Saŋsɔŋ gíri Gaza tɔ́ɔ́ dánnʋʋsɛ
16
1 Saŋsɔŋ kal oro mʋ́ Gaza. Ʋ ná hácɔ́rmɔ oro, a tɩŋ zʋ́ʋ́ pɩ́nʋ́ dɩhɩ̃́. 2 Gaza nɩɛ nɩ́ɔ̃́ rɩ́ Saŋsɔŋ cɔ́ ɛ́ dɩhɩ̃́. Ɛ́ nɛ́ ɓa isi mʋ́ kíl ɛ́ dɩhɩ̃́, tɩ́taŋ ná wuu, aá dɛ́llʋ́ tɔ́ɔ́ ná dánʋ́ɔ́ mɛ́. Amá ɓa bɩ́ɩ́nɩ́wɔ́ tɩɩ mɛ́ a bʋ́lɛ́: «Á ló rɩ tɔ́ɔ́ pʋ́l, ká ráá sɩɛ́ ɓʋ́ʋ́.» 3 Amá Saŋsɔŋ há pɩ́nɛ́, tɔ́ɔ́ ko fɩ́ɛ́lɛ a zʋ́ ɓarma, ʋ ísó mʋ́ gíri tɔ́ɔ́ ná dánnʋɔ boro ná rɩ́rʋ́ daasɛ ná bɛllɛ arɩ́rʋ́ yakɛ́ ná wuu, a báásʋ́ vacɔrʋ mɛ́ a kaa mʋ́ tá paalɔ ná há cáásɛ Ɩbɩrɔŋ, nyúú ɓóŋɓóŋ.Dalɩɩla nyɩ́sɔ́ ká Saŋsɔŋ pá dɩŋdɔma
4 Ʋ ɛ́ har mɛ́, Saŋsɔŋ ná háálɔ Sɔrɛkɛ polo mí, a cóllú. Ʋ yɩr nɛ́ ká Dalɩɩla. 5 Filisiti nɩɛ kuóre ná ko ná Dalɩɩla a bʋ́lʋ́ rɩ́ a bʋ́lɛ́: «Nyɩsɛ Saŋsɔŋ a zɩ́mʋ́ há ná dózeno né ráŋ ná, arɩ́ ɛ́ ná á há sɩ́ a, ká wóllú a vɔwɛ, rʋ́ʋ́ baá sɩ́ wóllí a wɩ́ɩ́. Ká rá nɛ́ŋ wuu pɛ́ɩ́ meéwicááka bʋ́ɩ́ arɩ́ zɔlɔ (1 100).» 6 Ɛ́ nɛ́ Dalɩɩla túperi Saŋsɔŋ a bʋ́lʋ́ rɩ́ a bʋ́lɛ́: «Nɛ́ɛ́ rɛ́, ɩ ná dózeno néé, beé rí nɛrɔ sɩ́ píí vɔ́wɩ́ ká wóllí>>» 7 Ɛ́ nɛ́ Saŋsɔŋ bʋ́lʋ́ rɩ́ bʋ́lɛ́: «Rɩ ɓa nɛ́ vɔ́wɩ́ŋ rɩ́ cuoló ŋmɛ́fɛlɛ balpɛ há lááwɔ́, ŋ báá wɩ dóé ká, ká rɩ́ŋ rɩ́ nɩɛ wuu nɛ́ náŋá.» 8 Filisiti nɩɛ kuóre ná sɩɛ́ ka cuoló ŋmɛ́fɛlɛ ná balpɛ, há lááwɔ́ a kaa ko pá Dalɩɩla ʋ píí vɔwɛ Saŋsɔŋ. 9 Ʋ sɩɛ́ fá ɔ́ɔ́ ɓa nɩɛ féŋsú jaa mɛ́. Kɔ́ʋ́ cáási a bʋ́lɛ́: «Saŋsɔŋ, Filisiti nɩɛ nɩ́ɩ́ kóé mí!» Saŋsɔŋ há gírke ísí, ʋ conni ŋmɛ́sɛ ná wuu, anɛ ŋmɛ́ŋ níŋ há díé. Ɓa wɩ wóllé zɩ́mʋ́ dóé dɩlɩɩ.
10 Dalɩɩla bʋl Saŋsɔŋ rɩ́ a bʋ́lɛ́: «Ɩ nyɩ́sɩ́ŋ, ɩ wɩ táŋa bʋ́lɛ́ páŋ. Ɛ́ wɩ́ɛ́, mʋ́l néé mí, bʋl táŋa páŋ. Beé rí ɓa sɩ́ píí wóllí vɔwɛ.» 11 Ɛ́ nɛ́ Saŋsɔŋ bʋl pɔ́ʋ́ a bʋ́lɛ́: «Rɩ ɓa nɛ́ vɔ́wɩ́ŋ kɩ́ŋkáŋ rɩ́ ŋmɛ́fɛlɛ ná, ɓa há há wɩ kéné tʋŋ, ŋ baá wɩ dóé ká, ká rɩ́ŋ rɩ́ nɩɛ wuu nɛ́ náŋá.» 12 Dalɩɩla la ŋmɛ́fɛlɛ ná, a píí vɔwɛ Saŋsɔŋ. Rɩ Filisiti nɩɛ báá fa féŋsi jaa mɛ́. Ʋ há vɔ́wɛ́ tenni, ʋ sɩɛ́ cáásó a bʋ́lɛ́: «Saŋsɔŋ, Filisiti nɩɛ níí kóí mí!» Naasɩ́ balá rɩ́ Saŋsɔŋ ísó a conni ŋmɛ́sɛ ná ɓa há píé vɔ́wʋ́ nɛ́ŋsa mɛ́ anɛ gepúŋmɛ́ŋ.
13 Dalɩɩla baa bʋl Saŋsɔŋ rɩ́ a bʋ́lɛ́: «A ko aá mɔ́ nyɛ́, ɩ nyɩ́sɩ́ŋ nɛ́, ɩ wɩ táŋa bʋ́lɛ́ páŋ. Makɩ́ŋ ɛ́ ná ɓa há sɩ́ a ká wóllí vɔwɛ.» Saŋsɔŋ sɛ́: «Rɩ́ɩ́ kéníŋ nyúpʋpalɛ ná balpɛ rɩ́ pɛŋyooriŋmɛ́dole hé náŋá mɛ́ a sɔ́, rɩ́ɩ́ káŋwɔ́ wuu rɩ́ɩ́ hé náŋá mɛ́, rɩ́ɩ́ pii tʋ́ pɛ́ŋyooridaa mɛ́, ŋ baá wɩ dóé ka, ká rɩ́ŋ rɩ nɩɛ wuu nɛ́ náŋá.» 14 Dalɩɩla sɩɛ́ a Saŋsɔŋ pɛ́ dóŋ, kɔ́ʋ́ kánʋ́ nyúpʋpalɛ ná balpɛ arɩ́ pɛŋyooriŋmɛ́dole ná hé náŋá mɛ́ a pál, a píí tʋ́ pɛ́ŋyóórídaa mɛ́, ká cáási bʋ́lɛ́: «Saŋsɔŋ, Filisiti nɩɛ nɩ́ɩ́ kóí mí!» Ʋ há gírke ísí dóŋ mí, ʋ de pɔ́ŋ pɛ́ŋyooriŋmɛ́dole ná rɩ́ pɛ́ŋyooridaa ná arɩ́ pɛ́ŋyóórídacɔ́ŋsɛ ná wuu ní a cúnni.
15 Dalɩɩla baa bʋ́lʋ́ rɩ́ a bʋ́lɛ́: «Ɛ́ rɛ́ɛ́ rɛ́, ɩ sɩ́ɩ́ cóŋ kɛ́ɩ́ sɩɛrʋ tóŋ mí>> Naasɩ́ botoro nɛ́ nyɛ ɩ há nyɩ́sɩ́ŋ; a wɩ́ɩ́ dózeno ná mʋ́kur mákɛ́ páŋ.» 16 Dalɩɩla kénú báŋ mɛ́, tápʋ́l wuu arɩ́ ɛ́ wɩ́bʋlɛ́ tɩɩ, a cáásɛ fɩ́ɩ́rʋ́ arɩ́ ɛ́ wɩ́bʋlɛ́. Saŋsɔŋ nyammɛ gúl, 17 ká wúrú sɩɛrʋ wuu, a bʋl pɔ́ʋ́ bʋ́lɛ́: «Nyúfʋnɛ́ ha wɩ́ŋ nyúú mí lɔ́kɛ́, beé wɩ́ɛ́, ŋ maá luoru mí mɩ́nɛ́ wuu mí, Wɩɩsɛ nɛ́ tɩŋ. Rɩ nyúfʋnɛ́ nɛ́ lɔ́kɩ́ŋ nyúú mí, ŋ dóé sɩ́ tenni ká rɩ́ŋ rɩ́ nɩɛ wuu nɛ́ náŋá.» 18 Dalɩɩla nóú rɩ́ Saŋsɔŋ wúrú sɩɛrʋ wuu ní pɔ́ʋ́. Ɛ́ nɛ́ ʋ tʋŋ rɩ́wɔ́ bʋl Filisiti nɩɛ kuóre ná rɩ́ a bʋ́lɛ́: «Mʋ́l né mí, ɩ́ ko, ʋ wúrú sɩɛrʋ wuu ní a páŋ.» Filisiti nɩɛ kuóre sɩɛ́ isi a mʋ́ Dalɩɩla rɩ́, arɩ́wɔ́ nʋtalɔ́ meéwíé ná ɓa nɛ́sɛ mɛ́. 19 Dalɩɩla a Saŋsɔŋ pɛ́ dóŋ ʋ naasɛ mɛ́, kɔ́ʋ́ yɩ́rɛ báálɔ nɔ́ŋɔ, ʋ ko cónnú nyúpʋ́pálɛ ná balpɛ. A sɩɛ́ de púl ɛ́ mɛ́ nɛ́ Dalɩɩla wóllú, beé wɩ́ɛ́, Saŋsɔŋ báá wɩ dóé kené. 20 Dalɩɩla sɩɛ́ bʋ́lʋ́ rɩ́ a bʋ́lɛ́: «Saŋsɔŋ, Filisiti nɩɛ nɩ́ɩ́ kóí mí:» Ʋ há gírké isi dóŋ mí, ʋ sɛ́: «Ŋ sɩ́ lowi dí dóé ká láŋ tɩɩ anɛ ɛ́ ŋ há valɛ́ aá á.» Beé wɩ́ɛ́, ʋ fa wɩ ɛ̃ rɩ́ Nyuutɩna Wɩɩsɛ lɩ́ɔ́ ká tɔ́ʋ́. 21 Filisiti nɩɛ kánʋ́, a tóksú sɩ́ɛ́. Ká kánʋ́ a mʋ́ Gaza, a vɔ́wʋ́ rɩ́ kɔ́mɔ́ bɛŋzɛlduoru. A fɩ́kʋ́ mɛ́ ʋ nɛ́ gɩ́gɛrɛ bilé bɩnajaa mɛ́. 22 Amá Saŋsɔŋ nyúpʋ́sɛ ná ɓa há píéré báá púló aá nyʋ́.
Saŋsɔŋ dúú tɛŋbuóró ká sʋwɛ
23 Kal oro, Filisiti nɩɛ kuóre sɩɛ́ hé náŋá mɛ́, rɩ́wɔ́ ɔsɛ vʋk há zeno a pɔ́wɔ́ veno Dagɔŋ, ká sɩɛ́ jʋ́ɔ́sɛ. Ɓa sɛ́:
«Á veno Dagɔŋ,
kéŋrá dɩŋdɔmɔ Saŋsɔŋ hérá nɛ́sɛ mɛ́.»
24 Jamáŋ ná há ná Saŋsɔŋ, ɓa dɛ́nnɩ́wɔ́ veno Dagɔŋ, a bʋ́lɛ́:
«Á veno Dagɔŋ
kéŋ Filisiti nɩɛ dɩŋdɔmɔ Saŋsɔŋ hérá nɛ́sɛ mɛ́,
nɛ́ŋ ná há zɔkrá tɔ́ɔ́,
a ɓʋ́ʋ́sɩ́rá aá jɛ́rɛ.»
25 Tɛ́ŋ ná mɛ́ ɓa wuu sɩɛnnɛ há tɔrɛ wérí, ɓa sɛ́: «Ɩ́ mʋ́ lɩ́sɛ Saŋsɔŋ a kaa ko, rʋ́ʋ́ a mɔ́ŋwɩ́ɛ́ párá!» Ɓa mʋ́ lɩ́sɛ Saŋsɔŋ bɩnajaa ná mɛ́, a kaa ko ʋ a mɔ́ŋwɩ́ɛ́, nɩɛ mɔ́mʋ́ wérí, ká kánʋ́ mʋ́ tá jaa ná nafarsɛ pɛ́kɛ. 26 Saŋsɔŋ sɩɛ́ sʋ́l báwie ná fá há cɔ́ʋ́ nɛ́sɛ mɛ́ aá tɩ́ɛ́sʋ́, a bʋ́lɛ́: «Pɛ́ŋ mɛ́ rɩ́ŋ tɩkɛ nafarsɛ ná há kéŋ jaa ná cɛ́ mɛ́, a tɩ́ɛ́kɩ́wɔ́ mɛ́.»
27 Rɩ báála arɩ́ háála sɩɛ́ fa sú ɛ́ jaa. Filisiti nɩɛ kuóre ná má wuu fa mɩŋ ráŋ nɛ́. Báála rɩ́ háála fa pérí bʋ́ɩ́toro (3 000), a ké luso daha, aá bel Saŋsɔŋ mɔŋwɩ́ɛ́. 28 Ɛ́ nɛ́ Saŋsɔŋ sʋl Nyuutɩna Wɩɩsɛ a bʋ́lɛ́: «Nyuutɩna Wɩɩsɛ, ŋŋ́ sʋ́lɩ́, bɩ́ɩ́nɩ́ŋ wɩ́ɛ́! Páŋ dóé mʋ́l néé mí dʋŋɔ, óó Wɩɩsɛ, rɩ́ŋ díŋ hatɩŋnɛ́ tɛŋbuoró Filisiti nɩɛ nyúú, ŋ sɩ́ɛ́ nyáŋ wɩ́ɛ́.» 29 Ká Saŋsɔŋ sɩɛ́ ɔsɛ láárɛ sɩ́sɩ́ɛ́nnʋ́wa nafarsɛ ná bɛllɛ há kéŋ jaa ná cɛ́. Ʋ púú néduu nɛ́sɛ tɩ́ɛ́kɛ nɔ́ŋɔ mɛ́, ká nɛ́gʋ́ɔ́ má tɩ́ɛ́kɛ nɔ́ŋɔ mɛ́. 30 Ká cáási a bʋ́lɛ́: «Ŋ có rɩ́ŋ rɩ́ Filisiti nɩɛ nyáŋ nɛ́ sʋsɛ!» Ká yiki náfarsɛ ná rɩ́rʋ́ dóé wuu, ʋ ɓál cú kuóre ná arɩ́ nɩɛ ná wuu fa há mɩŋ jaa ná sɩɛrʋ. Ɛ́ kal, nɩɛ ná há tɩŋʋ́ mɛ́ a sʋsɛ káŋ, a kɩ́llɛ nɩɛ ná ʋ há ɓʋ́ʋ́sɛ́ ʋ hiẽso tɛ́ŋ mɛ́.
31 Ʋ maábɩnáŋa rɩ́rʋ́ áná jaa nɩɛ wuu ko púú lɛlɔ; a kaa bɩ́r mʋ́ húú áná Manʋa lɛlbule mí, Sora rɩ́ Ɛsɩtahɔl pɛ́kɛ.
Saŋsɔŋ há a Ɩzɩrayɛl nɩɛ sarɩ́yadííro, ʋ a bɩŋsɛ mɛrɛ́ nɛ́.