Zonataŋ lá Davidi tá
19
1 Kuóro Sayul bʋ́lɔ́ pɔ́ʋ́ bio Zonataŋ rɩ́rʋ́ tʋtʋnna rɩ́wɔ́ ɓʋ́ Davidi. Amá Zonataŋ fa có Davidi wéri, 2 Ɛ́ nɛ́ ʋ bʋl pɔ́ʋ́ bʋlɛ́: ‹Ŋ áná Sayul já rʋ́ʋ́ ɓʋ́ɩ́ rɛ́. Pɔ́ɩ́ tɩɩ mɛ́ cié cɩ́cʋɔ, a ja dɩhɩ̃ a féŋsi.› 3 Ŋ sɛ́ lɛ a mʋ́ cɩ́nɩ́ŋ áná laka,baka sɩɛrʋ ráŋ ná ɩ há sɩ́ mɩŋ; ŋ sɩ́ bʋ́lɩ́ wɩ́ɛ́ ŋ áná dɩhɩ̃, a noú há sɩ́ ɔ́ʋ́ ná a bɩrɛ ko bʋl pɛ́ɩ́. 4 Zonataŋ bɩ́ Davidi mɛ́ a pɔ́ʋ́ áná Sayul, ká súúri bʋlɛ́: « ɩ é kuóro, ɩ wɩ mɔhɛ̃́ rɩ́ tʋŋ bɔ́ŋbɔ́ŋ cáásɩ́ tʋtʋnnɔ Davidi. Ʋ wɩ wɩ́bɔ́ŋ tʋ́mɛ́ cáásɩ́, ʋ táŋa á wérí ní kɩ́ŋkáŋ a cáásɩ́. 5 Ʋ púú mɩɩsɛ yootá a ɓʋ́ Goliyatɛ Filisitɛŋ ká Dɩtennitoo laatɛ́ ɓɩzeno peri Ɩzɩrayɛl nɩɛ wuu, ɩ há ná ɛ́ wɩ́ɩ́, ɩ sɩɛrʋ tɔ́rɔ́. Béé rí síɛ́ tɛ, ɩ jɩ́ja rɩ́ bɩsɛ nɛrɔ ná há wɩ wɩ́ɩ́ ɛ̃ cɛ́l ta a ɓʋ́ʋ́ ká ʋ wɩ wɩ́ɩ́ ɛ́ɛ́. 6 Sayul zésí Zonataŋ nʋɔ ká mŋɩ́ɛ́sɛ arɩ́ Nyuutɩna Wɩwommi yɩr rʋʋ wɩ Davidi ɓʋ́. 7 Ɛ́ nɛ́ Zonataŋ yɩ́rɛ Davidi a bʋ́lʋ́ wɩ́ɛ́ ná wuu pɔ́ʋ́; ká kánʋ́ bɩrɛ mʋ́ kuóro Sayul dɩhɩ̃, Davidi bɩrɛ púú tʋtʋmɛ́ anɛ dʋ́ŋdʋ̃́ʋ̃́ mɛ́. 8 Lal báá bɩ́rɔ́ isi, Davidi mʋ́ ʋ rɩ́ Filisiti nɩɛ yo náŋá, ʋ ɓʋ́wɔ́ nɩɛ kɩ́ŋkáŋ a kirwó ɓa fá. 9 Kal oro, Nyuutɩna Wɩɩsɛ lo kaŋtɔn zʋ Sayul, rʋʋ fa kénú jaa sɩɛrʋ a kánʋ́ cɔlmɛ ʋ nɛ́sɛ mɛ́. Davidi má fa dúdú cemo ní. 10 Kuóro Sayul fa máŋsɔ́ naasɩ́ balá rʋ́ʋ́ fa de yakʋ́ rɩ́ cɔlmɛ a mʋ́ ɓarɛ zeŋ, amá Davidi kúúró ká cɔlmɛ mʋ́ yakɛ cɔ́ zeŋ mi. Davidi lúó a lɛ ká wɩ́ɩ́ wuu wʋ́ʋ́ ɛ́́. 11 Sayul tʋ́ŋ nɩɛ rɩ́wɔ́ mʋ́ pɔ́ Davidi jaa mɛ́ a káá ja cícʋɔ rɩ́wɔ́ cɔŋ ɓʋ́. Amá Davidi háálɔ Mikal, kúó bʋl pɔ́ʋ́ bʋlɛ́:«Rɩ nɛ́ wɩ lɩ́ɛ́ fá tɩ́taŋ né, ɓa cíé sɩ́ ɓʋ́ɩ́. 12 Ká Mikal a Davidi tɩŋ tókóró lɩɩ fá col. Ʋ á ɛ́ nɛ́ a lú lɛ. 13 Ká, Mikal sɩ́ɛ́ píwó jaa veno a hé Davidi basa mɛ́; ká pi bʋʋnɔ kɛnɔ há kéŋ pʋ́sɛ a bilú nyúú rí a pi gɛbasa tɔ́. 14 Sayul nɩtʋmɛ́ ná há kué rɩ́wɔ́ ka Davidi, Mikal bʋ́lɔ́ pɔ́wɔ́ bʋlɛ́: «Ʋʋ́ wɩ́ɩ́lʋ́ nɛ́.» 15 Sayul baa bɩrɛ tʋ́ŋwɔ́ rɩ́wɔ́ mʋ́ ná Davidi ká bʋlɛ́: «Ɩ́ púú rɩrʋ́ gódó a kaa ko páŋ rɩ́ŋ ɓʋ́. 16 Nɩtʋmɛ́ ná bɩrko: Rɩ veno dʋŋɔ nɛ́ sakɛ gódó nyúú, bʋʋnɔ kɛnɔ sákʋ́ nyúú rɩ́. 17 Sayul bɔsɛ Mikal: «Béé rí tɛ ɩ nyɩ́sɩ́ŋ nyɩsɛ́ né duo>> Béé rí tɛ ɩ́ píŋ dɩŋdɔmɔ tá ʋ fá col>> Mikal sɛ́: Ʋ bʋ́lɩ́ŋ rɩ́: «Lo rɩ́ŋ col rɩ ɛ́ rá ŋ sɩ́ ɓʋ́ɩ́!»18 Ɛ́ tɛ́ŋ mɛ́ rɩ Davidi fɔ́ɔ́ col, a mʋ́ Samɩɛl dɩhɩ̃́ Rama mɛ́ a bʋl wɩ́ɛ́ ná wuu Sayul há píé ɔ́ɔ́ mɛ́ Rama mɛ́ a pɔ́ʋ́. Ká ʋ rɩ́ Samɩɛl mʋ́ ké Nazɔtɛ mɛ́. 19 Ɓa ko bʋl pá Sayul rɩ́ Davidi mɩŋ Nazɔtɛ mɛ́, Rama laka. 20 Sayul baa tʋŋ nɩɛ rɩ́wɔ́ mʋ́ ka Davidi. Ɓa ná Wɩɩsɛ Wɩlaabʋlla púl nɔ́ŋɔ há bʋl liŋhʋara, Samɩɛl ni sɩɛ́ fa kɔ́wɔ́ nyúútɩ́na. Wɩɩsɛ Sabɩɩna sɩ́ɛ́ tuwi Sayul tʋtʋnna nyúú, ɛ́ nɛ́ ɓa má tɩɩ isi áá bʋl liŋhʋɔra. 21 Mʋ́l náá mɛ́ Sayul há nɛ́ ɛ́ wɩ́ɩ́, ʋ tʋ́ŋ nɩɛ náŋa, amá ɓa má dé isi áá bʋl líŋhʋɔra nɛ́. Ʋ baa tʋŋ nɩɛ náŋa naasɩ́ botoro nyúú mí, ɛ́ tɩɩ tɩɩ nʋ̃́ʋ̃́ nɛ́ báá tʋ́mɛ́. 22 Ɛ́ nɛ́ Sayul tɩɩ isi mʋ́ Rama. Ʋ há mʋ́ɛ́ peri vilɓoo ná há mɩŋ Sekou mi, ʋ bɔ́sɔ́: «nɛ́ɛ́ rɛ́ Samɩɛl rɩ́ Davidi mɩŋ>>» Ɓa bʋl pɔ́ʋ́: «Ɓa mɩŋ nayɔtɛ mɛ́, Rama laka.» 23 Sayul lɛ́ ráŋ a caasɛ Nazɔtɛ há mɩŋ Rama laka áá mʋ́. Wɩɩsɛ Sabɩɩna ko zʋ́ ʋ bʋl liŋhʋɔra tíkítíkí a káá ja Nazɔtɛ há mɩŋ Rama laka mʋ́ péré. 24 Ʋ má wúrkú gɛnnɛ, ká má bʋl líŋhʋara Samɩɛl sɩ́ɛ́; Ɛ́ kal tɩ́taŋ rɩ́rʋ́ wɔhɔ wuu ʋ dé ɓɩ́rmú nadʋ́ʋ́na mɛ́ nɛ́ a rɩ́ tɛŋbíí. Ɛ́ nɛ́ ɓa sɛ́:«Sayul má mɩŋ Wɩɩsɛ Wɩlaabʋlla sɩɛrʋ rɛ́>>»