Zakɔbɛ hé Manase rɩ́ Efirayiŋ nyúú bárka
48
1 Ɛ́ wɩ́ɛ́ har mɛ́, ɓa kúó bʋl pá Zɔzɛfɛ rʋ́ʋ́ áná nɩ́ɩ́ wɩɩlɛ́. Ʋ lɩ́ɔ́ pɛ́ kɛ́sʋ́ bɛlɛ bɛllɛ, Manase rɩ Efirayiŋ tɩ́ŋʋ́ tɩɩ mɛ́. 2 Ɓa há sɛ́ Zakɔbɛ ná há ká Ɩzɩrayɛl néí bio Zɔzɛfɛ nɩ́ɩ́ kué, rʋ́ʋ́ néí. Zakɔbɛ wálmɔ́ isi kénú basa mɛ́. 3 Ká bʋl Zɔzɛfɛ dɩhɩ̃́ bʋlɛ́: <<Wɩɩsɛ ná dóé há kɛ onni wuu kenú tɩɩ nyɩ́ɩ́sɩ́ŋ mɛ́, Luzi mí, Kanaŋ dɩtɩ́llɛ, a héŋ nyúú bárka.>> 4 Ʋ sɛ́: <<Ŋ sɩ́ súúrí lʋla, a makɛ rɩ́ɩ́ pul a bɩrmɛ dukana áná. Ŋ sɩ́ pi tɔ́ɔ́ né pɛ́ɩ́ duo nɩɛ, rɩɩ nɛ́ kúé rɩɩ toó, a kaá mʋ́ wuu tokó toó. 5 Mʋ́l né mí ɩ bɛlɛ ná bɛllɛ, ɩ há lʋ́llɛ́ Ezipiti mí, ká rɩ́ŋ zɩŋ kóí dɩhɩ̃́ Ezipiti mí, ŋ nɛ́ sɩ́ tɩ́llɩ́wɔ́. Ŋ nɛ́ sɩ́ tɩ́llɛ Efirayiŋ rɩ́ Manase, anɛ ŋ há tɛ Ribaŋ rɩ́ Sɩmɩyɔŋ ɛ́. 6 Amá bɛlɛ ná ɩ há sɩ́ lʋ́lwɔ́ har rɩ́ mɛ́, ɓa nɛ́ sɩ́ ɛ́ɩ́ bɛlɛ. Ɓa rɩ́ Efirayiŋ rɩ́ Manase, ɓa waá a rɩ́wɔ́ tʋŋ liwe mí. 7 Ŋ há lɛ́ Padaŋ Aramɛ a ko peri Kanaŋ, Rasɛl sʋ́wɛ́ ráŋ nɛ́, raá ha wɩ Ifrati péré. Ŋ sɩɛ́ húú Ifirati ná, ɓa há kené aá yɩ́rɛ Beteleyɛmɛ ŋmɛ́nɔ nʋɔ nɛ́.>> 8 Zakɔbɛ bél Zɔzɛfɛ bɛlɛ, ká bʋlɛ́: <<Áŋwa rɛ́ nyɛ?>> 9 Zɔzɛfɛ bʋ́lʋ́ áná dɩhɩ̃́ bʋlɛ́: <<Ŋ bɛlɛ ná, Wɩɩsɛ há páŋ rɛɛ́wa nɛ́ ɛ́.>> Zakɔbɛ bʋl Zɔzɛfɛ dɩhɩ̃́ bʋlɛ́: <<Ŋŋ́ sʋlɩ́, a rɩ́wɔ́ péríŋ, a makɛ rɩ́ŋ hé bárka pɔ́wɔ́.>> 10 Zakɔbɛ há nɩ́ɩ́nɛ́, ʋ sɩ́ɛ́ bɔ́lɔ́, ɛ́ nɛ́ tɛ ʋ báá wɩ ráŋ wérí ná. Zɔzɛfɛ a ɓa tuu peri Zakɔbɛ, ʋ hé bárka pɔ́wɔ́, ká káŋwɔ́ kormi. 11 Zakɔbɛ bʋ́l Zɔzɛfɛ dɩhɩ̃́ bʋlɛ́: <<Ŋ fa wɩ bɩ́ɩ́nɛ́ ŋ sɩ́ bɩrɛ néí, sɩɛ́ ná, Wɩɩsɛ ɔ́ɔ́ ŋ néí bɛlɛ má tɩɩ!>> 12 Zɔzɛfɛ a ɓa ísú áná neɓííne daha, kɔ́ʋ́ ɓírmi, a kánʋ́ sɩ́ɛ́ cú tíé. 13 Ɛ́ nɛ́ Zɔzɛfɛ kɛ́sɩ́wɔ́ wuu bɛllɛ, ʋ kéŋ néduu nɛ́sɛ nɛ́ ka Efirayiŋ, Zakɔbɛ nágʋɔ caasɛ́, ká ka nágʋɔ nɛ́sɛ ka Manase, Zakɔbɛ néduu caasɛ́, a káŋwɔ́ tuu pérú tɩɩ. 14 Zakɔbɛ tɛ́rʋ́ néduu sakɛ Efirayiŋ há ká maábio nyúú mí, ká púú nágʋɔ nɛ́sɛ sakɛ Manase nyúú mí, kɔ́ʋ́ nɛ́ ká máálá. 15 Ʋ hé Zɔzɛfɛ nyúú bárka, a bʋlɛ́: <<Wɩɩsɛ ná ŋ naabál Abɩrahaŋ rɩ́rɩ́ŋ áná Ɩzakɛ há tɩ́ŋɛ́, Wɩɩsɛ ná há bélíŋ mí, ŋ lʋlɛ́ tɛ́ŋ, a kaa ko aá lɛ zaa; 16 malɩ́ka ná há láŋtá bɔ́ŋbɔ́ŋ rɩ́rʋ́ duó wuu mí, hé heŋbiisi nyáŋ nyúú bárka! Ká rɩ́wɔ́ píŋ yɩr rɩ́rɩ́ŋ ánáwa Abɩrahaŋ rɩ Ɩzakɛ yɩr, aá yɩ́rwɔ́. Ká rɩ́wɔ́ pul kɩ́ŋkáŋ, a sú dúníé. 17 Zɔzɛfɛ há néé rʋʋ áná púú néduu nɛ́sɛ sakɛ Efirayiŋ mí, ʋ sɩɛrʋ zɔ́kɔ́. Ɛ́ nɛ́ ʋ kánʋ́ áná nɛ́sɛ kóri Efirayiŋ nyúú mí, a kaa mʋ́ sakɛ Manase nyúú mí.>> 18 Ká bʋ́lʋ́ áná dɩhɩ̃́ bʋlɛ́: <<Ŋ áná, ɛ́ rá tóú; ŋ́né ní ká bihɔ̃́; píí néduu nɛ́sɛ sákʋ́ nyúú mí ní.>> 19 Ʋ áná vɛ, ká bʋlɛ́: <<Ŋ ɩ́ɔ̃́ rɛ́, ŋ bio, ŋ ɩ́ɔ̃́ rɛ́; ʋ má sɩ́ ko a duo nɔ́ŋɔ, ʋ má sɩ́ ko a nɔhɔ̃́; amá ʋ maábio nɛ́ sɩ́ ko a nɔhɔ̃́ a kɩ́llʋ́, ʋ nihẽ sɩ́ ko bɩrmɛ dukana.>> 20 Ɛ́ tápʋl, ʋ héwó nyúú bárka ká bʋlɛ́: <<A tɩ́ŋɩ́ mɛ́ nɛ́, Ɩzɩrayɛl nɩɛ sɩ́ wólli hé nɩɛ nyunni bárka.>> Ká bʋlɛ́: <<Rɩ́ Wɩɩsɛ a rɩ́ɩ́ nɛ Efirayiŋ rɩ́ Manase.>> Ɛ́ nɛ́ sɩɛ́ kɔ́ʋ́ pi Efirayiŋ hé sɩ́ɛ́, ká Manase tʋkɛ. 21 Zakɔbɛ bʋl Zɔzɛfɛ dɩhɩ̃́ bʋlɛ́: <<Ná, ŋ sɩɛ́ sɩ́ sʋwɛ! Amá Wɩɩsɛ sɩ́ mɩŋ arɩ́rɩ́wa, a a, rɩ́ɩ́wa bɩrɛ kóíwa naabálwa tɔ́ɔ́. 22 Ŋ sɩ́ pi ker nɔ́ŋɔ a pɛ́ɩ́, rʋ́ʋ́ kɩ́llɩ́ mááláwa ker, ʋ nɛ́ ká Sɩsɛmɛ dɩtɩ́llɛ ná ŋ há lá Amoritiwa nɛ́sɛ mɛ́, arɩ́rɩ́ŋ tókowí rɩ́rɩ́ŋ túó.>>