Wádawa ná háá makɛ yósi kanɛ́
21
1 Nyuutɩna Wɩɩsɛ súúri bʋlɛ́: <<Ná wádawa ná ɩ há mɔhɛ̃́ rɩ́ɩ́ pii bílwó sɩ́ɛ́: 2 Rɩ nɛrɔ nɛ́ yɔ́wɛ́ yómo, rʋʋ nɛ́ ká Ebire, ʋ sɩ́ tʋŋ bɩŋsɛ balgo. Bɩŋsɛ balpɛ nyúú mí, ʋ sɩ́ tɩ́llʋ́ tɩɩ a lɛ, kɩ́ŋ toó. 3 Rʋʋ dʋŋɔ nɛ́ zʋ́ɛ́, ʋ dʋŋɔ nɩ́ɩ́ lɩ́ɛ́; rʋʋ fa kéŋ háálɔ, ʋ rɩ́rʋ́ háálɔ nɩ́ɩ́ lɩ́ɛ́. 4 Rʋʋ tɩ́na nɛ́ já háálɔ pɔ́ʋ́, rɩ́ háálɔ ná lʋl heŋbólli ɛ́rá má tolé pɔ́ʋ́, háálɔ ná rɩ́ bɛlɛ ná, ʋ tɩ́na ná nɩ́ɩ́ tɩ́llɩ́wɔ́; ʋ dʋŋɔ nɩ́ɩ́ lɩɛ́. 5 Amá rɩ yómo ní sʋ́ʋ́ cóú tɩ́na, ʋ cóú háálɔ rɩ́rʋ́ bɛlɛ, ʋ waá ja rʋ́ʋ́ tɩ́llʋ́ tɩɩ a lɛ, 6 ʋ tɩ́na ná sɩ́ ka Wɩɩsɛ a dáŋsɩ́ɛ́, ká ka yómo ná peri dánnʋtɔ́lɔ, ɛ́rá má dánnʋɔ dacɔ́ŋsɛ, a kánʋ́ dɩllɛ ɓarɛ daa, ká pi hɛnnʋɔ cɔ́kɛ lúri. Ɛ́ é, ʋ sɩ́ tʋŋ aá pɔ́ʋ́ tɩ́na ná a kaá mʋ́ wuu.. 7 Rɩ báálɔ yɛ́llʋ́ toló rʋ́ʋ́ a yómó, ʋ wʋ́ʋ́ tɩɩ wuo tɩ́llɛ aá lɛ, anɛ yóbáála háá lɛ ɛ́. 8 Rʋʋ tɩ́na ná há yɔ́wʋ́ nɛ́ púú ja, ká báá wʋ́ʋ́ có, ʋ mɔhɔ̃́ rʋ́ʋ́ lo rɩ́ toló áná yɔwɛ lɔ́ʋ́ ɓɩnɔ. Ʋ wɩ ŋmɛ́nɔ kené a yɛ́llʋ́ aá pá nɩhʋɔra; ʋ yéŋŋú ní ɛ́. 9 Rʋʋ nɛ́ yɔ́wɛ́ pɔ́ʋ́ bio rʋ́ʋ́ ja, ʋ mɔhɔ̃́ rʋ́ʋ́ ka tolyómo ná anɛ ɛ́ ɓa háá ka tolé ní. 10 Rʋʋ tɩ́na ná nɛ́ já hál nɔ́ŋ súúrú mí má, ʋ wʋ́ʋ́ ɓɩdííli, ʋ gɛnnɛ arɩ́rʋ́ pɩ́nɛ́ cókí múúri. 11 Rʋʋ nɛ́ wɩ nyáŋ botoro ɛ́ɛ́ pá háyómo ná, ʋ wúóló lɔ́ʋ́ tɩɩ aá lɛ, ká kɩ́ŋ toó aá túŋ.Wɩ́zɔkɛ́ ná há wo nɛrɔ mɩɩsɛ aá lɩ́sɛ wɩ́ɛ́
12 Nɛrɔ ná há ŋmɔ́wɛ́ nɩbííno ɓʋ́, ɓaá ɓʋ́ʋ́ má nɛ́. 13 Taŋa rʋʋ nɛ́ wɩ bállɛ́ nɛ́ rɩ́ɩ́ ɓʋ́ʋ́, ká rʋ́ʋ́ a wɩ́zʋʋlɩ́ rɛ́ ká Wɩɩsɛ wɩ kɛ́rɛ́, ɓʋ́ɓʋ́ʋ́rɔ ná wúóló fá mʋ́ aá féŋsi dɩhɩ̃́ oro, ŋ há sɩ́ makɛ pɛ́ɩ́wa. 14 Amá rɩ nɛrɔ nɛ́ dí cɔwɩɩlɔ́ rɩ́ɩ́ pi lɩ́ŋ rɩ́ɩ́ ɓʋ́ʋ́ nɔ́ŋɔ é, rʋʋ có ʋ yúólíŋ koro mí má, ɩ́ ka tɩ́na ɓʋ́.
15 Nɛrɔ ná há ŋmɔ́wʋ́ áná ɛ́rá má ʋ maá, ɓaá ɓʋ́ tɩ́na nɛ́.
16 Nɛrɔ ná há gá nɩbííno yɛ́llɛ, ɛ́rá má a lo ʋ mɩ́nʋ́ dɩhɩ̃́, ɓaá ɓʋ́ tɩ́na nɛ́.
17 Nɛrɔ ná há bʋ́rɛ́ hóú áná ɛ́rá má ʋ maá mɛ́, ɓaá ɓʋ́ tɩ́na nɛ́.
18 Rɩ nɩɛ nɛ́ ná náŋá, rɩ́ nɔ́ŋɔ pi dɔ́wɩ́ yákʋ́ nɔ́ŋɔ, ɛ́rá má rʋʋ nɛ́sɛ nɛ́ rʋ́ʋ́ gúŋsi yákʋ́ rʋ́ʋ́ ɓal, rʋʋ nɛ́ wɩ sʋ́wɛ́, ká rɩ́ ɛ́ bílú basa mɛ́, 19 rʋʋ kúó wólli isi ka deŋtuke vɩ́va, nɛrɔ ná há yákʋ́ ɓa wʋ́ʋ́ ɓʋ́. Ʋ taŋa sɩ́ váárʋ́ rʋ́ʋ́ dúóri, ká tápʋlɛ ná má ʋ há pɩ́nɛ́ a wɩ tʋ́mɛ́, ʋ sɩ́ túŋwó má.
20 Rɩ nɛrɔ ŋmɔ́wʋ́ yómo báálɔ ɛ́rá má háálɔ rɩ́ daa rʋ́ʋ́ sʋwɛ, ɓa sɩ́ bɛ́ŋsʋ́ ɛ́ wɩ́ɛ́. 21 Amá rɩ yómo ná nɛ́ á tápʋ́l balá ɛ́rá má bɛllɛ ká sʋwɛ, ɓa wʋ́ʋ́ tɩ́na ná bɛŋsɛ, bee wɩ́ɛ́ ʋ meéwí ní.
22 Rɩ báála ná náŋá rɩ́ɩ́ mʋ́ʋ́ yɩ́ɩ́sɛ hápuuko, rɩ́ ɛ́ a rʋ́ʋ́ lʋl rʋʋ tápʋl ha wɩ péré, ká wɩ́ɩ́ wɩ zʋ́ɛ́, ʋ bála sɩ́ ɓá kɩŋ pɔ́wɔ́, rɩ́ nɩɛ cɛ́ naa ká rɩ́wɔ́ túŋ. 23 Amá rɩ wɩ́ɩ́ pú háálɔ ná, ɓaá pi kɩŋ rɩ́ɩ́ túŋ nɛrɔ ná há yɩ́ɩ́sʋ́ mɛ́ nɛ́. Rɩ nɛrɔ lɩ́sɛ hiẽsó, ɓaá lɩ́sʋ́ hiẽsó ní, 24 rɩɩ tóki nɛrɔ sɩ́ɩ́, ɓaá tókí sɩ́ɩ́ nɛ́, rɩɩ gíri nɛrɔ nyɩl, ɓaá gírí nyɩl nɛ́, rɩɩ cókí nɛrɔ nɛ́sɛ, ɓaá cókí nɛ́sɛ nɛ́, rɩɩ cókí nɛrɔ naa, ɓaá cókí naa nɛ́, 25 rɩɩ nyɩ́kɛ́ nɛrɔ, ɓaá nyɩ́kɩ́ nɛ́, rɩɩ pɩ́rɛ́ nɛrɔ, ɓaá pɩ́rɩ́ nɛ́, rɩɩ ŋmɔ́wɛ́ nɛrɔ bʋ́rmɛ, ɓaá bʋ́́rmɩ́ nɛ́.
26 Rɩ nɛrɔ ŋmɔ́wʋ́ yómo báálɔ ɛ́rá má háálɔ rʋ́ʋ́ sɩ́ɩ́ tóki, ʋ sɩ́ tá ɛ́ yómo rʋ́ʋ́ tɩ́llʋ́ tɩɩ a col, ʋ sɩ́ɩ́ ná tóke kɩŋ mɛ́. 27 Rʋʋ ŋmɔ́wʋ́ yómo báálɔ ɛ́rá má háálɔ rʋ́ʋ́ nyɩl gíri, ʋ sɩ́ tá ɛ́ yómo rʋ́ʋ́ tɩ́llʋ́ tɩɩ a col, ʋ nyɩl ná gíre kɩŋ mɛ́.
28 Rɩ nɔɔ kenú nyɩ́sɛ yakɛ bál ɓʋ́ ɛ́rá má hál, ɓa sɩ́ ja dɔ́wʋ́ɔ́ yosi ɛ́ nɔɔ ɓʋ́. Ɓa wʋ́ʋ́ namɩɛ dí. Ɓa wɩ wɩ́ɩ́ wuo pi aá cɩ́ɩ́nɛ nɔɔ tɩ́na. 29 Amá rʋʋ nɛ́ fa ká nɔpiiló, rɩ́wɔ́ bʋl pá nɔɔ tɩ́na fól wuu, kɔ́ʋ́ wʋ́ʋ́ mɛ́ bélé, ká rʋ́ʋ́ kánʋ́ nyɩ́sɛ yakɛ bál ɓʋ́ ɛ́rá má hál, ɓa sɩ́ ja dɔ́wʋ́ɔ́ yósú ɓʋ, ká ɓʋ́ʋ́ tɩ́na má. 30 Rɩ ɓa sáŋɔ́ rɩ́ nɔɔ tɩ́na túŋ óŋ ká lɔ́ʋ́ mɩɩsɛ, ká ná ɓa há ɓá kɩŋ mɔ ɛ́ wuu pɔ́ʋ́, ʋʋ́ túmú ní. 31 Rɩ nɔɔ ɓʋ́ heŋbíé má, tolwié ɛ́rá má heŋbólé, ɛ́ tɩɩ nɩ́ɩ́ bilé. 32 Rɩ nɔɔ ɓʋ́ yómo, rɩ bál, rɩ hál, nɔɔ tɩ́na sɩ́ túŋ meéwícááka mɛrɛ́ rɩ́ fí a pá yómo tɩ́na, ká rɩ́wɔ́ yosi nɔɔ ná ɓʋ́ rɩ́ dɔ́wʋ́ɔ́.
33 Rɩ nɛ́ŋ wúri vil nʋɔ tá, ɛ́rá má rɩ nɛ́ŋ lú vil ká wɩ nʋɔ cúé, ká rɩ́ nɔɔ ɛ́rá má kokúme ɓal ráŋ, 34 vil tɩ́na sɩ́ túŋ pʋna ná meéwí pá pʋna tɩ́na, ká pi pʋsʋwɛ ná. 35 Rɩ nɛ́ŋ nɔ́ɔ́ kenú nyɩ́sɛ yákʋ́ nɔ́ŋɔ nɔɔ rʋ́ʋ́ sʋwɛ, ɓa sɩ́ yɛ́llɛ nɔwómmi ná a pi meéwíé ɓa náŋá, ká pi nɔsʋwɛ ná má ɓa náŋá. 36 Amá rʋʋ nɛ́ fa ká nɔpiiló, rɩ́wɔ́ bʋl pá nɔɔ tɩ́na fól wuu, kɔ́ʋ́ wʋ́ʋ́ mɛ́ bélé, ká ná nɔwómmi tɩ́na sɩ́ ja nɔɔ túŋ nɔsʋwɛ ná kɩŋ, ká pi nɔsʋwɛ ná.
Pʋsɛ gɛɛ wɩ́ɛ́
37 Rɩ nɛ́ŋ gá nɔɔ, ɛ́rá má pieŋso, ɛ́rá má bʋʋnɔ, a ɓʋ́, ɛ́rá má a yɛ́llɛ, ʋ sɩ́ lɩ́sɛ nɛsɛ bɔmmʋ́ɔ́ a túŋ nɔɔ ná kɩŋ; ká lɩ́sɛ pieŋse ɛ́rá má bʋnnɛ baná a túŋ pebala ná kɩŋ, ɛ́rá má bʋbala ná kɩŋ.