Davidi rɩ́rʋ́ naanɩɛ wɩ́ɛ́
22
1 Davidi lɛ́ Gatɛ mɛ́, a fá mʋ́ féŋsi Adulaŋ paalɔ bʋɔ sɩɛrʋ. Ʋ máálawa rɩ́rʋ́ áná jaanɩɛ nʋ́ʋ́ dɩmɩnɩ́ wɩ́ɛ́, a lɩɩ mʋ́ʋ́ rɩ́. 2 Nɩɛ ná má há ká wɩ́ɩ́lá nɩ́ɛ́, náŋa má sazɔkɔ́ tɩ́náwa, náŋa má dí kɩma a wɩ wuó túŋ, ɓa má isi hé náŋá mɛ́, a peri nɩɛ zɔwaná, a má mʋ́ʋ́ rɩ́. Ʋ nɛ́ sɩɛ́ ɔ́wɔ́ wuu kuóro.3 Davidi baa lɛ Adulaŋ mɛ́, a mʋ́ Misipe, Mowabɛ tíé. A bʋl Mowabɛ tɩ́náwa kuóro rɩ́ bʋlɛ́: «Saŋ rɩ́ŋ áná rɩ́rɩ́ŋ maá kéní dɩhɩ̃́ rɛɛ́, ká rɩ́ŋ ná Wɩɩsɛ háá á rʋ́ʋ́ púú ná tʋ́mɩ́ŋ mɛ́.» 4 Davidi káŋwɔ́ zʋ, ɓa mɩŋ kuóro dɩhɩ̃́ ráŋ, kɔ́ʋ́ má lɛ a mʋ́ féŋsi. 5 Kal oro, Wɩɩsɛ wɩ́laabʋllɔ Gaadɛ bʋl Davidi rɩ́: >>Sɩ́ɩ́ dɩféŋsi né mí kénú, lɩɩzʋ Zida tɔ́ɔ́ sɩɛrʋ.>> Davidi ɓɩ́ɛ́na lɛ ráŋ, a mʋ́ mɩŋ Hɛrɛtɛ kʋkɔrɔ sɩɛrʋ.
Davidi bɛ́ŋsɛ́ Nɔɔbɛ vʋk'ɔɔsa
6 Sayul nɩ́ɔ̃́, rɩ ɓa ɛ̃ Davidi rɩ́rʋ́ nɩɛ dɩmɩnɩ́. Kuóro Sayul fa mɩŋ Gibeya mɛ́ nɛ́, a ké dúŋdúóŋ nyúú, sɔ́ŋtuu mʋ́l, a púú cɔlmɛ kánʋ́ nɛ́sɛ mɛ́; kɔ́ʋ́ tʋtʋnna wuu cɛ́ kílú. 7 Sayul sɩɛ́ bʋ́lʋ́ nɩɛ ná há kílú rɩ́ bʋlɛ́: >>Ɩ́ é Bɛŋzamɛ duo nɩɛ, ɩ́ zesi! Izayi bió né sɩ́ ná baksɛ rɩ́ vínyi tuuni, a pɛ́ɩ́wa anɛ ŋ há pɛ́ɩ́wa nyɛ>> Ɩ́ bɩ́ɩ́nɔ́ rʋʋ sɩ́ pi sóóji hɩɛ̃́sɛ pɛ́ɩ́wa, rɩ́ɩ́wa náŋa a bʋ́ɩ́wa nyúútɩ́náwa, ká rɩ́ náŋa má a zɔlɔwa nyúútɩ́náwa>> 8 Beérí ɩ́ wuu vʋʋrɛ lɩ́ŋ har>> Ŋ bio rɩ́rʋ́ tʋŋ nʋɔ mɛ́, ká ɩ́ oro wuu wɩ wɩ́ɩ́ bʋ́lɛ́ páŋ. Ŋ bio yíkíŋ dɩŋdɔmɔ héŋ mí, ʋ hé báráwa aá jáŋ, anɛ ʋ zaa háá jáŋ nyɛ, ká ɩ́ oro wuu wɩ bʋ́lɛ́ páŋ.>>
9 Ɛ́ nɛ́ Sayul tʋtʋnnɔ nɔ́ŋɔ, Dʋwɛgɛ há lɛ́ Edɔŋ, lɩ́sɛ nʋɔ bʋlɛ́: «Kal oro, ŋ ná ɛ́ Izayi bio, rʋʋ lɛ́ Nɔɔbɛ a ko vʋk'ɔɔsɔ, Ahitu bio Ahimelɛkɛ rɩ́; 10 Ahimelɛkɛ bɔsɛ Nyuutɩna Wɩɩsɛ pɔ́ʋ́, a pɔ́ʋ́ ɓidííle, ká pi Filisiti nɩɛ báálɔ Goliyatɛ tókowí má tɩɩ pɔ́ʋ́.>>
11 Ɛ́ nɛ́ Sayul a ɓa yɩ́rɛ Ahitu bio, vʋk'ɔɔsɔ Ahimelɛkɛ rɩ́rʋ́ jaa nɩɛ wuu há ká vʋk'ɔɔsá a mɩŋ Nɔɔbɛ mɛ́, ɓa wuu wuu kóú jaa. 12 Sayul sɛ́: >>Ahitu bio, zesi.>> Ɛ́ nɛ́ ʋ sɛ́: >>Néŋ ní, nyúútɩ́na.>> 13 Sayul bɔ́sʋ́ bʋlɛ́: >>Beérí ɩ rɩ́ Izayi bio vʋʋrɛ cɩ́nɩ́ŋ mɛ́>> Ɩ́ pɔ́ʋ́ ɓidííle, a pɔ́ʋ́ tókowí, a sʋl Wɩɩsɛ pɔ́ʋ́, rʋ́ʋ́ ná dóé a cɩ́nɩ́ŋ mɛ́, rʋ́ʋ́ hé báráwa bílíŋ mí, a nɛ ʋ zaa háá a nyɛ.>> 14 Ahimelɛkɛ sɛ́: >>Kuóro, nɛ́ŋ oro mɩ́nɩ́ɩ́ tʋtʋnna nyáŋ sɩɛrʋ a a nɩtaŋá kɩ́llɛ Davidi>> Ɩ hɩ́ɩ́lá nɛ́, ʋ nɛ́ ká sóójiwa ná háá pɔ́ɩ́ mɛ́ nyúútɩ́na má. Nɩɛ́ búú wérí ɩ jaa sɩɛrʋ. 15 Ɛ́ kal dʋŋɔ raá ŋ bɔsɛ Wɩɩsɛ ná, a pɔ́ʋ́. Ŋ wɩ́ɩ́ mɛ́ cɩ́nɛ́ kuóro! Ɛ́ wɩ́ɛ́, sɩ́ wɩ́ɩ́ píí cɩ́ɩ́nɩ́ŋ, ŋ rɩ́rɩ́ŋ jaa nɩɛ. Ŋ wɩ wɩ́ɩ́ wuu ɛ̃ ɩ bʋlɛ́ né sɩɛrʋ.>> 16 Ɛ́ nɛ́ kuóro sɛ́: >>Ahimelɛkɛ, ɩ́ ká sʋ́sɛ́, ɩ rɩ́rɩ́ jaa nɩɛ wuu.>>
17 Kuóro bɩ́rbʋl nɩɛ ná há kílú rɩ́ bʋlɛ́: >>Ɩ́ ɓʋ́ʋ́sɛ Wɩɩsɛ vʋk'ɔɔsa nyáŋ, bee wɩ́ɛ́ ɓa pɛ́ Davidi mi, a zɩŋ rʋ́ʋ́ lɩ́ɔ́ aá fá nɛ́, ká ɓa wɩ bʋ́lɛ́ páŋ.>> Amá ʋ tʋtʋnna ná oro wuu wɩ có rʋʋ tɛ́rʋ́ nɛ́sɛ́, a ɓʋ́ʋ́sɛ Wɩɩsɛ vʋk'ɔɔsa ná. 18 Ɛ́ nɛ́ Kuóro bʋl Edɔŋ tɩnáwa báálɔ Dɔwɛgɛ rɩ́ bʋlɛ́: >>Bɩ́rɛ ɓʋ́ʋ́sɛ vʋk'ɔɔsa nyáŋ!>> Edɔŋ tɩ́náwa Dɔwɛgɛ bɩ́rɛ, a ŋmásɩwɔ́ ɓʋ́ʋ́sɛ. Ɛ́ kal ʋ ɓʋ́ʋ́sɛ nɩɛ mɛɛ́sɩbaná rɩ́ bɔmmʋ́ɔ́; ɓa wuu fa ká vʋk'ɔɔsa nɛ́, a súwó tʋtʋ́nnɛ́ gɛnnɛ. 19 Ká Sayul tɩŋ mʋ́ Nɔɔbɛ, ɛ́ vʋk'ɔɔsa tɔ́ɔ́, a ɓʋ́ʋ́sʋ́ʋ́ nɩɛ wuu: Báála, háála, heŋbiisi, rɩ́ bipʋllɛ. A ɓʋ́ʋ́sɩ́wɔ́ nɛsɛ, ɓa kokúsi, ɓa pieŋse rɩ́wɔ́ bʋnnɛ má wuu. 20 Ahimelɛkɛ bio Abiyataarɛ dʋŋɔ nɛ́ lúé, a fá mʋ́ Davidi rɩ́. Ahimelɛkɛ ná áná há ká Ahitu bio ní. 21 Ʋ nɛ́ mʋ́ɛ́ bʋl pá Davidi, rɩ́ Sayul ɓʋ́ʋ́sɛ Wɩɩsɛ vʋk'ɔɔsa. 22 Ɛ́ nɛ́ Davidi bʋl Abiyataarɛ rɩ́ bʋlɛ́: «Ŋ fa ɩ́ɔ̃́ zɩŋ rɛ́ Edɔn tɩ́náwa Dʋwɛgɛ há mʋ́ Nɔɔbɛ ɛ́ kal tɩɩ, ʋ sɩ́ cesi wɩ́ɛ́ ná wuu pá Sayul. Ŋ é wɩ́ɛ́ nɛ́ ɓa ɓʋ́ʋ́sɩ́ jaa nɩɛ nyáŋ. 23 Kéníŋ laka rɛɛ́, ká sɩ́ héwíŋ fá. Sayul ná háá jáŋ mɩɩsɛ lɩ́sɛ, ʋ nɩ́ɩ́ jɛ́ɩ́ má mɩɩsɛ lɩ́sɛ; amá, rɩɩ nɛ́ kéníŋ laka rɛɛ́, nɛ́ŋ wuu wɩ́ɩ́ mɛ́ wuó tɩkɛ.»