Nʋtáltáárɔ tɩɩ pii pá Nyuutɩna Wɩɩsɛ wɩ́ɛ́
6
1 Nyuutɩna Wɩɩsɛ bʋ́l Moyizi rɩ́ a bʋlɛ́: 2 «Bʋ́l Ɩzɩrayɛl nɩɛ rɩ́ a bʋlɛ́: Rɩ bál ɛ́ rá má hál rɩ́ lɩ́sʋ́ tɩɩ ʋ náŋa sɩɛrʋ, rɩ́ɩ́ tá nʋɔ, rɩ́ɩ́ púú tɩɩ rɩ́ pá Nyuutɩna Wɩɩsɛ, 3 ʋ wɩ́ mɔhɛ̃́ rʋ́ʋ́ nyɔ dɩvɛ́ŋ rɩ́ sɩduorú; ʋ wɩ́ mɔhɛ̃́ rʋ́ʋ́ nyɔ dɩvɛ́ŋ vɩ́nɛ́gɩr, a wɩ́ mɔhɛ̃́ rʋ́ʋ́ nyɔ vɩ́nɛ́gɩr ná ɓa há kúósi sɩduorú; ʋ wɩ́ mɔhɛ̃́ rʋʋ́ nyɔ́ óŋ ná é wuu vinyi há mɩ́ŋ ráŋ, ʋ wɩ́ mɔhɛ̃́ rʋʋ́ dí vinyinɔ́ŋlaarʋ rɩ́rʋ́ nɔ́ŋkaasɛ. 4 Rʋʋ nʋtálɔ nɩ́ há wɩ lɩ́sɛ́, ʋ wɩ́ viinyi tuu óŋ wuu dí, a wʋʋ́ bii dí, a wʋ́ʋ́ puu máá dí.› » 5 Nyúfʋnɛ́ wʋ́ʋ́ nyúú míí lɔkɛ, a kaá jɔ́ʋ́ nʋtalɔ ná ʋ há tɛɛ́ a púú tɩɩ pá Nyuutɩna Wɩɩsɛ tɛ́ŋ lɩ́sɛ (tenni). Ʋ sɩ́ a Wɩɩsɛ nɩtɩ́llɛ́, ʋ sɩ́ tɔ́ʋ́ nyúpʋsɛ rɩ́wɔ́ wɔ́wɔ́ satɔrɔ́.6 Ʋ tɩɩ pii pá Wɩɩsɛ nʋtalɔ ná tɛ́ŋ mɩ́nɩ́ wuu mí, ʋ wɩ́ mɔhɛ̃́ rʋʋ́ tɩkɛ sʋwɛ mɛ́. 7 Rʋʋ́ áná, rʋʋ́ máá, rʋʋ́ máábinɔ́ŋɔ, ɛ́ rá má rʋʋ́ nétoló nɛ́ sʋwɛ, ʋ wɩ́ mɔhɛ̃́ rʋʋ́ tɩ́kʋ́ mɛ́ a zʋ́ busunnú ŋ sɩ́ɛ́ mɛ́, bee wɩ́ɛ́, ʋ ŋmɔ́wɛ́ tɩɩ pii pá Nyuutɩna Wɩɩsɛ malla ʋ nyúú mí. 8 Ʋ nʋtalɔ ná tɛ́ŋ mɩnɩ́ wuu mi, Nyuutɩna Wɩɩsɛ nɛ́ tʋʋ̃́, ʋ wɩ busunnu kené. 9 Rɩ nɛ́ŋ sʋwɛ sɩ́bírsʋʋ ʋ laka, rʋʋ́ nyúú ná ʋ há píé pá Nyuutɩna Wɩɩsɛ zʋ busunnú, ʋ sɩ́ píérú, ʋ busunnú mʋ́ʋ́rɛ́ tapʋl, tapʋlɛ bálpɛ kal. 10 Córí kal, kʋ́sɛ bɛllɛ ɛ́ rá má kʋ́dɔ́llɛ bɛllɛ nɛ́, rʋʋ́ kaa ko Céme táŋtɛjaa dánnʋɔ, a pá vɔk'ɔɔsɔ. 11 vɔk'ɔ́ɔ́sɔ ná sɩ́ ɓʋ́ nɔ́ŋɔ a ɔsɛ wɩ́bɔma vɔk'ɔsɔ́, a ɓʋ́ nɔ́ŋɔ ɔsɛ vʋkfísi, ká mʋ́ʋ́rɛ busuunú ná ʋ há zʋ́ɛ́ a tɩŋ sʋwɛ ná mɛ́ tɩkɛ́. Ká rʋʋ́ baa púú nyúú pá Nyuutɩna Wɩɩsɛ ɛ́ kal tɩɩ. 12 Ʋ sɩ́ púú tɩɩ baa ɓáásɛ pá Nyuutɩna Wɩɩsɛ a kaá jɔ́ʋ́ nʋtalɔ lɩ́sɛ́ tɛ́ŋ, a ɓʋ́ bɩna sɩ́ɩ́ pewie a ɔsɛ́ vʋk a mʋ́ʋ́rʋ́ busunú. Tapʋlɛ ná náŋa há daarɛ wɩ́ ráŋ dí, bee wɩ́ɛ́ busunnú zʋʋ́ nʋtalɔ ná sɩɛrʋ.»
13 «Tá nʋɔ pii tɩɩ pá Nyuutɩna Wɩɩsɛ wada ná naasɛ nɛ́ nyɛ: rɩ nʋtalɔ ná kal lɩ́sɛ nɛ́ péré, ɓá sɩ́ kánʋ́ ko Céme táŋtɛjaa dánnʋɔ. 14 Ʋ sɩ́ pɛ́ kánʋ́ pálɔ ko pá Nyuutɩna Wɩɩsɛ: bɩna sɩ́ɩ́ pewie ná há wɩ kɔsɔ́ kené a ɔsɛ vʋk físí, bɩna sɩ́ɩ́ pebra ná há wɩ kɔsɔ́ kené a ɔsɛ wɩ́bɔma vɔk'ɔsɔ́, arɩ́ bɩna sɩ́ɩ peɓala a ɔsɛ tɛ́ŋfɩ́ɛ́l vɔk'ɔsɔ́; 15 sɩbʋrtó dɩpɛŋwa kure sɩ́ɩ́, ɓáfurótumíŋ ɓa ha hé nʋʋ ŋmʋsɛ gatówa arɩ́ sɩbʋrtó máásawa (ŋmɔmɛwa) ɓa há gaarɛ nʋʋ arɩ́wɔ́ pállɛ rɩ́wɔ́ nyɔɔlɔ́* (dɩvɛ́ŋ). 16 vɔk'ɔ́ɔ́sɔ ná sɩ́ kaŋwɔ́ wuu túperi Nyuutɩna Wɩɩsɛ sɩ́ɛ́ a cáánʋ́, ká pii ɔsɛ wɩ́bɔma rɩ́ vʋk'físí vɔk'ɔsɔ́. 17 A pi peɓala ná rɩ́ sɩbʋrtó dɩpɛŋwa ná kure sɩ́ɩ́ ná ɔsɛ tɛ́ŋfɩ́ɛ́l vʋk'ɔsɔ́ a pá Nyuutɩna Wɩɩsɛ; a pi pálɔ ná rɩ́ dɩvɛ́ŋ ná má caanɛ Nyuutɩna Wɩɩsɛ. 18 Nʋtaltaarɔ sɩ́ fɩ́nʋ́ nyúú ná ʋ há ta nʋɔ pii pá Nyuutɩna Wɩɩsɛ, Céme táŋtɛjaa dánʋɔ mɛ́, a pɔ́ʋ́ nyúpʋsɛ ná ʋ há tá nʋɔ pii pá Wɩɩsɛ a hé tɛ́ŋfɩ́ɛ́l vɔk'ɔsɔ́ níŋ ná sɩɛrʋ. 19 Vʋk'ɔɔsɔ ná sɩ́ pi peɓala ná vaamɔ naŋbɩlɛ, a lɩ́sɛ kúre sɩɛrʋ sɩbʋrtó gató balá arɩ́ sɩbʋrtó maasa má balá; a piwó hé nʋtáltáárɔ ná nɛ́ŋsa mɛ́, ʋ nyúú ná ʋ há pie pá Nyuutɩna Wɩɩsɛ fɩnɛ́ har mɛ́. 20 Vʋk'ɔɔsɔ ná sɩ́ cɛ́ Nyuutɩna Wɩɩsɛ sɩ́ɛ́, a piwó cáánɛ Nyuutɩna Wɩɩsɛ: Nyuutɩna Wɩɩsɛ nɛ́ tɩwɔ́, ɓa ká vɔk'ɔ́ɔ́sɔ ná ker ni a súúrí beŋtú ná ɓa há pie cáánɛ Nyuutɩna Wɩɩsɛ arɩ́ húĩ́ ná ɓa haá lɩ́sɛ́ mɛ́. Ɛ́ har mɛ́, nʋtaltaarɔ ná sɩ́ wolli dɩvɛ́ŋ nyɔ. 21 Wada ná nʋtaltaarɔ há tá nʋɔ a púú tɩɩ pá Nyuutɩna Wɩɩsɛ há mɔhɛ̃́ rʋʋ́ tɩŋ nɛ́ ɛ́. Pállɛ ná má há mɔhɛ̃́ rʋʋ́ aa pá Nyuutɩna Wɩɩsɛ ʋ nʋtalɔ ná yɩr mɛ́ nɛ́ ɛ́, a súúrú dóé péró ɓɩ́ɛ́ mɛ́. Ʋ mɔhɔ̃́ rʋʋ́ hé dóé ká tɛ nʋtalɔ onni ná wuu, anɛ ɛ́ nʋtalɔ wada ná há mákɛ́.»
*Bárka sʋlɛ́ wɩ́ɛ́
22 Nyuutɩna Wɩɩsɛ bʋ́l Moyizi rɩ́ a bʋlɛ́: 23 « Bʋl Aarɔŋ rɩ́rʋ́ bɛlɛ rɩ́ bʋlɛ́: ‹Nyɛ́ nɛ́ mɔhɛ̃́ rɩ́wɔ́ sʋl bárka pá Ɩzɩrayɛl nɩɛ: 24 Rɩ́ Nyuutɩna Wɩɩsɛ hé bárka pɛ́ɩ́, ká pɔ́ɩ́ mɛ́! 25 Rɩ́ Nyuutɩna Wɩɩsɛ wurú sɩ́ɛ́ cáásɩ́, a ló rʋʋ́ zilé pérí!
26 Rɩ́ Nyuutɩna Wɩɩsɛ ló rʋʋ́ sɩ́ɛ́ mɩ́nɩ́ mɛ́, ká pɛ́ɩ́ tɛ́ŋfɩ́ɛ́l!›
27 Nyɛ́ nɛ́ ɓa sɩ́ yɩ́rɩ́ŋ yɩr pá Ɩzɩrayɛl nɩɛ, rɩ́ŋ hé bárka pɔ́wɔ́.»