Zedeyɔŋ dí dóé Madɩaŋ nɩɛ nyúú
7
1 Cɩ́cʋɔ fól, Zedeyɔŋ ná ɓa háá yɩ́rɛ́ Yerubaal rɩ́rʋ́ lalyoore ísó mʋ́ cíkwó púl Harɔdɛ nyibúlbʋɔ laka. Ká Madɩaŋ nɩɛ má púl mɩŋ típaŋtaŋɩ́ wɩɩsɛ dɩpomí nɛ́gʋɔ rɩ́ cɔɔ, Moore dúŋduó laka.2 Nyuutɩna Wɩɩsɛ bʋl Zedeyɔŋ rɩ́ bʋ́lɛ́: «Ɩ lalyoore ná kánɔ́ daarɛ rɩ́ŋ kɛ́sɛ Madɩaŋ nɩɛ héwó nɛ́sɛ mɛ́. Ɩzɩrayɛl nɩɛ sɩ́ nyʋ́nyʋ́kɛ a bʋ́lɛ́ rɩ́wɔ́ tɩɩ dóé ní lɔ́wɔ́ tá. 3 Ɛ́ wɩ́ɛ́, bʋl nyɛ pɛ́ɩ́ lalyoore ná: «Nɩɛ ná wuu há wɩ baŋcɩpɩrɩ́ kené káá fá héwíŋ, rɩ́wɔ́ cɛ́ Galadɛ paalɔ mɛ́ a bɩrmʋ́ jɩɩsɛ.»» Lalyoore ná sɩɛrʋ, ɓa báála bʋ́ɩ́ mɛrɛ́ rɩ́ bɛllɛ (22000) nɛ́ bɩ́rɛ́ mʋ́ jaa, ká káánɛ bʋ́ɩ́ fí (10 000). 4 Nyuutɩna Wɩɩsɛ baa ha bʋ́l Zedeyɔŋ rɩ́ bʋ́lɛ́: «Ɩ lalyoore ná ha kánɔ́ daarɛ, káŋwɔ́ tuwi nyii laka, rɩ́ŋ tʋ́ɔ́sɩ́wɔ́ a pɛ́ɩ́. Ŋ sɩ́ makɛ nɩɛ ná há mɔhɛ̃́ rɩ́wɔ́ mʋ́ arɩ́wɔ́ ná há wɩ mɔhɛ̃́ rɩ́wɔ́ mʋ́ a pɛ́ɩ́.» 5 Zedeyɔŋ a ʋ lalyoore ná tuwi nyii laka. Nyuutɩna Wɩɩsɛ bʋ́lʋ́ rɩ́ a bʋ́lɛ́: «Nɩɛ ná há sɩ́ kól nyii nyɔ́ anɛ vaa haá nyɔ́ nyii ɛ́, káŋwɔ́ hé kíŋkéré, ká ɓa ná há sɩ́ ɓírmíwó neɓííne mí aá nyɔ́, héwó má cɔ́ɔ́ nɔ́ŋɔ.» 6 Nɩɛ zotoro (300) ní kéŋwó nɛ́ŋsa a kól nyii aá nyɔ́. Ká káánɛ ná ɓírmíwó neɓííne mí aá nyɔ́. 7 Nyuutɩna Wɩɩsɛ bʋl Zedeyɔŋ rɩ́ a bʋ́lɛ́: «Nɩɛ nyáŋ zotoro há kól nyii aá nyɔ́, ɓa mɛ́ nɛ́ rɩ́ŋ tɩŋ lɛ́ɩ́wa tá Madɩaŋ nɩɛ nɛ́sɛ mɛ́, rɩ́ɩ́wa dí dóé ɓa nyúú. A rɩ́ nɩkáánɛ ná é bɩ́rmʋ́ jɩɩsɛ.» 8 Zedeyɔŋ sɩɛ́ a báála ná zotoro káánɛ, ká a Ɩzɩrayɛl nɩɛ ná náŋa bɩ́rcol, kɔ́ʋ́ lɔ́wɔ́ ɓɩdííle rɩ́wɔ́ mulli. Madɩaŋ nɩɛ púl fa mɩŋ polo ná mʋ́bʋɔ rɩ́ ɓóŋɓóŋ ní.
Zedeyɔŋ kéŋ lalyóóre zotoro mʋ́ lal dɩyóé
9 Ɛ́ kal tɩ́taŋ, Nyuutɩna Wɩɩsɛ bʋl Zedeyɔŋ rɩ́ a bʋ́lɛ́: «Isi tuwi yoo Madɩaŋ nɩɛ púl ná, ŋ sɩ́ kɛ́sɩ́wɔ́ héí nɛ́sɛ mɛ́. 10 Amá, rɩ́ɩ́ nɩ́ɩ́ fɔ́wɔ́ yóé, ɩ rɩ́rɩ́ɩ́ tʋtʋnnɔ Puura isi tuwi. 11 Rɩɩ́wa nɛ́ túwé, ɩ sɩ́ nɩ́wɔ́ háá bʋl wɩ́ɛ́ ná. Rɩɩ nɛ́ nɩ́wɔ́ wɩ́bʋlɛ́ ná, ɩ sɩ́ ká baŋcɩpɩrɩ́ a yówó.» Ɛ́ nɛ́ Zedeyɔŋ rɩ́rʋ́ tʋtʋnnɔ Puura isi tuwi, a vaa mʋ́ peri púl ná nʋɔ, dʋ́ŋdʋ́ʋ̃́ sóójiwa dɩhɩ̃́. 12 Madɩaŋ nɩɛ, Amalɛkɛ nɩɛ, arɩ́ nɩgʋɔrɛ́ ná há lɛ́ wɩɩsɛ dɩpomí rɩ́ cɔɔ fa káŋ anɛ nyaŋgɩrma, a jɛrɛ sú típaŋtaŋɩ́, ká ɓa nyʋ́kmawa má fa wɩ wúó dɩ́ɩ́sɛ, ɓa káŋ anɛ mʋʋ nʋɔ hɩɛl. 13 Zedeyɔŋ há mʋ́ɛ́ peri, rɩ báálɔ nɔ́ŋɔ fa césú duóse aá pɔ́ʋ́ nɔ́ŋɔ: «Ʋ sɛ́, ŋ duósó a ná ɔ́rzɛ dɩpɛ́ŋ á púl ná sɩɛrʋ, rʋʋ bílló bílló mʋ́ yakɛ táŋtɛ jaa, ʋ ɓál, a wulli cú.» 14 Ʋ nɔ́ŋɔ ná sɛ́: «Nyɛ ná wo Ɩzɩrayɛl báálɔ Zowasɛ bio Zedeyɔŋ tokówí aá a. Wɩɩsɛ pírá púl ná wuu hóú nɛ́sɛ mɛ́ nɛ́ .» 15 Zedeyɔŋ há zésí duóse ná rɩ́rʋ́ mʋ́l wuu ko tenni; ʋ ɓírmó a cʋ́ɔ́lɛ Wɩɩsɛ. Ká bɩ́rko Ɩzɩrayɛl nɩɛ púl; a cáási a bʋ́lɛ́: «Ɩ́ isi! Nyuutɩna Wɩɩsɛ pí Madɩaŋ nɩɛ púl ná héíwa nɛ́sɛ mɛ́.»
Madɩaŋ nɩɛ dí hɩ̃́ɩ̃́sɛ
16 Zedeyɔŋ kéŋ báála ná zotoro a ɓá púlli botoro. A pá nɛ́ŋ wuu nyɩ́la, rɩ́ koŋyuo wuoli, arɩ́ nyɔ́dúí há kéŋ ní, ɓa há sɩ́ pii hé koŋyuo ná sɩɛrʋ. 17 Ká bʋ́lwɔ́ rɩ́ a bʋ́lɛ́: «Ɩ́ bíbélíŋ, rɩ́ŋ nɛ́ mʋ́ɛ́ peri púl ná nʋɔ, ŋ há sɩ́ ɔ́ɔ́ ná, rɩ́ɩ́wa má ɔ́ʋ́ tɩɩ.» 18 Rɩŋ rɩ́rɩ́ŋ nɩɛ nɛ́ mú nyɩ́sɛ; ɩ́ má mú, a kíl púl ná wuu; ká cáási a bʋ́lɛ́: “Nyuutɩna Wɩɩsɛ rɩ́ Zedeyɔŋ nɛ́ tɛ́ ballɩ́!”»
19 Zedeyɔŋ rɩ́ báála zɔlɔ mʋ́ɔ́ peri púl ná nʋɔ, rɩ tɔ́ɔ́ fɩ́ɛ́lɔ́ a zʋ́ ɓarma nɛ́; rɩ síŋtírpɔ́ɔ́ra sɩɛ́ nɛ́ kúé a la náŋá mɛ́. Ɛ́ nɛ́ ɓa mu nyɩ́sɛ ká céŋŋi koŋyuore ná fa há mɩŋwɔ́ nɛ́ŋsa mɛ́. 20 Ɛ́ nɛ́ púlli ná bɛllɛ a ɛ́ tɩɩ, a mú nyɩ́sɛ ká kéŋyuore. Ɓa wuu pá nyɔ́dúó ná há kéŋ níŋ a héwó nɛ́gʋʋsɛ mɛ́, a pa nyɩ́sɛ ná má héwó nédunni mí, ká cáási a bʋ́lɛ́: «A yoo pá Nyuutɩna Wɩɩsɛ arɩ́ Zedeyɔŋ.» 21 Ɛ́ mɛ́, rɩ ɓa wuu ísí daha a kíl púl ná wuu; nɛ́ŋ wuu cɩ́nʋ́ dɩhɩ̃́, ká Madɩaŋ púl ná nɩɛ wuu fɩ́fá, káá cáási, aá jáwɔ́ tɩɩ. 22 Tɛ́ŋ ná mɛ́ báála ná zotoro há mu nyɩ́sɛ, Nyuutɩna Wɩɩsɛ ɔ́ɔ́ Madɩaŋ nɩɛ tɩɩ gɩrɛ cɔ́ksɛ náŋá aá ɓʋ́ʋ́sɛ púl ná sɩɛrʋ. Ká ɓa nɩkáánɛ fa mʋ́ Bɛtsɩta, a caasɛ Sereda, a mʋ́ peri Abɛlmehola há mɩŋ Tabatɛ laka.
23 Ɓa yɩ́rɛ Ɩzɩrayɛl nɩɛ ɓa lɩ Nɛftalɩ jɩmʋ́l, Asɛrɛ jɩmʋ́l, arɩ́ Manase jɩmʋ́l wuu sɩɛrʋ, ɓa ko kiri Madɩaŋ har.
24 Zedeyɔŋ sɩɛ́ tʋ́ŋ nɩɛ Ɩfɩrayɩŋ pallɛ dɩtɩ́llɛ wuu a bʋ́lɛ́: «Ɩ́ tuwi yoo Madɩaŋ nɩɛ, a pɔ́ Zʋrdɛŋ fuo dɩtɩ́ŋdaarɛ́ ná mɛ́, aá mʋ́ peri Bɛtbara.» Ɛ́ nɛ́ ɓa yɩ́rɛ Ɩfɩrayɩŋ báála, ɓa lá sɩ́ɛ́ tuwi pɔ́ Zʋrdɛŋ fuo dɩtɩ́ŋdaarɛ́ wuu mí, a mʋ́ peri Bɛtbara. 25 Ɓa yoo kɛ́sɛ Madɩaŋ nɩɛ sɩ́dííre ná bɛllɛ, Ɔrɛbɛ rɩ́ Zɛbɛ. Ɓa ɓʋ́ Ɔrɛbɛ ʋ bʋ́ɩ́ daha, ka ɓʋ́ Zɛbɛ ʋ víínyí dɩháásɩ́ mɛ́. Ká ha kiri tɩŋ Madɩaŋ nɩɛ ná mɛ́. Ká bɩ́rko coki Ɔrɛbɛ rɩ́ Zɛbɛ nyúnni, a kaa mʋ́ pá Zedeyɔŋ Zʋrdɛŋ fuo daarɛ́.