Abɩrahaŋ yɔ́wɛ́ tíé húú háálɔ Saara
23
1 Saara dí tɔ́ɔ́ bɩŋsɛ zɔlɔ rɩ́ mɛrɛ́ rɩ́ balpɛ. 2 Ʋ sʋ́wɛ́ Kiriyati'arba mɛ́ nɛ́; ʋ nɛ́ ká Ɛbɩrɔŋ, Kanaŋ tíé. Ɛ́ nɛ́ Abɩrahaŋ isi wíwú háálɔ Saara yúó. 3 Ʋ cɩ́ róŋ mí a lɛ sʋʋ ná dɩhɩ̃́ a mʋ́ bʋl Hɛtɛ duo nɩɛ rɩ́ bʋlɛ́: 4 <<Ŋ ká nɩhʋ́ɔ́r rɛ́ ɩ́ sɩɛrʋ, a a nɩdaarɩ́; ŋŋ́ sʋl tíé ní ɩ́ rɩ́, rɩ́ŋ húŋ háálɔ lɛlɔ.>> 5 Ɛ́ nɛ́ Hɛtɛ duo nɩɛ pá Abɩrahaŋ liŋó a bʋlɛ́: 6 Á nyúútɩ́na, zésírá! Ɩ ká kuór rí Wɩɩsɛ bil á sɩɛrʋ, ɛ́ wɩ́ɛ́, bélrá lɛlɛ dɩhúí, a lɩ́sɛ bʋɔ ná ɩ há có, a húí háálɔ lɛlɔ. Á oro wuu wɩ́ɩ́ bʋɔ wuó vɔŋ rɩ́ɩ́ húí háálɔ lɛlɔ.>> 7 Ɛ́ nɛ́ Abɩrahaŋ isi yʋ́ɔ́kʋ́ tɩɩ a cʋɔlɛ Hɛtɛ duo nɩɛ ná há ké tɔ́ɔ́ ná mɛ́, 8 ká bʋ́lwɔ́ rɩ́ bʋlɛ́: <<Rɩɩ́wa nɛ́ ɓɩɛ́na sáŋɛ́ rɩ́ŋ húŋ háálɔ lɛl rɛɛ́, ɩ́ zésíŋ liŋó, a sʋl Sohar bio Ɩfɩrɔŋ, 9 rʋ́ʋ́ pi Makpela paalɔ bʋɔ ná há kɔ́ʋ́ tɩ́llɛ ʋ baka nʋɔ, a páŋ. Rʋ́ʋ́ yɛ́llʋ́ páŋ ʋ yɛlɩ́ mʋɔsɔ ɩ́ sɩ́ɛ́, rɩ́ ɛ́ dɩhɩ̃́ áŋ sʋsɛ dɩhúí.>> 10 Ɩfɩrɔŋ tɩɩ há ká Hɛtɛ duo nɛ́ŋ, ʋ fa mɩ́ŋwɔ́ sɩɛrʋ. Ɛ́ nɛ́ ʋ cɛ́ nɩɛ ná wuu há cíkí tɔ́ɔ́ dánnʋɔ mɛ́ sɩ́ɛ́, ká bʋl pá Abɩrahaŋ bʋlɛ́: 11 Aɩ́, ŋ nyúútɩ́na, zésíŋ! Ŋ pí baka ná pɛ́ɩ́ a pi paalɔ bʋɔ ná má há mɩŋ ráŋ pɛ́ɩ́. Ŋ duo nɩɛ sɩ́ɛ́ mɛ́, ŋ píó dí zilé pɛ́ɩ́, húí háálɔ lɛlɔ.>> 12 Abɩrahaŋ baa isi yʋ́ɔ́kʋ́ tɩɩ a cʋɔlɛ Hɛtɛ duo nɩɛ ná há ké tɔ́ɔ́ ná mɛ́, 13 ká bʋl Ɩfɩrɔŋ rɩ́ tɔ́ɔ́ ná nɩɛ wuu sɩ́ɛ́ mɛ́ a bʋlɛ́: <<Ŋŋ́ sʋlɩ́, ɩ má baa zésíŋ! Ŋ sɩ́ túŋ baka ná yɛlɩ́ pɛ́ɩ́. Saŋ la ɛ́ meéwí, ká rɩ́ŋ wóllíŋ háálɔ lɛl hu ráŋ.>> 14 Ɩfɩrɔŋ baa bʋl pá Abɩrahaŋ bʋlɛ́: 15 <<Ŋ nyúútɩ́na, zésíŋ! Wárɛ zɔwaná tíé ká beé ŋ rɩ́rɩ́ pɛ́kɛ, húí háálɔ lɛlɔ.>> 16 Abɩrahaŋ rɩ́ Ɩfɩrɔŋ bʋl hé náŋá mɛ́, kɔ́ʋ́ dɩɩsɛ meéwí ná ʋ fa há mákɛ́, a pii pɔ́ʋ́, ʋ dunɩɛ ná wuu sɩ́ɛ́ mɛ́: wárɛ zɔwaná, anɛ yɔwɔ mɛ́ ɓa háá céŋŋi ɛ́.17 A kaa mɔ ɛ́ mɛ́, Ɩfɩrɔŋ baka ná há mɩŋ Makpela mɛ́ rɩ́ paalɔ bʋɔ ná há mɩŋ ráŋ arɩ́ tuuni ná wuu há mɩŋ ɛ́ baka sɩɛrʋ, a caasɛ Mamire, 18 Abɩrahaŋ nɛ́ tɩ́wɔ́. Hɛtɛ duo nɩɛ wuu arɩ́ tɔ́ɔ́ dánnʋɔ nɩɛ ná wuu ká dáŋsɩ́ɛ́wa.