28
1 Ɩzakɛ yɩ́rɛ Zakɔbɛ ʋ ko, ʋ hóú nyúú bárka ká bʋlɛ́: << Ɩ wɩ mɔhɛ̃́ rɩ́ɩ́ ja Kanaŋ tɩ́náwa toló. 2 Isi mʋ́ Mezopotami ɩ maá áná Bɩtʋɛl jaa, a ja háálɔ ráŋ, ɩ máá nánʋɔlɔ Labaŋ tolé sɩɛrʋ. 3 Rɩ́ Wɩɩsɛ ná há kéŋ dóé wuu héí nyúú bárka, a a rɩ́ɩ́ ka lʋla, rɩ́ɩ́ bɛlɛ pul, a makɛ rɩ́ɩ́ a dukana naabál. 4 Rɩ́ Wɩɩsɛ pi bárka ná ʋ há héé pá Abɩrahaŋ, a pɛ́ɩ́ rɩ́rɩ́ dunɩɛ, a makɛ rɩ́ɩ́ tɩ́llɛ tɔ́ɔ́ ná ɩ há ká nɩhʋ́ɔ́r ʋ mɛ́, tɔ́ɔ́ ná Wɩɩsɛ há píé pá Abɩrahaŋ. 5 Ɛ́ nɛ́ Ɩzakɛ a Zakɔbɛ mʋ́ Mezopotami, a mɩŋ Haraŋ tɩ́náwa Bɩtʋɛl bio Labaŋ jaa mɛ́. Ɛ́ Labaŋ nɛ́ ká Ezayu rɩ́ Zakɔbɛ máá Rebeka nánʋɔlɔ.6 Ezayu nɩ́ɔ̃́ rɩ Ɩzakɛ hé bárka pá Zakɔbɛ, ká a ʋ mʋ́ Mezopotami rʋ́ʋ́ ja háálɔ ráŋ. Ʋ nɩ́ɔ̃́ rɩ Ɩzakɛ bʋ́lʋ́ rɩ́ ʋ bárka ná héé mí, rʋ́ʋ́ sɩ́ Kanaŋ tɩ́náwa toló má já, 7 rɩ Zakɔbɛ má fa sáŋʋ́ áná rɩ́rʋ́ maá nʋɔ, a mʋ́ Mezopotami. 8 Ɛ́ nɛ́ Ezayu zɩŋ rʋ́ʋ́ áná Ɩzakɛ wɩ Kanaŋ tɩ́náwa tolé có. 9 Ɛ́ nɛ́, ʋ mʋ́ ná Abɩrahaŋ bio Ɩsɩmayɛlɛ, a jɔ́ʋ́ toló Mahalatɛ ná há ká Nɩbayɔtɛ nátoló, a sɩɛ́ súúrú háála náŋa mɛ́.
Zakɔbɛ duose
10 Zakɔbɛ fa há lɛ́ Bɛɛrɩsɩba mɛ́, ʋ cáásɛ́ Haraŋ rɩ́ cɔɔ aá mʋ́. 11 Ʋ válɔ́ mʋ́ peri dɩhɩ̃́ nɔ́ŋɔ rɩ wɩɩsɛ zʋ́ɔ́, ʋ cɔ ráŋ, a pi ɛ́ dɩhɩ̃́ dɔ́wɩ́ nɔ́ŋɔ, a yéllú nyúú, a kaa pɛ́ cɔ. 12 Ʋ dúósí duose. Ʋ ná neŋcolo múkur há tɩ́kɛ́ tíé, kɔ́ʋ́ zɛ́ aá yakɛ bána mɛ́. Wɩɩsɛ Malɩ́kawa tɩŋ ráŋ zɛ́ káá tuwi. 13 Nyuutɩna Wɩɩsɛ cɩ́nʋ́ nyúú ká bʋlɛ́: <<Ŋ nɛ́ ká Nyuutɩna Wɩɩsɛ, ɩ naabál Abɩrahaŋ rɩ́rɩ́ áná Ɩzakɛ Wɩɩsɛ. Tíé né ɩ há pɩ́nʋ́ daha, ŋ sɩ́ púú pɛ́ɩ́, ɩ rɩ́rɩ́ dunɩɛ. 14 Ɩ dunɩɛ sɩ́ a ɓɩkáná anɛ tíé kuŋkulo; ɓa sɩ́ pul a jɛrɛ mʋ́ lɛ tɔ́ɔ́ nyúú rɩ́ tɔ́ɔ́ mʋ́l, rɩ́ tɔ́ɔ́ lʋ́lɔ́ŋsɛ wuu bɛllɛ. Dúníé nyúú nɩɛ wuu sɩ́ tɩ́ŋɩ́ rɩ́rɩ́ dunɩɛ mɛ́ a náŋ bárka. 15 Ná! ŋ mɩ́nɔ́ arɩ́rɩ́, ŋ sɩ́ pɔ́ɩ́ mɛ́ ráŋ ná wuu ɩ háá mʋ́ɛ́, ká rɩ́ŋ kánɩ́ bɩrko tíé né daha. Ŋ wɩ́ɩ́ vɛ́ɛ́ tá, rɩŋ nʋtálɔ ná nɛ́ wɩ súé.>> 16 Zakɔbɛ gírkó isi dóŋ mí a bʋlɛ́: <<Taŋá nɛ́ ɓɩɛ́na, Nyuutɩna Wɩɩsɛ mɩŋ dɩhɩ̃́ né rí káŋ fa wɩ́ ɛ̃.>> 17 Héwíŋ há zʋ́ʋ́, ʋ sɛ́: <<Dɩhɩ̃́ né ká dɩfáálɛ́ rɛ́! Wɩɩsɛ jaa nɛ́ dé, Wɩɩsɛ zʋ́ɔ́ dánnʋɔ nɛ́.>> 18 Zakɔbɛ isi cɩ́cʋɔ fól, a pi dɔ́wɩ́ ná ʋ fa há píé yéllú nyúú, a kaa cɔ́ŋsɛ, a bɩ́sɛ nʋʋ wáásʋ́ nyúú. 19 Ʋ pá ɛ́ dɩhɩ̃́ yɩr Betɛl, ká ɛ́ tɔ́ɔ́ yɩr fa ká Luzi ní. 20 Zakɔbɛ sɩɛ́ tá nʋɔ a bʋlɛ́: <<Rɩ Wɩɩsɛ nɛ́ mɩnɛ́ arɩ́rɩ́ŋ, a cú tɔ́ŋ mɛ́ ŋmɛ́nɔ né nyúú ŋ há píé aá va, rʋʋ nɛ́ páŋ ɓɩdííli rɩ́ŋ dí, a páŋ gɛnnɛ rɩ́ŋ su, 21 rɩ́ŋ wólli bɩrɛ kóŋ áná jaa rɩ́ tɛŋfɩ́ɛ́l, ká ná, Nyuutɩna Wɩɩsɛ nɛ́ sɩ́ áŋ Wɩɩsɛ. 22 Dɔ́wɩ́ né ŋ há píé cɔ́ŋsɛ dɩhɩ̃́ né sɩ́ ko bɩrmɛ Wɩɩsɛ jaa. Omo ná wuu ɩ há sɩ́ pii páŋ ŋ sɩ́ lɩ́sʋ́ fí nyúú ker a pɛ́ɩ́.