PÚLE 42

Zakɔbɛ tʋ́mʋ́ bɛlɛ Ezipiti mí

1 Zakɔbɛ sɩɛ́ nɛ, rɩ ɓa sɛ́ bilé mɩŋ Ezipiti mí ɓaá yɛ́llɛ. Ɛ́ nɛ́ ʋ bʋ́lʋ́ bɛlɛ rɩ́ bʋlɛ́: <<Ɩ́ sɩ́ déé kéé bíbel náŋá nyɛ; 2 Ŋ nɩ́ɔ̃́ rɩ ɓa sɛ́ bilé mɩŋ Ezipiti mí, ɩ́ isi mʋ́ ráŋ, a yɔwɛ kaa ko ráá dí, rɩ́ losu sɩ́ rá ɓʋ́.>> 3 Zɔzɛfɛ mááláwa fí sɩɛ́ mʋ́ Ezipiti, rɩ́wɔ́ yɔwɛ bilé ná. 4 Zakɔbɛ wɩ lóé Zɔzɛfɛ maábio Bɛŋzamɛ tɩ́ŋʋ́ máálawa ná mɛ́. Bee wɩ́ɛ́ ʋ sɛ́: <<Ŋ waá ja rɩ́ nabɔŋ wɩ́ɩ́ pérú.>> 5 Zakɔbɛ bɛlɛ ná mʋ́ɔ́ peri Ezipiti, rɩ nɩɛ náŋa má lɛ́ tɔ́nɛ náŋa ko, rɩ́wɔ́ má yɔwɛ bilé; bee wɩ́ɛ́, losu fa mɩŋ Kanaŋ tíé wuu mí ní.

Zɔzɛfɛ nóú mááláwa

6 Zɔzɛfɛ nɛ́ fa tɛ Ezipiti wuu, a tʋkɛ Faarɔŋ mɛ́. Ʋ nɛ́ yɛ́llɛ bilé aá pá nɩɛ wuu. Ʋ mááláwa ná ko pérú laka, a ɓírmi, a ka sɩ́ɛ́ cú tíé. 7 Zɔzɛfɛ nówó tenni, rʋʋ ɩ́ɔ̃́ rʋ́ʋ́ mááláwa nɛ́; ʋ wɩ ɛ́ɛ́ ɓa zɩ́mʋ́, kɔ́ʋ́ ɓɛ́wɔ́ mɛ́ bʋlɛ́: <<Ɩ́ lɛ́ nɛɛ́?>> Ɛ́ nɛ́ ɓa sɛ́: <<Á lɛ́ Kanaŋ tíé ní.>>

8 Zɔzɛfɛ é zɩ́mʋ́ mááláwa, ká ɓa é wʋ́ʋ́ ɛ̃. 9 Zɔzɛfɛ bɩɩnɛ mʋ́ ná duose ná ʋ há dúósé ɓa wɩ́ɛ́, ká bʋlɛ́: <<Ɩ́ ká tɔ́kɩ́ɛ́la nɛ́! Ɩ́ kúó rɩ́ɩ́wa kɩ́ɛ́lɩ́ŋ tɔ́ɔ́ nɛ́, a ná tɔ́ɔ́ ráŋ ná há wɩ dóé kené.>> 10 Ɛ́ nɛ́ ɓa búŋsi bʋlɛ́: <<Aɩ́! Á nyúútɩ́na, á kɛ́ɩ́ tʋtʋ́nná rɛ́, a ko ráá yɔwɛ ɓɩdííle. 11 Á wuu ká áná balá bɛlɛ nɛ́; á ká nɩtaŋáwa rɛ́, á wɩ kúé ráá kɩ́ɛ́lɛ tɔ́ɔ́.>> 12 Zɔzɛfɛ sɛ́: <<Nyɩɛrʋ, ɩ́ kúó rɩ́ɩ́wa náŋ tɔ́ɔ́ ráŋ ná há wɩ dóé kené ní.>> 13 Ɛ́ nɛ́ ɓa bʋl pɔ́ʋ́ bʋlɛ́: <<Á nɛ́, ɩ tʋtʋnna nɛ́ ká rá. Á lɛ́ Kanaŋ tíé ní. Á nɛ́ fa báála fí rí bɛllɛ, a wuu tʋŋ áná mɛ́. Á sɩɛrʋ balá tóó, ká á ɓɩwie káánɛ jaa mɛ́, á áná laka.>> 14 Ɛ́ nɛ́ Zɔzɛfɛ sɛ́: <<Ŋ há bʋ́lʋ́ ná nɛ́, ɩ́ ká tɔ́kɩ́ɛ́la nɛ́. 15 Ŋ sɩ́ mɩ́lɩ́wa ná. Ŋ ŋmɩ́ɛ́sɔ́ pɛ́ɩ́wa, Faarɔŋ há wómmó yɩr mɛ́, rɩɩ́wa maábiwie ná wɩ rɛɛ́ kúé, ɩ́ wɩ tɔ́ɔ́ né míí lɛ. 16 Ɩ́ tʋ́mɩ́wa nɔ́ŋɔ rʋ́ʋ́ mʋ́ kánʋ́ ko, ká rɩ́ɩ́wa zʋʋ ké bɩnajaa mɛ́ aá dɛllɛ. Ɛ́ nɛ́ rɩ́ŋ zɩŋ taŋá. Rɩ ɛ́ rá, arɩ́ Faarɔŋ há wómmó yɩr, ɩ́ ká tɔ́kɩ́ɛ́la nɛ́.>>

17 Zɔzɛfɛ a ɓa tɔ́wɔ́ bɩnajaa tápʋlɛ botoro. 18 Tápʋlɛ botoro nyúú mí, Zɔzɛfɛ bʋ́lwɔ́ rɩ́ bʋlɛ́: <<Ŋ éé fá Wɩɩsɛ rɛ́, ɛ́ wɩ́ɛ́ ɩ́ ná wɩ́ɩ́ ná há mɔhɛ̃́ rɩ́ɩ́wa a, ká ná waana. 19 Rɩɩ́wa bʋ́l taŋá nɛ́, ɩ́ lo rɩ́ɩ́wa nɔ́ŋɔ mɩŋ bɩnajaa mɛ́ rɛɛ́, ká rɩ́ɩ́wa káánɛ bɩrɛ ka ɓɩdííle mʋ́ pɛ́ɩ́wa jaa nɩɛ ná losu há kɛ́sɛ́. 20 Ɩ́ mʋ́ kánɩ́wa maábiwie ná bɩrko páŋ rɛɛ́, rɩ́ŋ zɩŋ rɩ́ɩ́wa kéŋ taŋá, ká rɩ́wɔ́ sɩ́ɩ́wa ɓʋ́ʋ́sʋ́.>> Ɛ́ nɛ́ ɓa saŋ ɛ́. 21 Ká ɓa sɩɛ́ bʋ́bʋ́l náŋá rɩ́ bʋlɛ́: <<Á maábio ná wɩ́ɛ́ wɩɩla nɛ́ pérí rá nyɛ. 22 Ɛ́ nɛ́ Ribaŋ sɛ́: <<Ŋ wɩ́ɩ́wa rɩ́ bʋlɛ́ bʋlɛ́: <<Ɩ́ sɩ́ bio né wɩ́bɔ́ŋ wuu á? Amá ɩ́ wɩ zésé. Ɛ́ wɩ́ɛ́ ʋ sʋʋ ná kɩŋ nɩ́ɩ́ túŋrá mɛ́.>> 23 Ɓa wɩ ɛ̃ rɩ́ Zɔzɛfɛ nɛ́; bee wɩ́ɛ́ nɛ́ŋ rɛ́ fa mɩ́ŋwɔ́ rɩ́ Zɔzɛfɛ pɛ́kɛ, a la wɩ́ɛ́ bʋl aá pɔ́ʋ́. 24 Zɔzɛfɛ kɛ́kɩ́wɔ́ mɛ́, a mʋ́ cɛ́ dɩhuó a wi, ká bɩrko. Ʋ há bɩ́rɛ́ ko, ʋ ɔ́ɔ́ ɓa ka Sɩmɩyɔŋ vɔwɛ, ɓa sɩ́ɛ́ mɛ́, a kaa zʋʋ tɔ́ bɩnajaa mɛ́.

Zakɔbɛ bɛlɛ bɩ́rɔ́ mʋ́ Kanaŋ

25 Ká Zɔzɛfɛ a ɓa a bilé súwó bɔ́tɔ́wa, a a ɓa bɩrɛ pi oro wuu meéwí hóú bɔ́tɔ́ mɛ́, ká bʋlɛ́ rɩ́wɔ́ ja ɓɩdííle pɔ́wɔ́, rɩ́wɔ́ kaa va ŋmɛ́nɔ mɛ́ dí. Ɛ́ ná nɛ́ Zɔzɛfɛ aa pɔ́wɔ́.

26 Ɓa isi pɔ́wɔ́ bilé bɔ́tɔ́wa ná sákwɔ́ kokúsi mí, a bɩrɛ aá col. 27 Ɓa há mʋ́ɛ́ cɩkɛ dɩhɩ̃́ oro, ɓa nɔ́ŋɔ wúrú bɔ́tɔ́, ká rʋ́ʋ́ lɩ́sɛ ɓɩdííle pɔ́ʋ́ kokúme; ʋ béló rʋʋ meéwí ná ʋ há kené ko yɔwɛ ɓɩɛ nɛ́, bɔ́tɔ́ ná nʋɔ rɩ́. 28 Ʋ bʋ́lʋ́ maábináŋa dɩhɩ̃́ bʋlɛ́: <<Ɓa bɩ́rɔ́ píŋ meéwí páŋ; nóú ní ha ŋ bɔ́tɔ́ sɩɛrʋ.>> Ɛ́ nɛ́ ɓa wʋ́ɔ́ há ɔ́ʋ́ ná ɛ̃, héwíŋ há kɛ́sɩ́wɔ́, ɓa bʋl náŋá dɩhɩ̃́ bʋlɛ́: <<Beé rí tɛ Wɩɩsɛ árá nyɛ?>> 29 Ɓa mʋ́ɔ́ pérwó áná Zakɔbɛ dɩhɩ̃́ Kanaŋ tɔ́ɔ́ mɛ́, a cesi wɩ́ɛ́ ná wuu há pérwó, a pɔ́ʋ́. 30 Ɓa sɛ́: <<Báálɔ ná há ká tɔ́ɔ́ ná nyúútɩ́na, ʋ bɛ́sɩ́rá mɛ́ bɔ́ŋbɔ́ŋ, ká bʋlɛ́ rá kúó, ráá kɩ́ɛ́lɛ tɔ́ɔ́ nɛ́.>> 31 Á bʋ́lʋ́ dɩhɩ̃́ bʋlɛ́: <<Á ká nɩtaŋáwa rɛ́, á to tɔ́kɩ́ɛ́lá. 32 Á fa ká nɩɛ fí rí bɛllɛ rɛ́, a tʋŋ áná mɛ́; nɔ́ŋɔ toó ká á sɩɛrʋ ɓɩwie zaa mɩ́ŋrá áná dɩhɩ̃́, Kanaŋ tɔ́ɔ́ mɛ́. 33 Ɛ́ nɛ́ báálɔ ná há ká tɔ́ɔ́ ná nyúútɩ́na bʋ́lrá rɩ́ bʋlɛ́: <<Ná ɛ́ ná ŋ há sɩ́ pii kɩ́ɛ́lɛ zɩŋ, rɩ́ɩ́wa ká nɩtaŋáwa. Ɩ́ lo rɩ́ɩ́wa sɩɛrʋ nɔ́ŋɔ káánɛ arɩ́rɩ́ŋ, ká rɩ́ɩ́wa pi ɓɩdííle ɛ́ há sɩ́ mɔ́ɩ́wa rɩ́rɩ́wa jaa nɩɛ díí, a tɩŋ losu há mɩ́nɔ́ wɩ́ɛ́, a kaa col. 34 Ɩ́ mʋ́ a kánɩ́wa maábio ko páŋ, a makɛ rɩ́ŋ zɩŋ, rɩ́ɩ́wa ká nɩtaŋáwa, ɩ́ to tɔ́kɩ́ɛ́lá; ŋ sɩ́ bɩrɛ pííwa maábio pɛ́ɩ́wa; ká rɩ́ɩ́wa vɩ́va tɔ́ɔ́ ná mɛ́, ɩ́ há có ɛ́. 35 Ɓa há kúé vúsíwó bɔ́tɔ́wa, nɛrɔ wuu nóú meéwíé rɩ́ lɔkɔ́, ʋ bɔ́tɔ́ sɩɛrʋ. Ɓa rɩ́wɔ́ áná há ná meéwíé ná, héwíŋ kɛ́sɩ́wɔ́. 36 Ɓa áná Zakɔbɛ bʋ́lwɔ́ rɩ́ bʋlɛ́: <<Ɩ́ɩ́ já rɩ́ŋ sɩ́ŋ bɛlɛ ná nɛ́! Zɔzɛfɛ toó, Sɩmɩyɔŋ toó, ká ɩ́ baa ha jɩ́ja rɩ́ɩ́wa la Bɛŋzamɛ má ŋ dɩhɩ̃́! Wɩ́ɛ́ nyáŋ wuu káŋ é nyúú cɩka nɛ́!>> 37 Ribaŋ bʋ́lʋ́ áná dɩhɩ̃́:<< Rɩŋ nɛ́ wɩ bɩ́rɛ́ ka Bɛŋzamɛ rɩ́ɩ́ kóó héí nɛ́sɛ mɛ́, ɩ ɓʋ́ʋ́sɩ́ŋ bɛlɛ nyáŋ bɛllɛ. Púú héŋ nɛ́sɛ mɛ́, ŋ sɩ́ kánʋ́ bɩrko pɛ́ɩ́.>> 38 Zakɔbɛ sɛ́: <<Ŋ bio wɩ́ɩ́wa mɩ́ɩ́ tɩ́ŋɩ́ mʋ́, bee wɩ́ɛ́ ʋ máálá sʋ́wɔ́, ʋ dʋŋɔ nɛ́ káánɛ́. Rɩ wɩ́ɩ́ nɛ́ kúé rʋʋ pérú, ʋ valɛ́ ná sɩɛrʋ, ɩ́ɩ́ á rɩ́ŋ sʋwɛ wɩɩla sʋʋ nɛ́, ŋ bánɩ́nnɛ né mí.