Filisiti nɩɛ yóó dí Ɩzɩrayɛl, a la nʋtʋmɛ daka
4
1 Samɩɛl fa bʋ́l wɩ́ɩ́ ná pá Ɩzɩrayɛl nɩɛ wuu ní. Ɩzɩrayɛl lɩ́ɔ́ céŋ Filisiti nɩɛ rɩ́wɔ́ yo náŋá. «Ɓa mʋ́ɔ́ mɩŋ Ebenezɛr mɛ́, ká Filisiti nɩɛ má mɩŋ Afeki mí. 2 Filisiti nɩɛ kéŋwó tɩɩ rɩ́wɔ́ yo lal arɩ́ Ɩzɩrayɛl nɩɛ, ɛ́ nɛ́ lal fɛ́l, Filisiti nɩɛ yoo díwó a ɓʋ́ʋ́sɩ́wɔ́ lal dɩyóé a peri mʋ́ɔ́ tóó nɩɛ bʋ́ɩ́ baná. 3 Ɩzɩrayɛl nɩɛ ná bɩrɛ fá mʋ́wɔ́ púl, ɛ́ nɛ́ ɓa sídííre sɛ́: >>Béé rí tɛ Nyuutɩna Wɩɩsɛ lo Filisiti nɩɛ zaa yoo dí rá>> Á mʋ́ Silo a pírá Nyuutɩna Wɩɩsɛ nʋtʋmɛ daka; rʋ́ʋ́ ko mɩ́ŋrá sɩ́sɩ́ɛ́nnʋ́wa a makɛ rʋ́ʋ́ lárá tá á dɩŋdɔma nɛ́sɛ mɛ́. 4 Ɓa lɩ́sɛ nɩɛ a tʋ́ŋwɔ́ ɓa mʋ́ Silo. Ráŋ nɛ́ ɓa pi Nyuutɩna Wɩɩsɛ, dóé wuu tɩ́na dáka ná há mɩŋ málɩ́kawa pɛ́kɛ, a kaa ko. Eli bɛlɛ bɛllɛ Ofini rɩ́ Fineyasɛ fa mɩŋ ráŋ, arɩ́ Wɩɩsɛ nʋtʋmɛ daka ná. 5 Ɓa há kéŋ Nyuutɩna Wɩɩsɛ nʋtʋmɛ daka ná kówó púl, Ɩzɩrayɛl wuu ísó cáási satɔ́ɔ́rɛ́ cááse, ɛ́ nɛ́ tíé ziksi. 6 Filisiti nɩɛ nɛ́ cááse ná a bʋlɛ́: «Béé rí ká kɔzenó né duo Ebirewa púl mí>>» Ɓa kɩ́ɛ́lɔ́ a zɩŋ rɩ Nyuutɩna Wɩɩsɛ nʋtʋmɛ daka nɛ́ ɓa kaa kówó púl. 7 Héwíŋ kɛsɛ Filisiti nɩɛ bee wɩ́ɛ́, ɓa sɛ́: «Nyuutɩna Wɩɩsɛ kó Ebirewa púl!» Ká baa súúri bʋlɛ́: «Nyúbɔ́ŋ péri rá! Púle mí ʋ fa to ɛ́ nɛ́. 8 Nyúbɔ́ŋ a párá! Áŋ rɛ́ sɩ́ lárá tá wɩwómme nyáŋ nɛ́sɛ mɛ́>> Ɛ́ wɩŋsa nɛ́ ŋmɔ́wɛ́ Ezipisɩ́ɛ̃́wa, wɩɩla rɩ́rʋ́ duó wuu péríwó gɩrbétéké sɩɛrʋ. 9 Filisiti nɩɛ ɩ́ duóríwa naasɛ a tʋŋ ballɩ́, a makɛ rɩ́ɩ́wa sɩ́ kó bɩrmɛ Ebirewa yósí anɛ ɓa fa há bɩ́rmɩ́wa yósí ɛ́; ɩ́ yo arɩ́ ballɩ́! 10 Filisiti nɩɛ púl lal a yoo dí Ɩzɩrayɛl. Nɛrɔ wuu fá mʋ́ zʋ́ táŋtɛ sɩɛrʋ, ɓa zɔkɛ́ zɔkrʋ ɓɩzeno ká ɓʋ́ Ɩzɩrayɛl nɩɛ bʋ́ɩ́ mɛɛrɛ́ rɩ́ fí. 11 Ɓa lá Wɩɩsɛ nʋtʋmɛ dáka, ká ɓʋ́ Eli bɛlɛ bɛllɛ, Ɔfini rɩ́ Fineya.
Eli rɩ́rʋ́ bihál sʋʋ wɩ́ɛ́
12 Bɛŋzamɛ tɩ́náwa nɛ́ŋ balá rɛ́ lɛ́ lal sɩɛrʋ ɛ́ kal a fá mʋ́ lɛ Silo, ʋ gɛnnɛ wuu cɔnnɛ kɔ́ nyúú tɔ́ arɩ́ kuŋkulo. 13 Ʋ há mʋɛ́ peri rɩ Eli fa kénú ɓasa nyúú káá bel ŋmɛ́nɔ mɛ́, bee wɩ́ɛ́ ʋ béŋtúú fáá pi Wɩɩsɛ nʋtʋmɛ dáka ná wɩ́ɛ́. Báálɔ ná tɛ labaarɛ tɔ́ɔ́ sɩɛrʋ, nɩɛ wuu sɩ́ɛ́ isi áá búŋsi kɩ́ŋkáŋ. 14 Eli há nɛ́ búŋse ná ʋ sɛ́: Beé rí ká búŋse né duo mí. Báálɔ ná fá mʋ́ Eli dɩhɩ̃́ a tɛ ɛ́ labáárɛ pɔ́ʋ́. 15 Eli fa kéŋ bɩŋsɛ mɛ́ɛ́sɩbaná rɩ́ fí rí córí, ʋ sɩ́ɛ́ bíbel ká báá wɩ ráŋ ná. 16 Báálɔ ná bʋl Eli rɩ́: >>Ŋ nɛ́! Ŋ lɛ́ lal dɩyoé ní, ŋ zaa lɩ́ɔ́ fá ɛ́ lal dɩyóé. Eli bɔ́sʋ́: >>Béé rí kué, ŋ bio> >> 17 Nɛrɔ ná há kéŋ labáárɛ ko sɛ́: >>Filisiti nɩɛ kírí Ɩzɩrayɛl nɩɛ ɓa fá ká ɓa zɔ́kɩ́wɔ́ nɩɛ kɩ́ŋkáŋ. Ká ɓa ɓʋ́ʋ́sɩ́ bɛlɛ ná bɛllɛ, Ɔfini rɩ́ Fineyasɛ, ká a la Wɩɩsɛ nʋtʋmɛ dáka ná. 18 Labártɛɛrɔ ná háá bʋl Wɩɩsɛ nʋtʋmɛ daka ná wɩ́ɛ́, Eli dé lʋ́ʋ́ ɓasa nyúú lɩɩ ɓal báyɛlɛ́ nɛ́ Wɩɩsɛ jaa dánnʋɔ, lime céŋŋi, ʋ sʋwɛ, bee wɩ́ɛ́ ʋ fa hɩɛ̃́sɔ́ ká a ɓɩzímí. Ʋ fa ká Ɩzɩrayɛl saríyadír bɩŋsɛ mɛ́ɛ́sɛllɛ. 19 Eli bio Fineyasɛ háálɔ fa kéŋ puo a cɛ́ lʋlɛ́ mɛ́. Ʋ há nɛ́ Wɩɩsɛ nʋtʋmɛ dáka lɛɛ wɩ́ɛ́ labáárɛ a rɩ́rʋ́ bála áná rɩ́rʋ́ bála sʋʋ, ʋ dé tiini ní a lʋl, bee wɩ́ɛ́ ʋ luoru wɩ́ɔ́ úrú mí. 20 Ʋ há cɩ́ sʋwɛ mɛ́, háála ná há cɩ́nɛ́ kilú bʋ́lʋ́ rɩ́: >>Sɩ́ ló rɩ́ héwíŋ kánɩ́, bee wɩ́ɛ́ ɩ lʋ́l heŋbólé! Amá ʋ wɩ wɩ́ɩ́ bʋ́lɛ́ a wʋ́ɔ́ rɩ́ zésé má. 21 Ʋ pá heŋbóle ná yɩr Ɩkabɔdɛ, ká bʋlɛ́: >>Wɩɩsɛ píŋ báá to Ɩzɩrayɛl mɛ́!>> A tɩ́ŋwɔ́ há lá Wɩɩsɛ nʋtʋmɛ dáka ná rɩ́rʋ́ bála áná rɩ́rʋ́ bála há sʋ́sɛ́ wɩ́ɛ́ nɛ́.>> 22 Ʋ sɛ́: >>Wɩɩsɛ píŋ báá to Ɩzɩrayɛl mɛ́, bee wɩ́ɛ́ ɓa lá Wɩɩsɛ nʋtʋmɛ dáka!>>