Zonataŋ dí Davidi naŋnɔŋnɛ
18
1 Davidi há bʋ́lʋ́ wɩ́ɛ́ tenni Sayul rɩ́, Davidi hɩɛŋ kéŋ Zonataŋ, Ɛ́ nɛ́ ʋ cóllú a nʋ̃́ʋ̃́ tɩɩ. 2 Ɛ́ kal é Sayul wɩ loé rɩ́ Davidi bɩrɛ a mʋ́ʋ́ jaa. 3 Zonataŋ dí Davidi naŋnɔŋnɛ, béé wɩ́ɛ́ ʋ coú anʋ́ tɩɩ nɛ́. 4 Ʋ wúrkú kapóóti ʋ há sué a pá Davidi, a rɩ́rʋ́ sóójigɛnnɛ, a púú tókowí, ʋ tuó rɩ́rʋ́ báltɛ pɔ́ʋ́. 5 Rɩ Sayul nɛ́ tʋ́ŋ Davidi lal dɩhɩ̃́ wuu, ʋ́ʋ́ de yoo dí ní; ɛ́ nɛ́ tɛ Sayul a ʋ ɔ́ʋ́ lalyoore ná wuu kúóro. Sayul tʋtʋnna rɩ́ nɩɛ ná wuu cóú wɩ́ɛ́.6 Davidi há ɓʋ́ Filisitɛŋ ná, ká lalyoore bɩrɛ áá ko, Ɩzɩrayɛl tɔ́nɛ wuu háála kuó céŋ kúóro Sayul; a yɛ yɩɩla ká gɔ áá hé gugonni rɩ́ onni ná náŋa há dú mí, ká yílli satɔ́ɔ́rɛ́ yílle áá hé. 7 Ɓáá dɛnnɛ arɩ́ satɔrɔ́ áá bʋl náŋá dɩhɩ̃́ a bʋlɛ́: «Sayul ɓʋ́ nɩɛ bʋ́ɩ́ ká Davidi ɓʋ́ nɩɛ bʋ́ɩ́ fí.» 8 Sayul cɔ́ɛ́ isi kɩ́ŋkáŋ, bee wɩ́ɛ́ ɓa wɩ́ɩ́ ná wʋ́ʋ́ sɩɛrʋ tɔrɛ. Ʋ sɛ́: «Ɓa sɩ́ Davidi ɓʋ́ nɩɛ bʋ́ɩ́ fí káŋ ɓʋ́ nɩɛ bʋ́ɩ́. Ʋ sɩ́ɛ́ kéénó ɓá la kuorí ní pɔ́ʋ́. 9 Ɛ́ tɛ́ŋ mɛ́, Sayul púló áá gɩɛnɛ Davidi. 10 Ʋ tɔ́ɔ́ há pʋ́lɛ́, Wɩɩsɛ ló kaŋtɔŋ ko zʋ Sayul ʋ isi gʋɔrɛ áá a ŋmɔwɛ kaŋtɔmɔ ʋ jaa sɩɛrʋ. Davidi ko dú cemo, anɛ ɛ́ ʋ háá ɛ́ɛ́ kalɛ́ wuu, ká Sayul kánʋ́ cɔlmɛ ʋ nɛ́sɛ mɛ́. 11 Sayul yóó cɔlmɛ ká bʋlɛ́: «Ŋ sɩ́ de yakɛ Davidi ɓarɛ zeŋ. Amá ʋ naasɩ́ bʋllɛ wuu Davidi kúúró lɛ ká tɔ́ʋ́.» 12 Davidi héwíŋ sɩ́sɛ́nyɛ sɩ́ɛ́ ka Sayul, bee wɩ́ɛ́ ʋ ɩ́ɔ̃́ Wɩɩsɛ vɔ́ʋ́ tá ká mɩŋ Davidi har. 13 Sayul ɔ́ʋ́ Davidi kɛ́kʋ́ mɛ́, ʋ a ʋ bɩrmɛ nɩɛ bʋ́ɩ́ sóójiwa nɔhɔ̃́. Davidi dí nɩɛ sɩ́ɛ́ a káŋwɔ́ mʋ́ lal káá ko. 14 Davidi wɩ́ɛ́ wuu mí ʋ́ʋ́ de dí ní, bee wɩ́ɛ́ Nyuutɩna mɩ́nɔ́ har. 15 Sayul ha há né rʋʋ yóó dídí wuu, ʋ héwíŋ kenú. 16 Ama Ɩzɩrayɛl rɩ́ Ziida nɩɛ wuu fa có Davidi wɩ́ɛ́, ʋ há díwó sɩ́ɛ́ a káŋwɔ́ áá mʋ́ lal.
Davidi já Sayul toló Mikal
17 Sayul bʋ́l Davidi rɩ́ bʋlɛ: «Ná Merabɛ, ŋ tolhɔ̃́; ŋ sɩ́ púú a pɛ́ɩ́ rʋ́ʋ́ ɛ́ɛ́ háálɔ, rɩɩ nɩ́ɩ́ tʋ́mɩ́ŋ tʋtʋmɛ́ rɩ́ Nyúútɩ́na lal ná yoé rɩ́rɩ́ taŋá wuu.» Ŋ tɩɩ rá wɩ mɔhɛ̃́ rɩ́ŋ lɩ́sʋ́ mɩɩsɛ, amá Filisiti nɩɛ nɛ́ sɩ́ ɓʋ́ʋ́.» 18 Davidi bʋ́l Sayul rɩ́: «Ŋ wɩ cɩ́có, ŋ áná jaa nɩɛ má há mɩŋ Ɩzɩrayɛl mɛ́ wɩ cɩ́có, a makɛ rɩ́ŋ wólli hɩɩlɛ kuóro>> 19 Tɛ́ŋ ná mɛ́ Sayul toló Merabɛ há mɔhɛ̃́ rɩ́wɔ́ púú pá Davidi, Sayul púú pá Mehola tɩ́náwa Adɩrayɛl nɛ́ ʋ ja.
20 Ká Mikal Sayul toló nɔ́ŋɔ fa có Davidi. Ɓa ko bʋl pá Sayul, ʋ sɩɛrʋ tɔrɛ; 21 ɛ́ nɛ́ kuóro Sayul sɛ́: «Ŋ sɩ́ púú a pɔ́ʋ́ a makɛ rʋ́ a bárá a pɔ́ʋ́, rɩ́ɩ́ Filisiti nɩɛ tɩŋ ráŋ mɛ́ kánʋ́.» Sayul bʋ́l Davidi rɩ́ naasɩ́ bʋllɛ nyúú mí bʋlɛ́: «Zaa ɩ sɩ́ hɩɩlɩ́ŋ.» 22 Sayul bʋ́lʋ́ tʋtʋnna rɩ́, rɩ́wɔ́ mʋ́ lʋɔrɛ bʋl pá Davidi: «Ná kuóro rɩ́rʋ́ tʋtʋnna wuu há cóí, mʋ́lnémí jɔ́ʋ́ toló a hɩ́ɩ́lʋ́.» 23 Sayul tʋtʋnna mʋ́ bʋl ɛ́ pá Davidi; ɛ́ nɛ́ Davidi sɛ́: «Ɩ́ tɩɩ há bélé kuóro hɩɩlɛ́ ká wɩ́wíé ri>> Ŋ to óŋ wuu ŋ é ká súmmú rí.» 24 Sayul tʋtʋnna mʋ́ bil Davidi wɩ́bʋlɛ́ ná pɔ́ʋ́. 25 Sayul sɛ́: «Ɩ́ bʋl nyɛ ná pá Davidi; kuóro wɩ hájáárɛ́ ɓɩɛ la; amá ʋ́ʋ́ ja Filisiti nɩɛ pɛŋkɛnnɛ zɔlɔ nɛ́, rʋ́ʋ́ dúú tɛŋbuoró ʋ dɩŋdɔmɔ nyúú. Sayul sabɩɩna nɛ́ ká rɩ́ Filisiti nɩɛ ɓʋ́ Davidi. 26 Sayul tʋtʋnna bɩrɛ ka ɛ́ wɩ́ɛ́ ko bʋl pá Davidi, ɛ́ wɩ́ɩ́ tɔrɛ Davidi sɩɛrʋ, rʋʋ sɩ́ bɩrmɛ kuóro hɩ́ɩ́lá. Ká rɩ́ kuóro tɛ́ŋ makɩ́ ná zɩŋ peri, 27 Davidi rɩ́rʋ́ nɩɛ ísó mʋ́ yo ɓʋ́ Filisiti nɩɛ sɩɛrʋ nɩɛ zɔwɛllɛ. Davidi kéŋwó pɛŋkɛnnɛ ko, ɓa pii pá kuóro, a makɛ rʋ́ʋ́ bɩrmɛ kuóro hɩ́ɩ́lá. Ɛ́ nɛ́ Sayul púú toló Mikal pɔ́ʋ́ rʋ́ʋ́ ɔ́ʋ́ háálɔ.
28 Sayul nóú a zɩŋ rɩɩ Wɩɩsɛ mɩ́nɔ́ arɩ́ Davidi, ká ʋ toló Mikal cólli Davidi. 29 Ɛ́ nɛ́ Sayul ɔsɛ áá fá Davidi, ká tɛ́ŋ wuu mí ʋ de ɔ́ʋ́ dɩŋdɔ́ŋ.
30 Rɩ Filisiti nɩɛ kúóre lɩ́ɔ́ rɩ́wɔ́ yo lal wuu rɩ́ Ɩzɩrayɛl nɩɛ, Davidi nɩ́ɩ́ yo dí kɩ́llɛ Sayul tʋtʋnna wuu. Ɛ́ nɛ́ ʋ yɩr lɛ kɩ́ŋkáŋ.