Saŋsɔŋ hájaasɛ wɩ́ɛ́
14
1 Kal oro, Saŋsɔŋ mʋ́ Tɩmɩna, a ná Filisiti nɩɛ toló, ʋ zʋ́ʋ́ sɩ́ɩ́. 2 Ʋ há bɩrɛ mʋ́ jaa, ʋ bʋ́lɔ́ pɔ́ʋ́ áná rɩ́rʋ́ maá a bʋ́lɛ́: «Ŋ ná Filisiti nɩɛ toló, Tɩmɩna mɛ́, ŋ sɩɛ́ có rɩ́ɩ́wa mʋ́ sʋ́lʋ́ páŋ rʋ́ʋ́ áŋ háálɔ.» 3 Ɛ́ nɛ́ ʋ áná rɩ́rʋ́ maá sɛ́: «Ɩ wɩ toló néé ɩ duo sɩɛrʋ, ɛ́ rá má á nɩɛ sɩɛrʋ, ká rɩ́ɩ́ ísí mʋ́ ja Filisiti nɩɛ toló ní, pɛŋkɛnnɛ tɩ́náwa nyáŋ>>» Amá Saŋsɔŋ bʋ́lʋ́ áná rɩ́ a bʋ́lɛ́: «Ɛ́ toló ní zʋ́ŋ sɩ́ɩ́, jɔ́ʋ́ nɛ́ páŋ.» 4 Saŋsɔŋ áná rɩ́rʋ́ maá é wɩ ɛ̃ rɩ Saŋsɔŋ wɩ́ɩ́ ná ká Nyuutɩna Wɩɩsɛ cólle sɩɛrʋ nɛ́; ʋ jɩ́já gbel rʋ́ʋ́ tɩŋ ráŋ a yo Filisiti nɩɛ. Ɓeé wɩ́ɛ́, ɛ́ tɛ́ŋ mɛ́, Filisiti nɩɛ faá bɛ́ŋsɛ Ɩzɩrayɛl nɩɛ.5 Saŋsɔŋ rɩ́rʋ́ áná arɩ́rʋ́ maá mʋ́ Tɩmɩna. Ɓa há mʋ́ɛ́ peri Tɩmɩna tɔ́ɔ́, víínyi tuuni dɩhɩ̃́, kɩ́ŋkaŋɓʋɔl úúró, a nyɩ́ɩ́rɛ lɩɩ céŋ Saŋsɔŋ. 6 Nyuutɩna Wɩɩsɛ sabɩɩna túwí Saŋsɔŋ nyúú, ʋ gburki kɩ́ŋkáná ná rɩ́ nɛ́wuole, a kánʋ́ cɔ́nnɛ anɛ bʋwie. Amá ʋ wɩ ɛ́ wɩ́ɩ́ bʋ́lɛ́ pɔ́ʋ́ áná rɩ́rʋ́ maá. 7 Ká daarɛ mʋ́ Tɩmɩna, a bɛ́ bɩsɛ rɩ́ Filisiti nɩɛ toló ná. Ʋ ɔsɛ zʋ́ʋ́ sɩ́ɩ́ wérí. 8 Tápʋlɛ́ mʋɔ́ há daarɛ́, ʋ sɩɛ́ bɩrɛ aá mʋ́ Tɩmɩna rʋ́ʋ́ já háálɔ ná. Ʋ cʋrɛ zʋ rʋ́ʋ́ ná kɩ́ŋkáná ná ɓɩsʋwɛ mɛ́. Ʋ béló, rʋ́ʋ́ sʋ́ɔ́rɔ́ a pal lɛ́, ká tʋwíé cɛ́ kɩkarʋ ráŋ, a hé nʋʋ. 9 Ʋ lɔkɛ tʋʋ ná hóú nɛ́sɛ mɛ́, a dí aá va. Ʋ há mʋ́ɛ́ púú áná rɩ́rʋ́ maá, ʋ pí tʋʋ ná pɔ́wɔ́ má ɓa dí, ká ʋ taŋa wɩ bʋ́lɛ́ pɔ́wɔ́, rɩ́ kɩ́ŋkaŋsʋwɩ́ mɛ́ nɛ́ ʋ lɔ́kʋ́.
Saŋsɔŋ mʋrɛ mʋ́mʋ́rɩ́ a pá Filisiti nɩɛ
10 Ká Saŋsɔŋ áná sɩɛ́ mʋ́ toló ná jaa. Saŋsɔŋ sɩɛ́ a hájaasɛ cana, anɛ ɛ́ heŋbiwafɛlɛ háá ɛ́ɛ́. 11 Filisiti nɩɛ há nóú, ɓa lɩ́sɛ heŋbiwafɛlɛ mɛrɛ́ rí fí, ɓa lɛ́lʋ́. 12 Saŋsɔŋ sɩɛ́ bʋ́lwɔ́ rɩ́ a bʋ́lɛ́: «Ŋ sɩ́ mʋrɛ mʋ́mʋ́rɩ́ a pɛ́ɩ́wa. Rɩ́ɩ́wa nɛ́ lɩ́sʋ́ sɩ́ɛ́ ká máŋsʋ́ mʋ́l páŋ, ʋ sɩ́ɩ́ mɛ́, rɩ hájaasɛ cana tápʋlɛ balpɛ ná nɛ́ ha wɩ daarɛ́, ŋ sɩ́ pɛ́ɩ́wa gɛyɩra mɛrɛ́ rí fí, arɩ́ cana gɛsuusi má mɛrɛ́ rí fí. 13 Amá rɩ́ɩ́wa nɛ́ wɩ wóllé lɩ́sʋ́ mʋ́l páŋ, ɩ́ nɛ́ sɩ́ páŋ gɛyɩra mɛrɛ́ rí fí, arɩ́ cana gɛsuusi má mɛrɛ́ rí fí.» Ɛ́ nɛ́ ɓa sɛ́: «Makɛ mʋ́mʋ́rɩ́ ná, áá zésú rí.» 14 Saŋsɔŋ bʋ́lwɔ́ rɩ́ a bʋ́lɛ́:
«Ɓɩdííli lɛ́ dííro sɩɛrʋ ní.
Oŋ ŋmɔmɔ lɛ́ oŋduoko sɩɛrʋ nɛ́.
Beé rí kɔ́ʋ́>>»
Ʋ pérí tápʋlɛ botoro, rɩ heŋbiwafɛlɛ ná há wɩ sɩ́ŋsʋ́ɔ́lɔ ná mʋ́l ɛ̃. 15 Tápʋlɛ balpɛ kal, ɓa bʋl Saŋsɔŋ háálɔ rɩ́ a bʋ́lɛ́: «Nyɩ́sɩ́ bála, rʋ́ʋ́ makɛ mʋ́mʋ́rɩ́ ná mʋ́l párá, rɩ́ ɛ́ rá, á sɩ́ nyɩ́kɩ́ rɩ́rɩ́ áná jaa wuu níŋ. Ɩ́ yɩ́rɛ́ rá a ko rɩ́ɩ́wa lárá ɓɩɛ nɛ́>>» 16 Saŋsɔŋ háálɔ sɩɛ́ wíí kánʋ́ bála baŋ mɛ́, bʋ́lɛ́: «Ɩ wɩ́ŋ có, ɩ bɛ́rɩ́ŋ nɛ́. Ɩ makɛ mʋ́mʋ́rɩ́ páŋ duo nɩɛ, ká wʋ́ʋ́ mʋ́l lɩsɛ́ páŋ.» Ɛ́ nɛ́ Saŋsɔŋ sɛ́: «Ŋ wʋ́ʋ́ mʋ́l lɩ́sɛ́ páŋ áná rɩ́rɩ́ŋ maá má tɩɩ. Beé rí tɛ, rɩ́ŋ lɩ́sʋ́ mʋ́l pɛ́ɩ́ é ní>>» 17 Cana ná tápʋlɛ balpɛ ná wuu sɩɛrʋ, Saŋsɔŋ háálɔ de wii kánʋ́ baŋ mɛ́ nɛ́. Ʋ balpɛ ná kal, Saŋsɔŋ gúló ká lɩ́sɛ mʋ́mʋ́rɩ́ ná mʋ́l pɔ́ʋ́. Ɛ́ nɛ́ ʋ káá lɩɩ cesi a pɔ́ʋ́ duo nɩɛ. 18 Tápʋlɛ balpɛ kal, ká rɩ́ tɔ́ɔ́ zɩŋ bíri, tɔ́ɔ́ ná nɩɛ kúó, a bʋl Saŋsɔŋ rɩ́ a bʋ́lɛ́:
«Beé rí báá ŋmɔmɛ́ a kɩ́llɛ tʋʋ>>
Beé rí baá duoké, a kɩ́lllɛ kɩ́ŋkáná>>»
Ɛ́ nɛ́ ʋ bʋ́lwɔ́ rí a bʋ́lɛ́: «Rɩ́ɩ́wa nɛ́ fa wɩ́ŋ nɔbɩra a kené parɛ,
ɩ́ fa wɩ mʋ́mʋ́rɩ́ ná mʋ́l wuó zɩŋ.»