3
1 Ná duó ná nɩɛ Nyuutɩna Wɩɩsɛ há tá Kanaŋ mɛ́, rʋ́ʋ́ tɩŋwɔ́ mɛ́ a mɩ́l Ɩzɩrayɛl nɩɛ ná há wɩ Kanaŋ lalwa ná néé. 2 Ʋ sɩɛ́ fa có rɩ wóówa ná há tʋ́kɛ́, a wɩ lal yóé, rɩ́wɔ́ má zɩŋ lal yóé. 3 Ɛ́ nɩɛ nɛ́ ká: Kuóre ná bɔmmʋ́ɔ́ há dí dóé Fɩlɩsɩtɛŋwa nyúú, Kanaŋ nɩɛ wuu, Sɩɩdɔnɩɛŋwa, arɩ́ Hivitiwa há mɩŋ Lɩbaŋ pallɛ mɛ́, a de pɔ́ Balɩhɛrmɔŋ paalɔ mɛ́, a kaa mʋ́ yakɛ Lebohamatɛ mɛ́. 4 Nyuutɩna tɩŋ nɩɛ nyáŋ mɛ́ nɛ́, a mɩ́l Ɩzɩrayɛl nɩɛ rʋ́ʋ́ ná, ɓa sáŋ wɩ́makɛ́ ná ʋ fa há tɩŋ Moyizi mí pʋ́ŋsɛ páwɔ́ naabálwa. 5 Ɛ́ nɛ́ tɛ Ɩzɩrayɛl nɩɛ ké rɩ́ Kanaŋ nɩɛ, Hititiwa, Amoritiwa, Perizitiwa, Hivitiwa, arɩ́ Zebuzitiwa. 6 Ɩzɩrayɛl nɩɛ jáwɔ́ tolé, ká má píwó tolé páwɔ́, káá ɓáárɩ́wɔ́ venni.SARƖ́YADÍÍRE WƖ́Ɛ́
Ɔtɩnɩɛl wɩ́ɛ́
7 Ɩzɩrayɛl nɩɛ ɔ́ɔ́ zɔkɛ Nyuutɩna Wɩɩsɛ mɛ́, ɓa sʋ́llɩ́wɔ́ Nyuutɩna Wɩɩsɛ wɩ́ɛ́, ká ɓáárɛ Balwa rɩ́ Asɛrawa. 8 Nyuutɩna Wɩɩsɛ cɔ́ɛ́ ísíwó nyúú, ɛ́ nɛ́ ʋ píwó hé Mezopotami kuóro Kusarisatayimi nɛ́sɛ mɛ́, ɓa tʋ́ŋ bɩŋsɛ córí a pɔ́ʋ́. 9 Ɩzɩrayɛl nɩɛ sɩɛ́ cáási hé Nyuutɩna Wɩɩsɛ mɛ́, ɛ́ nɛ́ ʋ lɩ́sɛ Kalɛbɛ maábio Kenazɛ bio Ɔtɩnɩɛl, rʋ́ʋ́ láwɔ́ tá. 10 Wɩɩsɛ Sabɩɩna zʋ́ Ɔtɩnɩɛl, ʋ a sarɩ́yadíír Ɩzɩrayɛl nɩɛ sɩ́ɛ́. Nyuutɩna Wɩɩsɛ pɔ́ʋ́ mɛ́, ʋ ká dóé, a mʋ́ yoo dí Mezopotami kuóro Kusarisatayimi. 11 Ʋ ɛ́ har mɛ́, tɔ́ɔ́ ná mɩŋ fɩɛla mɛ́ bɩŋsɛ mɛɛ́sɛllɛ, ká Kenazɛ bio Ɔtɩnɩɛl sɩɛ́ zɩŋ sʋwɛ.
Ehudi wɩ́ɛ́
12 Ɩzɩrayɛl nɩɛ báá ɔ́ɔ́ zɔkɛ Nyuutɩna Wɩɩsɛ mɛ́. Ɛ́ nɛ́ Nyuutɩna Wɩɩsɛ pi dóé pá Mɔwabɛ kuóro Ɩgɩlɔŋ, ʋ yoo dí Ɩzɩrayɛl nɩɛ. 13 Kuóro Ɩgɩlɔŋ yɩ́rɛ Amonitiwa rɩ́ Amalesitiwa ɓa ko súúrú mí, ɓa yo Ɩzɩrayɛl a la tɔ́ɔ́ ná há kéŋ habɛ́ tuuni. 14 Ɩzɩrayɛl nɩɛ a yósi Mʋwabɛ kuóro Ɩgɩlɔŋ nɛ́sɛ mɛ́ bɩŋsɛ fí rɩ́ córí. 15 Ɩzɩrayɛl nɩɛ sɩɛ́ baa cáási hé Nyuutɩna Wɩɩsɛ mɛ́, ɛ́ nɛ́ ʋ lɩ́sɛ Gera bio Ehudi há ká góllú, a lɛ́ Bɛŋzamɛ jɩmʋ́l.
Ɩzɩrayɛl nɩɛ sɩɛ́ tʋ́ŋ Ehudi rʋ́ʋ́ ka zilé mʋ́ pá Mʋwabɛ kuóro Ɩgɩlɔŋ. 16 Ehudi sɩɛ́ pɛ́ luki tókowí gbesi há pérí mɛ́ɛ́tɩrɛ fá, háá dí nʋʋsɛ bɛllɛ, a píí vɔ́wʋ́ néduu tɩŋsɩ́ɩ́ mɛ́, a ka gɛrɔ tɔ́. 17 Ʋ ka zilé ná mʋ́ pá Mʋwabɛ kuóro Ɩgɩlɔŋ. Ɩgɩlɔŋ fa ká nɩzéní duó rí. 18 Ehudi há tɛ́ zilé ná ko tenni, ʋ rɩ́ nɩɛ ná há cɩ́ɩ́nɛ cɩksɛ ná bɩ́rɔ́ col. 19 Ɓá há válɛ́ mʋ́ peri Gɩlgal veŋgúlli dɩhɩ̃́, ʋ bɩ́rɔ́ a kó bʋ́lɛ́: «Oó ŋ kuóro, ŋ kéŋ liŋó rí aá ja rɩ́ŋ lɔkɛ pɛ́ɩ́.» Ɛ́ nɛ́ kuóro sɛ́: «Ŋŋ́ zesu rí», ká a nɩɛ ná há cɩ́nʋ́ nyúú rí, ɓa wuu lɛ́. 20 Ɩgɩlɔŋ sɩɛ́ fa kénú tuko jaa ná há fɩ́ɛ́lɔ́ sɩɛrʋ nɛ́. Ɛ́ nɛ́ Ehudi sɩɛ́ tuupérú a bʋ́lʋ́ rɩ́ bʋ́lɛ́: «Ŋ kéŋ Wɩɩsɛ liŋó rí, aá ja rɩ́ŋ pɛ́ɩ́». Ɩgɩlɔŋ sɩɛ́ ísú kuóɓasa daha a cɛ́. 21 Ehudi de kánʋ́ nɛ́gʋɔ a foki tókowí ná há vɔ́wʋ́ néduu tɩŋsɩ́ɩ́ mɛ́, a yiki hé kuóro Ɩgɩlɔŋ file mí. 22 Tókowí ná rɩ́rʋ́ tíl wuu zʋ́ file ná sɩɛrʋ, ká naŋnʋʋ tɔ́ tókowí ná mɛ́. Ehudi báá wɩ tókowí ná fóké. 23 Ká lɛ́ jaa ná mɛ́, a ka dánnʋɔ tɔ́, a yakɛ.
24 Ʋ lɩɩ colé har mɛ́, kuóro Ɩgɩlɔŋ tʋtʋnna kúó zʋ rɩ dánnʋʋsɛ yákɔ́. Ɓa bʋ́lwɔ́ tɩɩ mɛ́, a bʋ́lɛ́: «Nyɛ́mɛ́ ʋ zʋ́ɔ́ aá pɔ́ŋ tíé ní.» 25 Ɓaá dɛllɛ rɩ́ kuóro wúrú tuko jaa dánnʋɔ, a dɛllɛ gúl. Ɓa pi borwí a wúri, rɩ ɓa nyúútɩ́na nɛ́ sʋ́wɛ́ pɛ́ tíé. 26 Tɛ́ŋ ná mɛ́ ɓa há cɩ́nɛ́ aá dɛllɛ; rɩ Ehudi é fɔ́ɔ́ mʋ́ daarɛ dɔ́wʋ́ɔ́ venni ná dɩhɩ̃́, a mʋ́ peri Seyira. 27 Ʋ há mʋ́ɛ́ peri ɛ́ pʋʋlɛ́, ʋ mú nyɩ́la Ɩfɩrayɩŋ pallɛ dɩhɩ̃́, a yɩ́rɛ Ɩzɩrayɛl nɩɛ hé náŋá mɛ́, a lɔ́wɔ́ sɩ́ɛ́ ká ɓa tɩŋʋ́ mɛ́, ɓa lɛ́ paalɔ daha a tuwi. 28 Ʋ sɩɛ́ bʋ́lwɔ́ rɩ́ bʋ́lɛ́: «Ɩ́ tɩŋɩ́ŋ mɛ́, bee wɩ́ɛ́, Nyuutɩna Wɩɩsɛ kɛ́sɩ́wa dɩŋdɔma Mʋwabitiwa héíwa nɛ́sɛ mɛ́.» Ɓa tɩŋ Ehudi mí, ɓa mʋ́ yóó dí Mʋwabɛ nɩɛ ná há mɩŋ Zʋrdɛŋ fuo daarɛ. Ká pɔ́ rɩ́wɔ́ nɛ́ŋ balá má tɩɩ sɩ́ fuo ná mɛ́ dáárʋ́. 29 Ɛ́ tɛ́ŋ mɛ́, Ɩzɩrayɛl nɩɛ ɓʋ́ʋ́sɛ Mʋwabitiwa lalyóóríbɩbara ná há kéŋ dóé, nɩɛ mʋɔ́ tóó bʋ́ɩ́ fí (10 000), ɓa wɩ nɛ́ŋ balá má tɩɩ lóé. 30 A de pɔ́ ɛ́ tɛ́ŋ mɛ́, Ɩzɩrayɛl nɩɛ dí dóé Mʋwabitiwa nyúú. Ká tɔ́ɔ́ ná mɩŋ tɛŋfɩ́ɛ́l mɛ́ bɩŋsɛ mɛɛ́sɩ́baná (80).
Saŋgarɛ wɩ́ɛ́
31 Ehudi har mɛ́, Anatɛ bio Saŋgarɛ nɛ́ lɔ́ʋ́ nyúú mí. Ʋ ɓʋ́ Filisiti nɩɛ zɔwalgo (600) rɩ́ nɛsɛ deŋtuke nʋɔ hɛŋ, ká má la Ɩzɩrayɛl nɩɛ tá.