Ɩzɩrayɛl nɩɛ sɛ́ ɓaá ja kuóro ní
8
1 Samɩɛl há kúé nɩɩnɛ, ʋ bɛlɛ nɛ́ ʋ bil ɓa a sarɩ́ya dííré, Ɩzɩrayɛl nɩ́ɛ nyúú. 2 Ʋ bio ɓɔhɔ̃́ yɩr nɛ́ ká Zowɛl, ʋ tʋkɛ́ má yɩr nɛ́ ká Abɩya. Ɓa mʋ́ɔ́ ké Bɩrseba mɛ́ nɛ́ aá dí nɩɛ sarɩ́ya. 3 Amá ɓa wʋ́ɔ́ áná natɩ́ŋsɛ píé. Meéwíjɔɔ mɩ́ŋwɔ́ nyúú mí, ɓaá dí sarɩ́ya má, a pi taŋá pá nɩɛ ná há wɩ taŋá kené, ká ɛ́ nɩɛ ka zilé onni ko aá pɔ́wɔ́. 4 Ɛ́ nɛ́ Ɩzɩrayɛl nɩɛ nɩhɩ́ɛ̃́sɛ isi hé náŋá mɛ́, a mʋ́ ná Samɩɛl, Rama mɛ́. 5 A bʋ́lʋ́ rɩ́ bʋlɛ́: «Samɩɛl, ɩ nɩ́ɩ́nɔ́, ká ɩ bɛlɛ wɩ́ɩ́ natɩ́ŋsɛ píé. Ɛ́ wɩ́ɛ́, bil kuóro párá́, rʋ́ʋ́ nɛ́ árá sarɩ́ya dííro, a nɛ́ duowa ná náŋa há kéŋwó kuóre nyɛ.» 6 Samɩɛl sɩɛrʋ wuu zɔkɛ, ɓa há sʋ́ʋ́ ja kuóro pɔ́wɔ́ rʋ́ʋ́ nɛ́ ɔ́wɔ́ sarɩ́yadííro ná wɩ́ɛ́. Ɛ́ nɛ́ ʋ sʋl Nyuutɩna Wɩɩsɛ. 7 Nyuutɩna Wɩɩsɛ bʋ́lʋ́ rɩ́ bʋlɛ́: «Zésíwó liŋó, ká sáŋwɔ́ wɩ́sʋlɩ́. Bee wɩ́ɛ́, ɩ raá ɓa waá ja, ŋ é ní. Ɓa báá wɩ có rɩ́ŋ nɛ́ ɔ́wɔ́ kuóro. 8 Ŋ há lɩ́sɩ́wɔ́ Ezipiti mí, ɓa púú ná áŋ mɛ́, a ko aá lɛ zaa, ʋ nɛ́ ɓa pi aá ɛ́ɩ́ má mɛ́. Ɓa vɛ́ŋ tá káá cʋɔlɛ wɩŋsa náŋa. 9 Ɛ́ wɩ́ɛ́ sáŋwɔ́ sʋlɛ́. Taŋa máŋksɛ pɔ́wɔ́ wérí, rɩ́wɔ́ zɩ́ŋwɔ́ kuójaalɩ́ ná háá rʋ́ʋ́ tʋŋ ɛ́ ɓa mɛ́.»10 Samɩɛl césí Nyuutɩna Wɩɩsɛ wɩ́bʋlɛ́ ná wuu a pá jamáŋ ná háá sʋl kuóro. 11 Ʋ sɛ́: «Ɩ ná wɩ́ɛ́ ná kuóro ná há á rʋ́ʋ́ tɩ́llɩ́wa, háá a rʋ́ʋ́ a: Ʋ sɩ́ kɛ́sɩ́wa bɛlɛ, wɔ́ ɔ́ʋ́ lalyoore. Rɩ́wɔ́ zɩ́nʋ́ lalyóórí záksɛ, a zʋ́ʋ́ lalyóórí torkowa aá va. Rɩ́wɔ́ fá lɔ́ʋ́ sɩ́ɛ́, ká rʋ́ʋ́ kénú torko sɩɛrʋ a tɩŋ. 12 Ʋ sɩ́ pa náŋa hé rɩ́wɔ́ a sóóji bʋ́ɩ́wa nyúútɩ́náwa, rɩ́ náŋa a sóóji mɛɛ́sɛllɛ rɩ́ fíwa nyúútɩ́náwa; rɩ́ náŋa pɩ́párʋ́ baksɛ aá kʋ́sʋ́ oŋparɛ́, aá lúkú lalyóórí cɩksɛ rɩ́rʋ́ torkowa cɩksɛ. 13 Ʋ sɩ́ pɛ́ɩ́wa tolé rɩ́wɔ́ mɩ́mɩ́sɛ tulaaléwa, aá a ɓɩdííle, aá wasɛ dɩpɛ́ŋ. 14 Ʋ sɩ́ lɛ́ɩ́wa baksɛ, ɩ́ víínyi tuuni, rɩ́rɩ́wa ólívi tuuni, ɓa ɓɩwere, a pɔ́ʋ́ tʋtʋnna. 15 Ʋ sɩ́ a rɩ́ɩ́wa lɩ́sɩ́ɩ́wa oŋparɛ, arɩ́rɩ́ɩ́wa víínyi tuuni wuu, fí nyúú ker, a kaa ko rʋ́ʋ́ laa pɔ́ʋ́ laka sóójiwa rɩ́rʋ́ tʋtʋnna. 16 Ʋ sɩ́ tʋ́ɔ́sɩ́wa heŋbiwafɛlɛ, a tʋ́ɔ́sɩ́wa tʋtʋŋbáála rɩ́ tʋtʋŋtolé sɩɛrʋ ɓɩduoru, a kɛ́sɩ́ɩ́wa kokúsi, a kaa mʋ́ rɩ́wɔ́ wuu tʋŋ aá pɔ́ʋ́. 17 Ʋ sɩ́ a rɩ́ɩ́wa lɩ́sɩ́wa pʋwɩɛla má fí nyúú ker a kaa ko pɔ́ʋ́. Ɩ́ tɩɩ wuu sɩ́ ko ɔ́ʋ́ yósi. 18 Ɛ́ tɛ́ŋ mɛ́, ɩ́ sɩ́ cáási hé Nyuutɩna Wɩɩsɛ mɛ́, ɩ́ kuóro ná ɩ́ há lɩ́sɛ́ wɩ́ɛ́, ká rʋ́ʋ́ sɩ́ɩ́wa rɩ́ zésú.»
19 Ɛ́ nɛ́ Ɩzɩrayɛl nɩɛ bɩ́ɩ́lɛ, a wɩ Samɩɛl zésé ká bʋlɛ́: «Á háá ja kuóro, áá ja kuóro ní! 20 A makɛ rá má nɛ duowa ná náŋa. A káŋ rá kuóro, rʋ́ʋ́ dí sarɩ́ya aá párá, a lárá lalyoore sɩ́ɛ́ a mʋ́ yo lal aá párá.» 21 Samɩɛl zesi Ɩzɩrayɛl nɩɛ wɩ́bʋlɛ́ wuu, a pii cesi pá Nyuutɩna Wɩɩsɛ. 22 Ɛ́ nɛ́ Nyuutɩna Wɩɩsɛ bʋl Samɩɛl rɩ́ bʋlɛ́: «Zésíwó liŋó a ja kuóro pɔ́wɔ́.» Ɛ́ nɛ́ ká Samɩɛl sɩɛ́ lɩɩ bʋl Ɩzɩrayɛl nɩɛ rɩ́ bʋlɛ́: «Nɛ́ŋ wuu bɩrmʋ́ jaa.»