Davidi kenú tɩɩ rʋ́ʋ́ ka Wɩɩsɛ nʋtʋmɛ dáka ná zʋ Zerizalɛmɛ
15
1 Davidi ɔ́ɔ́ ɓa sɔ jɩɩsɛ ʋ zʋ́ɔ́ mɛ́. Ʋ bɩrmɛ́ dɩhɩ̃́ a ciki táŋtɛ rɩ́wɔ́ pi nʋtʋmɛ dáka ná bil róŋ. 2 Ɛ́ nɛ́ Davidi sɛ́: Levi duo nɩɛ nɛ́ mɔhɛ̃ rɩ́wɔ́ cɩ́cɩ́ɩ́nɛ nʋtʋmɛ dáka ná, bee wɩ́ɛ́ ɓa nɛ́ Nyuutɩna Wɩɩsɛ lɩ́sɛ a kaá mʋ́ wuu rɩ́wɔ́ nɛ́ cɩ́cɩ́ɩ́nɛ Nyuutɩna Wɩɩsɛ nʋtʋmɛ dáka ná ká tʋŋ aá pɔ́ʋ́. 3 Ká Davidi tʋŋ yɩ́rɛ Ɩzɩrayɛl nɩɛ wuu, ɓa ko Zerizalɛmɛ, a makɛ rɩ́wɔ́ ka dáka ná zʋʋ bil dɩhɩ̃́ ná ʋ há bɩ́rmɛ́ bílú mí. 4 Ʋ yɩ́rɛ Aarɔŋ bɛlɛ há ká vʋ́k'ɔɔsa, rɩ́ Levi duo nɩɛ. 5 Nɩɛ ná ʋ há yɩ́rɛ nɛ́ nyɛ. Kehatɛ duo sɩɛrʋ: Uriyɛl há ká nyúútɩ́na rɩ́rʋ́ maábináŋa zɔlɔ rɩ́ mɛrɛ́ (120) . 6 Merari duo sɩɛrʋ: Asaya há ká nyúútɩ́na rɩ́rʋ́ maábináŋa zɔwɛllɛ rɩ́ mɛrɛ́ (220). 7 Gersɔŋ duo sɩɛrʋ: Zowɛl há ká nyúútɩ́na rɩ́rʋ́ maábináŋa zɔlɔ mɛrɛ́ rɩ́ fí (130). 8 Elɩsafaŋ duo sɩɛrʋ: Semaya há ká nyúútɩ́na rɩ́rʋ́ maábináŋa zɔwɛllɛ (200), . 9 Ɩbrɔŋ duo sɩɛrʋ: Elɩɛl há ká nyúútɩ́na rɩ́rʋ́ maábináŋa mɛɛ́sɩbaná (80). 10 Uzɩyɛl duo sɩɛrʋ: Amɩnadabɛ há ká nyúútɩ́na rɩ́rʋ́ maábináŋa zɔlɔ rɩ́ fí rɩ́ bɛllɛ (112). 11 Davidi yɩ́rɛ vʋk'ɔɔsa nɩhɩɛ̃́sɛ; Sadɔkɛ rɩ́ Abɩyatarɛ; rɩ́ Levi duo nɩɛ Uriyɛl rɩ́ Asaya rɩ́ Zowɛl rɩ́ Semaya rɩ́ Elɩɛl arɩ́ Amɩnadabɛ. 12 Ʋ bʋ́lwɔ́ rɩ́ bʋlɛ́: «Ɩ́ nɛ́ ká Levi duo nɩɛ jɩtɩ́náwa, ɩ́ la sɩ́ɛ́ a mʋ́ʋ́rɩ́wa rɩ́rɩ́wa jaa nɩɛ busunnu; ká mʋ́ pi Nyuutɩna, Ɩzɩrayɛl Wɩɩsɛ nʋtʋmɛ dáka ná a kaa zʋʋ bil dɩhɩ̃́ ná ŋ há bɩ́rmɛ́ bílú mí. 13 Dʋ́ŋdʋʋ̃́ mɛ́, ɩ́ fa to rɛɛ́, ká Nyuutɩna Wɩɩsɛ, á Wɩɩsɛ ɓʋ́ʋ́sɩ́ra sɩɛrʋ nɩɛ náŋa, bee wɩ́ɛ́, á wʋ́ʋ́ jɛ́ɛ́ anɛ ɛ́ há bilé. 14 Ɛ́ nɛ́ vʋk'ɔɔsa, rɩ́ Levi duo nɩɛ mʋ́ʋ́rɩ́wɔ́ busunnu, ká rɩ́wɔ́ mʋ́ pi Nyuutɩna Wɩɩsɛ, Ɩzɩrayɛl Wɩɩsɛ dáka ná. 15 Levi duo nɩɛ pi dapʋɔllɛ tʋ dáka ná mɛ́, a pii báásɩ́wɔ́ vapara mɛ́, anɛ ɛ́ Moyizi há mákɛ pɔ́wɔ́ anɛ ɛ́ Nyuutɩna Wɩɩsɛ há sɛ́. 16 Davidi sɩɛ́ bʋl Levi duo nɩɛ nɩhɩɛ̃́sɛ rɩ́, rɩ́wɔ́ lɩ́sɩ́wɔ́ maábináŋa ná há ká gɔkɛ ɓa sɩɛrʋ; rɩ́wɔ́ yɩ yɩɩla, a dú cemo rɩ́ gbaŋcemo rɩ́ kuléŋléŋwa aá jʋɔsɛ. 17 Levi duo nɩɛ sɩɛrʋ, ɓa lɩ́sɛ Zowɛl bio Hemaŋ rɩ́rʋ́ maábinɔ́ŋɔ Asafɛ há ká Berekiya bio, rɩ́ Merari dunɛrɔ Kusaya bio Etaŋ. 18 A kɛ́sɩ́wɔ́ maábɩnáŋa, Zakari rɩ́ Bɛŋ rɩ́ Yazɩɛl rɩ́ Semiramɔtɛ rɩ́ Yehiyɛl rɩ́ Unni rɩ́ Elɩyabɛ rɩ́ Benaya rɩ́ Maaseya rɩ́ Matitiya rɩ́ Elifilɛhu rɩ́ Mikneya rɩ́ Obɛɛd'Edɔmmɛ rɩ́ Yehɩɛl há ká dánnʋpɔ́ɔ́ra. 19 Gɔkɛ Hemaŋ rɩ́ Asafɛ rɩ́ Etaŋ nɛ́ faá dú kɔmɔ kuléŋléŋwa. 20 Ká Zakari rɩ́ Azɩyɛl rɩ́ Semiramɔtɛ rɩ́ Yehiyɛl rɩ́ Unni rɩ́ Elɩyabɛ rɩ́ Maaseya arɩ́ Benaya nɛ́ ká gɔkɛ́ ná háá dú ceŋsi ná háá cɩɩmɛ wérí. 21 Matitiya rɩ́ Elifilɛhu rɩ́ Mikneya rɩ́ Obɛɛd'Edɔmmɛ rɩ́ Yehɩɛl arɩ́ Azaziya nɛ́ ká gɔkɛ ná há lá sɩ́ɛ́ ɓá yɩɩla rɩ́ gbaŋceŋsi ná líŋsi há zeŋso. 22 Ká Kenanɩya há ká Levi duo nɩɛ sɩ́dííro, zɩ́zɩŋ Wɩɩsɛ nʋtʋmɛ dáka cɩɩnɛ wɩ́ɛ́, bee wɩ́ɛ́, ʋ fa kenú zɩmɛ́ wérí. 23 Dánnʋɔpɔ́ɔ́ra Berekiya rɩ́ Ɛlkana nɛ́ fa ká dáka ná pʋ́pɔ́ɔ́ra. 24 Vʋk'ɔɔsa Sebaniya rɩ́ Zosafa rɩ́ Nɛtaneyɛl rɩ́ Amasiya rɩ́ Zakari rɩ́ Benaya arɩ́ Elɩɛzɛɛrɛ nɛ́ fa lá Wɩɩsɛ nʋtʋmɛ dáka sɩ́ɛ́, aá mu nyɩ́sɛ. Obɛɛd'Edɔmmɛ rɩ́ Yehiya má há ká dáka ná pʋ́pɔ́ɔ́ra nɛ́.Wɩɩsɛ nʋtʋmɛ dáka ná zʋ́ Zerizalɛmɛ
25 Ɛ́ nɛ́ Davidi rɩ́ Ɩzɩrayɛl nɩhɩɛ̃́sɛ arɩ́ Sóójiwa nɩhɩɛ̃́sɛ isi jʋ́ɔ́sɛ mʋ́ Obɛɛd'Edɔmmɛ jaa, rɩ́wɔ́ pi Wɩɩsɛ nʋtʋmɛ dáka ná. 26 Wɩɩsɛ há pɛ́ Levi duo nɩɛ mɛ́, ɓa wólli pi Nyuutɩna Wɩɩsɛ nʋtʋmɛ dáka ná, ɛ́ nɛ́ ɓa ɔsɛ vʋ́k pɔ́ʋ́, a ɓʋ́ʋ́sɛ nɔɓallɛ balpɛ rɩ́ peɓallɛ má balpɛ. 27 Davidi rɩ́ Levi duo nɩɛ ná há cɩ́ɩ́nɛ dáka ná rɩ́ gɔkɛ arɩ́ Kenaniya há ká dáka cɩ́cɩ́ɩ́na nyúútɩ́na wuu fa sú gɛpúwɩɛlɩ́wie gɛrɔ nɛ́; ka Davidi é fa sú pɛ́ŋbíé gɛpʋmmɔ a suúrí. 28 Ɛ́ nɛ́ Ɩzɩrayɛl nɩɛ wuu sɩɛ́ caasi ballɩ́, a mu nyɩ́lkʋʋrɔ́ arɩ́ nyɩ́sɛ, a dú kuléŋléŋwa rɩ́ ceŋsi rɩ́ gbaŋceŋsi, a ka Nyuutɩna Wɩɩsɛ nʋtʋmɛ dáka ná zʋ Zerizalɛmɛ. 29 Nyuutɩna Wɩɩsɛ nʋtʋmɛ dáka ná há kúé aá zʋ Davidi zʋ́ɔ́ ná sɩɛrʋ Sayul toló Miikal, múúli tókóró mí a ná kuóro Davidi rʋʋ́ gɔ gʋala, a ɓéri aá bɩ́rɛ Nyuutɩna Wɩɩsɛ sɩ́ɛ́. Ɛ́ nɛ́, ʋ sɩɛrʋ lʋ́ʋ́.