Zɔzɛfɛ mɩ́lʋ́ mááláwa
44
1 Zɔzɛfɛ bʋ́lʋ́ oŋbello rɩ́ bʋlɛ́: <<A ɓɩdííle sú nɩɛ nyáŋ bɔ́tɔ́wa, ɓa há wo ɛ́ kaá col, a pɔ́wɔ́. Bɩrɛ píwó oro wuu meéwí hóú bɔ́tɔ́ nʋɔ mɛ́. 2 Rɩɩ píwó sɩɛrʋ ɓɩwie meéwí hóú bɔ́tɔ́ mɛ́, ɩ pɛ́ píŋ wárɛ nyíŋgbaŋa ná hé róŋ.>> Báálɔ ná a ɛ́ Zɔzɛfɛ há sʋ́ʋ́ a. 3 Tɔ́ɔ́ há pʋ́lɛ́, ɓa cɔ́ŋɔ́ tá Zakɔbɛ bɛlɛ ná rɩ́wɔ́ kokúsi, ɓa col. 4 Ɓa há kɛ́kɛ́ tɔ́ɔ́ mɛ́, ká ha wɩ sɩ́ɛ́ rɩ́ mʋ́ɛ́, Zɔzɛfɛ bʋ́lʋ́ jaa oŋbello rɩ́ bʋlɛ́: <<Isi kiri kɛsɛ nɩɛ nyáŋ, a bɔ́sɩ́wɔ́ bʋlɛ́: <Beé rí á ɛ́ɩ́wa wérí, ká ɩ́ pi bɔ́ŋbɔ́ŋ árá mɛ́? 5 Ʋ cɛ́ ɛrɛ́, ɩ́ pi nyíŋgbaŋa ná ŋ nyúútɩ́na há kené aá nyɔ nyii, ká kaa bel aá ná cíé wɩ́ɛ́? Ɩ́ há ɔ́ʋ́ ná ʋ wɩ weri.>>> 6 Ʋ jaa oŋbello ná kiri kɛ́sɩ́wɔ́, a pi wɩ́ɛ́ ná bɔ́sɩ́wɔ́. 7 Ɛ́ nɛ́ ɓa sɛ́: <<Bee wɩ́ɩ́ rɛ́ nyúútɩ́na bʋ́lrá rɩ́ nyɛ? Á waá sáŋ a nyɛ wɩ́ɩ́. 8 Meéwí ná é tɩɩ á há néé á bɔ́tɔ́wa nʋʋsɛ, á wɩ kené bɩrlɛ Kanaŋ tíé ko pɛ́ɩ́ rɛ́? Ká rá sɩɛ́ baa ga meéwíé, ɛ́ rá má salmɛ ɩ nyúútɩ́na jaa mɛ́? 9 Rɩ ɓa ná ɛ́ nyíŋgbaŋa á oro cɩksɛ sɩɛrʋ, rɩ́wɔ́ ɓʋ́ tɩ́na, ká ráá wuu áŋ nyúútɩ́na yósi.>> 10 Oŋbello ná sɛ́: <<Ʋ wéró, ɩ́ bʋlɛ́ ná nɩ́ɩ́ cɩ́nɛ́! Amá taŋa, nɛrɔ ná ŋ há sɩ́ ná óŋ ʋ dɩhɩ̃́, ʋ tɩ́na dʋŋɔ sɩ́ bɩ́rmɩ́ŋ yómo, ká rɩ́ɩ́wa é tɩ́llɩ́wa tɩɩ.>> 11 Ɓalaɓala, nɛrɔ wuu kórú bɔ́tɔ́ bil tíé, a ka nʋɔ purí. 12 Báálɔ ná sɩɛ́ wúllíwó cɩksɛ, a pɔ́wɔ́ nɔhɔ̃́ cɩksɛ mɛ́ nɛ́, ká wúlli mʋ́ tenni heŋbie mí; a ná nyíŋgbaŋa ná Bɛŋzamɛ bɔ́tɔ́ sɩɛrʋ. 13 Ɛ́ nɛ́ ɓa káŋwɔ́ gɛnnɛ cɔ́nnɛ, ká nɛrɔ wuu bɩrɛ pɔ́ʋ́ cɩksɛ sákʋ́ kokúme daha, ɓa bɩrzʋ tɔ́ɔ́ sɩɛrʋ. 14 Ziida rɩ́rʋ́ maábɛlɛ bɩrko peri Zɔzɛfɛ jaa, rʋʋ ha mɩŋ ráŋ. a mʋ́ʋ́ sɩ́ɛ́, a tuwi ɓírmi tíé. 15 Zɔzɛfɛ bɔ́sɩ́wɔ́ bʋlɛ́: <<Beé wɩ́ɩ́ rɛ́ ɩ́ a ɛ́? Ɩ́ wɩ ɛ̃ rɩ́ nɛ́ŋ há nɩhɩ̃́ŋ nyɛ, ʋ wo cíé wɩ́koolé muuli aá ná?>> 16 Ɛ́ nɛ́ Ziida lɩ́sɛ nʋɔ a bʋlɛ́: <<Á sɩɛ́ á rá bʋlɛ́ beé, nyúútɩ́na? Á wɩ́bʋlɩ́ nɛ́ beé, ráá bʋl ká la taŋá párá tɩɩ? Wɩɩsɛ nɛ́ wúllírá mʋ́l. Ɛ́ wɩ́ɛ́ á kɛ́ɩ́ yósi ní, nyúútɩ́na, á rɩ́ nɛrɔ ná ɓa há lɩ́sɛ nyíŋgbaŋa ná ʋ bɔ́tɔ́ sɩɛrʋ.>> 17 Ɛ́ nɛ́ Zɔzɛfɛ sɛ́: <<Aɩ́! ŋ wɩ ɛ́ ná a! Nɛrɔ ná ɓa há ná nyíŋgbaŋa ʋ dɩhɩ̃́, ʋ dʋŋɔ nɛ́ sɩ́ áŋ yómo; amá ɩ́ é, ɩ́ bɩrɛ aá mʋ́ɩ́wa áná dɩhɩ̃́ arɩ́ tɛŋfɩ́ɛ́l.>>Ziida sʋlɔ́ rʋ́ʋ́ la Bɛŋzamɛ tá
18 Ɛ́ nɛ́ Ziida tuu pérú a bʋlɛ́: <<Hé suúri, nyúútɩ́na! Lo rɩ́ tʋtʋnnɔ bʋl wɩ́ɩ́ ɩ rɩ́; ká rɩ́ cɔ́ɛ́ sɩ́ŋ nyúú ísú! Bee wɩ́ɛ́, ɩ rɩ́ Faarɔŋ nɛ́ cɛ́rɛ náŋá. 19 Nyúútɩ́na, ɩ nɛ́ fa bɔ́sɩ́rá, ɩ tʋtʋnna a bʋlɛ́: <Ɩ́ kéŋ áná arɩ́ maábí nɔ́ŋ rɛ́?> 20 Ɛ́ nɛ́ á má sɛ́: <Á kéŋ aŋbánɩ́ɩ́na rɛ́, arɩ́rá maábio ɓɩwie, á áná bánɩ́nnɛ bio ní. Á áná wʋ́ʋ́ wɩ́ɛ́ saŋ; ʋ dʋŋɔ nɛ́ káánɛ́, ʋ hácólli bɛlɛ sɩɛrʋ. Ʋ máálá sʋ́wɔ́.> 21 Ɛ́ nɩ́ɩ́ bʋ́lrá rɩ́ bʋlɛ́: <Ɩ́ mʋ́ kánʋ́ ko rɩ́ŋ sɩ́ɩ́ nóú.> 22 Ɛ́ nɛ́ á bʋl pɛ́ɩ́, a bʋlɛ́ bio ná wʋ́ʋ́ áná mɛ́ wuó kɛkɛ; rʋʋ nɛ́ kɛ́kʋ́ mɛ́, ʋ áná sɩ́ sʋwɛ. 23 Ɛ́ nɛ́ ɩ sɛ́ ráá wɩ́ɩ́ sɩ́ɛ́ rɛɛ́ kɔwɛ ko aá cɛ́, rɩ raá nɛ́ wɩ́rá maábio ná kené tɩ́ŋrá tɩɩ mɛ́ ko. 24 Á há bɩ́rɛ́ mʋ́ néí tʋtʋnnɔ, á áná, á césí líŋsi ná wuu pɔ́ʋ́. 25 Ʋ há sɛ́ rá bɩrko yɔwɛ ɓɩdííle mʋɔ́, a kaa ko pɔ́ʋ́, 26 á bʋ́lɔ́ pɔ́ʋ́ bʋlɛ́: <Á wɩ wuó mʋ́, raá maábio ɓɩwie ná nɛ́ wɩ́rá mɛ́ tɩ́ŋɛ́. Raá wɩ pɛ́ɛ́ kánʋ́ mʋ́, á wɩ tɔ́ɔ́ ná nyúútɩ́na sɩ́ɛ́ wuó peri.> 27 Ɩ tʋtʋnnɔ há kárá áná sɛ́: <Ɩ́ tɩɩ ɩ́ɔ̃́ rɛ́ bɛlɛ bɛllɛ nɛ́, ŋ háálɔ Rasɛl lʋl. 28 Nɔ́ŋɔ yʋ́ksɛ; ŋ bɩ́ɩ́nɔ́ rɩ dííre ní kenú dí, bee wɩ́ɛ́ ŋ báá wʋ́ʋ́ néé arɩ́ zaa. 29 Rɩɩ́wa nɛ́ sɩɛ́ báá láŋ né má, rɩ́ bɔ́ŋbɔ́ŋ ko púú, ŋŋ́ sʋwɛ wɩɩla sʋʋ nɛ́, ŋ bánɩ́nnɛ́ né mí.> 30 Mʋ́l né mí sɩɛ́, ŋ nyúútɩ́na, ŋ sɩ́ wóllíŋ áná rɩ́ bɩrmʋ́ ká tá bio né rɛɛ́? Ʋ dʋma cɔ́ʋ́ bio ná mɛ́ daarɛ. 31 Rʋʋ wʋ́ʋ́ néé, ʋʋ́ sʋ́wʋ́ nɛ́. Raá nɛ́ ɛ́ɛ́ á áná sʋwɛ wɩɩla sʋʋ, ʋ bánɩ́nnɛ́ né mí. 32 Ŋ nɛ́ lá bio ná wɩ́ɛ́ cɩ́ɩ́nɩ́ŋ tɩɩ, a bʋlɛ́: <Rɩŋ nɛ́ wʋ́ʋ́ kené bɩrko pɛ́ɩ́, rʋ́ʋ́ wɩ́ɛ́ áŋ é ní nyúú wɩ́ɩ́ tɛ́ŋ wuu mí.> 33 Ɛ́ wɩ́ɛ́ ŋŋ́ sʋlɩ́ rɛ́, lo rɩ́ŋ nɛ́ ké bio né nyúú mí, a ɛ́ɩ́ yómo, ká rʋ́ʋ́ tɩ́ŋʋ́ mááláwa mɛ́ col. 34 Ŋ wɩ́ŋ áná rɩ́ wuo bɩrɛ aá mʋ́, rɩŋ wɩ pɛ́ɛ́ ka bio né. Ŋ waá ja rɩ́ŋ bélíŋ áná, ká rʋ́ʋ́ nɩ́ná wɩɩla ná há sɩ́ pérú.>>