Tɔ́yúóle wɩ́ɛ́
19
1 Rɩ Nyuutɩna Wɩɩsɛ, ɩ́ Wɩɩsɛ nɛ́ zɔ́kɛ́ duowa ná nɩɛ, tíé ná ʋ há sʋ́ʋ́ sɩ́ pii pɛ́ɩ́wa mɛ́, rɩ́ɩ́wa kírwó, ká láwɔ́ tɔ́nɛ arɩ́wɔ́ jɩɩsɛ a ké, 2 ɩ́ lɩ́sɛ tɔ́nɛ botoro a pɛ́ɩ́wa tɩɩ, rɩ́wɔ́ mɩŋ tíé ná Nyuutɩna Wɩɩsɛ, ɩ́ Wɩɩsɛ há sɩ́ pii pɛ́ɩ́wa sɩ́sɩ́ɛ́nʋ́. 3 Ɩ́ ka tíé ná Nyuutɩna Wɩɩsɛ, ɩ́ Wɩɩsɛ há píé pɛ́ɩ́wa rʋ́ʋ́ ɛ́ɩ́wa óŋ, a kaa ɓa dɩhɛ̃́ botoro, rɩ́ dɩhɛ̃́ ná oro wuu ka tɔ́ɔ́ ɓa há sɩ́ fá mʋ́ yúyúóli. Ɩ́ hé ŋmɛ́ŋsɛ aá mʋ́ ɛ́ tɔ́nɛ, rɩ nɛ́ŋ wuu rí ɓʋ́ nɛrɔ, ʋ sɩ́ wólli fá mʋ́ ɛ́ tɔ́nɛ nɔ́ŋɔ. 4 Rɩ nɛrɔ nɛ́ wɩ sánɛ́ ká ɓʋ́ nɛrɔ há tóú dɩŋdɔŋ, ʋ sɩ́ wólli fá mʋ́ tɔ́nɛ ná a lɔ́ʋ́ mɩɩsɛ. 5 Anɛ nɛrɔ rɩ́rʋ́ nɔ́ŋɔ tɩ́na há ísé mʋ́ gɩr rɩ́wɔ́ conni daasɛ, ʋ háá coki ɛ́, rɩ́ saa foki a yákʋ́ nɔ́ŋɔ tɩ́na ná ɓʋ́. Báálɔ ná sɩ́ wólli fá mʋ́ ɛ́ tɔ́nɛ nɔ́ŋɔ a lɔ́ʋ́ mɩɩsɛ. 6 Rɩ ɛ́ raá, nɛrɔ ná ʋ há ɓʋ́ɛ́, maábinɔ́ŋɔ há sɩ́ dúú liwe ní ná wɩ́ɩ́ ná há ɛ́ɛ́, ʋ sɩ́ dí cɔ́ɛ́ a kiri tɩŋ nɛrɔ ná há ɓʋ́ʋ́ maábinɔ́ŋɔ har. Rɩ tɔ́ɔ́ ná ʋ há sɩ́ mʋ́ yúóli ní bolé, ʋ sɩ́ kiri kánʋ́ a ɓʋ́ʋ́, ká ʋ fa wɩ mɔhɛ̃́ rʋ́ʋ́ ɓʋ́ʋ́ má, beé wɩ́ɛ́ nɩsʋwɛ ná fa to dɩŋdɔŋ. 7 Wɩ́ɩ́ ná há tɛ ŋ bʋl rɩ́ɩ́wa lɩ́sɛ tɔ́nɛ botoro rɩ́wɔ́ ɔ́ŋwɔ́, a pɛ́ɩ́wa tɩɩ a mʋ́ yúyúóli ní ɛ́. 8 Rɩ Nyuutɩna Wɩɩsɛ, ɩ́ Wɩɩsɛ nɛ́ lóé rɩ́ɩ́wa tíé jɛ́llɛ, anɛ ɛ́ ʋ há tá nʋɔ a pɛ́ɩ́wa naabálwa, a pi tíé ná wuu pɛ́ɩ́wa, anɛ ɛ́ ʋ há tá nʋɔ, 9 beé wɩ́ɛ́ rɩ́ɩ́wa nɛ́ pɔ́rɩ́wa tɩɩ mɛ́, a tɩŋ kíŋse ná wuu, ŋ há píé mákɩ́wa zaa, a cólli Nyuutɩna Wɩɩsɛ, ɩ́ Wɩɩsɛ a tɩ́tɩ́ŋʋ́ cólle tɛ́ŋ é wuu, ʋ mɔhɔ̃́ rɩ́ɩ́wa bɩrɛ lɩ́sɛ tɔ́nɛ botoro ní a súúri dʋ́ŋdʋ̃́ʋ́ tɔ́nɛ botoro ná mɛ́. 10 Ɩ́ a ɛ́ tíé ná Nyuutɩna Wɩɩsɛ, ɩ́ Wɩɩsɛ há sɩ́ pii pɛ́ɩ́wa rʋ́ʋ́ ɛ́ɩ́wa óŋ sɩɛrʋ, rɩ́ nɛrɔ há wɩ wɩ́ɩ́ zɔ́kɛ́ cɛ́l sɩ́ tíé ná mɛ́ ɓɛ́sʋ́, rɩ́ɩ́wa la zɔ́krʋ.11 Amá rɩ nɛrɔ nɛ́ bɛ́rʋ́ nɔ́ŋɔ tɩ́na, a isi lʋɔrɛ ŋmɔ́wʋ́ ɓʋ́, ká fá mʋ́ tɔ́nɛ nyáŋ nɔ́ŋɔ, 12 ʋ tɔ́ɔ́ nɩhɩɛ̃́sɛ mɔhɔ̃́ rɩ́wɔ́ lo rɩ́wɔ́ mʋ́ kánʋ́ bɩrɛ kówó tɔ́ɔ́ nɛ́, rɩ́wɔ́ púú hé nɛrɔ ná ʋ há ɓʋ́ɛ́ maábinɔ́ŋɔ há sɩ́ díú liwe nɛ́sɛ mɛ́ rʋ́ʋ́ ɓʋ́ʋ́. 13 Ɩ́ sɩ́ nɩɓʋ́ʋ́rɔ́ ná susu fá. Ɩ́ a ɛ́ a mʋʋrɛ nɩɛ ná há wɩ wɩ́ɩ́ zɔ́kɛ́ cɛ́l Ɩzɩrayɛl tíé mí, ká rɩ́ wɩ́ɛ́ wólli va wérí a pɛ́ɩ́wa. 14 Tíé ná Nyuutɩna Wɩɩsɛ, ɩ́ Wɩɩsɛ há sɩ́ pii pɛ́ɩ́wa mɛ́, rɩ́ɩ́wa tɩ́llʋ́, ɩ́ sɩ́ɩ́wa rɩ́rɩ́ɩ́wa kennináŋá susúbʋɔnnɛ ná ɩ́ naabálwa há lá sɩ́ɛ́ bil káá vúgúmi.
Dáŋsɩ́ɛ́ díí wɩ́ɛ́
15 Rɩ nɛrɔ nɛ́ rɩ́wɔ́ bʋlʋ́ zɔkɛ wɩ́ɩ́, rʋ́ʋ́ a wɩ́bɔmɔ, ɛ́ rá má wɩ́nyɔ́rkɛ duó wuu, nɛ́ŋ balá wɩ dáŋsɩ́ɛ́ wuó dí, rɩ wɩ́ɩ́ ná ká wɩ́táŋa nɛ́. Nɩɛ bɛllɛ, ɛ́ raá má nɩɛ botoro ní sɩ́ wólli a wɩ́ɩ́ dáŋsɩ́ɛ́, rɩ́ wɩ́ɩ́ ná cɛ́. 16 Rɩ nɛrɔ nɛ́ ká dáŋsɩ́ɛ́ a nyɩ́ɛ́rʋ a pá nɛrɔ, rʋ́ʋ́ á wɩ́ɩ́ rɛ́ a zɔkɛ, 17 ʋ rɩ nɛrɔ ná ʋ há nyɩ́ɛ́rʋ pá, ɓa mɔhɔ̃́ rɩ́wɔ́ mʋ́ Nyuutɩna Wɩɩsɛ sɩ́ɛ́ nɛ́, Wɩɩsɛ vʋk'ɔɔsa arɩ́ sarɩ́yadííre ná há mɩŋ ráŋ ɛ́ tɛ́ŋ mɛ́ dɩhɩ̃́. 18 Sarɩ́yadííre ná mɔhɔ̃́ rɩ́wɔ́ bel wɩ́ɩ́ ná sɩɛrʋ rɛ́ wérí, rɩ ɓa nɛ́ kúé ná rɩ nɛrɔ ná há dí dáŋsɩ́ɛ́ ká nyɛtɩɩnɔ nɛ́, a nyɛ nyɩ́ɛ́rʋ pɔ́ʋ́ maábinɔ́ŋɔ, 19 ʋ mɔhɔ̃́ rɩ́wɔ́ pi wɩ́ɩ́ ná ɓa fa há sɩ́ pii ɔ́ʋ́ maábinɔ́ŋɔ mɛ́, a ɔ́ʋ́ mɛ́. Ʋ mɔhɔ̃́ rɩ́ɩ́wa a ɛ́ nɛ́ a lɩ́sɛ́ wɩ́bɔmɔ ná tá ɩ́ sɩɛrʋ. 20 Rɩ nɩkáánɛ ná nɛ́ nɛ́ wɩ́ɩ́ ná ɩ́ há ɛ́ɛ́, héwíŋ sɩ́ zʋ́wɔ́, ɓa báá wɩ wɩ́bɔmɔ né duo a, ɩ́ sɩɛrʋ. 21 Ɩ́ sɩ́ nɛ́ŋ wuu susu fá. Rɩ nɛrɔ nɛ́ ɓʋ́ʋ́ nɔ́ŋɔ, ɩ́ ɓʋ́ʋ́ má; rɩ nɛrɔ nɛ́ tókú nɔ́ŋɔ sɩ́ɩ́, ɩ́ tókú má sɩ́ɩ́; rɩ nɛrɔ nɛ́ gírú nɔ́ŋɔ nyɩl, ɩ́ gírú má nyɩl; rɩ nɛrɔ nɛ́ bórú nɔ́ŋɔ nɛ́sɛ, ɩ́ bórú má nɛ́sɛ; rɩ nɛrɔ nɛ́ bórú nɔ́ŋɔ naa, ɩ́ bórú má naa.