Sayul yóó di Amon tɩ́náwa
11
1 Amɔŋ tɩ́náwa rɩ́wɔ́ kuóro Nahasɛ kúó kíl tɔ́ɔ́ ná ɓa háá yɩ́rɛ Yabɛsɛ, a mɩŋ Galadɛ tíé. Yabɛsɛ tɩ́náwa sɩɛ́ bʋl Nahasɛ rɩ́ bʋlɛ́: «Á vʋʋrɛ tʋ̃n nʋɔ mɛ́, ká rá tʋŋ aá pɛ́ɩ́.» 2 Ɛ́ nɛ́ Amɔŋ tɩ́náwa kuóro sɛ́: «Ŋ sɩ́ saŋ vʋʋrɛ́, rɩɩ́wa nɩ́ɩ́ saŋɛ́ rɩ́ŋ tóksíwa nɛ́ŋ wuu nédu sɩ́ɩ́, rɩ́ ɛ́ a hɩ̃ɩ̃sɛ́ a pá Ɩzɩrayɛl nɩɛ wuu. 3 Yabɛsɛ nɩhɩɛ̃́sɛ bʋ́lʋ́ rɩ́ bʋlɛ́: «Párá tápʋlɛ balpɛ; ráá́ hé nɩɛ wɔ́ bɔsɛ Ɩzɩrayɛl tíé wuu mí ná, rɩɩ nɛ́ŋ tóó aá lárá mɛ́, rá sɩɛ́ káŋrá tɩɩ lɩɩpɛ́ɩ́.» 4 Nɩtʋmɛ́ ná bɔsɛ wuu mʋ́ lɛ Sayul tɔ́ɔ́ Gibeya, a bʋl ɛ́ wɩɩ hé nɩɛ wuu dɩlla mɛ́. Ɓa wuu de wúríwó nʋʋsɛ mɛ́ a cáási. 5 Rɩ Sayul lɛ́ baka aá ko, a mɩ́nʋ́ nɛsɛ har. Ʋ ko bɔsɛ bʋlɛ́: «Beérí kéŋ tɔ́ɔ́ nɩɛ wuu ɓa wíwi>>» Ɓa pi Yabɛsɛ tɩ́náwa liŋó ná bil pɔ́ʋ́. 6 Sayul há nɛ́ ɛ́ liŋó, Wɩɩsɛ Sabɩɩna túwú nyúú, ká cɔwɩɩlɔ́́ má kánʋ́ kɩ́ŋkáŋ. 7 Ɛ́ nɛ́ ʋ kɛsɛ nɛsɛ bɛllɛ ɓʋ́ʋ́sɛ, a kʋsɛ múnémúné, a paa tʋŋ nɩɛ ɓa kaa gʋɔrɛ tɛ Ɩzɩrayɛl tíé wuu mí, ká a ɓa bʋl pá nɩɛ wuu bʋlɛ́: «Nɛrɔ ná wuu há vɛ́ɛ́, rʋ́ʋ́ tɩŋ Sayul rɩ́ Samɩɛl mɛ́ a mʋ́ lal dɩyóé, ɓaá a tɩ́na nɛsɛ nyɛ nɛ́.» Nyuutɩna Wɩɩsɛ héwíŋ ka nɩɛ wuu, ɓa ko hé náŋá mɛ́ anɛ nɛ́ŋ balá. 8 Sayul dɩ́ɩ́sɩ́wɔ́ wuu Bezɛkɛ mɛ́. Ɩzɩrayɛl cɔɔ rɩ́ nɩɛ nɛ́ bʋ́ɩ́ zotoro, Zida má cɔɔ rɩ́ nɩɛ nɛ́ bʋ́ɩ́ mɛrɛ́ rɩ́ fí. 9 Ká ɓa sɩɛ́ bʋl nɩtʋmɛ́ ná rɩ́, wɔ́ mʋ́ bʋl pá Yabɛsɛ tɩ́náwa bʋlɛ́: «Cíé wɔhɔ, nɩɛ sɩ́ ko lɛ́ɩ́wa tá.» Nɩtʋmɛ́ ná ka ɛ́ labáárɛ ko pá Yabɛsɛ nɩɛ, ɓa tɛŋ wuu pɔrɛ. 10 Ɛ́ nɛ́ ɓa tʋŋ ɓa mʋ́ bʋl Amɔŋ tɩ́náwa ná rɩ́ bʋlɛ́: «Cíé, á sɩ́ káŋrá tɩɩ ko pɛ́ɩ́wa, rɩ́ɩ́wa árá ɛ́ ɩ́ há có.»11 Ɛ́ nɛ́ tɔ́ɔ́ pʋl, Sayul ka jamáŋ ná wuu caksɛ púlli botoro. Ɓa cɔŋ zʋ Amɔŋ tɩ́náwa cɔɔ rɩ́ a ŋmásɩ́wɔ́. Wɩɩsɛ kúó aá háksɛ, rɩ ɓa yóó díwó. Ɓa ná há lúé lɛ, fá pɩsɛ maá ŋ bíí wa, bɛllɛ má wɩ náŋá mɛ́ tɩŋɛ́. 12 Ɩzɩrayɛl nɩɛ wuu sɩɛ́ ko bʋl Samɩɛl rɩ́ bʋlɛ́: «Aŋ́ wa rɛ́ fa sɛ́: ‹Sayul sɩ́ dí kuorí á nyúú>>› Ɩ́ kɛsɛ ɛ́ nɩɛ párá ráá ɓʋ́ʋ́sɛ.» 13 Amá Sayul sɛ́: «Zaa tápʋl wɩ mɔhɛ̃́ rɩ́wɔ́ ɓʋ́ nɛ́ŋ, bee wɩ́ɛ́, zaa nɛ́ Nyuutɩna Wɩɩsɛ lá ballɩ́ pá Ɩzɩrayɛl nɩɛ.» 14 Ɛ́ nɛ́ Samɩɛl bʋl jamáŋ wuu rɩ́ bʋlɛ: «Ɩ́ ko rá mʋ́ Gilgal, a bíl rá kuóro.» 15 Ɓa wuu isi mʋ́ Gilgal, a pi kuorí pá Sayul ráŋ, Nyuutɩna Wɩɩsɛ sɩ́ɛ́ mɛ́. Ká ɓa ɔsɛ tɛŋfɩ́ɛ́l vʋka Nyuutɩna Wɩɩsɛ sɩ́ɛ́; Sayul rɩ́ Ɩzɩrayɛl nɩɛ sɩɛ́ isi jʋɔsɛ wérí.