Zakɔbɛ rɩ́ Ezayu céŋ náŋá
32
1 Tɔ́ɔ́ há pʋ́lɛ́, Labaŋ ísí cɩ́cʋɔ fól, a kɛ́sʋ́ tolé rɩ́rʋ́ nihẽ a kormi, a héwó nyúú bárka, ká sɩɛ́ zɩŋ bɩrɛ mʋ́ʋ́ jaa. 2 Ká Zakɔbɛ má isi zʋ́ʋ́ ŋmɛ́nɔ, aá col. Wɩɩsɛ malɩ́kawa ko cémú. 3 Ʋ há nówó, ʋ sɛ́: <<Rɛɛ́ ká Wɩɩsɛ dɩmɩnɩ́ nɛ́!>> Ká pá ɛ́ dɩhɩ̃́ yɩr Mahanayimi.4 Zakɔbɛ tʋ́ŋ nɩɛ ɓa la sɩ́ɛ́ mʋ́ʋ́ máálá Ezayu dɩhɩ̃́, Seyiri tíé, Edoŋ dɩtɩ́llɛ. 5 Ʋ pɔ́wɔ́ ŋmɛ́nɔ ká bʋlɛ́: <<Rɩɩ́wa mʋ́ɔ́, ɩ́ bʋl nyɛ páŋ nyúútɩ́na Ezayu: <Ɩ tʋtʋnnɔ Zakɔbɛ sɛ́: Ŋ fa mʋ́ɔ́ mɩŋ Labaŋ dɩhɩ̃́ nɛ́, a ké ráŋ wuu a kaa ko aá peri zaa. 6 Ŋ kéŋ nɛsɛ, kokúsi, pieŋse rɩ́ bʋnnɛ; ŋ kéŋ tʋtʋnna má, báála rɩ́ háála. Ɛ́ nɛ́ ŋ tʋŋ nɩɛ rɩ́wɔ́ ko hé duosi pɛ́ɩ́, ŋ nyúútɩ́na, rɩ́ɩ́ cakɛ láŋ wérí.>> 7 Zakɔbɛ nɩtʋmɛ́ ná bɩrko bʋ́lʋ́ dɩhɩ̃́ bʋlɛ́: <<Á mʋ́ɔ́ néí máálá Ezayu. Ʋ má mɩŋ ŋmɛ́nɔ mɛ́ aá cémí; ʋ rɩ́ báála zɔwaná nɩ́ɩ́ kué.>> 8 Héwíŋ ka Zakɔbɛ, ʋ sɩɛrʋ zɔkɛ. Ʋ ka nɩɛ ná há mɩ́nʋ́ dɩhɩ̃́ ɓa buke bɛllɛ; a kánʋ́ pʋzeŋsi, rɩ́rʋ́ pʋwɩɛla, arɩ́rʋ́ nyʋ́kmawa má ɓa buke bɛllɛ. 9 Ká bʋlɛ́: <<Rɩ Ezayu ní kúé wólli buke ná nɔ́ŋɔ yoo dí má, buk ná há káánɛ́ sɩ́ fá.>>
10 Zakɔbɛ cʋ́ɔ́lɛ́ Wɩɩsɛ bʋlɛ́: <<Ŋ naabál Abɩrahaŋ Wɩɩsɛ ná há káŋ áná Ɩzakɛ Wɩɩsɛ, Nyuutɩna Wɩɩsɛ, ɩ nɛ́ sɛ́ rɩ́ŋ bɩrmʋ́ŋ tɔ́ɔ́ ŋ áná jaa, ká rɩ́ɩ́ ɔ́sɩ́ŋ.> 11 Ŋ kɛ́ɩ́ tʋtʋnnɔ nɛ́; ŋ múúró kɛ́ɩ́ mákɩ́ sawér páŋ, a mákɩ́ nɩcɩ́tɩkɔ́ má páŋ. Bee wɩ́ɛ́, ŋ há kúé aá daarɛ Zʋrdɛŋ fuo né daarɛ́, daa dʋŋɔ nɛ́ fa mɩ́nɩ́ŋ nɛ́sɛ mɛ́; káŋ zaa ka nɩɛ rɩ́ ɓɩɛ, a kaa ɓa buke bɛllɛ. 12 Ŋ sɩɛ́ sʋlɩ́ rɛ́, láŋ tá ŋ máálá Ezayu nɛ́sɛ mɛ́; bee wɩ́ɛ́ ŋŋ́ fá héwíŋ, rʋ́ʋ́ háá ko ɓʋ́ŋ, a ɓʋ́ʋ́sɛ háála nyáŋ má rɩ́wɔ́ bɛlɛ. 13 Amá ɩ nɛ́ bʋ́lɩ́ŋ rɩ́ bʋlɛ́: <Ŋ sɩ́ a wérí a pɛ́ɩ́ ká a rɩ́ɩ́ dunɩɛ a ɓɩkáná anɛ mʋʋ nʋɔ hɩɛla nɛ́ŋ há wʋ́ɔ́ wuó dɩɩsɛ.>>> 14 Zakɔbɛ cɔ́ ráŋ nɛ́ ɛ́ kal. Ʋ há ísé, ʋ lɩ́sɛ pʋsɛ ná wuu ʋ há kené sɩɛrʋ náŋa, a tɛ rɩ́wɔ́ kaa mʋ́ dí zilé pɔ́ʋ́ máálá Ezayu: 15 Bʋmaáwa zɔwɛllɛ arɩ́ bʋŋgboksi mɛrɛ́, pemaáwa zɔwɛllɛ arɩ́ peɓallɛ mɛrɛ́, 16 nyʋ́kmawa ná bɛlɛ ha háá ɔsɛ́ mɛrɛ́ rɩ́ fí arɩ́wɔ́ bɛlɛ wuu, nɔmaáwa mɛɛ́sɛllɛ arɩ́ nɔɓallɛ fí, kokúháála mɛrɛ́ arɩ́ kokúwala fí. 17 Ʋ kéŋwó ɓa pʋna rɩ́rʋ́ duówa a pɔ́ʋ́ tʋtʋnna, ká bʋ́lwɔ́ rɩ́ bʋlɛ́: <<Ɩ́ ko la sɩ́ɛ́; ɩ́ va bámmáwa, rɩ́ pɛ́kɛ mɩŋ pʋsɛ duó wuu rɩ́wɔ́ náŋa pɛ́kɛ.>> 18 Ká bʋl tʋtʋnnɔ ná há lá sɩ́ɛ́ rɩ́ bʋlɛ́: <<Rɩŋ máálá Ezayu ní kúé cémí a bɔ́sɩ́ bʋlɛ́: <Ɩ ká áŋ tʋtʋ́nnʋ́ rɛ́? Ɩɩ́ mʋ́ nɛɛ́? Áŋ rɛ́ tɛ pʋsɛ nyáŋ wuu há mɩ́nɩ́ sɩ́ɛ́?> 19 Ɩ bʋl pɔ́ʋ́ bʋlɛ́: <Ɩ tʋtʋnnɔ Zakɔbɛ nɛ́ tɩ́wɔ́. Ɓa ká zilé ní ʋ sɛ́ rɩ́ŋ kaa ko pɛ́ɩ́, ŋ nyúútɩ́na Ezayu; ʋ tɩɩ mɩŋ har rɩ́ aá ko.>>> 20 Ʋ bʋ́l ɛ́ tɩɩ nɛ́ a pá bʋllɛ nyúú mí nɛrɔ, a bʋl ɛ́ pá botoro nyúú mí nɛrɔ, arɩ́wɔ́ ná wuu há tɩ́ŋ pʋsɛ ná mɛ́: <Rɩɩ́wa nɛ́ náŋ nyúútɩ́na Ezayu, nyɛ nɛ́ mɔhɛ̃́ rɩ́ɩ́wa bʋ́lʋ́ rɩ́. 21 Ká rɩ́ɩ́wa bʋl súúri pɔ́ʋ́ bʋlɛ́:‹Ɩ tʋtʋnnɔ Zakɔbɛ tɩɩ mɩ́ŋrá har aá ko› » Bee wɩ́ɛ́ ʋ sɛ́: << Ŋ sɩ́ pɔ́rʋ́ cɔ́ɛ́ arɩ́ zilé né há lá sɩ́ɛ́ aá mʋ́, ká rɩ́ŋ tɩɩ sɩɛ́ zɩŋ pérú; ɩɩ́ gbé ʋ sɩ́ cakɛ láŋ.>> 22 Zilé pʋsɛ ná wuu lɔ́ʋ́ sɩ́ɛ́ col, kɔ́ʋ́ tɩɩ cɔ ráŋ ná ʋ há kúé ké. 23 Ʋ ísí ɛ́ tɩ́taŋ tɩɩ, a kɛ́sʋ́ háála bɛllɛ, rɩ́rʋ́ tʋtʋnnɩtolé bɛllɛ, arɩ́rʋ́ bɛlɛ fí rí oro, a daarɛ Yabɔkɛ fuo daarɛ́. 24 Ʋ ɔ́ɔ́ ɓa daarɛ fuo nyipoo mí, kɔ́ʋ́ a ʋ oŋkana ná má wuu sɩɛ́ daarɛ.
Zakɔbɛ rɩ́ Wɩɩsɛ lówó
25 Zakɔbɛ dʋŋɔ kúó káánɛ, ɛ́ nɛ́ báálɔ oro ko kánʋ́ lowi wuu tɔ́ɔ́ pʋl. 26 Ɛ́ báálɔ há kúé ná rʋʋ wɩ Zakɔbɛ wo, ʋ ŋmɔ́wɛ́ Zakɔbɛ tɩŋsɩ́ɩ́ mɛ́; a ŋmɔwɛ cɩkɛ, ɓa loo ná mɛ́. 27 Ká bʋ́lʋ́ rɩ́ bʋlɛ́: <<Píŋ tá rɩ́ŋ col, bee wɩ́ɛ́ tɔ́ɔ́ pʋ́lɔ́ aá ko rí.>> Ɛ́ nɛ́ Zakɔbɛ sɛ́: <<Ŋ wɩ́ɩ́ píí tá rɩ́ɩ́ col, rɩɩ nɛ́ wɩ́ŋ nyúú bárka héé.>> 28 Báálɔ ná bɔ́sʋ́: <<Ɩ yɩr nɛ́ beé?>> Ɛ́ nɛ́ ʋ sʋ́ʋ́ yɩr nɛ́ ká Zakɔbɛ. 29 Báálɔ ná baa bʋ́lʋ́ rɩ́ bʋlɛ́: <<Ɓa báá wɩ́ɩ́ Zakɔbɛ yɩ́rɛ, amá ɓa sɩ́ yɩ́yɩ́rɩ́ Ɩzɩrayɛl; bee wɩ́ɛ́ ɩ lówó arɩ́ Wɩɩsɛ, a lowi arɩ́ nɩbííne, ká dí dóé.
30 Zakɔbɛ bʋ́lʋ́ rɩ́ bʋlɛ́: <<Ŋŋ́ sʋlɩ́ rɛ́, mákɩ́ yɩr páŋ.>> Rʋʋ sɛ́: <<Beé wɩ́ɛ́ ɩɩ́ bɔ́sɩ́ŋ yɩr mɛ́?>> Ká sɩɛ́ hé bárka pá Zakɔbɛ ráŋ. 31 Zakɔbɛ sɛ́: <<Ŋ ná Wɩɩsɛ rɩ́ sɩ́ɩ́, káŋ wɩ sʋ́wɛ́.>> Ɛ́ nɛ́ tɛ ʋ pá ɛ́ dɩhɩ̃́ yɩr Penɩɛl. 32 Wɩɩsɛ kúó aá poŋ, rɩ Zakɔbɛ dáárɛ́ Penɩɛl. Zakɔbɛ sɩɛ́ vɩ́va kara. 33 Ɛ́ nɛ́ tɛ arɩ́ zaa wuu, Ɩzɩrayɛl nɩɛ wɩ omo tɩŋpol dí, bee wɩ́ɛ́, Wɩɩsɛ há lɩ́sɛ Zakɔbɛ tɩŋsɩ́ɩ́, tɩŋpol mí ní ʋ ŋmɔwɛ.