Wɩɩsɛ nʋtʋmɛ daka mɩŋ Filisiti nɩɛ tɔ́ɔ́ mɛ́
5
1 Filisiti nɩɛ pí Wɩɩsɛ nʋtʋmɛ dáka Ebinezɛrɛ mɛ́ a kaa mʋ́ Asɩdɔdɛ, 2 a kánʋ́ mʋ́ zʋ Dagɔŋ dɩɓaarɩ́ a púú bil Dagɔŋ laka. 3 Ʋ tɔ́ɔ́ há pʋ́lɛ́, Asɩdɔdɩɛ̃́wa ísí cɩ́cʋɔ a ná Dagɔŋ rʋ lɩ́ɔ́ ɓal pɛ́ baŋbú Nyuutɩna Wɩɩsɛ nʋtʋmɛ dáka ná sɩ́ɛ́; ɓa púú bɩrɛ bílú dɩhɩ̃́. 4 Ʋ tɔ́ɔ́ báá há pʋ́lɛ́ cɩ́cʋɔ, ɓa báá ísó rɩ Dagɔŋ lɩ́ɔ́ ɓal baŋbú Nyuutɩna Wɩɩsɛ nʋtʋmɛ dáka ná sɩ́ɛ́, ʋ nyúú rɩ́rʋ́ nɛ́ŋsa bɛllɛ wuu conni pɛ́ dɩɓaarɩ́ dánnʋbíí mɛ́, ʋ sɩ́sɩ́ɛ́nnʋ́wa dʋŋɔ nɛ́ kúé káánɛ. 5 Ɛ́ nɛ́ tɛ Dagɔŋ vʋk'ɔɔsa arɩ́ nɩɛ ná wuu háá zʋ Dagɔŋ dɩɓaarɩ́, Asɩdɔdɛ mɛ́, naa wʋ́ʋ́ dɩɓaarɩ́ dánnʋbíí míí nʋɔsɛ, a kaa ko aá lɛ zaa. 6 Nyuutɩna Wɩɩsɛ nɛ́sɛ túwí Asɩdɔdɩɛ̃wa nyúú, ʋ hé sazɔkɔ́ ɓa mɛ́; ʋ ɔ́ɔ́ Asɩdɔdɛ rɩ́rʋ́ kílo tɔ́wɩɛla nɩɛ mʋ́bʋʋsɛ dí. 7 Ɓa há néí rʋʋ ká ɛ́ nɛ́, Asɩdɔdɛ nɩɛ sɛ́: >>Ɩzɩrayɛl Wɩɩsɛ nʋtʋmɛ dáka wɩ rá dɩhɩ̃́ wuó mɩŋ, bee wɩ́ɛ́ Wɩɩsɛ nɛ́sɛ túwírá nyúú a bɛ́ŋsɩ́rá wérí, á rɩ́rá wɩɩsɛ Dagɔŋ. 8 Ɛ́ nɛ́ ɓa yɩ́rɛ Filisiti nɩɛ kuóre wuu ɓa ko céŋ náŋá. Ɓa bʋlɛ́: >>Á pi Ɩzɩrayɛl Wɩɩsɛ nʋtʋmɛ dáka né a beé> >> Rɩ ɓa sɛ́: >>Á pi Nyuutɩna Wɩɩsɛ nʋtʋmɛ dáka ná kaa mʋ́ Gatɛ. Ɛ́ nɛ́ ɓa ɓɩɛ́na pi Ɩzɩrayɛl Wɩɩsɛ nʋtʋmɛ dáka ná kaa mʋ́ ráŋ. 9 Amá ɓa há píé mʋ́ peri Gatɛ, Dɩtennítóó Wɩɩsɛ nɛ́sɛ túwí ɛ́ tɔ́ɔ́ má nɩɛ nyúú. Héwíŋ ɓɩzeno zʋ́wɔ́. Tɔ́ɔ́ ná nɩɛ wuu, a pɔ́wɔ́ sɩɛrʋ heŋbie ká mʋ́ lɩ́wɔ́ nɔhɔ̃́ mɛ́, ɓa mʋ́ʋ́la díó. 10 Ɓa pí fól cɩ́ɩ́nɛ Wɩɩsɛ nʋtʋmɛ dáka ná mʋ́ Ɩkɩrɔŋ. Amá ɓa há mʋ́ɛ́ peri ráŋ, Ɩkɩrɔŋ tɩ́náwa ísó cáási, a bʋlɛ́: >>Ɓa cɩ́ɩ́nɛ Ɩzɩrayɛl Wɩɩsɛ nʋtʋmɛ dáka kó rá dɩhɩ̃́, rʋ́ʋ́ ɓʋ́rá rɩ́rá nɩɛ wuu! 11 Ɓa yɩ́rɛ Filisiti nɩɛ kuóre wuu ko ciki, a bʋ́lwɔ́ rɩ́ bʋlɛ́: >>Á bɩrka Ɩzɩrayɛl Wɩɩsɛ nʋtʋmɛ dáka ná mʋ́ tá ʋ dɩhɩ̃́ a makɛ rʋ́ʋ́ sɩ́rá wuu ɓʋ́ʋ́sʋ́.>> Ɛ́ wɩ́ɛ́ héwíŋ ɓɩzeno zʋ́ tɔ́ɔ́ ná sɩɛrʋ, béé wɩ́ɛ́ Nyuutɩna Wɩɩsɛ ɔ́ʋ́ rɩ́wɔ́ zɩ́mʋ́ dóé mʋɔsɔ. 12 Nɩɛ ná há wɩ sʋ́sɛ́, mʋ́dílo dé kɛ́sɩ́wɔ́ wuu ní, tɔ́ɔ́ ná nɩɛ sazɔ́krɩ́wííle zɛ́ aá yakɛ bána mɛ́.