Zakɔbɛ mʋ́ɔ́ ké Bɩtɛl mɛ́
35
1 Wɩɩsɛ bʋ́l Zakɔbɛ rɩ́ bʋlɛ́: <<Isi mʋ́ Bɩtɛl a ké ráŋ. Má koro ráŋ a pá Wɩɩsɛ ná há kenú tɩɩ nyɩ́ɩ́sɩ́ mɛ́, tɛ́ŋ ná mɛ́ ɩ fa háá fɛ́ɛ́ rɩ́ɩ́ kɛ́kɩ́ máálá Ezayu mí.>> 2 Zakɔbɛ bʋ́lʋ́ jaa nɩɛ rɩ́, arɩ́ nɩɛ ná wuu há tɩ́ŋʋ́ mɛ́ rɩ́ bʋlɛ́: <<Wɩhʋɔra venni ná wuu há mɩ́nɩ́wa dɩhɩ̃́, ɩ́ a rɩ́wɔ́ yʋ́ksɛ, ɩ́ mʋ́ʋ́rɩ́wa busunnu ká pa gɛhúónní su. 3 Á sɩ́ isi mʋ́ Bɩtɛl; rɩ́ŋ má koro ráŋ, a pá Wɩɩsɛ ná há fáŋ búŋse ŋ sazɔkɔ́ kal, ká mɩŋ a rɩ́rɩ́ŋ ŋ ŋmɛ́ŋvalɩ́ wuu mí.>> 4 Ɓa pɔ́wɔ́ wɩhʋɔra venni ná wuu há mɩŋwɔ́ rɩ́ a pá Zakɔbɛ, a kúóríwó dɩmmɛ́ŋsɛ má pɔ́ʋ́. Zakɔbɛ lɔ́wɔ́ wuu hu tuzeno ná há mɩŋ Sɩsɛmɛ laka mʋ́l. 5 Ká ɓa isi ráŋ a col. Wɩɩsɛ a héwíŋ ɓɩzeno sɩɛ́ ka tɔ́nɛ ná kíl ráŋ nɩɛ wuu, ɛ́ nɛ́ tɛ ɓa nɛ́ŋ wuu wɩ lɩ́ɛ́ kiri tɩŋ Zakɔbɛ bɛlɛ mɛ́. 6 Zakɔbɛ rɩ́rʋ́ har nɩɛ wuu mʋ́ɔ́ peri Luzi ná há ká Bɩtɛl, a mɩŋ Kanaŋ dɩtɩ́llɛ. 7 Ʋ má koro ráŋ, a ka ɛ́ dɩhɩ̃́ aá yɩ́rɛ: <Bɩtɛl Wɩɩsɛ> beé wɩ́ɛ́ ráŋ nɛ́ Wɩɩsɛ kánʋ́ tɩɩ nyɩ́ɩ́sʋ́ mɛ́, tɛ́ŋ ná mɛ́ ʋ fa háá fɛ́ɛ́ rʋ́ʋ́ kɛ́kʋ́ máálá Ezayu mí. 8 Rebeka bikannɔ Debora sʋ́wɔ́, ɓa húú Bɩtɛl laka, tuzeno ná ɓa há kené aá yɩ́rɛ <wííle tuu> mʋ́l. 9 Zakɔbɛ há bɩ́rɛ́ lɛ Mezopotami ko Bɩtɛl, Wɩɩsɛ báá kenú tɩɩ nyɩ́ɩ́sʋ́ mɛ́, a hé bárka pɔ́ʋ́. 10 Wɩɩsɛ bʋ́lʋ́ dɩhɩ̃́: <<Ɩ yɩr nɛ́ Zakɔbɛ, amá ɓa báá wɩ́ɩ́ Zakɔbɛ yɩ́rɛ. Ɩ yɩr sɩ́ a Ɩzɩrayɛl.>> Ɛ́ nɛ́ Wɩɩsɛ pi Ɩzɩrayɛl pɔ́ʋ́ ʋ ɔ́ʋ́ yɩr. 11 Wɩɩsɛ bʋ́lɔ́ pɔ́ʋ́ bʋlɛ́: <<Ŋ nɛ́ ká Wɩɩsɛ ná há kéŋ dóé wuu. Lʋl bɛlɛ a pul kɩ́ŋkáŋ. Ɩ sɩ́ ka duo, a lʋl dukana. Ɩ sɩ́ lʋl kuóre má ɩ dunɩɛ sɩɛrʋ. 12 Tɔ́ɔ́ ná ŋ há píé pá Abɩrahaŋ rɩ́ Ɩzakɛ, ŋ sɩ́ púú pɛ́ɩ́; rɩɩ kúó rɩɩ toó má, ŋ sɩ́ púú pɛ́ɩ́ nihẽ. 13 Ká Wɩɩsɛ isi col, a kɛkɛ dɩhɩ̃́ ná ʋ há cɩ́nɛ́ bʋl wɩ́ɛ́ pá Zakɔbɛ mɛ́. 14 Zakɔbɛ pi dɔ́wɩ́ cɔ́ŋsɛ ɛ́ dɩhɩ̃́, a ɔ́ŋsɛ sɩ́ŋ rɩ́ nʋʋ, a wáásʋ́ nyúú. 15 Zakɔbɛ pá dɩhɩ̃́ ná Wɩɩsɛ há bʋ́l wɩ́ɛ́ ʋ rɩ́ yɩr Bɩtɛl.Bɛŋzamɛ lʋlɛ́ rɩ́ Rasɛl sʋʋ wɩ́ɛ́
16 Ɛ́ har mɛ́, Zakɔbɛ rɩ́rʋ́ jaa nɩɛ lɛ́ Bɩtɛl mɛ́. Ʋ há kúé káánɛ mʋɔ́ kɔ́wɔ́ peri Ɩfirati, Rasɛl luoru wɩ́ɔ́, ʋ ná wɩɩla wérí ká lʋl bio. 17 Ʋ luoru ná wɩɩ tɛ́ŋ mɛ́, hácakrɔ fa bʋ́lʋ́ rɩ́ bʋlɛ́: <<Sɩ́ lo rɩ́ héwíŋ kánɩ́, beé wɩ́ɛ́ ɩ báá sɩ́ lʋl heŋbóle.>> 18 Ʋ há lʋ́lɛ́ ká cɛ́ sʋʋ mɛ́, ʋ pá bio ná yɩr Bɛŋ'oni, kɔ́ʋ́ áná má pɔ́ʋ́ yɩr Bɛŋzamɛ. 19 Rasɛl sʋ́wɔ́, ɓa púú hu Ifirati ná ɓa há kené aá yɩ́rɛ Beteleyɛmɛ, ŋmɛ́nɔ laka. 20 Zakɔbɛ pi dɔ́wɩ́ cɔ́ŋsʋ́ lɛlbule nyúú. Arɩ́ zaa wuu Rasɛl lɛlbule dɔ́wɩ́ ná ha mɩ́nɔ́. 21 Zakɔbɛ ísí ráŋ, a mʋ́ cikú táŋtɛ Mɩgɩdal'ɩdɛrɛ sɩ́ɛ́. 22 Zakɔbɛ mɩŋ ɛ́ dɩhɩ̃́ nɛ́, ká Ribaŋ mʋ́ kánʋ́ háwie Bila pɛ́. Ɛ́ nɛ́ Zakɔbɛ nɛ.
Zakɔbɛ bɛlɛ yɩra
Zakɔbɛ bɛlɛ wuu ní fa fí rí bɛllɛ. 23 Leya bɛlɛ nɛ́ ká: Ribaŋ, Zakɔbɛ dʋ́ŋdʋ́ʋ̃́ bio, Sɩmɩyɔŋ, Levi, Ziida, Ɩsakaarɛ rɩ́ Zabɩlɔŋ. 24 Rasɛl bɛlɛ nɛ́ ká: Zɔzɛfɛ rɩ́ Bɛŋzamɛ. 25 Rasɛl tʋtʋnnɩtoló Bila bɛlɛ nɛ́ ká: Daŋ rɩ́ Nɛfɩtalɩ. 26 Leya tʋtʋnnɩtoló Zilpa bɛlɛ nɛ́ ká: Gaadɛ rɩ́ Asɛrɛ; ɓa nyáŋ nɛ́ ká Zakɔbɛ bɛlɛ ná ʋ há lʋ́lɛ́, Mezopotami mí.
Ɩzakɛ sʋʋ wɩ́ɛ́
27 Zakɔbɛ bɩ́rɔ́ kóú áná Ɩzakɛ rɩ́, Mamire mí, Kiriyatɛ'arba ná ɓa há kené aá yɩ́rɛ Ɩbɩrɔŋ laka. Abɩrahaŋ rɩ́ Ɩzakɛ fa ké ráŋ nɛ́. 28 Ɩzakɛ hiẽsó bɩŋsɛ wuu ní zɔlɔ rɩ́ mɛɛ́sɩbaná, 29 kɔ́ʋ́ sʋwɛ. Ɩzakɛ nɩ́ɩ́nɔ́, a dí tɔ́ɔ́ vɔkɛ ká zɩŋ sʋwɛ a mʋ́ʋ́ ánáwa rɩ́. Ʋ bɛlɛ Ezayu rɩ́ Zakɔbɛ púú hu.