Zɔzɛfɛ há mɩŋ Ezipiti mí wɩ́ɛ́
39
1 Ɩsɩmayɛlɛ duo nɩɛ ná há kéŋ Zɔzɛfɛ mʋ́ Ezipiti, ɓa yɛ́llʋ́ pá báálɔ ná ɓa háá yɩ́rɛ Potifarɛ. Ɛ́ Potifarɛ ká Ezipiti kuóro laka sóójiwa nɔhɔ̃́ nɔ́ŋɔ nɛ́. 2 Zɔzɛfɛ sɩɛ́ mʋ́ mɩ́nʋ́ nyúútɩ́na jaa mɛ́. Nyuutɩna Wɩɩsɛ mɩŋ Zɔzɛfɛ har, ʋ wɩ́ɛ́ wuu ɔsɛ wérí aá pɔ́ʋ́. 3 Ʋ nyúútɩ́na ná kɩ́ɛ́lɛ zɩŋ rɩ́ Nyuutɩna Wɩɩsɛ mɩŋ Zɔzɛfɛ har, a a ʋ wɩ́ɛ́ wuu ɔsɛ wérí aá pɔ́ʋ́. 4 Ɛ́ nɛ́ ʋ tɛŋ pɔrɛ Zɔzɛfɛ nyúú, ʋ púú hóú tʋtʋmɛ́ nyúú, ʋ nɛ́ bíbélú jaa mɛ́ arɩ́rʋ́ oŋtɩ́llɛ wuu mí. 5 Potifarɛ há tʋ́ŋ ɛ́ pá Zɔzɛfɛ wɩ́ɛ́, Nyuutɩna Wɩɩsɛ hé bárka pɔ́ʋ́ má, ʋ jaa ɓɩɛ rɩ́rʋ́ baksɛ onni wuu ɔsɛ pul wérí. 6 Ɛ́ nɛ́ Potifarɛ sɩɛ́ púú oŋtɩ́llɛ wuu hé Zɔzɛfɛ nɛ́sɛ mɛ́, ʋ nɛ́ bíbélwó mí. Ʋ é tɩɩ báá fa wɩ óŋ wuu míí bel, rʋʋ nʋɔ ɓɩdííle dʋŋɔ rá.Zɔzɛfɛ rɩ́rʋ́ nyúútɩ́na háálɔ wɩ́ɛ́.
Ná Zɔzɛfɛ nɛ́ fa ká haŋpɔwérí tɩɩ. 7 Ɛ́ har mɛ́, Zɔzɛfɛ nyúútɩ́na háálɔ nóú wér, ʋ sɩ́ɩ́ zʋ́ʋ́; ɛ́ nɛ́ ʋ sɛ́: <<Ko pɩ́nɩ́ŋ.>> 8 Zɔzɛfɛ bɩ́ɩ́lɛ ká bʋlɛ́: <<Ŋ nyúútɩ́na áŋ yardá, a púú oŋtɩ́llɛ wuu héŋ nɛ́sɛ mɛ́ jaá né sɩɛrʋ, ká tɩɩ báá wɩ óŋ wuu míí bel. 9 Nɛ́ŋ wuu wɩ́ŋ kɛ jaá né sɩɛrʋ. Ŋ nyúútɩ́na wɩ́ŋ mɛ́ kɛ́rɛ́ rɩ́ óŋ, rɩɩ dʋŋɔ rá, ɩ há kɔ́ʋ́ háálɔ wɩ́ɛ́. Wɩ́ɩ́ há bɔ́mɔ́ a zeŋ mɔ nyɛ, ŋ sɩ́ wóllú a? Rɩ́ŋ aa zɔkɛ Wɩɩsɛ mɛ́?>> 10 Tɔ́ɔ́ wuu há pʋ́lɛ́, ɛ́ wɩ́ɩ́ nɛ́ ʋ kaa cɛ́ Zɔzɛfɛ mɛ́; amá Zɔzɛfɛ wʋ́ʋ́ rɩ́ zesi; ʋ wɩ sáŋɛ́ pɔ́ʋ́ ʋ rɩ́rʋ́ pɛ́.
11 Kal oro Zɔzɛfɛ zʋ́ɔ́ rʋ́ʋ́ tʋ́mʋ́ tʋtʋmɛ́, rɩ Potifarɛ tʋtʋnna oro wuu to róŋ. 12 Ɛ́ nɛ́ Potifarɛ háálɔ cɔ́ Zɔzɛfɛ gɛrɔ mɛ́, ká bʋlɛ́: <<Ko pɩ́nɩ́ŋ.>> Zɔzɛfɛ bɩ́ɩ́lɛ, ká wúrkú gɛrɔ ná tá ɛ́ háálɔ nɛ́sɛ mɛ́, ká fá lɛ. 13 Ʋ sɩɛ́ há néé rɩ Zɔzɛfɛ fɔ́ɔ́ lɛ, ká tɔ́ʋ́ gɛrɔ ʋ nɛ́sɛ mɛ́, 14 ʋ de cáási a yɩ́rʋ́ jaa tʋtʋnna, ɓa zʋ, ʋ bʋl pɔ́wɔ́ bʋlɛ́: <<Ɩ́ ná, ŋ bála há kéŋ Ebirewa báálɔ ná ko rɛɛ́, ʋ ísó rʋ́ʋ́ lɔ́rɩ́rá. Ʋ kúó rʋ́ʋ́ kánɩ́ŋ pɛ́, ɛ́ nɛ́ ŋ cáási kɩ́ŋkáŋ. 15 Ʋ há néé rɩŋ cáásó aá yɩ́rɛ nɩɛ, ʋ fɔ́ a mʋ́ lɛ ká tɔ́ʋ́ gɛrɔ, ŋ laka.>> 16 Kɔ́ʋ́ pí Zɔzɛfɛ gɛrɔ ná bílú laka, ʋ bála ko zʋ. 17 Ʋ baa bʋl ɛ́ tɩɩ tɩɩ pɔ́ʋ́ má bʋlɛ́: <<Ebirewa yómo ná ɩ há kené ko párá, ʋ fa zʋ́ɔ́ rʋ́ʋ́ cíkíŋ. 18 Ŋ há cáási kɩ́ŋkáŋ yɩ́rɛ nɩɛ, ʋ fɔ́ɔ́ mʋ́ lɛ, ká tɔ́ʋ́ gɛrɔ ŋ laka rɛɛ́.>> 19 Potifarɛ há nɩ́ɛ́, rʋʋ háálɔ sɛ́ yómo ná wɩ́'aalɩ́ nɛ́ ɛ́, ʋ cɔ́ɛ́ wɩ́ɔ́ kɩ́ŋkáŋ. 20 Ʋ a ɓa ka Zɔzɛfɛ tɔ́ bɩnajaa ná mɛ́, kuóro háá tɔ́ʋ́ bɩnajaa nɩɛ. Zɔzɛfɛ káánɛ bɩnajaa mɛ́ ráŋ.
Zɔzɛfɛ mɩŋ bɩnajaa mɛ́
21 Nyuutɩna Wɩɩsɛ ha mɩŋ Zɔzɛfɛ har ráŋ má; ʋ mákʋ́ sawér pɔ́ʋ́, a lo bɩnajaa sóójiwa nɔhɔ̃́ má tʋŋ sawér pɔ́ʋ́. 22 Kuóro sóójiwa nɔhɔ̃́ ná háá bélú bɩnajaa nɩɛ mɛ́, ʋ pi nɩtɔ́ɔ́lɛ ná wuu hé Zɔzɛfɛ nɛ́sɛ mɛ́; ʋ nɩ́ɩ́ bélwó mí, a makɛ tʋtʋmɛ́ aá pɔ́wɔ́. 23 Nyuutɩna Wɩɩsɛ mɩŋ Zɔzɛfɛ har, ʋ wɩ́ɛ́ wuu ɔsɛ wérí aá pɔ́ʋ́. Ɛ́ nɛ́ sóójiwa nɔhɔ̃́ há tá wɩ́ɛ́ ná wuu pá Zɔzɛfɛ, ʋ báá wʋ́ɔ́ mɩ́ɩ́ kɩ́ɛ́lɛ.