Tola wɩ́ɛ́
10
1 Abɩmɛlɛkɛ har mɛ́, Pʋa bio Tola há ká Dodo nihĩ́, a lɛ Ɩsakaarɛ jɩmʋ́l nɩɛ sɩɛrʋ, ʋ nɛ́ ísé yoo la Ɩzɩrayɛl nɩɛ tá. Ʋ fa mɩŋ Samiiri mí ní, Ɩfɩrayɩŋ pallɛ sɩɛrʋ. 2 Ʋ ká sarɩ́yadír Ɩzɩrayɛl mɛ́ bɩŋsɛ mɛrɛ́ rɩ́ botoro ká sʋwɛ, ɓa húú Samiiri mí.Yayir wɩ́ɛ́
3 Ʋ har mɛ́, Galaadɛ báálɔ Yayir nɛ́ tʋ́kʋ́ mɛ́. Ʋ ká sarɩ́yadír Ɩzɩrayɛl mɛ́ bɩŋsɛ mɛrɛ́ rɩ́ bɛllɛ nɛ́. 4 Ʋ fá kéŋ bɛlɛ mɛrɛ́ rɩ́ fí, háá zɛ́ kokúsi mɛrɛ́ rɩ́ fí. Ɓa fá kéŋ tɔ́wɩ́ɛ́la má mɛrɛ́ rɩ́ fí Galaadɛ dɩtɩ́llɛ mɛ́. Arɩ́ zaa wuu, ɓaá yɩ́rwɔ́ Yayir tɔ́wɩ́ɛ́la nɛ́. 5 Yayir há sʋ́wɛ́, ɓa húú Kamɔŋ mɛ́ nɛ́.
Zefte wɩ́ɛ́
6 Ɩzɩrayɛl nɩɛ báá ɔ́ɔ́ zɔkɛ Nyuutɩna Wɩɩsɛ mɛ́. Ɓa sʋ́llʋ́ wɩ́ɛ́, a vɛ rɩ́wɔ́ cʋ́ɔ́lʋ́. Ɓa ɓáárɛ Baalwa arɩ́ Astartewa há ká Siiri, Sɩɩdɔŋ, Mʋwabɛ, Amɔŋ arɩ́ Filisiti nɩɛ venni. 7 Ʋ ɛ́ ná pusi Nyuutɩna Wɩɩsɛ cɔ́ɛ́, ʋ píwó hé Filisiti arɩ́ Amɔŋ nɛ́sɛ mɛ́. 8 Ɛ́ bɩna Filisiti arɩ́ Amɔŋ nɩɛ bɛ́ŋsɛ Ɩzɩrayɛl nɩɛ wérí, ká bɛ́ŋsɩ́wɔ́ ná há mɩ́ŋ Amɔɔrɛ há ká Galaadɛ dɩ́tɩ́llɛ, Zʋrdɛŋ fuo daarɛ́, a kaá mʋ́ peri bɩŋsɛ fí arɩ́ córí. 9 Amɔŋ ha tɩŋ daarɛ Zʋrdɛŋ fuo cɔɔ rɩ́, a yoo Ziida, rɩ́ Bɛŋzamɛ, arɩ́ Ɩfɩrayɩŋ jɩmʋ́ʋ́la ná há mɩŋ róŋ. Ɛ́ zɔ́kɛ́ Ɩzɩrayɛl nɩɛ sɩɛrʋ kɩ́ŋkáŋ. 10 Ɛ́ nɛ́ Ɩzɩrayɛl nɩɛ gúl ká cáási yɩ́rɛ Nyuutɩna Wɩɩsɛ a bʋ́lɛ́: «Fárá búŋse, beé wɩ́ɛ́, á ɔ́ɔ́ zɔ́kɩ́ mɛ́. Á vɛ́ɩ́ tá, ɩ é, á Wɩɩsɛ, kaá cʋ́ɔ́lɛ Baalwa.» 11 Nyuutɩna Wɩɩsɛ bʋ́lwɔ́ rɩ́ a bʋ́lɛ́: «Ezipiti, Amɔɔrɛ, Amɔŋ, Filisiti, 12 Sɩɩdɔŋ, Amalɛkɛ, arɩ́ Mawɔŋ nɩɛ há bɛ́ŋsɩ́wa, ɩ́ ŋmɔ́wɛ búŋse héŋ mí. Ŋ sɩɛ́ wɩ́ɩ́wa lɛ́ɛ́ tá ɓa nɛ́sɛ mɛ́>> 13 Amá mʋ́l né mí, ɩ́ báá vɛ́ŋ tá, káá ɓaarɛ venni. Ɛ́ nɛ́ sɩɛ́ tɛ ŋ má báá wɩ́ɩ́wa láá tá. 14 Ɩ́ cáási hé venni ná ɩ́ há pííwa yɩɛla héwó mí, ɩ́ wɩɩla tɛ́ŋ mɛ́. Ɓa nɛ́ mɔhɛ̃́ rɩ́wɔ́ lɛ́ɩ́wa tá. 15 Ɩzɩrayɛl nɩɛ báá bʋ́l Nyuutɩna Wɩɩsɛ rɩ́ a bʋ́lɛ́: «Á ɔ́ɔ́ zɔ́kɩ́ mɛ́. Bɛ́ŋsɩ́rá a mɔ ɛ́ ná wuu ɩ há có, amá zaá baa lárá tá!» 16 Ɓa páwɔ́ venni ná fá há mɩŋwɔ́ rɩ́, a yoo tá, ká baa púl aá cʋ́ɔ́lɛ Nyuutɩna Wɩɩsɛ. Ɛ́ nɛ́ Nyuutɩna Wɩɩsɛ fáwɔ́ búŋse.