PÚLE 40

1 Ɛ́ wɩ́ɛ́ há dáárɛ́, Ezipiti kuóro tʋtʋnnɩhɩɛ̃́sɛ bamma bɛllɛ, á wɩ́ɛ́ zɔ́kʋ́ mɛ́. Ʋ tʋtʋnnɔ ná háá zɩŋ kuóro sɩnyɔɔlɛ́ wɩ́ɛ́, arɩ́rʋ́ ná háá zɩ́mʋ́ ɓɩdííle wɩ́ɛ́ nɛ́. 2 Kuóro cɔwɩɩlɔ́ isi ɛ́ nɩɛ bɛllɛ nyúú: ʋ ná háá bélú sɩnyɔɔlɛ́ mɛ́, arɩ́rʋ́ ná háá bélú ɓɩdííle mí. 3 Ʋ a ɓa kɛ́sɩ́wɔ́ mʋ́ tɔ́ bɩnajaa ná mɛ́, kuóro háá tɔ́ʋ́ nɩɛ, sóójiwa nɔhɔ̃́ pɔ́ tɩkɛ. Ráŋ ná tɩɩ ɓa há tɔ́ Zɔzɛfɛ má. 4 Ɓa mɩŋ ráŋ a dáánɛ. Bɩnajaa sóójiwa nɔhɔ̃́ píwó má hé Zɔzɛfɛ nɛ́sɛ mɛ́, ʋ bíbélwó mí. 5 Tɩ́taŋ oro, Ezipiti kuóro tʋtʋnna ná bɛllɛ ɓa há kɛ́sɛ́ tɔ́, ɓa wuu bɛllɛ dúósó. ɓa oro wuu duose kánʋ́ mʋ́l. 6 Tɔ́ɔ́ pʋl, Zɔzɛfɛ isi cɩ́cʋɔ ko rʋ́ʋ́ nówó. Ʋ kúó rɩ ɓa oro wuu sɩ́ɛ́ zúkó. 7 Ɛ́ nɛ́ ʋ bɔ́sɩ́wɔ́ bʋlɛ́: <<Beé rí ɩ́ zúkíwa sɩ́ɛ́ nyɛ zaa?>> 8 Ɓa sɛ́: <<Á oro wuu die dúósó ní, ká nɛ́ŋ toó rʋ́ʋ́ lɩ́sɩ́rá duose mʋ́l párá.>> Ɛ́ nɛ́ Zɔzɛfɛ sɛ́: <<Wɩɩsɛ wówó mʋ́ʋ́la lɩ́sɛ aá pɛ́ɩ́wa. Ɩ́ césíwa ɛ́ duose páŋ.>>

9 Ʋ ná fa háá bel kuóro sɩ́ŋ mɛ́, la sɩ́ɛ́ césú ɓɩnɔ a bʋlɛ́: <<Ŋ duose ná sɩɛrʋ, ŋ ná víínyi tuu rʋʋ cɩ́nɩ́ŋ sɩ́ɛ́. 10 Ɛ́ tuu fa kéŋ hílli botoro. Ʋ há kúé tɔwɛ paarʋ, ʋ fɛ́ fɩɩla, a nɔŋ nɔnɔ ɓa bɛ. 11 Ezipiti kuóro sɩ́ŋ nyíŋgbaŋa má mɩ́nɩ́ŋ nɛ́sɛ mɛ́. Ŋ sɩɛ́ ɓɔ́rɛ víínyi nɔŋbɩɩlɛ́ ná, a haasɛ hé nyíŋgbaŋa ná mɛ́, a kaa mʋ́ hé kuóro nɛ́sɛ mɛ́.>> 12 Ɛ́ nɛ́ Zɔzɛfɛ sɛ́: <<Néí duose mʋ́l: Hílli ná botoro ká tápʋlɛ botoro ní. 13 Ʋ káánɛ tápʋlɛ botoro ká rɩ́ kuóro cúólí. Ʋ sɩ́ bɩrɛ píí, a héí tésíé tʋtʋmɩ́ mɛ́, rɩ́ɩ́ baa ɔ́ŋsɛ sɩ́ŋ hóú nyíŋgbaŋa mɛ́ aá pɔ́ʋ́, anɛ ɩ fa háá a ɛ́. 14 Amá rɩ ɓa sɩɛ́ kúó lɩ́sɩ́, ɩ sɩ́ŋ mɛ́ sʋllʋ́. Bɩ́ɩ́nɩ́ŋ wɩ́ɛ́, a bʋ́lɩ́ŋ wɩ́ɛ́ pá kuóro; a makɛ rɩ́wɔ́ lɩ́sɩ́ŋ má jaá né mí. 15 Ɓa lɩ́sɩ́ŋ Ebirewa sɩɛrʋ nɛ́, a kaa ko rɛɛ́. Ŋ sɩɛ́ há kó rɛɛ́ má, ŋ wɩ wɩ́ɩ́ zɔ́kɛ́, a mɔ rɩ́wɔ́ tɔ́ŋ bɩnajaa.>>

16 Ʋ ná má fa háá bel kuóro ɓɩdííle mí, ʋ há néé rʋʋ nɔ́ŋɔ ná duose mʋ́l wéró, ʋ má bʋl Zɔzɛfɛ rɩ́ bʋlɛ́: << Ŋ é dúósó rɩŋ fa cɩ́ɩ́nɛ dɩpɛ́ŋ há sú fʋ́yáknɛ botoro, ŋ nyúú mí. 17 Fʋ́yaakɔ́ ná há mɩŋ daha, kuóro dɩpɛ́ŋcólle ní róŋ, ká diíwiisi ko aá dí ɛ́ dɩpɛ́ŋ, ŋ nyúú mí.>> 18 Ɛ́ nɛ́ Zɔzɛfɛ sɛ́: <<Néí duose mʋ́l: Fʋ́yáknɛ ná botoro ká tápʋlɛ botoro ní. 19 Ʋ káánɛ tápʋlɛ botoro, ká rɩ́ kuóro a rɩ́wɔ́ cókí nyúú, a a rɩ́wɔ́ kánɩ́ mʋ́ vɔwɛ ɓél tuu mí, rɩ́ diíwiisi ko dídí namɩɛ.>>

20 Tápʋlɛ botoro ná peri, a cɛ́rɛ Faarɔŋ bɩŋlʋlɩ́ cana. Ʋ a ɓɩdííle, a yɩ́rʋ́ kílo nɩɛ wuu ɓa ko. Ʋ a ʋ tʋtʋnna ná bɛllɛ ko lɩɩ cɛ́ nɩɛ ná wuu sɩ́ɛ́ mɛ́: tʋtʋnnɔ ná háá bélú sɩnyɔɔlɛ́ mɛ́, arɩ́rʋ́ ná háá bélú ɓɩdííle mí. 21 Ʋ ɔ́ɔ́ ɓa kánʋ́ ná háá bélú sɩnyɔɔlɛ́ mɛ́, a bɩrɛ ko hóú tʋtʋ́ŋbɩnɛ́ mɛ́, rʋ́ʋ́ baa púú nyɔɔlɔ́ ko aá pɔ́ʋ́. 22 Ká a ɓa kánʋ́ ná háá bélú ɓɩdííle mí vɔwɛ ɓél tuu mí, ʋ sʋwɛ, anɛ ɛ́ Zɔzɛfɛ há lɩ́sʋ́ duose mʋ́l pɔ́ʋ́. 23 Amá báálɔ ná háá bel kuóro sɩ́ŋ mɛ́, ʋ wɩ Zɔzɛfɛ wɩ́ɛ́ líísé, ʋ sʋllʋ́ mɛ́.