11
1 Robohamɛ há bɩ́rɛ́ ko Zerizalɛmɛ, ʋ yɩ́rɛ Ziida arɩ́ Bɛŋzamɛ nɩɛ lalyóóríbibara bʋ́ɩ́zɔlɔ arɩ́ mɛɛ́sɩbaná (180 000) a hé náŋá mɛ́, rɩ́wɔ́ mʋ́ yo Ɩzɩrayɛl nɩɛ, a makɛ rʋ́ʋ́ é Robohamɛ la kuorí.2 Amá Nyuutɩna Wɩɩsɛ liŋó bʋ́l Wɩɩsɛ báálɔ Semaya rɩ́ bʋlɛ́:3 «Bʋ́l pá Salomɔŋ bio Robohamɛ há ká Ziida kuóro, arɩ́ Ɩzɩrayɛl nɩɛ ná wuu há lɛ́ Ziida rɩ́ Bɛŋzamɛ, a bʋlɛ́:4 Ná Nyuutɩna Wɩɩsɛ há sʋ́ʋ́ ná: “Ɩ́ wɩ mɔhɛ̃́ rɩ́ɩ́wa yóíwa maábináŋa. Nɛrɔ wuu bɩrmʋ́ʋ́ jaa! Bee wɩ́ɛ́, ŋ é tɩɩ nɛ́ ɛ́ɛ́ wɩ́ɩ́ né tʋ́ŋ.”» Ɓa saŋ Nyuutɩna Wɩɩsɛ nʋɔ, a wɩ mʋ́ɛ́ yo Zerobohamɛ.
Robohamɛ sɔ́ zeŋe kíl tɔ́nɛ ɓɩkana
5 Robohamɛ kúó ké Zerizalɛmɛ mɛ́, a sɔ zeŋe kíl Ziida tɔ́nɛ: 6 Ʋ sɔ́ Betelehɛmɛ, Etamɛ, Tekoya; 7 Bɛtsuuri, Soko, Adulamɛ; 8 Gatɛ, Maresa, Zifi; 9 Adorayimi, Lakiisi, Azeka; 10 Soreya, Ayalɔŋ, arɩ́ Ɩbrɔŋ. Ɓa ká tɔ́sɔkɛ́rɛ nɛ́ a mɩŋ Ziida arɩ́ Bɛŋzamɛ dɩtɩ́llɛ mɛ́. 11 Robohamɛ sɔ́ zenaasɛ a kíl ɛ́ tɔ́nɛ, ɓa ɔsɛ ká dóé, a bil ɓɩdííle, nʋnnɛ arɩ́ sɩnnɛ. Ká lɩ́sɛ sɩ́dííre rɩ́wɔ́ bíbélwó mí. 12 Ɛ́ tɔ́nɛ oro wuu sɩɛrʋ, ʋ bíl hɔkɛ́rsɛ arɩ́ cɔlmɛwa. Ʋ fa ɔ́ɔ́ ɛ́ tɔ́nɛ ɔsɛ ka dóé kɩ́ŋkáŋ. Ziida rɩ́ Bɛŋzamɛ wuu kɔ́ʋ́ tɩ́llɛ nɛ́.
Vʋk'ɔɔsa arɩ́ Levi duo nɩɛ mɩŋ Robohamɛ har nɛ́
13 Ɩzɩrayɛl dɩtɩ́llɛ vʋk'ɔɔsa rɩ́ Levi duo nɩɛ wuu kúó mɩŋ Robohamɛ har nɛ́. 14 Levi duo nɩɛ fa lɩ́wɔ́ tɔ́nɛ rɩ́wɔ́ pʋsɛ dɩnʋɔlɛ́ mɛ́, a ko mɩŋ Ziida rɩ́ Zerizalɛmɛ mɛ́. Bee wɩ́ɛ́, Zerobohamɛ rɩ́rʋ́ bɛlɛ fa kɛ́rwɔ́ mɛ́ rɩ́wɔ́ sɩ́ Nyuutɩna Wɩɩsɛ vʋk'ɔ́ɔ́sɛ tʋtʋmɛ́ ná tʋ́mʋ́. 15 Zerobohamɛ tɩɩ fa má buŋgboksi rɩ́ nɔɓalwiisi a bil dúŋdúóme ná ɓa háá ɓaarɛ venni ráŋ; ká lɩ́sʋ́ vʋk'ɔɔsa ɓa yɩr mɛ́. 16 Ɩzɩrayɛl jɩmʋ́ʋ́la nɩɛ ná wuu, arɩ́ nɩɛ ná fa há có rɩ́wɔ́ cʋɔlɛ Nyuutɩna Wɩɩsɛ, Ɩzɩrayɛl Wɩɩsɛ, mʋ́ Zerizalɛmɛ nɛ́ a ɔsɛ vʋka aá pá Nyuutɩna Wɩɩsɛ, ɓa naabálwa Wɩɩsɛ. 17 Ɓa ɔ́ɔ́ Ziida dɩtɩ́llɛ ná ka dóé wérí, ká súúrí Salomɔŋ bio Robohamɛ má kuorí, ʋ ɔsɛ bɛ bɩŋsɛ botoro. Ɛ́ bɩŋsɛ botoro wuu sɩɛrʋ, Ɩzɩrayɛl nɩɛ tɩ́ŋ taŋá wérí anɛ Davidi rɩ́rʋ́ bio Salomɔŋ kuorí tɛ́ŋ mɛ́.
Robohamɛ jaa wɩ́ɛ́
18 Robohamɛ háálɔ nɛ́ ka Mahalatɛ, Mahalatɛ áná nɛ́ ká Yerimɔtɛ, Yerimɔtɛ má áná nɛ́ ká Davidi. Yerimɔtɛ maá nɛ́ ká Abihayi, Abihayi áná nɛ́ ká Elɩabɛ, Elɩabɛ má áná nɛ́ ká Zese. 19 Mahalatɛ lʋ́l bɛlɛ pɔ́ʋ́: Ɓa nɛ́ ká: Yehuusi, Semariya arɩ́ Zahaamɛ. 20 Ʋ har mɛ́, Robohamɛ já Absalɔmɛ toló Maaka, ʋ lʋl Abiya, Atayi, Ziza arɩ́ Selomiti. 21 Robohamɛ fa có Absalɔmɛ toló Maaka nɛ́, a kɩ́llʋ́ háála ná wuu rɩ́rʋ́ háwiisi ná. Robohamɛ háála nɛ́ fí rí córí, háwiisi má mɛɛ́sɩbotoro. Ʋ lʋ́l heŋbólli mɛ́rɛ rí córí, tolé má mɛɛ́sɩbotoro. 22 Robohamɛ lɩ́sɛ Abiya nɛ́ ʋ nɛ́ ɔ́ɔ́ mááláwa jaatɩ́na. Abiya maá nɛ́ ká Maaka. Bee wɩ́ɛ́, Robohamɛ fa có rʋ́ʋ́ nɛ́ la kuorí. 23 Robohamɛ tʋ́ŋ zɩmɛ́, a a ʋ bɛlɛ ná wuu pɩsɛ náŋá mɛ́, a zʋʋ ké Ziida rɩ́ Bɛŋzamɛ dɩtɩ́llɛ mɛ́, arɩ́ tɔ́sɔkɛ́rɛ ná sɩɛnnɛ. Ɛ́ nɛ́ ʋ ja háála ɓɩkana pɔ́wɔ́; a ja ɓɩdííle má kɩ́ŋkáŋ a pɔ́wɔ́.