Wárɛ nyɩ́sɛ wɩ́ɛ́
10
1 Nyuutɩna Wɩɩsɛ bʋl Moyizi rɩ́ a bʋlɛ́: 2 «A rɩ́wɔ́ pi wárɛ gulí a luki nyɩ́sɛ bɛllɛ. Ɓa nɛ́ rɩ́ɩ́ kaá yɩrɛ jamáŋ ná aá ciki, ká káŋwɔ́ nɛ́ aá ílli jamáŋ ná má ɓa púl mí. 3 Rɩ ɓa nɩ́ mú nyɩ́sɛ ná wuu bɛllɛ, jamáŋ ná wuu sɩ́ céŋ náŋá ɩ laka, céme táŋtɛjaa ná dánnʋɔ. 4 Rɩ nyɩ́la balá nɛ́ rɩ́wɔ́ mu, jɩtɩ́náwa rɩ́ Ɩzɩrayɛl nɩɛ bʋ́ɩ́wa nyúútɩ́náwa nɛ́ sɩ́ hé náŋá mɛ́, ɩ laka. 5 Rɩ́ ɓa mú kɩ́ŋkáŋ, nɩɛ ná púl há mɩ́ŋ tɔ́ɔ́ mʋ́l, nɛ́ sɩ́ isi va; 6 rɩ́ ɓa nɛ́ mú kíŋkáŋ bʋllɛ mɛ́, nɩɛ ná púl há mɩ́ŋ wɩɩsɛ dɩpomí nédu rɩ́, sɩ́ isi aá va. Ɓa sɩ́ mú kíŋkáŋ ɓa ísí valɛ́ mɛ́. 7 Ɩ́ sɩ́ mú a yɩrɛ jamáŋ wuu aá hé náŋá mɛ́, amá ɩ́ sɩ́ kɩ́ŋkáŋ mú. 8 Aarɔŋ bɛlɛ ná há ká vʋk'ɔɔsa nɛ́ sɩ́ mumú ɛ́ nyɩ́sɛ. Ʋ sɩ́ a wɩ́bílí a pɛ́ɩ́wa a de kaá mʋ́ wuu ɩ́ wówa wuu sɩɛrʋ. 9 Ɩ́ tɔ́ɔ́ sɩɛrʋ, rɩɩ́wa kúó aá mʋ́ rɩ́ɩ́wa yo dɩŋdɔmɔ ná há cɩ́nɩ́ɩ́wa mɛ́, ɩ́ mu nyɩ́sɛ ná kɩ́ŋkáŋ, rɩ́ŋ bɩ́ɩ́nɩ́wa wɩ́ɛ́, a makɛ rɩ́ŋ é Nyuutɩna Wɩɩsɛ, há kɛ́ɩ́wa Wɩɩsɛ, rɩ́ŋ bɩ́ɩ́nɩ́wa wɩ́ɛ́, a lɛ́ɩ́wa tá dɩŋdɔma nɛ́sɛ mɛ́. 10 Ɩ́ satɔrɔ́ tápʋlɛ rɩ́rɩ́wa tápʋlzeŋsi, rɩ́rɩ́wa caŋfɛlɛ cáŋsɛ tapʋlɛ, ɩ́ sɩ́ mu nyɩ́sɛ ná, a ɔsɛ vʋkfísi rɩ́ tɛŋfɩ́ɛ́l vʋka, rɩ́wɔ́ a rɩ́ Wɩɩsɛ líísíwa wɩ́ɛ́. Ŋ nɛ́ ká Nyuutɩna Wɩɩsɛ, ɩ́ Wɩɩsɛ.»Ɩzɩrayɛl nɩɛ ísí Sinayi gɩrbétéke sɩɛrʋ
11 Bɩŋsɛ bɛllɛ nyúú mí, caŋsɛ bɛllɛ mɛ́, tápʋlɛ mɛrɛ́ kal, dúóbána ná ísí ceme táŋtɛ ná nʋtʋmɛ dáka há mɩnʋ́ sɩɛrʋ nyúú. 12 Ɛ́ nɛ́ Ɩzɩrayɛl nɩɛ isi Sinayi gɩrbétéke ná sɩɛrʋ col, anɛ ɛ́ há bílé. Dúóbána ná mʋ́ cɛ́ Paraŋ gɩrbétéke mí. 13 Ɓa dʋ́ŋdʋ́ʋ̄́ valɛ́ nɛ́ ɛ́, a tɩŋ ɛ́ Nyuutɩna Wɩɩsɛ há mákɛ́ pá Moyizi.
14 Ziida bɛlɛ rɩ́wɔ́ púlli ní lá sɩ́ɛ́ arɩ́wɔ́ dirapó. Nasɔŋ há ká Amɩdabɛ bio nɛ́ fá ká Ziida bɛlɛ púl nyúútɩna (pulli nɔhɔ̃́); 15 Nɩtanɩyɛl há ká Sʋɔrɛ bio nɛ́ ká Ɩsakarɛ bɛlɛ púl nyúútɩ́na (sóójipúlli nɔhɔ̃́); 16 Ɩlɩyabɛ há ká Hɩlɔŋ bio nɛ́ ká Zabɩlɔŋ bɛlɛ púl nyúútɩ́na (sóójipúlli nɔhɔ̃́).
17 Ɓa cunni táŋtɛjaa ná, Gɛrsɔŋ rɩ́ Merari bɛlɛ cɩ́ɩ́nɛ aá cól.
18 Ribaŋ rɩ́rʋ́ púll isi col arɩ́wɔ́ dirapó. Elisuri há ká Sedehuri bio nɛ́ ká Ribaŋ pul nyúútɩ́na; 19 Sɩmɩyɔŋ jɩmʋ́l bɛlɛ púl nyúútɩ́na nɛ́ ká Sɛlʋmɩyɛl há ká Surisadayi bio; 20 Gadɛ jɩmʋ́l bɛlɛ púl nɔhɔ̃́ nɛ́ ká Ɩlɩyazafɛ há ká Dɩwɛl bio.
21 Ɛ́ har mɛ́, Kehatitiwa ísó cɩ́ɩ́nɛ Wɩɩsɛ dʋŋɔ tʋtʋmɛ́ cɩksɛ, a col; ká náŋa ná la sɩ́ɛ́, rɩ́wɔ́ mʋ́ ciki táŋtɛjaa ná aá dɛllɩ́wɔ́ koe. 22 Ɩfirayiŋ bɛlɛ rɩ́rʋ́ púlli má isi tɩŋ, arɩ́wɔ́ dirapó. Ɩfɩrayɩŋ bɛlɛ púl nyúútɩ́na nɛ́ ká Elisama há ká Amihudi bio; 23 Manase jɩmʋ́l bɛlɛ púl nyúútɩna nɛ́ ká nɛ́ ká Gamalɩɛl há ká Pedasuri bio; 24 Bɛŋzamɛ jɩmʋ́l bɛlɛ sóójipúl nyúútɩ́na nɛ́ ká Abidaŋ há ká Gidoni bio.
25 Daŋ bɛlɛ púlli rɩ́wɔ́ dirapó (arɩ́wɔ́ púlli) ní ká náŋa ná wuu hatɩŋna. Daŋ bɛlɛ púl nyúútɩ́na nɛ́ ká Ahɩzɛrɛ há ká Amisadayi bio; 26 Azɛrɛ jɩmʋ́l bɛlɛ púl nyúútɩ́na nɛ́ ká Pagɩɛl há ká Ɔkɩraŋ bio; 27 Nɛfɩtalɩ jɩmʋ́l bɛlɛ púl nyúútɩ́na nɛ́ ká Ahɩra há ká Ɩnaŋ bio. 28 Nyɛ nɛ́ Ɩzɩrayɛl nɩɛ púlli hé náŋá mɛ́, a tʋkɛ aá va.
Aŋ rɛ́ sɩ́ la sɩ́ɛ́ a ka jamáŋ va>>
29 Moyizi bʋl Rɩhʋɛl bio Hobab ha kɔ́ʋ́ hɩɩla a lɛ Madɩaŋ, rɩ́ bʋlɛ́: «Áá mʋ́ tɔ́ɔ́ ná wɩ́ɛ́ Nyuutɩna Wɩɩsɛ há sɛ́: ‹Ŋ sɛ́ púú pɛ́ɩ́wa.› Ko ráá mʋ́, á sɩ́ a wérí pɛ́ɩ́, bee wɩ́ɛ́ Nyuutɩna Wɩɩsɛ tá nʋɔ bʋl rʋ́ʋ́ sɩ́ a wérí pá Ɩzɩrayɛl.» 30 Hobab bʋl pɔ́ʋ́ bʋlɛ́: «Ŋ waá mʋ́, amá ŋŋ́ mʋ́ŋ tɔ́ɔ́ nɛ́, ŋ nɩɛ sɩɛrʋ.» 31 Moyizi sɛ́: «Ŋŋ́ sʋ́lɩ́, sɩ́ rá mɛ́ kɛ́kʋ́, bee wɩ́ɛ́ ɩ ɛ̃ ráŋ náwa á háá cɩkɛ́, gɩrbétéke né sɩɛrʋ, ɩ sɩ́ tɩ́ɛ́sɩ́rá. 32 Rɩɩ nɛ́ tɩ́ŋrá mɛ́, á sɩ́ a rɩ́ɩ́ dí wér ná Nyuutɩna Wɩɩsɛ há sɩ́ párá.
33 Ɓa isi Nyuutɩna Wɩɩsɛ paalɔ ná daha rɩ́wɔ́ va ŋmɛ́nɔ tápʋlɛ botoro. Nyuutɩna Wɩɩsɛ Nʋtʋmɛ dáka ná láwɔ́ sɩ́ɛ́, rʋ́ʋ́ káŋwɔ́ va ɛ́ tápʋlɛ botoro, a ja dɩfɩɛlɩ́ pɔ́wɔ́. 34 Nyuutɩna Wɩɩsɛ dúóbána ná fa mɩ́ŋwɔ́ nyúú wɔhɔ, ɓa colé mí.