Bɛŋzamɛ mááláwa kenú mʋ́ Ezipiti
43
1 Losu kúó ɔsɛ bɛsɛ kɩ́ŋkáŋ tɔ́ɔ́ ná mɛ́. 2 Ɓa há díwó bilé ná ɓa há kené lɛ Ezipiti ko, a tenni, Zakɔbɛ bʋ́lʋ́ bɛlɛ dɩhɩ̃́ bʋlɛ́: <<Ɩ́ bɩrmʋ́ yɔwɛ ɓɩdííle mʋɔ́ ko párá.>> 3 Ɛ́ nɛ́ Ziida sɛ́: <<Báálɔ ná dé caasɛ bʋl taŋá párá; ʋ sɛ́ ráá báá wʋ́ʋ́ sɩ́ɛ́ kɔwɛ aá cɛ́, raá maábio ná nɛ́ wɩ́rá mɛ́ tɩ́ŋɛ́ ko. 4 Rɩɩ nɛ́ sáŋɛ́ ráá maábio tɩŋrá mɛ́ mʋ́, á sɩ́ mʋ́ yɔwɛ ɓɩdííle ko pɛ́ɩ́. 5 Amá rɩɩ nɛ́ wɩ sáŋɛ́ rʋ́ʋ́ tɩ́ŋrá mɛ́, á waá mʋ́, bee wɩ́ɛ́ báálɔ ná bʋ́lɔ́ párá bʋlɛ́: <<Ɩ́ báá sɩ́ŋ sɩ́ɛ́ rɛɛ́ kó, rɩɩ́wa maábio ná nɛ́ wɩ́ɩ́wa mɛ́ tɩ́ŋɛ́.>> 6 Ɛ́ nɛ́ Zakɔbɛ sɛ́: <<Beé rí tɛ ɩ́ áŋ bɔ́ŋbɔ́ŋ nyɛ, a bʋl pá báálɔ ná rɩ́ɩ́wa ha kéŋ maábí nɔ́ŋ rɛ́?>> 7 Ɓa sɛ́: <<Báálɔ ná nɛ́ bɔ́sɩ́rá pɩ́ɩ̃́, á wɩ́ɛ́ arɩ́rá jaa nɩɛ wɩ́ɛ́, a bʋlɛ́: <Ɩ́ áná haá híẽ́sú rí? Ɩ́ kéŋ maábí nɔ́ŋ rɛ́?> Ɛ́ nɛ́ á lɩ́sʋ́ wɩ́bɔsɛ́ ná sɩ́ɛ́. Á sɩ́ wóllí zɩŋ rʋ́ʋ́ sɩ́ bʋlɛ́ ráá káŋrá maábio ko?>> 8 Ɛ́ nɛ́ Ziida bʋ́lʋ́ áná rɩ́ bʋlɛ́: <<Lo rí Bɛŋzamɛ tɩ́ŋɩ́ŋ mɛ́ mʋ́, á sɩ́ mʋ́ yɔwɛ ɓɩdííle ko, rɩ́ losu sɩ́rá ɓʋ́ʋ́sʋ́, á rɩ́rɩ́, arɩ́rá bɛlɛ wuu. 9 Ŋ é sɩ́ lɔ́ʋ́, rʋ́ʋ́ áŋ nyúú cɩka. Rɩŋ nɛ́ wʋ́ʋ́ kené bɩrko pɛ́ɩ́, ɩ púú wɩ́ɛ́ bɔ́sɩ́ŋ. 10 Raá fa há dáánɛ́ rá nɛ́, nyɛ mɛ́ á fa mʋ́ɔ́, ká bɩrko naasɩ́ bʋllɛ. 11 Ɛ́ nɛ́ ɓa áná Zakɔbɛ sɛ́: <<Rʋʋ ká ɛ́, ɩ́ a nyɛ: Ɩ́ pɛ́ járá tɔ́ɔ́ oŋwere, a héíwa bɔ́tɔ́wa mɛ́, a kaa mʋ́ dí zilé pá tɔ́ɔ́ ná nyúútɩ́na. Ɩ́ ja tuwiilówa ná há kéŋ sɔ́ŋ buke botoro, a ja pɩsɩtasɩwa rɩ́ amaŋdɛwa, a súúri tʋʋ a kaa mʋ́. 12 Ɩ́ lɩ́sɛ meéwíé, anɛ ɩ́ fa há dʋ́ʋ́nɛ́ lɩ́sɛ ɛ́; ɩ́ pi meéwí ná má ɓa há píé héíwa bɔ́tɔ́wa mɛ́ ɩ́ kaa lɛ Ezipiti ko. Nyɛ mɛ́ nɛ́ŋ rɛ́ sʋllɛ́ ká pii hé. 13 Ɩ́ isi kánɩ́wa maábio, a bɩrmʋ́ báálɔ ná rɩ́. 14 Rɩ́ Wɩɩsɛ ná há kéŋ dóé wuu, a rɩ́ báálɔ ná fɛ́ɩ́wa susu, ká lo rí Sɩmɩyɔŋ rɩ́ Bɛŋzamɛ tɩ́ŋɩ́wa mɛ́ bɩrko; ká rɩŋ é ní wɩ́ŋ bɛlɛ ná má, rɩ́ŋ sɩ́wɔ́ ná.>>15 Zakɔbɛ bɛlɛ ná isi pɔ́wɔ́ zilé ɓɩɛ, a ja meéwí má buke bɛllɛ, a sɩɛ́ ka Bɛŋzamɛ, ɓa isi zʋ ŋmɛ́nɔ, a col Ezipiti, a mʋ́ cɛ́ Zɔzɛfɛ sɩ́ɛ́. 16 Zɔzɛfɛ há ná Bɛŋzamɛ ɓa har, ʋ bʋ́lʋ́ jaa oŋbello rɩ́ bʋlɛ́: <<Ka báála nyáŋ zʋ́ŋ jaa; ɓʋ́ pʋna a a ɓɩdííle. Ŋ rɩ́wɔ́ nɛ́ zaa dí ɓɩdííle wɔhɔ. 17 Zɔzɛfɛ jaa oŋbello sáŋʋ́ nʋɔ, a ka báála ná zʋ Zɔzɛfɛ jaa. 18 Ɓa há kéŋwó aá zʋ Zɔzɛfɛ jaa, héwíŋ kéŋwó ɓa sɛ́: <<Meéwí ná ɓa há bɩ́rɛ́ pii hérá bɔ́tɔ́wa nʋʋsɛ mɛ́ wɩ́ɛ́ nɛ́, ɓa káŋrá mʋ́mʋ́; ɓaá já rɩ́wɔ́ de ko cúrá hé ní, a bɛ́ŋsɩ́rá, ká ráá a yósi, ká lárá kokúsi.>> 19 Ɓa há mʋ́ɛ́ peri dánnʋɔ, ɓa túó peri Zɔzɛfɛ jaa oŋbello ná, a bʋ́lʋ́ rɩ́ bʋlɛ́: 20 <<Á nyúútɩ́na, hérá suúri! Á fa lá sɩ́ɛ́ ko rɛɛ́ a yɔwɛ ɓɩdííle. 21 Á há bɩ́rɛ́ aá col, a mʋ́ peri ráŋ ná á há cɔɛ́, á púrírá bɔ́tɔ́wa, nɛrɔ wuu ná meéwí ná ʋ há túné, ʋ bɔ́tɔ́ nʋɔ mɛ́. Nówó ní á kaa bɩrko. 22 Á wɩ nɛrɔ ná há pí ɛ́ meéwíé hérá bɔ́tɔ́wa mɛ́ ɛ̃. Á sɩɛ́ pɔ́ ka meéwíé náŋa ko, ráá yɔwɛ ɓɩdííle.>> 23 Zɔzɛfɛ jaa oŋbello ná bʋ́lwɔ́ rɩ́ bʋlɛ́: <<Ɩ́ lo rɩ́ɩ́wa beŋtunni pɛ́ cɩ́m, ká sɩ́ wɩ́ɩ́ wuu fá. Wɩɩsɛ ná há kɛ́ɩ́wa rɩ́rɩ́wa áná Wɩɩsɛ, ʋ nɛ́ pí meéwí ná héíwa bɔ́tɔ́wa mɛ́. Rɩ ɛ́ rá, ɩ́ meéwí é, ŋ fa lɔ́ rɛ́.>> Ká sɩɛ́ a Sɩmɩyɔŋ lɩ́wɔ́ rɩ́. 24 Báálɔ ná a ɓa wuu zʋ Zɔzɛfɛ jaa. Ʋ pɔ́wɔ́ nyii ɓa sɛ́sɩ́wɔ́ naasɛ, kɔ́ʋ́ ja ɓɩdííle pɔ́wɔ́ kokúsi má. 25 Ɓa bɩ́rmɩ́wɔ́ zilé ɓɩɛ bil, káá dɛllɛ Zɔzɛfɛ rʋ́ʋ́ ko wɔhɔ; beé wɩ́ɛ́ ɓa fa nɩ́ɔ̃́ rɩ ɓa rɩ́ Zɔzɛfɛ sɩ́ dí ɓɩdííle.
26 Zɔzɛfɛ há bɩ́rɛ́ ko jaa, ɓa pí zilé ɓɩɛ ná ɓa há kené, a pɔ́ʋ́ jaa sɩɛrʋ; ká sɩɛ́ ɓírmi tíé ʋ sɩ́ɛ́. 27 Ʋ bɔ́sɩ́wɔ́ tɛŋfɩ́ɛ́l wɩ́ɛ́ ká bʋlɛ́: <<Ɩ́ há bʋ́lɩ́wa aŋbánɩ́ɩ́na ná wɩ́ɛ́, ʋ dúókó rí? Ʋ haá híẽ́sú rí?>> 28 Ɓa sɛ́: <<Ɩ tʋtʋnnɔ, á áná duokí; ʋ haá híẽ́sú rí.>> Ká baa yʋ́ɔ́kwɔ́ tɩɩ, a tuwi ɓírmi tíé. 29 Zɔzɛfɛ kenú sɩ́ɛ́ ɓɔ́ bel, a nóú lɩkápá Bɛŋzamɛ, ʋ rɩ́rʋ́ há tʋ́ŋ maá mɛ́. Ɛ́ nɛ́ ʋ sɛ́: <<Ɩ́ maábio ná, ɩ́ há bʋ́lʋ́ wɩ́ɛ́ páŋ nɛ́ nyɛ ná?>> Ká súúri bʋlɛ́: <<Ŋ bio, Wɩɩsɛ sɩ́ héí nyúú bárka.>> 30 Zɔzɛfɛ há nóú maábio ná, ʋ wɩ́ɛ́ dʋ́mʋ́ beŋtú mí, ʋ sɩ́mɩɩrʋ cɛ́ lɩɩ mɛ́. Ɛ́ nɛ́ ʋ coki wɩ́bʋl kúléé, ká zʋ́ʋ́ jaa sɩ́ɛ́ rɩ́ a wi. 31 Ʋ há kúé púŋsú sɩ́mɩɩrʋ tá ko tenni, ʋ bɩ́rɔ́ lɩ́wɔ́ rɩ́; a nyáŋʋ́ tɩɩ, ká bʋlɛ́ rɩ́wɔ́ pi ɓɩdííle ɓa. 32 Ɓa lɔk pá Zɔzɛfɛ ʋ kaa kénú dʋŋɔ, ká pɔ́ʋ́ mááláwa má dʋŋɔ. Ezipiti nɩɛ ná há kó róŋ, ɓa má rɩ́ Zɔzɛfɛ kéŋwó dʋŋɔ aá dí. Bee wɩ́ɛ́ Ezipiti tɩ́náwa kíso ní ká, rɩ́wɔ́ rɩ́ Ebirewa tʋŋ dí ɓɩɛ. 33 Ɓa ɔ́ʋ́ Zɔzɛfɛ maábináŋa ná ké tʋkɛ náŋá mɛ́, hɩɛ̃́sɛ nɛ́, Zɔzɛfɛ sɩ́ɛ́; a pɔ́ nɔhɔ̃́ mɛ́ a mʋ́ lɩ́wɔ́ ɓɩwie mí; ɓa sɩɛ́ gɩrɛ aá bel náŋá, wɩ́ɩ́ há vɔ́kwɔ́ wɩ́ɛ́. 34 Zɔzɛfɛ a ɓa lɔkɛ ɓɩdííli ná há mɩ́nʋ́ sɩ́ɛ́ a pɔ́wɔ́. Bɛŋzamɛ ker kʋ́ʋ̃́ mááláwa ker, naasɩ́ bɔmmʋ́ɔ́. Ká ɓa wuu hé náŋá nyɔ dɩvɛ́ŋ, a vɔksɛ.