Filisiti nɩɛ bɩ́rɔ́ pi Ɩzɩrayɛl Wɩɩsɛ nʋtʋmɛ dáka tɛ
6
1 Nyuutɩna Wɩɩsɛ nʋtʋmɛ dáka ná mɩŋ Filisiti nɩɛ tɔ́ɔ́ mɛ́ caŋsɛ balpɛ. 2 Ɛ́ nɛ́ ɓa yɩ́rwɔ́ vʋk'ɔɔsa rɩ́wɔ́ vʋra a bɔ́sɩ́wɔ́: >>Á rá pi Nyuutɩna Wɩɩsɛ nʋtʋmɛ dáka ná ɔ́ɔ́ béé rí>> Ɩ́ mákɩ́rá ɛ́ ná há mɔhɛ̃́ rá a ká bɩrɛ kánʋ́ mʋ́ tá ʋ tɔ́ɔ́ mɛ́.>> 3 Vʋk'ɔɔsa rɩ́ vʋra ná sɛ́: >>Rɩ́ɩ́wa nɩ́ɩ́ já rɩ́ɩ́wa pi Ɩzɩrayɛl Wɩɩsɛ nʋtʋmɛ dáka ná tɛ, ɩ́ sɩ́ píí tɛ yɔ́ɔ́, ɩ́ hé zilé óŋ a pá Ɩzɩrayɛl Wɩɩsɛ. Ɛ́ wɩ́ɛ́ ɩ́ sɩ́ ná tɛŋfɩ́ɛ́l, ká ná ɛ́ ná má há tɛ, Wɩɩsɛ nɛ́sɛ de cɔ́llɩ́wa mɛ́.>> 4 Amá Filisiti nɩɛ sɛ́: >>Zíl orí duó rí mɔhɛ̃́ rá dí pɔ́ʋ́>> Vʋk'ɔɔsa rɩ́ɩ́ vʋra sɛ́: >>Filisiti nɩɛ kuóre nʋɔ há ká bɔmmʋ́ɔ́, ɩ́ ja salmɛ onni bɔmmʋ́ɔ́ há nɩ́ɛ́sɛ́ mʋ́dílo, arɩ́ salmɛ datʋ́ɔ́ bɔmmʋ́ɔ́, béé wɩ́ɛ́ ɛ́ pʋɔlɩ́ balá tɩɩ nɛ́ kɛ́sɩ́wa rɩ́rɩ́wa kuóre wuu. 5 Ɩ́ bɩrmɛ onni ná há nɩhɩ̃́ mʋ́dílo rɩ́ datʋ́ɔ́ ná há zɔ́kɩ́wa tɔ́ɔ́, a kaa mʋ́ cʋɔlɛ Ɩzɩrayɛl Wɩɩsɛ. Rɩɩ́ gbé ʋ nɛ́sɛ báá wɩ́ɩ́wa nyúú rɩ́rɩ́wa tɔ́ɔ́ rɩ́rɩ́wa wɩŋsa nyúú tuwi kɩ́ŋkáŋ. 6 Ɩ́ sɩ́ɩ́wa beŋtunni dúórú, anɛ Faarɔŋ rɩ́ Ezipiti nɩɛ há duóríwó beŋtunni ɛ́. Ɩ́ líísíwa tɩɩ Wɩɩsɛ ná há ɔ́wɔ́ ɛ́, ɓa wɩ Ɩzɩrayɛl nɩɛ tɛ́ɛ́ ɓa col>> 7 Ɛ́ wɩ́ɛ́ mʋ́lnéémí ɩ́ bɩrmɛ tórko ɓɩfɛlɔ a kɛsɛ nɔhásʋɔ̃sɛ bɛllɛ, ɓa bɛlɛ ha háá ɔsɛ́, ká ɓa ha wɩ zúki báásɛ́ ná. Ɩ́ kɛ́sɩ́wɔ́ hé tórko mí, ká kíríwó bɛlɛ ná há tɩ́ŋwɔ́ har a kaa bɩrɛ mʋ́ jaa. 8 Ɩ́ pi Nyuutɩna Wɩɩsɛ nʋtʋmɛ daka ná a hé tórko sɩɛrʋ. Ká pa salmɛ onni ná wuu ɩ́ há kené áá mʋ́ rɩ́ɩ́wa pá Wɩɩsɛ, ɩ́ zɔkrɛ yɩr mɛ́, a hé dákwie mí, a bil Wɩɩsɛ nʋtʋmɛ dáka laka, ká zɩŋ tá tórko ná rʋ́ʋ́ col. 9 Ɩ́ sɩ́ ná: rɩ nɔhásʋɔ̃sɛ ná nɛ́ pí Ɩzɩrayɛl ŋmɛ́nɔ rɩ́ caasɛ Bɛtɩsɩmɛkɛ rɩ́, ʋ ɛ́ já rʋ́ʋ́ máŋsɛ rɩ bɔ́ŋbɔ́ŋ né wuu Ɩzɩrayɛl Wɩɩsɛ tɩɩ nɛ́ árá. Rɩ ɓa nɩ́ wɩ ɛ́ cɔɔ cáásɛ́, á sɩ́ zɩŋ rʋʋ ra wɩ́rá bɔ́ŋbɔ́ŋ né wuu ɛ́ɛ́. Amá ɓa dé pérírá yɔ́ɔ́ rɛ́. 10 Filisiti nɩɛ tʋ́ŋ ɛ́ ná ɓa há cáánɩ́wɔ́. Ɓa kɛ́sɛ́ nɔhásʋɔ̃sɛ bɛllɛ a hé tórko mí, ká ɓa kɛ́sɩ́wɔ́ bɛlɛ tɔ́ tá jaa mɛ́. 11 Ɓa pí Nyuutɩna Wɩɩsɛ nʋtʋmɛ dáka arɩ́ dákwie ná salmɛ datʋ́ɔ́ há mɩ́nʋ́ mɛ́ arɩ́ onni ná há nɩ́ɛ́sɛ́ mʋ́dílo a hé tórko ná mɛ́. 12 Nɔmááwa ná dé pi Bɛtɩsɩmɛkɛ ŋmɛ́nɔ nɛ́ térke. Ɓa dé púú ní wuu a va káá búŋsi; ɓa wɩ néduu rɩ́ mʋ́, a wɩ nágʋɔ má rɩ́ mʋ́. Filisiti nɩɛ kuóre tɩ́ŋ tórko ná har a mʋ́ peri Bɛtɩsɩmɛkɛ súsúbʋɔ. 13 Bɛtɩsɩmɛkɛ nɩɛ fa mɩŋ polo mí, aá kʋŋ bilé. Ɓa há ísé bel ná Wɩɩsɛ nʋtʋmɛ dáka ná ɓa jʋ́ɔ́sɔ́. 14 Tórko ná mʋ́ɔ́ peri Bɛtɩsɩmɛkɛ tɩ́náwa Zozie baka a cɛ́ dɔ́wɩ́zeno oro laka. Ɓa cɛsɛ tórko ná daasɛ, a pi nɔháála ná físi ɔsɛ vʋk a pá Nyuutɩna Wɩɩsɛ. 15 Levitiwa lɩ́sɛ Nyuutɩna Wɩɩsɛ nʋtʋmɛ dáka rɩ́ dákwie ná salmɛ onni há mɩ́nʋ́ sɩɛrʋ, a púwó wuu sakɛ dɔ́wɩ́zeno ná daha. Ɛ́ kal tɩɩ Bɛtɩsɩmɛkɛ nɩɛ ɔ́sɛ́ vʋka a físi náŋa a pá Nyuutɩna Wɩɩsɛ. 16 Filisiti nɩɛ kuóre ná bɔmmʋɔ há ná ɛ́, ɓa bɩ́rɛ́ ɛ́ kal tɩɩ a mʋ́ Ɩkɩrɔŋ. 17 Salmɛ onni ná há nɛhɛ̃́ mʋ́dílo Filisiti nɩɛ kaa mʋ́ cʋɔlɛ Nyuutɩna Wɩɩsɛ ɓa zɔ́krʋ yɩr mɛ́, Asɩdɔdɛ nɛ́ tɛ nɔ́ŋɔ, Gaza má nɔ́ŋɔ, Asɩkalɔŋ má nɔ́ŋɔ, Gatɛ má nɔ́ŋɔ, Ɩkɩrɔŋ má nɔ́ŋɔ. 18 Salmɛ datʋɔ́ ná má césí Filisiti nɩɛ kuóre ná bɔmmʋɔ́ há tɛ tɔ́nɛ ná wuu, ɓa tɔ́zeŋsi arɩ́ tɔ́wɩɛla wuu, a mʋ́ peri dɔ́wɩ́zeno ná ɓa há pí nyuutɩna Wɩɩsɛ nʋtʋmɛ dáka sákʋ́ nyúú. Ɛ́ dɔ́wɩ́ záá ha mɩŋ Zozie há lɛ́ Bɛtɩsɩmɛkɛ baka mɛ́. 19 Nyuutɩna Wɩɩsɛ bɛ́ŋsɛ́ Bɛtɩsɩmɛkɛ tɩ́náwa há církí sɩ́ɛ́ hé Wɩɩsɛ nʋtʋmɛ dáka ná mɛ́. Ʋ ɓʋ́ʋ́sɩ́wɔ́ sɩɛrʋ báála mɛ́ɛ́sɩbotoro rɩ́ fí. Tɔ́ɔ́ ná nɩɛ de mɩŋ wííle mí, bee wɩ́ɛ́ Nyuutɩna Wɩɩsɛ ɓʋ́ʋ́sɩ́wɔ́ kɩ́ŋkáŋ. 20 Bɛtɩsɩmɛkɛ nɩɛ sɛ́: >>Áŋ rɛ́ wo Nyuutɩna Wɩɩsɛ há wɩ busunnu kéné sɩ́ɛ́ cɛ́ káá wa>> Áá púú nʋtʋmɛ dáká né rɩ́ tá nɛ́ɛ́wa, rʋ́ʋ́ kɛ́kɩ́rá mɛ́>> >> 21 Ɓa tʋŋ nɩɛ Kiriyatɛ Yarimi nɩɛ dɩhɩ̃ rɩ́wɔ́ bʋl pɔ́wɔ́ bʋlɛ́: >>Filisiti nɩɛ kéŋ Nyuutɩna Wɩɩsɛ nʋtʋmɛ dáka ná bɩrko rí. Ɩ́ ko pi a kaa mʋ́ɩ́wa dɩhɩ̃́.>>