Zakɔbɛ rɩ́ Ezayu bʋ́lɔ́ hé náŋá mɛ́
33
1 Zakɔbɛ tɩ́ɛ́nɛ bel ná Ezayu, rɩ báála zɔwaná tɩ́ŋʋ́ mɛ́ aá ko. Ɛ́ nɛ́ ʋ kánʋ́ bɛlɛ ɓa, a pá Leya rɩ́ Rasɛl rɩ́rʋ́ tʋtʋŋháála bɛllɛ. 2 Ʋ lá sɩ́ɛ́ púú tʋtʋŋháála ná rɩ́wɔ́ bɛlɛ nɛ́ a hé sɩ́ɛ́, Leya má rɩ́rʋ́ bɛlɛ baa tʋkɛ, ká Rasɛl rɩ́ Zɔzɛfɛ sɩɛ́ mɩ́ŋwɔ́ har. 3 Ʋ tɩɩ sɩɛ́ ko lɔ́wɔ́ sɩ́ɛ́. Ʋ ɓírmi tíé naasɩ́ balpɛ ká rʋ́ʋ́ zɩŋ pérú máálá. 4 Ezayu fɔ́ɔ́ a cémú; a kánʋ́ kormi, ká báásʋ́ baŋ mɛ́, ɓa hé náŋá mɛ́ aá búŋsi. 5 Ezayu há tɩ́ɛ́nɛ́ a ná háála ná rɩ́wɔ́ bɛlɛ, ʋ bɔ́sɛ́ Zakɔbɛ bʋlɛ́: <<Áŋwa rɛ́ tɩ́ŋɩ́ mɛ́ nyɛ?>> Zakɔbɛ sɛ́: <<Ɓa ká bɛlɛ ná Wɩɩsɛ há píé dí zilé pɛ́ɩ́ tʋtʋnnɔ nɛ́.>> 6 Ɛ́ nɛ́ tʋtʋŋháála ná rɩ́wɔ́ bɛlɛ tuu peri a ɓírmi tíé. 7 Leya má rɩ́rʋ́ bɛlɛ tuu peri a ɓírmi. Ʋ har rɩ́ Zɔzɛfɛ má rɩ́ Rasɛl tuu peri a ɓírmi. 8 Ezayu bɔ́sʋ́: <<Pʋkana nyáŋ ŋ há cémé, ɩɩ́ já rɩ́ɩ́ ɔ́wɔ́ beé?>> Zakɔbɛ sɛ́: <<Ŋŋ́ já rɩ́ŋ pɛ́ɩ́ nɛ́, ŋ nyúútɩ́na ká néí sawér.>> 9 Ɛ́ nɛ́ Ezayu sɛ́: <<Ŋ maábio, ŋ kéŋ ɓɩɛ kɩ́ŋkáŋ ɓa mɔhɩ́ŋ, ɩ má kánɩ́ ɓɩɛ.>> 10 Zakɔbɛ sɛ́: <<Aɩ́, ŋŋ́ sʋlɩ́, rɩ sawér é ní ɩ kaa cáásɩ́ŋ, ɩ saŋ zilé né ŋ há pɛ́ɩ́. Ɛ́ nɛ́ tɛ ŋ kóí sɩ́ɛ́ anɛ ɓa háá ko Wɩɩsɛ sɩ́ɛ́ ɛ́, kɛ́ɩ́ má cakɛ láŋ rɩ́ taŋá. 11 La zilé ná ŋ há kené ko rɩ́ŋ pɛ́ɩ́, bee wɩ́ɛ́ Wɩɩsɛ mákʋ́ sawér páŋ, ŋ nɛ́sɛ zʋ omo ná wuu ŋ háá jɛɛ́. Ʋ há háárɛ́ Ezayu mí, ʋ gúló ká la.12 Ezayu sɛ́: <<Isi ráá hé náŋá col.>> 13 Ɛ́ nɛ́ Zakɔbɛ sɛ́: <<Ɩ tɩɩ ɩ́ɔ̃́ ŋ nyúútɩ́na, rɩ heŋbiisi wɩ dóé kené; káŋ baa ka pemaáwa rɩ́ nɔmaáwa má, ɓa bɛlɛ haá ɔsɛ. Rɩ raá háárɩ́wɔ́ mɛ́ rɩ́wɔ́ va kɩ́ŋkáŋ tápʋ́l balá, pʋwɩɛla ná wuu sɩ́ sʋsɛ. 14 Ŋ nyúútɩ́na, lɛ́ɩ́ tʋtʋnnɔ sɩ́ɛ́ va, ká rɩ́ŋ é pɔ́rɩ́ŋ tɩɩ mɛ́, a ka heŋbiisi rɩ́ pʋsɛ ná va mʋɔ́wa, ɓa dóé mʋɔsɔ, a kóí rɩ́ Seyiri tíé.>> 15 Ezayu sɛ́: <<Ɛ́ wɩ́ɛ́, ŋ nɩɛ náŋa sɩ́ káánɩ́ dɩhɩ̃́.>> Zakɔbɛ sɛ́: <<Beé mʋ́l mɛ́? Wúólí sɩɛrʋ páŋ, ʋ ɛ́ mɔhɔ̃́.>> 16 Ɛ́ kal tɩɩ nɛ́ Ezayu bɩrzʋ ŋmɛ́nɔ, ɓa mʋ́ Seyiri. 17 Ká Zakɔbɛ má isi a mʋ́ Sʋkɔtɛ. Ʋ sɔ́ʋ́ tɩɩ jaa, ká ciki lɔkɔ a pɔ́ʋ́ pʋsɛ má. Ɛ́ nɛ́ tɛ ɓa ka ɛ́ dɩhɩ̃́ aá yɩ́rɛ Sʋkɔtɛ.
Zakɔbɛ kúó ké Sɩsɛɛmɛ mɛ́
18 Zakɔbɛ há bɩ́rɛ́ lɛ Mezopotami mí, ʋ kúó peri tɔ́ɔ́ ná ɓa háá yɩ́rɛ Sɩsɛmɛ a mɩŋ Kanaŋ tíé, arɩ́ tɛŋfɩ́ɛ́l, ká wɩ́ɩ́ wuu wʋ́ʋ́ ɛ́ɛ́. Ʋ cíkú zʋ́ɔ́ tɔ́ɔ́ ná sɩ́ɛ́. 19 Ʋ lá tíé yɔwɛ Sɩsɛmɛ bio Hamɔɔrɛ bɛlɛ rɩ́, a cíkú táŋtɛ. Ʋ yɔ́wɛ́ ɛ́ tíé, meéwícááka zɔlɔ nɛ́. 20 Zakɔbɛ má koro ɛ́ dɩhɩ̃́, a pɔ́ʋ́ yɩr: Ɩzɩrayɛl Wɩɩsɛ.