Vʋk'ɔ́ɔ́sɛɓɩɛ ná há Levi duo nɩɛ ker wɩ́ɛ́
18
1 Wɩɩsɛ vʋk'ɔɔsa ná há ká Levi duo nɩɛ, ɓa wɩ mɔhɛ̃́ rɩ́wɔ́ ka tíé ker Ɩzɩrayɛl wuu mí. Ɓa ker nɛ́ ká onni ná Ɩzɩrayɛl jamáŋ há kené ko rɩ́wɔ́ ɔsɛ vʋka pɩ́pá Nyuutɩna Wɩɩsɛ. 2 A tɩ́ŋwɔ́ há wɩ tíé ɓáálɛ́ wuu kené ɓa maábináŋa sɩɛrʋ, Nyuutɩna Wɩɩsɛ nɛ́ sɩ́ pɔ́wɔ́ omo ná wuu ɓa háá jɛɛ́, anɛ ɛ́ ʋ fa há bʋlɛ́ pɔ́wɔ́.3 Rɩ nɛrɔ nɛ́ kéŋ nɔɓala, ɛ́ raá má píéŋso, a kaa ko ɔsɛ tɛŋfɩ́ɛ́l vʋk, Wɩɩsɛ vʋk'ɔɔsa nɛ́ sɩ́ tɩ́llɛ vaamɔ, tayáwa arɩ́ sɩɛrʋ ɓɩɛ. 4 Ɩ́ pííwa baka ɓɩdíbʋʋrɛwa má a pɔ́wɔ́: Bile, dɩvɛ́ŋ, nʋʋ arɩ́rɩ́wa pieŋse bidʋʋnɩwa pelɔ́ŋ ná ɩ́ há kɛ́ɛ́. 5 Ɩ́ jɩmʋ́ʋ́la wuu sɩɛrʋ, Levi rɩ́rʋ́ duo nɩɛ nɛ́ Nyuutɩna Wɩɩsɛ, ɩ́ Wɩɩsɛ lɩ́sɛ, rɩ́wɔ́ mɩnʋ́ sɩ́ɛ́, a tʋŋ pɩpɔ́ʋ́ a kaá mʋ́ wuu.
6 Rɩ Levi dunɛ́ŋ rɩ lʋ́ʋ́ tɔ́ɔ́ mɛ́, rɩ́ɩ́ mʋ́ dɩhɩ̃́ ná Nyuutɩna Wɩɩsɛ há sɩ́ lɩ́sɛ rɩ́ɩ́wa cʋ́cʋ́ɔ́lʋ́, 7 ʋ sɩ́ wólli tʋŋ tʋtʋmɛ́ Nyuutɩna Wɩɩsɛ, ʋ Wɩɩsɛ yɩr mɛ́ ráŋ, anɛ Levi dunɩɛ ná náŋa háá tʋŋ Nyuutɩna Wɩɩsɛ sɩ́ɛ́ ɛ́, dɩhɩ̃́ ná. 8 Ʋ rɩ́rʋ́ náŋa ná wuu ker sɩ́ mɔ náŋá. Ʋ ker rɩ́ Levi dunɩɛ ná naŋá ɓɩɛ sɩ mɔ náŋá, a súúrú áná liwe ná ʋ há lɛ́ɛ́ mɛ́.
Wɩ́ɛ́ ná háá kísé
9 Rɩɩ́wa nɛ́ mʋ́ɛ́ zʋ tíé ná Nyuutɩna Wɩɩsɛ, ɩ́ Wɩɩsɛ há sʋ́ʋ́ sɩ́ pii pɛ́ɩ́wa, ɩ́ sɩ́ duowa ná há mɩŋ dɩhɩ̃́ ná mɛ́ tɩ́ŋʋ́, rɩ́ɩ́ kúó a wɩ́ɛ́ ná háá kísé. 10 Ɩ́ pɔ́ rɩ́ɩ́wa sɩ́ɩ́wa bíí wuu, bál ɛ́ raá má hál káá ɓʋ́, rɩ́ɩ́ nyɩkɛ rɩ́ɩ́ pá véní wuu. Ɩ́ sɩ́ vʋ́rʋ́, a sɩ́ muulináára wɩ́ɛ́ á, a sɩ́ hɩlɩ́ tʋ́mʋ́, 11 ɛ́ raá má a bʋ́bʋrɛ bʋra, aá yɩ́rɛ lɛlɛ ɛ́ raá má kaŋtɔma. 12 Nɛrɔ ná wuu háá a wɩ́kisé nyáŋ, Nyuutɩna Wɩɩsɛ bɛ́rɛ tɩ́na. Wɩ́ɛ́ nyáŋ nɛ́ tɛ rɩ Nyuutɩna Wɩɩsɛ, ɩ́ Wɩɩsɛ ko kiri duowa ná há mɩŋ tíé ná mɛ́. 13 Ʋ mɔhɔ̃́ rɩ́ɩ́wa vɔwɩ́ɩ́wa tɩɩ cɔ́ Nyuutɩna Wɩɩsɛ, ɩ́ Wɩɩsɛ mɛ́ weri.
Wɩɩsɛ wɩ́laabʋlla wɩ́ɛ́
14 Duowa ná ɩ́ háá mʋ́ɛ́ rɩ́ɩ́wa yoo kiri ká láwɔ́ tíé, ɓa nɩɛ́ tɩŋ vʋra arɩ́ muulináára nʋɔ nɛ́. Nyuutɩna Wɩɩsɛ, ɩ́ Wɩɩsɛ waá ja rɩ́ɩ́wa é tɩ́tɩŋ wɩ́ɛ́ nyáŋ. 15 Nyuutɩna Wɩɩsɛ, ɩ́ Wɩɩsɛ sɩ́ lɩ́sɛ nɛrɔ, ɩ́ maábináŋa sɩɛrʋ a pɛ́ɩ́wa, rʋ́ʋ́ ɔ́ʋ́ wɩ́laabʋllɔ anɩ́ŋ é Moyizi. Ʋ mɔhɔ̃́ rɩ́ɩ́wa zísú. 16 Tápʋl ná ɩ́ há hílmé, paalɔ ná ɓa háá yɩ́rɛ Ɔrɛbɛ laka, ɩ́ sɛ́: «Á báá waá ja ráá nɛ Nyuutɩna Wɩɩsɛ, á Wɩɩsɛ liŋó, ɛ́ raá má ráá nóú níŋzeno ná. Raá nɛ́ ná ɛ́, á sɩ́ sʋsɛ.» 17 Ɛ́ nɛ́ Nyuutɩna Wɩɩsɛ bʋl páŋ bʋlɛ́: «Wɩ́ɩ́ ná ɓa há bʋlɛ́ ká wɩ́wérí rí. 18 Ŋ sɩ́ lɩ́sɛ nɛrɔ ɓa maábináŋa sɩɛrʋ, rʋ́ʋ́ áŋ wɩ́laabʋ́llʋ́, a nɩ́ɩ́ é Moyizi. Ŋ sɩ píŋ wɩ́ɛ́ hóú nʋɔ mɛ́, rʋ́ʋ́ láwɔ́ wuu bʋl pɔ́wɔ́. 19 Rɩ nɛrɔ wuu ní vɛ́ɛ́ rʋ́ʋ́ zesi nɛ wɩ́ɛ́ ná ŋ wɩ́laabʋllɔ ná há sɩ́ bʋlɩ́ŋ yɩr mɛ́, ŋ é tɩɩ nɛ́ sɩ́ bɛ́ŋsɛ tɩ́na. 20 Amá rɩ wɩ́laabʋ́llʋ́ wuu bʋ́l wɩ́ɩ́ ŋ yɩr mɛ́ arɩ́ nyúduo, ka ŋ raá wʋ́ʋ́ héé, ɛ́ raá má rɩ véní nɔ́ŋ yɩr mɛ́ rɛ́, rʋ́ʋ́ a ɛ́, ʋ mɔhɔ̃́ rɩ́ɩ́wa ɓʋ́ʋ́ nɛ́.»
21 Ɩ́ sɩ́ wólli bɔsɛ náŋá a bʋlɛ́: «Ɛ́rɛ́ rɛ́ á sɩ́ a ká zɩŋ, rɩ Nyuutɩna Wɩɩsɛ raá wʋ́ʋ́ héé ʋ bʋ́bʋl wɩ́ɩ́ ná>>» 22 Rɩ wɩ́laabʋllɔ nɛ́ bʋ́l wɩ́ɩ́ Nyuutɩna Wɩɩsɛ, ɩ́ Wɩɩsɛ yɩr mɛ́, ká wɩ́ɩ́ ná ʋ há bʋlɛ́ wɩ díé, ɩ́ ɛ̃ rɩ Nyuutɩna Wɩɩsɛ, ɩ́ Wɩɩsɛ raá wʋ́ʋ́ héé ʋ bʋl wɩ́ɩ́ ná, ʋ tɩɩ dóé mí ní, ɩ́ sʋ́ʋ́ fá.