɛ́ nɩɛ mʋɔ nɩ́ fa dúú anɛ ɛ́ ɓa há pʋ́ŋsɛ. 6 Nɩtʋmɛ́ ná ka kɛnnɛ ná kuóro rɩ́rʋ́ tʋtʋnɩhɩ̃́sɛ há pʋ́ŋsɛ kaa gʋɔrɛ pá Ɩzɩrayɛl nɩɛ rɩ́ Ziida nɩɛ wuu. Ká bʋ́l pɔ́wɔ́, kuóro yɩr mɛ́ a bʋlɛ́: «Ɩzɩrayɛl nɩɛ, ɩ́ bɩrko Nyuutɩna Wɩɩsɛ, Abɩrahaŋ, Izakɛ rɩ́ Zakɔbɛ Wɩɩsɛ rɩ́, ʋ má sɩ́ bɩrkoíwa rɩ́, ɩ́ nɩkáánɛ ná há lúé lɛ Asiiri kuóre nɛ́sɛ mɛ́ . 7 Ɩ́ sɩ́ɩ́wa ánáwa rɩ́rɩ́wa maábináŋa césú, ɓa die wɩ cɩ́nɛ́ tɩkɛ Nyuutɩna Wɩɩsɛ, ɓa naabálwa Wɩɩsɛ. Ɛ́ ɔ́ɔ́ ʋ píwó hé zɔkrɔ nɛ́sɛ mɛ́, anɛ ɛ́ ɩ́ há nóú. 8 Mʋ́l néé mí, ɩ́ sɩ́ɩ́wa baŋcɩllɛ dúórú a nɩ́ɩ́wa ánáwa. Ɩ́ sáŋ pá Nyuutɩna Wɩɩsɛ a bɩrɛ koú dɩmɩnɩ́ ná há kɔ́ʋ́ tɩ́llɛ tɛ́ŋ wuu mɩ́, a tʋŋ aá pá Nyuutɩna Wɩɩsɛ, ɩ́ Wɩɩsɛ; a makɛ rʋ́ʋ́ cɔwɩɩlɩ́zeno ná sɩ́ɩ́wa nyúú túwú. 9 Ɛ́ wɩ́ɛ́, rɩ́ɩ́wa nɛ́ sáŋɛ́ bɩrko Nyuutɩna Wɩɩsɛ rɩ́, nɩɛ ná há kɛ́sɩ́wa maábináŋa rɩ́rɩ́wa bɛlɛ kaa mʋ́ yomí, sɩ́ fá susu a lo rɩ́wɔ́ bɩrko tɔ́ɔ́ né sɩɛrʋ. Bee wɩ́ɛ́, Nyuutɩna Wɩɩsɛ ɩ́ Wɩɩsɛ kéŋ susufɔ́ɔ́ rɩ́ sawer, ʋ wɩ́ɩ́wa vɛ́ɛ́ tá, rɩ́ɩ́wa nɛ́ bɩ́rɛ́ kóú rɩ́.» 10 Nɩtʋmɛ́ ná gʋ́ɔ́rɛ́ Ɩfɩrayɩŋ rɩ́ Manase dɩtɩ́llɛ tɔ́ɔ́ rɩ́ tɔ́ɔ́ wuu, a lɛ mʋ́ peri Zabulɔŋ jɩmʋ́l. Amá nɩɛ faá mɔ́ŋwɔ́ kaá lɔ́rwɔ́. 11 Amá Asɛɛr nɩɛ rɩ́ Manase nɩɛ arɩ́ Zabɩlɔŋ nɩɛ fa sáŋɔ́ múúríwó tɩɩ a ko Zerizalɛmɛ. 12 Wɩɩsɛ bɩrsɛ Ziida nɩɛ má sabɩŋsɛ ɓa wuu saŋ kuóro rɩ́rʋ́ tʋtʋnɩhɩɛ̃́sɛ wɩ́bʋlɛ́ anɛ́ ɛ Nyuutɩna Wɩɩsɛ há bʋlɛ́ pɔ́wɔ́.Ezekiyasɛ dí pakɛ cana
13 Bɩna sɩɛrʋ caŋsɛ bɛllɛ nyúú mí, nɩkaná kúó hé náŋa mɛ́ Zerizalɛmɛ mɛ́ rɩ́wɔ́ dí sɩbʋ́r tóó dɩpɛ́ŋ cana: Nɩɛ fa kánɔ́ wérí. 14 Ɓa gínní vʋk'ɔɔsɛ korsi ná há mɩŋ Zerizalɛmɛ mɛ́, rɩ́wɔ́ ná daha ɓa háá nyɩ́kɛ áŋsáŋsɛ, a kaa mʋ́ yoo hé Sedrɔŋ polcʋ́ɔ́rɛ sɩɛrʋ. 15 Caŋsɛ bɛllɛ nyúú mí tápʋlɛ́ fí rɩ́ baná kal nɛ́, ɓa ɓʋ́ʋ́sɛ pákɛ cana pʋsɛ ná. Hɩ̃ɩ̃sɛ kéŋ vʋk'ɔɔsa arɩ́ Levi duo nɩɛ ɛ́ nɛ́ ɓa mʋ́ʋ́rɩ́wɔ́ busunnu ká ɔsɛ vʋ́kfíse Nyuutɩna Wɩɩsɛ wɩcʋɔlɩjaa ná sɩɛrʋ. 16 Ɓa fa cɩ́ŋwɔ́ dɩtʋmɩ́ mɛ́ anɛ ɛ́ Wɩɩsɛ báálɔ Moyizi wɩbilé fa há makɛ pɔ́wɔ́. Vʋk'ɔɔsa ná la cɛ́l ná Levi duo nɩɛ rɩ́ a ɔ́ŋsɛ aá hé koro ná mɛ́. 17 Nɩɛ fa há kánɔ́ a wʋ́ɔ́ busunnu mʋ́ʋ́rɛ́, ká rɩ́wɔ́ wólli tʋŋ Nyuutɩna Wɩɩsɛ yɩr mɛ́, ɛ́ nɛ́ tɛ Levi duo nɩɛ ɓʋ́ʋ́sɛ pákɛ cana pʋsɛ a ɔsɛ vʋka ɓa yɩr mɛ́. 18 Bee wɩ́ɛ́, nɩɛ fa kánɔ́ a wʋ́ɔ́ busunnu mʋ́ʋ́rɛ́ ká dí pákɛ cana ɓɩdííle ná ká ɛ́ wɩ cɛ́rɛ́ anɛ ɛ́ há pʋ́ŋsɛ. Ɛ́ nɩɛ dɩkáŋ fa lɛ Ɩfɩrayɩŋ ní arɩ́ Manase rɩ́ Ɩsakaarɛ arɩ́ Zabulaŋ. Ɛ́ nɛ́ Ezekiyasɛ sʋl Wɩɩsɛ ɓa yɩrɛ mɛ́ a bʋlɛ́: Rɩ́ Nyuutɩna Wɩɩsɛ ná há wéró, pii cɛ́ 19 nɩɛ ná wuu háá ja Wɩɩsɛ, Nyuutɩna Wɩɩsɛ ɓa ánáwa Wɩɩsɛ rɩ́wɔ́ sɩɛrʋ wuu; ká wʋ́ɔ́ busunnu mʋ́ʋ́rɛ́ a tɩɩnɛ Wɩɩsɛ oŋtɩ́llɛ mɛ́! 20 Nyuutɩna Wɩɩsɛ sáŋ Ezikiyasɛ wɩsʋllɔ́, a báá wɩ nɩɛ ná bɛ́ŋsɛ́. 21 Ɩzɩrazyɛl nɩɛ ná há mɩŋ Zerizalɛmɛ mɛ́, dí sɩbʋ́r toó dɩpɛ́ŋ cana, a jʋɔsɛ kɩ́ŋkáŋ tápʋlɛ́ balpɛ. Tápʋ́l é wuu, Levi duo nɩɛ rɩ́ vʋk'ɔɔsa pá Wɩɩsɛ jaa gbɔkcɩksɛ ná há cɩ́ɩ́mɛ wérí a dɛ́nnɛ Nyuutɩna Wɩɩsɛ. 22 Ezikiyasɛ wɩ́bʋlɛ́ tɔ́rɛ́ Levi duo nɩɛ wuu ná há cɩ́nɛ́ tɩkɛ Nyuutɩna Wɩɩsɛ wɩ́ɛ́ sɩɛnnɛ. Tápʋlɛ́ balpɛ ná wuu sɩɛrʋ, ɓa dí pákɛ cana ɓɩ́dííle, ká ɔsɛ tɛŋfɩ́ɛ́l vʋka. Ká sɩɛ́ yɩ yɩɩla aá bɛ Nyuutɩna Wɩɩsɛ, ɓa naabálwa Wɩɩsɛ mɛ́. 23 Nɩɛ ná wuu sáŋɔ́ rɩ́wɔ́ baa dí cana ná tápʋlɛ́ balpɛ náŋa súúri. Ɛ́ tápʋlɛ́ balpɛ sɩɛrʋ, ɓa báá jʋ́ɔ́sɔ́. 24 Bee wɩ́ɛ́, nɔɓallɛ bʋ́ɩ́ (1000) arɩ́ pʋwɩɛla bʋ́ɩ́walpɛ (7000) nɛ́ Ziida kuóro Ezikiyasɛ lɩ́sɛ pá nɩɛ ná. Kɔ́ʋ́ tʋtʋnɩhɩ́ɛ̃́sɛ má lɩ́sɛ nɔɓallɛ bʋ́ɩ́ (1000) arɩ́ pʋwɩɛla bʋ́ɩ́ fí (10 000). Ɛ́ kal Vʋk'ɔɔsa ɓɩkana nɛ́ mʋ́ʋ́rɩ́wɔ́ tɩɩ busunnu. 25 Satɔrɔ́ ɓɩzeno ní a pá Ziida nɩɛ wuu rɩ́ vʋk'ɔɔsa rɩ́ Levi duo nɩɛ rɩ́ nɩɛ ná há lɛ́ Ɩzɩrayɛl tɔ́nɛ a ko rɩ́wɔ́ dí cana arɩ́ Ɩzɩrayɛl nɩɛ ná há kúé ké Ziida mɛ́. 26 Zerizalɛmɛ nɩɛ sɩɛnnɛ fa tɔ́rɔ́ wérí. Bee wɩ́ɛ́, a pɔ́ Davidi bio Salomɔŋ há dí Ɩzɩrayɛl kuorí tɛ́ŋ wuu mí, wɩ́ɩ́ né duo ha wɩ́ Zerizalɛmɛ mɛ́ tʋmɛ́ ná. 27 Ká vʋk'ɔɔsa ná há lɛ́ Levi duo nɩɛ sɩɛrʋ sʋl Wɩɩsɛ bárka pá nɩɛ: Ɓa liŋó zɛ́ yakɛ bána mɛ́, ɛ́ nɛ́ Wɩɩsɛ kénú jaa mɛ́ ká zesi nɩ́wɔ́ wɩsʋlɔ́.