Ɩzɩrayɛl nɩɛ pérí Sinayi paalɔ
19
1,2 Ɩzɩrayɛl nɩɛ ísí Refidiŋ mí a col. Ɓa Ezipiti mí lɩɩ caŋsɛ botoro nyúú mí, dʋ́ŋdʋ́ʋ̃́ tápʋl nɛ́, ɓa kaa zʋ Sinayi gɩrbétéke sɩɛrʋ. Ɓa sɩɛ́ mʋ́ ciki Sinayi paalɔ sɩ́ɛ́, gɩrbétéke ná sɩɛrʋ. 3 Moyizi zɛ́ paalɔ ná rʋ́ʋ́ céŋ Nyuutɩna Wɩɩsɛ.Nyuutɩna Wɩɩsɛ cɛ́ paalɔ ná nyúú ɓóŋɓóŋ ká yɩ́rʋ́ a bʋlɛ́: <<Ná wɩ́ɩ́ ná ɩ há sɩ́ bʋl pá Zakɔbɛ duo, Ɩzɩrayɛl nɩɛ: 4 <Ɩ́ tɩɩ náŋ há á Ezipiti ɛ́ rɛ́; ɩ́ náŋ há á ɛ́ ká kɛ́sɩ́wa kóŋ rɩ́ ɩ́ ko aá lɛ rɛɛ́wa rɛ́; ʋ dé nɛ kiesí há gúú bɛlɛ ɛ́ nɛ́. 5 Mʋ́l né mí, rɩɩ́wa nɛ́ tɩ́ŋɩ́ŋ nʋɔ, rɩɩ́wa nɛ́ tɩ́ŋɩ́ŋ nʋtálɔ, ɩ́ sɩ́ áŋ jamáŋ, ŋ nɛ́sɛ nɩɛ, dúníé nɩɛ wuu sɩɛrʋ; bee wɩ́ɛ́ ŋ nɛ́ tɛ tíé wuu. 6 Ɩ́ é sɩ́ áŋ kuótɔ́ɔ́ vʋk'ɔɔsa, a áŋ duo nɩɛ ná má há wɩ busunnu kené.> Bʋl nyáŋ nɛ́ pá Ɩzɩrayɛl nɩɛ.>>
7 Ɛ́ nɛ́ Moyizi ko yɩ́rɛ Ɩzɩrayɛl nɩhɩɛ̃́sɛ a cesi wɩ́ɛ́ ná wuu pɔ́wɔ́, anɛ ɛ́ Nyuutɩna Wɩɩsɛ há máŋsɛ́ pɔ́ʋ́. 8 Jamáŋ ná wuu hé nʋɔ balá a bʋlɛ́: <<Á sɩ́ a wɩ́ɛ́ ná wuu Nyuutɩna Wɩɩsɛ há mákɛ́.>> Moyizi ka jamáŋ wɩ́bʋlɛ́ ná mʋ́ bʋl pá Nyuutɩna Wɩɩsɛ. 9 Nyuutɩna Wɩɩsɛ bʋl Moyizi rɩ́ bʋlɛ́: <<Ŋ sɩ́ zʋ duóbáŋzeno sɩɛrʋ a kóí rí, a makɛ rɩ́ŋ bʋ́bʋ́lɩ́ rɩ́ ká rɩ́ jamáŋ ná nɩ́nɩ́ŋ liŋó, rɩ́wɔ́ tɩŋ ɛ́ mɛ́ a lɛ́ɩ́ dí tɛ́ŋ wuu mí.>> Moyizi pi jamáŋ liŋó ná bil pá Nyuutɩna Wɩɩsɛ.
Wɩɩsɛ kó Moyizi rɩ́, Sinayi paalɔ nyúú
10 Nyuutɩna Wɩɩsɛ baa bʋl Moyizi rɩ́ bʋlɛ́: <<Bɩrmʋ́ jamáŋ ná rɩ́, a bʋl rɩ́wɔ́ mʋ́ʋ́rɩ́wɔ́ busunnu zaa rɩ́ cíé; rɩ́wɔ́ sɛ́sɩ́wɔ́ gɛnnɛ má. 11 Bʋl rɩ́wɔ́ káŋwɔ́ tɩɩ tápʋlɛ botoro kal, bee wɩ́ɛ́ ɛ́ kal ŋ sɩ́ tuwi Sinayi paalɔ nyúú jamáŋ ná wuu sɩ́ɛ́ mɛ́. 12 Ɩ sɩ́ tuuri kíl paalɔ ná wuu, ká bʋl pɔ́wɔ́, rɩ́ nɛrɔ wuu pɔ́ rʋ́ʋ́ sɩ́ tuuró ná mɛ́ dáárʋ́, a sɩ́ paalɔ ná zɩ́nʋ́, a sʋ́ʋ́ mɛ́ tɩ́kʋ́. Rɩ nɛrɔ wuu vɔ́ɔ́ ká tɩkɛ, ʋʋ́ sʋ́wʋ́ nɛ́. 13 Rʋʋ ká nɩbíŋ, rʋʋ ká pʋná, ɓaá ɓʋ́ nɛ́. Ɓa taŋa wʋ́ʋ́ mɩ́ɩ́ tɩkɛ, ɓaá yósú rɩ́ dɔ́wʋ́ɔ́ nɛ́, ɛ́ rá má hɛmɛ, rʋ́ʋ́ sʋwɛ. Ká, rɩ ɓa nɛ́ kúé mu penyɩ́la, nɩɛ náŋa sɩ́ zɛ́ paalɔ ná nyúú.>> 14 Moyizi lɛ paalɔ ná nyúú tuwi jamáŋ ná rɩ́, a a ɓa mʋ́ʋ́rɩ́wɔ́ busunnu, a sɛ́sɩ́wɔ́ gɛnnɛ. 15 Ká ʋ sɩɛ́ bʋl pá jamáŋ ná bʋlɛ́: <<Ɩ́ kánɩ́wa tɩɩ rɛɛ́ rɩ́ tápʋlɛ botoro; ɩ́ sɩ́ɩ́wa háála mɛ́ tɩ́kʋ́.>>
16 Tápʋlɛ botoro kal cɩ́cʋɔ fól, rɩ duóɓɛ́llɛ rɩ́ duófɩ́llɛ arɩ́ duóbána ɓɩzeno ní paalɔ ná nyúú, ká ɓa nɛ nyɩ́la mui dɔ́mɛ kɩ́ŋkáŋ. Jamáŋ ná wuu de cɛ́ ká cícel. 17 Moyizi a jamáŋ ná lɩ́wɔ́ dɩkéni, a mʋ́ céŋ Wɩɩsɛ. Ɓa mʋ́ cɛ́ paalɔ ná tɩŋa. 18 Sinayi paalɔ wuu sɩɛ́ de cúcu nyʋɔsɛ, bee wɩ́ɛ́ Nyuutɩna Wɩɩsɛ túwí níŋ sɩɛrʋ. Nyʋɔsɛ ná dé cúcu ní anɛ nívaa nyʋɔsɛ, ká paalɔ ná wuu de zízíksi rɩ́ dóé. 19 Nyɩ́la ná dɔ́mɛ de ɔsɛ aá cɩɩmɛ kɩ́ŋkáŋ. Moyizi bʋl wɩ́ɛ́, Wɩɩsɛ tɩŋ duóɓɛ́llɛ mɛ́ aá lɩ́sɛ nʋʋsɛ.
20 Nyuutɩna Wɩɩsɛ tuwi cɛ́ Sinayi paalɔ ná nyúú ɓóŋɓóŋ ká yɩ́rɛ Moyizi ʋ zɛ́. 21 Nyuutɩna Wɩɩsɛ bʋl Moyizi rɩ́ bʋlɛ́: <<Tuwi bʋl jamáŋ ná rɩ́, rɩ́wɔ́ pɔ́ rɩ́wɔ́ háá buuri fá peri rɩ́wɔ́ bélíŋ. Rɩ ɓa á ɛ́, ɓa sɩɛrʋ nɩɛ ɓɩkana sɩ́ sʋsɛ. 22 Rɩ́ vʋk'ɔɔsa ná má tɩɩ há túé aá péríŋ, rɩ́wɔ́ má mʋ́ʋ́rɩ́wɔ́ busunnu, rɩ́ Nyuutɩna Wɩɩsɛ háá ɓʋ́ʋ́sɩ́wɔ́ sɩɛrʋ náŋa.>> 23 Moyizi bʋl Nyuutɩna Wɩɩsɛ mɛ́ bʋlɛ́: <<Jamáŋ ná wɩ Sinayi paalɔ ná nyúú wuó zɛ́, ɩ tɩɩ nɛ́ sʋ́ʋ́ kísú, a a á tuuri kíl paalɔ ná wuu, ká bʋlɛ́ nɛrɔ wuu pɔ́ rʋ́ʋ́ sɩ́ tuuró ná mɛ́ dáárʋ́, a sɩ́ paalɔ ná tɩŋa má mɛ́ tɩ́kʋ́.>> 24 Nyuutɩna Wɩɩsɛ bʋl pɔ́ʋ́ bʋlɛ́: <<Bɩrtuwi, ká rɩ́rɩ́ Aarɔŋ zɛ́. Amá rɩ́ vʋk'ɔɔsa rɩ́ jamáŋ ná sɩ́ búúrí zɩ́nɩ́ŋ rɩ́, rɩ ɓa á ɛ́, ŋ sɩ́ ɓʋ́ʋ́sɩ́wɔ́ sɩɛrʋ nɩɛ náŋa.>> 25 Moyizi bɩrtuwi bʋl ɛ́ pá jamáŋ ná.