Saŋsɔŋ tɛŋbuoró dí wɩ́ɛ́
15
1 Tápʋlɛ mʋɔ́ há dáárɛ́ har mɛ́, bilé kʋ́sɛ́ tɛ́ŋ mɛ́, Saŋsɔŋ ísó a ka bʋwie, a mʋ́ rʋ́ʋ́ nóú háálɔ, a sɩɛ́ bʋ́lʋ́ háálɔ áná rɩ́ a bʋ́lɛ́: «Ŋŋ́ sʋ́lɩ́ ká rɩ́ŋ zʋ́ŋ háálɔ rɩ́.» Ɛ́ nɛ́ ʋ háálɔ áná wʋ́ʋ́ ŋmɛ́nɔ pɛ́ɩ́. 2 Ká bʋ́l Saŋsɔŋ rɩ́ a bʋ́lɛ́: «Ŋ fa bɩ́ɩ́nɔ́ rɩɩ sɩɛrʋ lʋ́ʋ́ rɩ, rɩ́ɩ́ báá wʋ́ʋ́ có rí, ɛ́ nɛ́ ŋ púú pɛ́ɩ́ hájaasɛ cana naŋnɔ́ŋɔ ná. Ʋ maábio ní taŋa mɩnɛ́, ʋ wér má tɩɩ kʋ́ʋ̃́ máála; jɔ́ʋ́ nɛ́, ʋ gbel mí.» 3 Ɛ́ nɛ́ Saŋsɔŋ sɛ́: «Mʋ́l néé mí, rɩŋ nɛ́ pí bɔ́ŋbɔ́ŋ a Filisiti nɩɛ nyáŋ mɛ́, ʋ báá tóŋ nyúú wɩ́ɩ́.»4 Ká de mʋ́ kɛsɛ kílowa zotoro; a káŋwɔ́ mʋ́dunni hé náŋá mɛ́ bɛllɛwa, a pá nyɔ́dúó a héwó mʋ́dunni ná pɛ́ksɛ, a vɔwɛ. 5 Ká hé níŋ nyɔ́dúí wuu mí, ká kírwó hé Filisiti nɩɛ biléwa baksɛ mɛ́. Ɛ́ nɛ́ ʋ a, a nyɩkɛ biléwa ná ɓa há kʋ́sɛ́ arɩ́wɔ́ ná há cɛ́ dahá, rɩ́ víínyiwa, arɩ́ ólíívi tuuni. 6 Filisiti nɩɛ sɩɛ́ bɔsɛ a jɩ́ja tɩ́na: «Áŋ má rɛ́ a wɩ́ɩ́ né duo>>» Ɓa bʋl pɔ́wɔ́ a bʋ́lɛ́: «Saŋsɔŋ nɛ́! Beé wɩ́ɛ́ Tɩmɩna báálɔ toló ná ʋ fa háá jɛ́ɛ́ nɛ́, ʋ áná bɩ́r píí pá Saŋsɔŋ tɩɩ nannɔ́ŋɔ, ɛ́ nɛ́ tɛ ʋ tʋ́ŋ nyɛ.» Ɛ́ nɛ́ Filisiti nɩɛ mʋ́ nyɩ́kɛ háálɔ ná rɩ́rʋ́ áná níŋ. 7 Saŋsɔŋ sɩɛ́ bʋ́lwɔ́ rɩ́ a bʋ́lɛ́: «Ɩ́ há tʋŋ nyɛ, mʋ́l né mí, ŋ wɩ́ɩ́wa píí tá rɩ́ŋ nɛ́ wɩ́ŋ tɛŋbuoró díé, ɩ́ nyúú.» 8 Ká mʋ́ yówó, a dí dóé ɓa nyúú a zɔ́kwɔ́ kɩ́ŋkáŋ. Ká lɩɩ fá mʋ́ a féŋsi Ɩtaŋ bʋ́ɩ́ bʋɔ sɩɛrʋ.
Saŋsɔŋ rɩ́ kokúme tayaá wɩ́ɛ́
9 Filisiti nɩɛ mʋ́ɔ́ cíkwó púl Ziida tíé mí, a héwó lalyoore ɓa jɛ́rɛ mʋ́ lɩ dɩhɩ̃́ ná ɓa haá yɩ́rɛ Lehi. 10 Ziida nɩɛ bɔsɛ Filisiti nɩɛ a bʋ́lɛ́: «Beé rí tɛ ɩ́ ko aá yó rá>>» Ɛ́ nɛ́ ɓa sɛ́: «Saŋsɔŋ nɛ́ á jɩ́ja ráá kaa vɔwɛ, a bɛ́ŋsʋ́ anɛ ʋ há bɛ́ŋsɩ́rá ɛ́.» 11 Ɛ́ nɛ́ Ziida nɩɛ bʋ́ɩ́toro (3 000) tuwi Ɩtaŋ bʋ́ɩ́ bʋɔ ná sɩɛrʋ, a bʋl Saŋsɔŋ rɩ́ a bʋ́lɛ́: «Ɩ wɩ ɛ̃́ rɩ Filisiti nɩɛ nyáŋ dúókírá>> Beé rí ɩ á rá nyɛ>>» Saŋsɔŋ bʋ́lwɔ́ rɩ́ a bʋ́lɛ́: «Ɓa há bɛ́ŋsɩ́ŋ ɛ́ ná nɛ́, ŋ má bɛ́ŋsɩ́wɔ́.» 12 Ɓa bʋ́lʋ́ rɩ́ a bʋ́lɛ́: «Á túwó ráá vɔ́wɩ́ pá Filisiti nɩɛ nɛ́.» Ɛ́ nɛ́ Saŋsɔŋ sɛ́: «Ɩ́ ŋmɩ́ɛ́sɛ, rɩ́ɩ́wa tɩɩ wɩ́ŋ ɓʋ́.» 13 Rɩ ɓa sɛ́: «Aɩ́, á wɩ kóé ráá ɓʋ́ɩ́ nɛ́, á taŋá ja ráá vɔ́wɩ́ pá Filisiti nɩɛ nɛ́.» Ɓa sɩɛ́ vɔ́wʋ́ rɩ́ ŋmɛ́fɛlɛ bɛllɛ, a kaa lɛ́ bʋɔ ná sɩɛrʋ. 14 Ʋ há mʋ́ɛ́ peri Lehi, Filisiti nɩɛ kúó cémú rɩ́ kulí. Amá mʋ́l ná tɩɩ mɛ́, rɩ Nyuutɩna Wɩɩsɛ sabɩɩna dóé túwí Saŋsɔŋ nyúú: ŋmɛ́sɛ ná ɓa fa há píé vɔ́sʋ́ vaŋsɛ, ɓa wuu conni, a ɓallɛ anɛ bʋɔ ŋmɛ́ŋ níŋ há díé. 15 Kɔ́ʋ́ ná kokúme tayaá ɓɩlɔɔ, a píí ɓʋ́ʋ́sɛ nɩɛ bʋ́ɩ́. 16 Ká cáási a bʋ́lɛ́:
«Kokúme tayaá nɛ́,
ŋ kaa ɓʋ́ʋ́sɛ nɩɛ bʋ́ɩ́,
kokúme tayaá nɛ́,
ŋ kaa ɓʋ́ʋ́sɛ nɩɛ jɛrɛ.»
17 Ʋ há bʋ́l ɛ́ ko tenni, ʋ pí kokúme tayaá ná yoo tá dɩbólí. Ɓa pá ɛ́ dɩhɩ̃́ yɩr Ramatɛlehi, ʋ mʋ́l nɛ́ ka “tayaá paalɔ”. 18 Nyinyʋ́ɔ́sɛ sɩɛ́ fa kéŋ Saŋsɔŋ wérí, ɛ́ nɛ́ ʋ sʋ́l Nyuutɩna Wɩɩsɛ a bʋ́lɛ́: «Óó Wɩɩsɛ, ɩ nɛ́ pɛ́ŋ mɛ́, ŋ dí ballɩ́ ɓɩzeno né. Ká beé rí sɩɛ́ tɛ mʋ́l néé mí, ɩɩ́ ja rɩ́ nyinyʋɔ́sɛ wɩ́ɛ́ a, rɩ pɛŋkɛnnɛ tɩ́náwa nyáŋ wólli ɓʋ́ŋ>>» 19 Ɛ́ nɛ́ Wɩɩsɛ a Lehi bʋ́ɩ́ ná póŋ nyii, Saŋsɔŋ nyɔ a baa ná dóé. Ɓa pá ɛ́ nyibúlbʋɔ yɩr “Koore nyibúlbʋɔ”, ʋ mʋ́l nɛ́ ká “nɛrɔ ná háá yɩ́rɛ́, nyibúlbʋɔ” arɩ́ zaa wuu ʋ há mɩŋ Lehi mí.
20 Saŋsɔŋ há ká Ɩzɩrayɛl nɩɛ sarɩ́yadííro dí bɩŋsɛ mɛrɛ́ nɛ́. Ɛ́ tɛ́ŋ mɛ́, rɩ Filisiti nɩɛ níí dí dóé ɓa nyúú.