Zɔ́krʋ há hé lal
34
1 Kal oro, Dɩɩna há ká Zakɔbɛ rɩ́ Leya toló, ʋ lɩ́ɔ́ mʋ́ rʋ́ʋ́ ná tɔ́ɔ́ ná tɩ́náwa tolé. 2 Tɔ́ɔ́ ná kuóro há ká Hamɔɔrɛ, a lɛ Hivitiwa sɩɛrʋ, ʋ bio Sɩsɛmɛ sɩɛ́ ná toló ná, a kánʋ́ bɩbarɩ́, a mʋ́ pɛ́, a zɔ́kʋ́ wɩ́ɛ́. 3 Ʋ sɩɛ́ fa có Dɩɩna ná rɩ́rʋ́ sɩɛrʋ wuu. Ʋ bʋl wɩ́ɛ́ aá makɛ rʋ́ʋ́ bɩ́rsʋ́ sabɩɩna hóú rɩ́. 4 Sɩsɛmɛ bʋ́lʋ́ áná Hamɔɔrɛ rɩ́ bʋlɛ́: <<Ja toló né páŋ rʋ́ʋ́ áŋ háálɔ.>> 5 Zakɔbɛ fa nɩ́ɔ́ rʋʋ zɔ́kʋ́ toló Dɩɩna wɩ́ɛ́ tá, amá ʋ bɛlɛ fa ha mɩŋ baka mɛ́ arɩ́rʋ́ pʋsɛ; Zakɔbɛ wɩ wɩ́ɩ́ wuu bʋlɛ́, a kaa jáwɔ́ koe. 6 Sɩsɛmɛ áná Hamɔɔrɛ sɩɛ́ mʋ́ rʋ́ʋ́ hé duosi pá Zakɔbɛ. 7 Zakɔbɛ bɛlɛ há lɛ́ baka ko, ɓa nɛ́ tʋtʋmɩ́ ná há tʋ́mɛ́. Ɓa sɩɛrʋ wuu zɔkɛ, ɓa cɔ́ɛ́ má isi kɩ́ŋkáŋ; beé wɩ́ɛ́ Sɩsɛmɛ á wɩ́ɩ́ ná há wɩ mɔhɛ̃́, ʋ há kéŋ Zakɔbɛ toló ná pɛ́ wɩ́ɛ́. Ɛ́ ká kísó rí Ɩzɩrayɛl mɛ́. 8 Hamɔɔrɛ bʋ́lwɔ́ rɩ́ bʋlɛ́: <<Ŋ bio Sɩsɛmɛ cóíwa toló ná rɩ́rʋ́ sɩɛrʋ wuu ní. Ŋŋ́ sʋlɩ́wa rɛ́, ɩ́ pii pɔ́ʋ́ rʋ́ʋ́ ja. 9 Ɩ́ lo rɩ́rá jɩ́ja náŋá; rɩ́ɩ́wa pííwa tolé aá párá, ká rá má pirá tolé aá pɛ́ɩ́wa. 10 Ɩ́ ké arɩ́rá, á pí tɔ́ɔ́ ná wuu pɛ́ɩ́wa. Ɩ́ ké rɛɛ́ aá yɛ́llɛ, a ja ɓɩɛ pɛ́ɩ́wa tɩɩ. 11 Sɩsɛmɛ tɩɩ má mʋ́ ná Dɩɩna áná arɩ́rʋ́ nánʋɔlɔwa, a bʋlɛ́: <<Ɩ́ é ha saŋ páŋ, ká omo ná wuu ɩ́ há sɩ́ bʋlɩ́ŋ tɛ, ŋ sɩ́ pɛ́ɩ́wa. 12 Ɩ́ pi toló ná páŋ rʋ́ʋ́ áŋ háálɔ; ká rɩ́ɩ́wa mákʋ́ mʋ́l ɓɩɛ kɩ́ŋkáŋ, a makɛ zilé ɓɩɛ má súúri, ŋ sɩ́ tɛ́wɔ́ wuu.>> 13 Sɩsɛmɛ há zɔ́kwɔ́ nátoló Dɩɩna ná wɩ́ɛ́, Zakɔbɛ bɛlɛ lɩ́sɛ nʋɔ pá Sɩsɛmɛ rɩ́rʋ́ áná Hamɔɔrɛ rɩ́ lɩ́ŋ. 14 Ɓa sɛ́: <<Á wɩ́rá nátoló píí pá pɛŋkɛnɔ tɩ́na. Rɩ raá a ɛ́, á lɔ́rɩ́rá tɩɩ. 15 Á wɩ́ɩ́wa sʋlɛ́ ná saŋ, rɩɩ́wa sɩɛrʋ báála wuu ní wʋ́ɔ́ pɛnɛ cónné a nɛ́rá, 16 ká rá sɩɛ́ zɩŋ pírá tolé pɛ́ɩ́wa; ká rɩ́ɩ́wa má pííwa tolé párá; ɛ́ é á sɩ́ kéníwa sɩɛrʋ, rá wuu a duó. 17 Amá rɩɩ́wa nɛ́ wɩ sáŋɛ́ rɩ́wɔ́ cónní́wa pɛnɛ, á sɩ́ káŋrá toló isi col.>> 18 Ɓa wɩ́bʋlɩ́ ná tɔ́rɛ́ Hamɔɔrɛ rɩ́rʋ́ bio Sɩsɛmɛ sɩɛrʋ. 19 Bápʋɔsɩ́wie Sɩsɛmɛ wɩ dáánɛ́, ká tʋŋ ɛ́ tʋtʋmɩ́, bee wɩ́ɛ́ ʋ fa có Zakɔbɛ toló rɩ́rʋ́ sɩɛrʋ wuu. Ká ɓa fa bú Sɩsɛmɛ aá kɩ́llɛ nɩɛ ná wuu há mɩ́nʋ́ áná jaa mɛ́. 20 Hamɔɔrɛ rɩ́rʋ́ bio Sɩsɛmɛ ísó mʋ́ cɩ́ŋwɔ́ tɔ́ɔ́ dánnʋɔ, ká bʋl pɔ́wɔ́ tɔ́ɔ́ nɩɛ a bʋlɛ́: 21 <<Nɩɛ nyáŋ ká nɩwéré duó rí a párá. Ɩ́ lo tɔ́ɔ́ pɔ́wɔ́ rɩ́wɔ́ ké, a mʋ́ ráŋ ná ɓa há có, aá va báyɛlɩ́. Á sɩ́ wóllíwó tolé jɩ́ja, ká rá má pírá tolé pɔ́wɔ́, rɩ́wɔ́ jɩ́ja. 22 Amá ɓa waá sáŋ kéŋrá sɩɛrʋ, ráá rɩ́wɔ́ a duó balá, rɩ rá sɩɛrʋ báála wuu ní wʋ́ɔ́ pɛnɛ cónné, anɛ ɓa tɩɩ há cónníwó pɛnɛ ɛ́. 23 Rɩ rá nɛ́ sáŋwɔ́ bʋlɛ́, ká rɩ́wɔ́ kéŋrá sɩɛrʋ, ɓa pʋsɛ rɩ́wɔ́ liwe wuu sɩ́ ko árá ɓɩ́ɛ́.>> 24 Nɩɛ ná wuu há lɩ́ɛ́ mʋ́ tɔ́ɔ́ ná dánnʋɔ, ɓa sáŋ Hamɔɔrɛ rɩ́rʋ́ bio Sɩsɛmɛ há sʋ́ʋ́ ná, a wuu cónníwó pɛnɛ. 25 Ʋ tápʋlɛ botoro kal, ɓa pɛnɛ fʋrʋ há ɛ́ɛ́ ɓa nɩ́ná wɩɩla, Zakɔbɛ bɛlɛ bɛllɛ, Dɩɩna nánʋɔlɔ Sɩmɩyɔŋ rɩ́ Levi, oro wuu ísó púú tókowí, ɓa zʋ tɔ́ɔ́ sɩɛrʋ, a úríwó mí, a ɓʋ́ʋ́sɛ tɔ́ɔ́ ná báála wuu. 26 Ɓa ɓʋ́ Hamɔɔrɛ má rɩ́rʋ́ bio Sɩsɛmɛ, ká lɩ́sɛ Dɩɩna Sɩsɛmɛ jaa mɛ́, a kaa col. 27 Zakɔbɛ bɛlɛ wuu sɩɛ́ isi zʋ tɔ́ɔ́ ná sʋsɛ sɩɛrʋ, a kúóríwó onni wuu, ká dí tɔ́ɔ́ ná lɛ, ɓa há zɔ́kwɔ́ nátoló ná tá wɩ́ɛ́. 28 Ɓa kɛ́sɩ́wɔ́ pieŋse rɩ́wɔ́ bʋnnɛ, ɓa nɛsɛ rɩ́wɔ́ kokúsi, ɓa ná há mɩŋ tɔ́ɔ́ sɩɛrʋ, rɩ́wɔ́ ná há mɩ́ŋ baka mɛ́; 29 Ɓa lɔ́wɔ́ kuóɓɩɛ wuu, a lɔ́wɔ́ bɛlɛ rɩ́wɔ́ háála, arɩ́ óŋ ná é wuu há mɩ́ŋwɔ́ jɩɩsɛ mɛ́. 30 Ɛ́ nɛ́ Zakɔbɛ sɩɛ́ bʋl Sɩmɩyɔŋ rɩ́ Levi rɩ́ bʋlɛ́: <<Ɩ́ já wɩ́ɩ́ páŋ, Kanaŋ nɩɛ rɩ́ Ferezɩɛ̃wa, rɩ́wɔ́ sɩ́ɩ́ zʋ́ŋ. Ŋ nɩɛ wɩ kaŋ, ɓa sɩɛ́ sɩ́ ko hé náŋá mɛ́, a yoo díŋ ká tɩ́ksɩ́ŋ rɩ́rɩ́ŋ jaa nɩɛ wuu.>> 31 Ɛ́ nɛ́ ɓa sɛ́: <<Ráá sɩɛ́ fa lo rí ɛ́ báálɔ pírá nátoló makɛ hácɔ́rmʋ́?>>