Tolé ná há kéŋ liwe báljáásɛ wadawa wɩ́ɛ́
36
1 Galaadɛ há ká Makiri ná má ká Manase bio, a lɛ Zɔzɛfɛ dunɩɛ sɩɛrʋ, jɩmʋ́l jɩtɩnawa, ísó kó Moyizi arɩ́ sɩdiire ná há ká Ɩzɩrayɛl jɩtɩnawa sɩ́ɛ́ a cesi wɩ́ɛ́. 2 Ɓa sɛ́:« Nyuutɩna Wɩɩsɛ tá ŋmɛ́nɔ pá́ŋ nyúútɩna rʋ́ ká tɔ́ɔ́ ná a ɓá a pá Ɩzɩrayɛl nɩɛ a tɩŋ biyólli mi. Nyuutɩna Wɩɩsɛ baá pá́ŋ nyúútɩna ŋmɛ́nɔ, rʋʋ́ pi rá máábinɔ́ŋɔ Selofadi liwe a pɔ́ʋ́ tolé. 3 Rɩ́ ɓa nɛ́ já Ɩzɩrayɛl jɩmʋ́ʋ́la ná sɩɛrʋ oro bál, ɓa sɩ́ lɩ́sɩ́wɔ́ liwe a ánáwa liwe ná sɩɛrʋ, a súúri jɩmʋ́l ná sɩɛrʋ ɓa há sɩ́ ja liwe mi; ɛ́ sɩ́ a rá liwe ná a há lɛɛ a tɩŋ biyólli mi múúri. 4 Ká rɩ́ "pii cɛ́ bɩna" (zíbíle) ni peri Ɩzɩrayɛl nɩɛ, ɓa liwe sɩ́ lɩ́rá ánáwa liwe sɩɛrʋ nɛ́, a súúri jɩmʋ́l ná sɩɛrʋ ɓa há jɛ́ liwe mi.»5 Moyizi máŋsɛ Nyuutɩna Wɩɩsɛ wɩmakɛ́ ná a pá́ Ɩzɩrayɛl nɩɛ a bʋlɛ́: «Zɔzɛfɛ bɛlɛ jɩmʋ́l ké taŋá. 6 Ná wɩ́ɩ́ ná Nyuutɩna Wɩɩsɛ há sʋʋ́ ná a pá Selofadi tolé: Ɓa sɩ́ já báálɔ ná ɓa há có, rʋ́ é há awɔ́ áná jɩmʋ́l sɩɛrʋ jaa nɔ́ŋɔ bá́l. 7 Ɛ́ wɩ́ɛ́ Ɩzɩrayɛl nɩɛ sɩɛrʋ, liwe oro wuu waá wólli a jɩmʋ́l né óŋ ká baá a jɩmʋ́l nɔ́ŋɔ má óŋ; amá Ɩzɩrayɛl nɩɛ nɛ́ŋ wuu sɩ vɔ́wʋ́ tɩɩ cɔ́ʋ́ ánáwa jɩmʋ́l liwe mi. 8 Toló ná é wuu há kéŋ liwe Ɩzɩrayɛl jɩmʋ́ʋ́la sɩɛrʋ, mɔhɔ̃́ rʋʋ́ jɔ́ʋ́ balá ʋ áná jɩmʋ́l jaa nɔ́ŋɔ sɩɛrʋ nɛ́, a makɛ rɩ́ Ɩzɩrayɛl nɛ́ŋ wuu tɩ́llʋ́ ánáwa liwe. 9 Liwe wuu wɩ mɔhɛ̃́ rʋ́ a jɩmʋ́l né óŋ ká baá a jɩmʋ́l nɔ́ŋɔ má óŋ, amá Ɩzɩrayɛl nɩɛ jɩmʋ́l wuu mɔhɔ̃́ rʋ́ vɔ́wʋ́ tɩɩ cɔ́ʋ́ liwe mi.»
10 Selofodi tolé tʋŋ ɛ́ ná Nyuutɩna Wɩɩsɛ fa há mákɛ́ pá́ Moyizi. 11 Mahila rɩ́ Tirisa rɩ́ Hogila rɩ́ Milika arɩ́ Nowa há ká Selofodi tolé jɔ́wɔ́ áná máála bɛlɛ nɛ́. 12 Ɓa já Manase há ká Zɔzɛfɛ bio, bɛlɛ jɩɩsɛ sɩɛrʋ nɛ́, ɛ́nɛ́ ɓa liwe káánɛ jɩmʋ́l ná ɓa áná duo há lʋʋ́ sɩɛrʋ.
13 Ɓa nyáŋ nɛ́ ká wadawa ná arɩ́ wɩ́makɛ́ ná Nyuutɩna Wɩɩsɛ há tɩŋ Moyizi mi a máŋsɛ a pá́ Ɩzɩrayɛl nɩɛ Mʋabɛ polo sɩɛrʋ, Zʋrdɛŋ fuo nʋɔ, a caasɛ Zeriko.