7
1 Kiriyatɛyarimi nɩɛ sɩ́ɛ́ ko pi Nyuutɩna Wɩɩsɛ nʋtʋmɛ dáka ná a kaa mʋ́ Abinadabɛ ná jaa há mɩŋ dúŋduóŋ nyúú. Ʋ bio Ɩlɩazarɛ nɛ́ ɓa bil rʋ́ʋ́ bibélú mí.
Ɩzɩrayɛl nɩɛ dí dóé Filisiti nɩɛ nyúú
2 Ɓa há kéŋ Wɩɩsɛ nʋtʋmɛ dáka ná ko bil Kiriyatɛyarimi mí, ʋ dáánɛ a peri bɩŋsɛ mɛrɛ́. Ɛ́ nɛ́ Ɩzɩrayɛl nɩɛ wuu wi a hĩĩni aá ja Nyuutɩna Wɩɩsɛ. 3 Ɛ́ nɛ́ Samɩɛl bʋ́lwɔ́ rɩ́ bʋlɛ́: >>Rɩ́ɩ́wá já rɩ́ɩ́wa bɩrko Nyuutɩna Wɩɩsɛ dɩhɩ̃ rɩ́rɩ́wa sɩɛrʋ wuu ní, ɩ́ yo wɩhʋɔra ná há mɩ́nɩ́ɩ́wa dɩhɩ̃ arɩ́ Asɩtarɩtɛ venni a tá, ka lo rɩ́ɩ́wa beŋtunni wuu mɩŋ Nyuutɩna Wɩɩsɛ mɛ́, aá ɓáárʋ́ dʋŋɔ nɛ́; ɛ́ é, ʋ sɩ́ lɛ́ɩ́wa tá Filisiti nɩɛ nɛ́sɛ mɛ́. 4 Ɛ́ nɛ́ Ɩzɩrayɛl nɩɛ yo Baalɛ rɩ́ Asɩtarɩtɛ venni tá, káá ɓaarɛ Nyuutɩna Wɩɩsɛ dʋŋɔ. 5 Rɩ Samɩɛl sɛ́: >>Ɩ́ yɩ́rɛ Ɩzɩrayɛl wuu ciki Mitisipa mɛ́, ká rɩ́ŋ sʋl Nyuutɩna Wɩɩsɛ pɛ́ɩ́wa. 6 Ɓa céŋ náŋá Mitisipa mɛ́, a tɔwɛ nyii ko bɩ́sɛ tá tíé Nyuutɩna Wɩɩsɛ sɩ́ɛ́. Ɛ́ tápʋl ɓa vɔ́wɛ́ nʋʋsɛ a sʋ́lwɔ́ wɩ́bɔma súúri ká bʋlɛ́: >>Á ɔ́ʋ́ zɔkɛ Nyuutɩna Wɩɩsɛ mɛ́. Ɛ́ Mitisipa mɛ́ nɛ́ Samɩɛl a Ɩzɩrayɛl nɩɛ saríyadííro. 7 Filisiti nɩɛ há nɩɛ́ rɩ Ɩzɩrayɛl nɩɛ fa céŋ náŋá Mitisipa mɛ́, ɓa kúóre ná bɔmmʋ́ɔ́ vʋ́ʋ́rɔ́ rɩ́wɔ́ mʋ́ yo Ɩzɩrayɛl. Ɩzɩrayɛl nɩɛ há nɛ́ ɛ́, héwíŋ kéŋwó. 8 Ɓa bʋl Samɩɛl dɩhɩ̃ bʋlɛ́: >>Sɩ́ɩ́ nʋɔ táŋŋʋ́! Amá búŋsi pá Nyuutɩna Wɩɩsɛ ná há kárá Wɩɩsɛ, á yɩr mɛ́, a makɛ rʋ́ʋ́ lárátá Filisiti nɩɛ nɛ́sɛ mɛ́. 9 Samɩɛl sɩɛ́ ka pewie ná háá ɔsɛ ɩ́l, a físú wuu ɔsɛ vʋk pá Nyuutɩna Wɩɩsɛ, ká búŋsi pá Nyuutɩna Wɩɩsɛ, Ɩzɩrayɛl yɩr mɛ́, ʋ sáŋʋ́ sʋlɛ́. 10 Tɛ́ŋ ná mɛ́ Samɩɛl háá ɔsɛ vʋk ná, rɩ Filisiti nɩɛ péró rɩ́wɔ́ yo Ɩzɩrayɛl; amá ɛ́ kal, Nyuutɩna Wɩɩsɛ ɔ́ɔ́ duóŋ de ɓɛ Filisiti nɩɛ mɛ́ kɩ́ŋkáŋ, ɓa de yéŋŋi, ká Ɩzɩrayɛl nɩɛ wóllíwó. 11 Ɩzɩrayɛl sóójiwa lɛ Mitisipa mɛ́ a kiri yo Filisiti nɩɛ dí, a kaa mʋ́ peri Bɛtɛkarɛ mʋ́l. 12 Samɩɛl pí dɔ́wɩ́ a bil Mitisipa arɩ́ Sɛŋ pɛ́kɛ, a kánʋ́ áá yɩ́rɛ́ Ebinezɛrɛ, ʋ mʋ́l nɛ́ ká: laatɛ́ dɔ́wɩ́, ká bʋlɛ́: >>A kaa ko aá peri rɛɛ́wa, Nyuutɩna Wɩɩsɛ lárátá. 13 Ɛ́ ɔ́ɔ́ Filisiti nɩɛ dí hɩɩ̃sɛ, a báá wɩ bɩ́rɛ́ ko Ɩzɩrayɛl dɩtɩ́llɛ. Ká Nyuutɩna Wɩɩsɛ dé cɛ́ Filisiti nɩɛ mɛ́ Samɩɛl hiẽ́só́ tɛ́ŋ wuu mí. 14 Ɩzɩrayɛl sɩɛ́ bɩrlɔ́ʋ́ tɔ́nɛ ná Filisiti nɩɛ fa há lɛ́, a pɔ́ Ɩkɩrɔŋ mɛ́ ká kaa mʋ́ lɛ Gatɛ rɩ́wɔ́ dɩtɩ́llɛ; Ɩzɩrayɛl nɩɛ lɔ́wɔ́ Filisiti nɩɛ nɛ́sɛ mɛ́. Ká tɛŋfɩ́ɛ́l mɩŋ Ɩzɩrayɛl rɩ́ Amorɩɛŋwa pɛ́kɛ.