Sayul kuorí dí, arɩ́rʋ́ lal yoe
13
1 Sayul kuó aá dí kuorí rʋʋ kéŋ bɩŋsɛ ɓɩ́ŋtɩ́ŋ*. Ʋ dí kuorí dáánɛ Ɩzɩrayɛl nɩɛ nyúú. 2 Sayul tʋɔ́sɛ Ɩzɩrayɛl nɩɛ bʋ́ɩ́toro; a ka bʋ́ɩ́wʋllɛ mʋ́ mɩŋ Betɛl paalɔ nyúú, Mikima mɛ́. Ká bʋ́ɩ́ má tɩŋ Zonataŋ mɛ́, a mʋ́ Gibeya há mɩŋ Bɛŋzamɛ tíé. Kɔ́ʋ́ a nɩɛ ná káánɛ bɩrmʋ́ jɩɩsɛ́. 3 Zonataŋ mʋ́ yo lal rɩ́ Filisiti nɩɛ, a yoo díwó sóójiwa rɩ́wɔ́ nɔhɔ̃́ Geba mɛ́. Filisiti nɩɛ nɛ ɛ́ wɩ́ɩ́. Sayul a ɓa mu nyɩ́la a ceŋ tɔ́ɔ́ wuu, a bʋlɛ́: >>Rɩ́ Ebirewa nɛ ɛ́ wɩ́ɩ́ >> 4 Ɩzɩrayɛl nɩɛ wuu nɛ, rɩ ɓa sɛ́ Sayul yóódí Filisiti nɩɛ sóójiwa nɔhɔ̃́ nɔ́ŋɔ́. Ɛ́ nɛ́ Filisiti nɩɛ cɔ́ɛ́ wɛ Ɩzɩrayɛl nɩɛ.5 Sayul yɩ́rʋ́ nɩɛ hé náŋá mɛ́ Gilgal mɛ́. Filisiti nɩɛ isi káŋwɔ́ tɩɩ, rɩ́wɔ́ mʋ́ yo Ɩzɩrayɛl nɩɛ. Ɓa fa kéŋ lalyóórí torkowa bʋ́ɩ́ mɛrɛ́ rɩ́ fí, arɩ́ zákzɩ́ŋna bʋ́ɩ́ balgo. Ɓa káŋ, anɛ mʋʋ nʋɔ hɩɛla. Ɓa kúó cíkwó púl Mikima mɛ́ nɛ́, Bɛtɩhavaŋ tɔ́ɔ́ mʋ́l rɩ́. 6 Filisiti nɩɛ yo Ɩzɩrayɛl nɩɛ, a kaa mʋ́ fɛrɛ; ɓa sɩɛrʋ zɔkɛ, ɓa pusi fá zʋʋ féŋsi pallɛ bʋɔnnɛ mɛ́, butuonni mí, bʋ́ɔ́ pɛ́ksɛ, bɔɓoru mí, arɩ́ vilɓoru sɩɛrʋ. 7 Ɓa nɩɛ náŋa fá daarɛ Zʋrdɛŋ fuo daarɛ́, a mʋ́ lɛ Gadɛ rɩ́ Galadɛ.
Sayul ha mɩŋ Gilgal mɛ́ nɛ́, ká héwiŋ kɛ́sʋ́ sóójiwa ɓa cícel. 8 Sayul ké róŋ a dɛllɛ Samɩɛl tápʋlɛ balpɛ rʋ́ʋ́ ko. Samɩɛl wɩ Gilgal kúé; Sayul sóójiwa vɔ́ʋ́ tá, ká fá jáwɔ́ tɩɩ. 9 Ɛ́ nɛ́ Sayul sɛ́: >>Ɩ́ ka vʋkfísi arɩ́ tɛŋfɩ́ɛ́l vʋk pʋsɛ ná ko páŋ.>> Ɓa kaa ko pɔ́ʋ́, ʋ laa ɔsɛ vʋkfísi ná. 10 Ʋ ɔ́sɛ́ vʋk ná ko aá tenni, rɩ Samɩɛl nɩ́ɩ́ kué. Sayul isi mʋ́ cémú, rʋ́ʋ́ bɔ́llʋ́. 11 Ɛ́ nɛ́ Samɩɛl bɔ́sʋ́ bʋlɛ́: >>beérí ɩ a> >> Sayul sɛ́: >>Ɩ tɛ́ŋ makɩ́ ná há péré kɛ́ɩ́ wɩ kúé, nɩɛ púló fa kaá táŋ, ká Filisiti nɩɛ má ko peri Mikima. 12 Ɛ́ nɛ́ ŋ bɩ́ɩ́nɩ́ŋ tɩɩ mɛ́ bʋlɛ́: >>Filisiti nɩɛ sɩ́ ko yórá Gilgal mɛ́, ká á ha wɩ Wɩɩsɛ ɓáárɛ́.>> Ɛ́ nɛ́ ŋ tɩɩ la vʋkfísi pʋna ná a ɔsɛ vʋk pá Wɩɩsɛ.>> 13 Ɛ́ nɛ́ Samɩɛl bʋl pá Sayul bʋlɛ́: >>Ɩ́ tʋ́ŋ nɩcʋ́l tʋtʋmɩ́! Wada ná Nyuutɩna ɩ Wɩɩsɛ há bílé pɛ́ɩ́, ɩ wʋ́ʋ́ zílé. Wɩɩsɛ fa sɩ́ a rɩ́ dí kuorí há waá tenni Ɩzɩrayɛl mɛ́. 14 Mʋlnémí sɩɛ́, ɩ kuorí báá waá dáánɛ. Wɩɩsɛ nóú satɔ́ɔ́rɛ báálɔ, a bílú rʋ́ʋ́ nɩ́ ɔ́ʋ́ nɩɛ kuóro, ɩ há wʋ́ʋ́ wɩ́máŋsɛ ná zílé wɩ́ɛ́.>> 15 Samɩɛl lɛ Gilgal a col dɩhúó. Ká Sayul har nɩɛ isi tɩ́ŋʋ́ʋ́ mɛ́, ɓa má lɛ Gilgal a mʋ́ Gibeya há mɩŋ Bɛŋzamɛ tíé. Sayul dɩ́ɩ́sɩ́wɔ́ wuu, ɓa nɩɛ nɛ́: báála zɔwalgo. 16 Sayul rɩ́rʋ́ bio Zonataŋ arɩ́wɔ́ har nɩɛ wuu mʋ́ɔ́ ké Gibeya ná há mɩŋ Bɛŋzamɛ tíé mí, ká Filisiti nɩɛ má ciki Mikima mɛ́. 17 Filisiti nɩɛ sóójiwa lɛ rɩ́wɔ́ zɔkɛ dɩhɩ̃́, a káŋwɔ́ tɩɩ ɓa, goru botoro. Goo nɔ́ŋɔ caasɛ Ɔfɩra há mɩŋ Sʋwal rɩ́, 18 Goo nɔ́ŋɔ má pi Bɛtɩhɔrɔŋ ŋmɛ́nɔ, ká goo ná nɔ́ŋɔ má caasɛ gɩrbétéke, aá tuwi Seboyiimi polo rɩ́.
19 Ɛ́ tɛ́ŋ mɛ́, lúkrú wuu fa to Ɩzɩrayɛl tíé. Beewɩ́ɛ́, Filisiti nɩɛ fa pɔ́ɔ́ rɩ́ lukro sɩ́ Ebirewa sɩɛrʋ mɩ́nʋ́, rɩ́wɔ́ háá ko luki tokowíé rɩ́ cɔlmɛwa. 20 Ɩzɩrayɛl nɩɛ wuu túwí Filisiti nɩɛ rɩ́ nɛ́, aá ɔ́sɩ́wɔ́ pirsi, ɓa deréwa, ɓa saasɛ, arɩ́wɔ́ píŋgáásɛwa. 21 Rɩ wárɛ balá nɛ́ rɩ́wɔ́ kaa cɛsɛ botoro, cɔrʋ bɛllɛ nɛ́ ɓaá pii túŋ Filisiti nɩɛ ká sɛ́sɩ́wɔ́ pirsi, rɩ́wɔ́ deréwa, rɩ́wɔ́ saasɛ, ká tʋ́rwɔ́ pʋlúksi hɛmɛ má. 22 Lal yoe kal, Sayul rɩ́ Zonataŋ lalyoore wɩ tokowí kené, a wɩ cɔ́lmɛ́ kené. Kuóro rɩ́rʋ́ bio dʋŋɔ nɛ́ fa kéŋwó. 23 Filisiti nɩɛ sóójiwa náŋa lɩɩ kɛ́rɛ Mikima ŋmɛ́nɔ, a ké pɔ́.