Zakɔbɛ lɩ́ɔ́ mʋ́ Kanaŋ
31
1 Zakɔbɛ nɩ́ɔ̃́ rɩ Labaŋ bɛlɛ sɛ́: <<Zakɔbɛ párá áná onni wuu ní, ɓa mɛ́ nɛ́ sɩɛ́ ʋ tɩŋ a ná kuóɓɩɛ nyáŋ wuu.>> 2 Zakɔbɛ kɩ́ɛ́lɛ zɩŋ rɩ Labaŋ sɩ́ɛ́ báá tóú mí anɛ dʋ́ŋdʋ́ʋ̃́ ná. 3 Ɛ́ nɛ́ nyuutɩna Wɩɩsɛ bʋl Zakɔbɛ rɩ́ bʋlɛ́: <<Isi bɩrmʋ́ɩ́ áná tɔ́ɔ́, ɩ duo sɩɛrʋ, ŋ sɩ́ mɩŋ arɩ́rɩ́.>> 4 Zakɔbɛ tʋŋ ɓa yɩ́rɛ Rasɛl rɩ́ Leya ɓa ko baka, ráŋ ná ʋ há mɩ́nʋ́ pʋsɛ laka. 5 Ʋ bʋ́lwɔ́ rɩ́ bʋlɛ́: <<Ŋ kɩ́ɛ́lɔ́ zɩŋ rɩ́ɩ́wa áná sɩ́ɛ́ báá tóŋ mí anɛ dʋ́ŋdʋ́ʋ̃́ ná. Amá ŋ áná Ɩzakɛ Wɩɩsɛ mɩ́nɩ́ŋ har. 6 Ɩ́ tɩɩ ɩ́ɔ̃́ rɩŋ dé caasɛ tʋŋ pɛ́ɩ́wa áná rɩ́rɩ́ŋ dóé wuu ní. 7 Ká ɩ́ áná nyɩ́sɩ́ŋ a bɩ́rsɩ́ŋ túme naasɩ́ fí. Amá Wɩɩsɛ wɩ sáŋɛ́ pɔ́ʋ́ rʋ́ʋ́ áŋ bɔ́ŋbɔ́ŋ. 8 Rʋʋ nɛ́ sɛ́: Petaksɛ́ nɛ́ sɩ́ ɛ́ɩ́ túme, pʋháála ná wuu de lʋllɛ bitaksɛ́ nɛ́; ká rʋʋ nɛ́ sɛ́, ɓɩbɩɛ́llɛ nɛ́ sɩ́ ɛ́ɩ́ túme, pʋsɛ ná wuu de lʋllɛ ɓɩbɩɛ́llɛ nɛ́. 9 Wɩɩsɛ nɛ́ lɛ́ɩ́wa áná pʋsɛ, a pii páŋ. 10 Tɛ́ŋ ná mɛ́ pʋsɛ ná há kúé aá kɛsɛ puusi, ŋ dúósó rɩ peɓallɛ rɩ́ bʋŋgboksi ná wuu há zɩ́ŋwɔ́, rɩ ɓa ká pʋsɛ ná há kéŋ bɩɛ́llɛ, a ŋméŋsi ká taksɛ nɛ́. 11 Wɩɩsɛ malɩ́ka yɩ́rɩ́ŋ ɛ́ duose mí a bʋlɛ́: <<Zakɔbɛ!>> Ɛ́ nɛ́ ŋ saŋ a bʋlɛ́: <<Náŋ nɛ́!>> 12 Ɛ́ nɛ́ ʋ sɛ́: <<Tɩ́ɛ́nɛ bel ná, pʋwala ná wuu há zɛ́ pʋháála ná, ɓa táksɔ́, a ka bɩɛ́llɛ, ká ŋméŋsi; bee wɩ́ɛ́ ŋ ná wɩ́ɛ́ ná wuu Labaŋ há píé ɛ́ɩ́ mɛ́ rɛ́. 13 Ŋ nɛ́ ká Wɩɩsɛ ná há kúé lɩ́ɩ́ mɛ́ Betɛl mɛ́, ɩ pi dɔ́wɩ́ cɔ́ŋsɛ, a bɩ́sɛ nʋʋ waasɛ, ká tá nʋɔ pá nɛ́. Mʋ́l né mí, isi tɔ́ɔ́ né mí a bɩrmʋ́ɩ́ áná tɔ́ɔ́.>> 14 Rasɛl rɩ́ Leya bʋ́lʋ́ rɩ́ bʋlɛ́: << Á báá wɩ ker kené á áná liwe sɩɛrʋ ʋ jaa mɛ́. 15 Ʋ wɩ́rá píé makɛ nɩhʋ́ɔ́rá rɛ́? Ʋ wɩ́rá píé yɛ́llɛ ká dírá meéwíé ná má á fa há sɩ́ la? 16 Kuóɓɩɛ ná wuu Wɩɩsɛ há kené lárá áná rɩ́, á nɛ́ tɩ́wɔ́, á rɩ́rá bɛlɛ. Mʋ́l né mí, ɔ́ɔ́ ná wuu Wɩɩsɛ há sɩ́ɩ́ a.>> 17 Ɛ́ nɛ́ Zakɔbɛ isi a kɛ́sʋ́ háála rɩ́rʋ́ bɛlɛ, ɓa zɛ́ nyʋ́kmawa. 18 A kɛ́sʋ́ pʋsɛ má, a pa kuóɓɩɛ ná wuu ʋ há néé Mezopotami mí, a sɩɛ́ bɩrɛ aá cólú áná Ɩzakɛ tɔ́ɔ́, Kanaŋ tíé. 19 Rɩ Labaŋ fa kenú pieŋse mʋ́ rʋ́ʋ́ kɛ́wɔ́ lɔ́ŋ. Ɛ́ nɛ́ Rasɛl gaa pɔ́ʋ́ áná jaa venni a kaa col. 20 Zakɔbɛ nyɩsɛ Labaŋ há ká Aramɩɛŋ, a wɩ bʋlɛ́ pɔ́ʋ́ ká lʋɔrɛ fá col. 21 Ʋ fɔ́ɔ́ rɩ́rʋ́ onni wuu, a daarɛ fuo daarɛ́, a caasɛ Galaadɛ pallɛ cɔɔ rɩ́ aá mʋ́.Labaŋ lɩ́ɔ́ aá kiri rʋ́ʋ́ ka Zakɔbɛ
22 Tápʋlɛ botoro kal, ɓa bʋ́lɔ́ pá Labaŋ rɩ́ Zakɔbɛ fɔ́. 23 Ɛ́ nɛ́ ʋ kɛ́sʋ́ maábináŋa pɔ́ʋ́ tɩɩ mɛ́, ɓa lɛ a kiri Zakɔbɛ tápʋlɛ́ balpɛ, ká mʋ́ kánʋ́ Galaadɛ pallɛ sɩɛrʋ. 24 Amá ʋ tɩ́taŋ, Wɩɩsɛ tɩ́ŋ duose mí, a ko bʋl Labaŋ ná há ká Aramɩɛŋ dɩhɩ̃́ a bʋlɛ́: << Pɔ́ɩ́ tɩɩ mɛ́ rɩ́ɩ́ sɩ́ wɩ́ɩ́ wuu bʋ́lʋ́ Zakɔbɛ rɩ́.>> 25 Labaŋ mʋ́ɔ́ pu Zakɔbɛ, rʋʋ fa cíkú táŋtɛ Galaadɛ pallɛ nyúú. Labaŋ má rɩ́rʋ́ maábináŋa cíkwó ɓɩɛ ɛ́ pallɛ nyúú. 26 Ɛ́ nɛ́ Labaŋ sɩɛ́ bʋl Zakɔbɛ rɩ́ bʋlɛ́: << Beé rí ɩ a nyɛ? Ɩ nyɩ́sɩ́ŋ ká kɛ́sɩ́ŋ tolé fá aá col anɛ lal nɩyookɛsɛ́. 27 Beé rí tɛ ɩ lʋ́ɔ́rɩ́ŋ mɛ́ a fá aá col, ká wɩ bʋlɛ́ páŋ? Rɩɩ fa bʋ́lɔ́ páŋ rɛ́, ŋ faá á rɩ́wɔ́ dú beŋtére rɩ́ cemo ní, a yɛ yɩɩla rɩ́ satɔrɔ́, káŋ kánɩ́ lɩɩ hé ŋmɛ́nɔ mɛ́. 28 Ɩ wɩ lóé rɩ́ŋ kórmíŋ tolé rɩ́wɔ́ bɛlɛ má. Ɩ tʋ́ŋ cʋ́llɛ nɛ́ sɩɛ́ ɛ́. 29 Ŋ fa wóíwa bɔ́ŋbɔ́ŋ ɩ́'a; amá ɩ áná fa háá cʋɔlɛ Wɩɩsɛ ná die bʋ́lɩ́ŋ rɩ́ bʋlɛ́: ‹Pɔ́ɩ́ tɩɩ mɛ́ rɩ́ɩ́ sɩ́ wɩ́ɩ́ wuu bʋ́lʋ́ Zakɔbɛ rɩ́› 30 Ɩ áná jaa mʋ́ɩ́ wɩ́ɛ́ nɛ́ há kení ɩ lɛ aá col, beé rí sɩɛ́ tɛ ɩ gaa páŋ jaa venni má?» 31 Ɛ́ nɛ́ Zakɔbɛ bʋl Labaŋ rɩ́ bʋlɛ́: <<Héwíŋ ní keníŋ, ŋŋ́ fá rɩ́ɩ́ háá kánɩ́ tolé la ká táŋ nɛ́. 32 Wúllírá cɩksɛ á maábináŋa sɩ́ɛ́ mɛ́, rɩɩ néí óŋ wuu á dɩhɩ̃́, ɩ lɩ́sɛ. Nɛrɔ ná dɩhɩ̃́ ɩ há sɩ́ néí venni ná, tɩ́na sɩ́ sʋwɛ.>> Zakɔbɛ fa wɩ ɛ̃ rɩ́ Rasɛl gá venni ná. 33 Labaŋ zʋʋ wúlli Zakɔbɛ táŋtɛ, a zʋʋ wúlli Leya táŋtɛ, a wúlli tʋtʋnnɩtolé ná má bɛllɛ táŋtɛwa, ká wɩ óŋ wuu né. Ʋ lɛ́ Leya táŋtɛ mɛ́ nɛ́, a zʋ Rasɛl táŋtɛ sɩɛrʋ. 34 Rasɛl fa pá venni ná, a pii hóú nyʋ́kma ɓasa mʋ́l nɛ́, a zɛ́ kéŋwó daha. Ká Labaŋ wúlli táŋtɛ ná wuu ká wɩ óŋ néé. 35 Rasɛl bʋ́lʋ́ áná rɩ́ bʋlɛ́: <<Ŋ áná, sɩ́ ló rɩ́ɩ́ cɔ́ɛ́ ísíŋ nyúú, ŋ há wɩ dahá wuó isi aá cɛ́ ɩ sɩ́ɛ́; ŋ héŋ tɩŋa nɛ́.>> Labaŋ baa wúlli, ká wɩ venni ná néé. 36 Zakɔbɛ cɔ́ɛ́ isi ʋ rɩ́ Labaŋ na náŋá. Ʋ bɔ́sʋ́: <<Ŋ wɩ́zɔkɩ́ nɛ́ ká beé rí? Beé nɩɓʋ́ʋ́rɩwɩ́ rɛ́ ŋ a, ɩ isi aá kíríŋ arɩ́ tɛŋhɛ́sɔ né duo? 37 Ɩ há wúllíŋ cɩksɛ wuu, ɩ néí jaa óŋ ráŋ? Rɩɩ ná óŋ, ɩ kaa ko mákɩ́ŋ, ŋ maábináŋa rɩ́rɩ́ maábináŋa sɩ́ɛ́ mɛ́, rɩ́wɔ́ dírá bɛllɛ sarɩ́ya. 38 Bɩŋsɛ mɛrɛ́ nɛ́ ŋ há mɩ́nɩ́ dɩhɩ̃́; ɩ pieŋse rɩ́rɩ́ bʋnnɛ wɩ zɔ́kɛ́ tá, ŋ wɩ́ɩ́ petuu peɓallɛ má kɛ́sɛ́ dí. 39 Rɩ dííre pɩ́rɛ́ pʋna wuu, ŋ wɩ kené ko aá pɛ́ɩ́, ʋ káŋ kɩŋ nɛ́. Ɩɩ́ a ŋ túŋwó ná má ɓa há gɛ́ɛ́, tɩ́taŋ rɩ́ wɔhɔ wuu ní. 40 Wɔhɔ sɩɛrʋ wɩɩsɛ deé ŋmɔ́wɩ́ŋ nɛ́, tɩ́taŋ waarʋ má kánɩ́ŋ; ŋ wɩ dóŋ wuó pɛ́. 41 Bɩŋsɛ mɛrɛ́ nɛ́ nyɛ ŋ há mɩ́nɩ́ jaa mɛ́. Ŋ tʋ́ŋ bɩŋsɛ fí rɩ́ baná nɛ́ a pɛ́ɩ́, ɩ tolé ná bɛllɛ wɩ́ɛ́; ká tʋŋ bɩŋsɛ balgo má ɩ pʋsɛ wɩ́ɛ́. Ká ɩ bɩ́rsɩ́ŋ túme naasɩ́ fí. 42 Rɩŋ naabál Abɩrahaŋ Wɩɩsɛ fa tóŋ har nɛ́, ʋ Wɩɩsɛ ná ŋ áná Ɩzakɛ há fɔ́ʋ́ héwíŋ, ɩ fa waá a rɩ́ɩ́ páŋ óŋ wuu rɩ́ŋ kaa col. Amá Wɩɩsɛ sɩɛ́ náŋ susu, arɩ́ bɔlɛ ná ŋ há néé tʋmɛ́ mɛ́; ʋ dí sarɩ́ya die tɩ́taŋ, a pi taŋá páŋ.>>
Zakɔbɛ rɩ́ Labaŋ tá nʋtálɔ pá náŋá
43 Ɛ́ nɛ́ Labaŋ bʋl Zakɔbɛ rɩ́ bʋlɛ́: <<Tolé nyáŋ káŋ tolé ní, ɓa bɛlɛ nyáŋ má káŋ bɛlɛ nɛ́. Pʋsɛ nyáŋ, arɩ́ onni nyáŋ wuu ɩ háá belé ŋ nɛ́ tɩ́wɔ́. Zaa sɩɛ́, ŋ báá wo beé a aá páŋ tolé nyáŋ rɩ́wɔ́ bɛlɛ nyáŋ ɓa há lʋ́lɛ́? 44 Ɛ́ wɩ́ɛ́, ko ráá ja nɛ́ŋ rʋ́ʋ́ a dáŋsɩ́ɛ́ ŋ rɩ́rɩ́ pɛ́kɛ, ká ráá tá nʋɔ pá náŋá.>> 45 Ɛ́ nɛ́ Zakɔbɛ pi dɔ́wɩ́, a kaa cɔ́ŋsɛ. 46 Kɔ́ʋ́ bʋ́lʋ́ nɩɛ rɩ́ bʋlɛ́: <<Ɩ́ pa dɔ́wʋ́ɔ́ ko!>> Ɓa pa dɔ́wʋ́ɔ́ ko ciki náŋá mɛ́; ɓa kéŋwó laka a dí ɓɩdííle. 47 Labaŋ ka dɔ́wɩ́púúle ná aá yɩ́rɛ Yegar'Sahaduta, ká Zakɔbɛ má kaá yɩ́rɛ Galedi. 48 Labaŋ sɛ́: <<Púl né ní zaa ká dáŋsɩ́ɛ́ ŋ rɩ́rɩ́ pɛ́kɛ!>> Ɛ́ nɛ́ tɛ ɓaá yɩ́rʋ́ Galedi. 49 Ɓaá yɩ́rʋ́ Misipa má; beé wɩ́ɛ́ Labaŋ fa sɛ́: <<Rɩ́ Nyuutɩna Wɩɩsɛ pɔ́ŋ rɩ́rɩ́ mɛ́, tɛ́ŋ ná mɛ́ á há sɩ́ ko a báá wɩ náŋá ná. 50 Rɩɩ nɛ́ bɛ́ŋsɩ́ŋ tolé, ɛ́ rá má rɩɩ já háála náŋa súúríwó mí, zɩŋ rɩ́ nɩbíŋ rá tórá dáŋsɩ́ɛ́, Wɩɩsɛ nɛ́ sɩ́ áŋ rɩ́rɩ́ pɛ́kɛ dáŋsɩ́ɛ́.>> 51 Ɛ́ nɛ́ Labaŋ baa bʋl Zakɔbɛ rɩ́ bʋlɛ́: <<Bel dɔ́wɩ́ né ŋ há cɔ́ŋsɛ́, arɩ́ dɔ́wʋ́ɔ́ púl né ŋ há bílɩ́ŋ rɩ́rɩ́ pɛ́kɛ. 52 Dɔ́wɩ́púúle nyáŋ rɩ́ dɔ́wɩ́cɔ́ŋsɛ né sɩ́ árá dáŋsɩ́ɛ́. Ŋ wʋ́ɔ́ mɛ́ wuo daarɛ kóí cɔɔ rɩ́ aá tʋŋ bɔ́ŋbɔ́ŋ; ɩ má wʋ́ɔ́ mɛ́ wuo daarɛ kóŋ cɔɔ rɩ́ aá tʋŋ bɔ́ŋbɔ́ŋ. 53 Abɩrahaŋ Wɩɩsɛ arɩ́ Nahɔrɛ wɩŋsa, ɓa nɛ́ sɩ́ áŋ rɩ́rɩ́ pɛ́kɛ sarɩ́yadííre.>> Ɛ́ nɛ́ Zakɔbɛ ŋmɩ́ɛ́sɛ Wɩɩsɛ ná ʋ áná Ɩzakɛ háá fɔ́ʋ́ yɩr mɛ́. 54 Zakɔbɛ ɔ́sɛ́ vʋk paalɔ ná nyúú, a yɩ́rʋ́ nɩɛ ɓa ko dí ɓɩdííle ká cɔ ɛ́ paalɔ daha.