Saŋsɔŋ lʋlɛ́ wɩ́ɛ́
13
1 Ɩzɩrayɛl nɩɛ báá ɔ́ɔ́ zɔ́kɛ Nyuutɩna Wɩɩsɛ mɛ́. Ɛ́ nɛ́ tɛ Nyuutɩna Wɩɩsɛ píwó hé Filisiti nɩɛ nɛ́sɛ mɛ́, ɓa bɛ́ŋsɩ́wɔ́ bɩŋsɛ mɛɛ́sɛllɛ.2 Daŋ jɩmʋ́l báálɔ oro fa mɩŋ Sora mɛ́, ɓaá yɩ́rʋ́ Manʋa. Ʋ háálɔ fa ká hápɩ́r rɛ́, a wɩ bio kéné. 3 Kal oro, Nyuutɩna Wɩɩsɛ malɩ́ka kénú tɩɩ nyɩ́ɩ́sɛ ɛ́ háálɔ mɛ́, a bʋ́lʋ́ rɩ́ a bʋ́lɛ́: «Ŋ ɩ́ɔ̃́ rɩ́ɩ́ wɩ bio kéné, ɩ há ká hápɩ́r wɩ́ɛ́. Ɩ sɩɛ́ sɩ́ ká puo, a lʋl heŋbóle. 4 Amá, a de pɔ́ mʋ́l néé mí, pɔ́ɩ́ tɩɩ mɛ́ wérí, a sɩ́ dɩvɛ́ŋ rɩ́ sɩdúó oro wuu nyɔ́; a sɩ́ busunnú ɓɩdííli oro wuu má dí, 5 beé wɩ́ɛ́, ɩ sɩ́ ká puo a lʋl heŋbóle. Nyúfʋnɛ́ wʋ́ʋ́ nyúú mí lɔkɛ, beé wɩ́ɛ́ ʋ luoru mí mɩnɛ́ wuu, Wɩɩsɛ nɛ́ tʋ́ʋ̃́, ʋ nɩ́ɩ́ á rʋ́ʋ́ púl yoo la Ɩzɩrayɛl ta Filisiti nɩɛ nɛ́sɛ mɛ́.» 6 Háálɔ ná há zʋʋ jaa, ʋ bʋ́lɔ́ pɔ́ʋ́ bála, a bʋ́lɛ́: «Wɩɩsɛ báálɔ nɔ́ŋɔ kénú tɩɩ ko nyɩ́ɩ́sɩ́ŋ mɛ́. Ʋ dé nɛ́ Wɩɩsɛ malɩ́ka nɛ́, beé wɩ́ɛ́ ʋ belé kéŋ héwíŋ. Ŋ wʋ́ʋ́ dɩlɩ́ɩ́ mɛ́ bɔ́sɛ́, kɔ́ʋ́ má wʋ́ʋ́ yɩr mákɛ́ páŋ. 7 Ʋ bʋ́lɩ́ŋ rɩ́ a bʋlɩ́ŋ sɩ́ ká puo, a lʋl heŋbóle. Amá rɩ́ŋ pɔ́ŋ tɩɩ mɛ́, a báá sɩ́ dɩvɛ́ŋ rí sɩdúó oro wuu nyɔ́, a sɩ́ busunní ɓɩdííli oro má wuu dí, beé wɩ́ɛ́ Wɩɩsɛ nɛ́ tʋ́ʋ̃́, ʋ luoru mí mɩ́nɛ́ wuu mí, a kaá jɔ́ʋ́ sʋʋ.»
8 Ɛ́ nɛ́ Manʋa sʋl Nyuutɩna Wɩɩsɛ a bʋ́lɛ́: «Ŋŋ́ sʋ́lɩ́ Nyuutɩna, lo rɩ Wɩɩsɛ báálɔ ná ɩ há tʋ́mɛ́, bɩ́rko máŋsɩ́rá ɛ́ ná há mɔhɛ̃́ ráá a, heŋbóle ná lʋ́lɛ́ mɛ́.» 9 Manʋa há bʋl ɛ́, Wɩɩsɛ nɩ́ɔ́: ʋ ló tɛ́ŋ ná mɛ́ háálɔ ná há mɩŋ baka mɛ́, Wɩɩsɛ malɩ́ka ná baa ko nyɩ́ɩ́sʋ́ mɛ́. Ʋ bála Manʋa fá tóú laka. 10 Ɛ́ nɛ́ ʋ fá kɩ́kɛ́lɛ mʋ́ bʋl pɔ́ʋ́ bála, a bʋ́lɛ́: «Ná, báálɔ ná kal há kóŋ rí, ʋ nɛ́ zaa báá kenú tɩɩ ko nyɩ́ɩ́sɩ́ŋ mɛ́.» 11 Manʋa sɩɛ́ ísí tɩŋʋ́ háálɔ mɛ́, a mʋ́ báálɔ ná rɩ́, a bɔ́sʋ́ a bʋ́lɛ́: «Ɩ nɛ́ ɓɩɛ́na ka báálɔ ná há bʋ́l wɩ́ɛ́ páŋ háálɔ>>» Ɛ́ nɛ́ ʋ sɛ́: «Óó, ŋ nɛ́.» 12 Manʋwa baa bʋ́lʋ́ rɩ́ a bʋ́lɛ́: «Rɩɩ wɩ́bʋlɛ́ nyáŋ nʋɔ nɛ́ súé, beéwa rɩ́ ká wɩ́ɛ́ ná há mɔhɛ̃́ ráá tɩŋwɔ́ naasɛ heŋbóle ná yɩr mɛ́>> Beé rí mɔhɛ̃́ ráá aa pɔ́ʋ́>>» 13 Nyuutɩna Wɩɩsɛ malɩ́ka ná bʋl Manʋwa rɩ́ a bʋ́lɛ́: «Ɩ háálɔ mɔhɔ̃́ rʋ́ʋ́ pɔ́ʋ́ tɩɩ mɛ́ rɩ́ wɩ́ɛ́ ná wuu ŋ há mákɛ́ pɔ́ʋ́: 14 ʋ wɩ víínyi óŋ wuu dí, ʋ wɩ dɩvɛ́ŋ rɩ́ sɩduoru nyɔ́; ʋ wɩ mɔhɛ̃́ rʋ́ʋ́ dí busunnu óŋ wuu. Ʋ mɔhɔ̃́ rʋ́ʋ́ tɩŋɩ́ŋ wɩ́makɛ́ ná wuu wérí.» 15 Manʋa sɩɛ́ bʋl Nyuutɩna Wɩɩsɛ malɩ́ka ná rɩ́ a bʋ́lɛ́: «Ké, ráá ka bʋwie a dɩsɛ pɛ́ɩ́.» 16 Amá Malɩ́ka ná sɛ́: «Rɩ́ŋ nɛ́ kéné má, ŋ wɩ́ɩ́ ɓɩdííli dí. Amá rɩ́ɩ́ nɛ́ có, ɩ kaa ɔsɛ vʋkfisi pá Nyuutɩna Wɩɩsɛ.» Beé wɩ́ɛ́ Manʋwa fa wɩ ɛ̃ rɩ́ Nyuutɩna Wɩɩsɛ malɩ́ka nɛ́. 17 Manʋa bɔsɛ Nyuutɩna Wɩɩsɛ malɩ́ka ná a bʋ́lɛ́: «Ɩ yɩr nɛ́ sɩɛ́ bee>> A makɛ, rɩɩ wɩbʋ́lɛ́ ná nʋɔ nɛ́ súé, rá ko pɛ́ɩ́ díé.» 18 Malɩ́ka ná sɛ́: «Ɩɩ́ jáŋ yɩr rɩ́ɩ́ a beé>> Ŋ yɩr ká yɩgɩrɩ́ rɛ́.» 19 Manʋa sɩɛ́ ka bʋwie rɩ́ pálɔ ná, a kaa mʋ́ ɔsɛ vʋk bʋ́ɩ́ daha, a pá Nyuutɩna Wɩɩsɛ ná háá a wɩ́gɩrɛ́. Ká Manʋa rɩ́rʋ́ háálɔ cɩ́ aá bel 20 níŋpoo há ísí koro ná daha aá zɛ́ bána. Ɓa ná Nyuutɩna Wɩɩsɛ malɩ́ka ná rʋ́ʋ́ ísí níŋpoo ná sɩɛrʋ a zɛ́ bána rɩ́, héwíŋ káŋwɔ́, ɓa ɓallɛ a káŋwɔ́ sɩ́ɛ́ cú tíé. 21 Nyuutɩna Wɩɩsɛ malɩ́ka báá wʋ́ʋ́ tɩɩ kené nyɩ́ɩ́sɛ Manʋa rɩ́rʋ́ háálɔ mɛ́. Ɛ́ mɛ́ nɛ́ Manʋwa sɩɛ́ zɩŋ rɩ́ Nyuutɩna Wɩɩsɛ malɩ́ka nɛ́. 22 Manʋa sɩɛ́ bʋ́lʋ́ háálɔ rɩ́ a bʋ́lɛ́: «Á há ná Wɩɩsɛ nyɛ, á sɩ́ sʋsɛ.» 23 Ɛ́ nʋ́ʋ́ háálɔ sɛ́: «Rɩ Nyuutɩna Wɩɩsɛ nɛ́ faá jɛ́ ráá sʋsɛ, ʋ fa wɩ ráá nɛ́sɛ vʋkfisi rɩ́ pálɔ náá la. Ʋ fá waá lo ráá sɩ́ɛ́ ná wɩ́ɛ́ nyáŋ, ká rʋ́ʋ́ máŋsɛ wɩ́ɛ́ nyáŋ má a párá.»