Wɩɩsɛ mɩ́l Abɩrahaŋ
22
1 Ɛ́ wɩ́ɛ́ har mɛ́, Wɩɩsɛ mɩ́l Abɩrahaŋ rʋ́ʋ́ ná, a yɩ́rʋ́: <<Abɩrahaŋ!>> Ʋ saŋ: <<Néŋ ní!>> 2 Wɩɩsɛ sɛ́: <<Kánɩ́ bio Ɩzakɛ ná, ɩ bibala ná ɩ há có, a kánʋ́ mʋ́ Moriya tɔ́ɔ́, paalɔ oro nyúú ŋ há sɩ́ makɛ pɛ́ɩ́, a ɔsɛ vʋkfísi páŋ.>>3 Abɩrahaŋ cɔŋ fól a cɛsɛ daasɛ rʋ́ʋ́ kaa mʋ́ ɔsɛ vʋkfísi ná, a hóú kokúcɩksɛ, a kɛ́sʋ́ tʋtʋnna bɛllɛ, a kánʋ́ bio Ɩzakɛ, ɓa pi ŋmɛ́nɔ aá mʋ́ dɩhɩ̃́ ná Wɩɩsɛ fa há mákɛ́ pɔ́ʋ́. 4 Tápʋlɛ botoro kal, Abɩrahaŋ tɩ́ɛ́nɔ́ bel rʋʋ ná dɩhɩ̃́ ná sɩ́ɛ́ rɩ́. 5 Ɛ́ nɛ́ ʋ bʋ́lʋ́ tʋtʋnna ná bɛllɛ rɩ́ bʋlɛ́: <<Ɩ́ nɛ́, ɩ́ ké rɛɛ́wa arɩ́ kokúme, ká rɩ́ŋ rɩ́rɩ́ŋ bio zɛ́ nyúú rí a cʋɔlɛ Wɩɩsɛ, ká bɩrko. 6 Abɩrahaŋ pi vʋk'ɔsɔ́ daasɛ ná a cɩ́ɩ́nʋ́ bio Ɩzakɛ, ká má pi níŋɓɔ́ɔ́ arɩ́ sii a kánʋ́ nɛ́sɛ mɛ́, ɓa bɛllɛ hé náŋá aá col. 7 Ɛ́ nɛ́ Ɩzakɛ yɩ́rʋ́ áná Abɩrahaŋ bʋlɛ́: <<Ŋ áná!>> Ʋ saŋ: <<Néŋ ní ŋ bio!>> Ɩzakɛ sɛ́: <<Ná níŋ arɩ́ daasɛ nɛ́, ká vʋk'ɔsɔ́ pewie mɩŋ nɛɛ́?>> 8 Abɩrahaŋ sɛ́: <<Ŋ bíí, Wɩɩsɛ tɩɩ nɩ́ɩ́ tɛ vʋk'ɔsɔ́ pewie.>>
9 Ɓa há mʋ́ɛ́ peri dɩhɩ̃́ ná Wɩɩsɛ há mákɛ́ pɔ́ʋ́, Abɩrahaŋ má vʋk'ɔ́ɔ́sɩ́koro, a pɩɛrɛ daasɛ. Ká sɩɛ́ kánʋ́ bio Ɩzakɛ a vɔwɛ, a púú sakɛ daasɛ ná daha koro ná nyúú. 10 Abɩrahaŋ sɩɛ́ tɛrɛ nɛ́sɛ a pi sii rʋ́ʋ́ kɔ́rkʋ́ bio. 11 Ɛ́ nɛ́ Nyuutɩna Wɩɩsɛ malɩ́ka cɛ́ bána nyúú ká yɩ́rʋ́ bʋlɛ́: <<Abɩrahaŋ! Abɩrahaŋ!>> Ʋ saŋ: <<Néŋ ní!>> 12 Malɩ́ka ná sɛ́: <<Sɩ́ɩ́ nɛ́sɛ káá mʋ́ bio ná rɩ́. Sʋ́ʋ́ wɩ́ɩ́ wuu á. Ŋ sɩ́sɛ́nyɛ ɩ́ɔ̃́ rɩɩ ɓɩɛ́na zíl Wɩɩsɛ, ɛ́ nɛ́ tɛ ɩ wɩ́ŋ vɔ́mɛ́ arɩ́rɩ́ bio ná há kɛ́ɩ́ bibala léŋ.>> 13 Abɩrahaŋ kenú nyúú ɓɔ́, ʋ ɔ́ɔ́ rʋ́ʋ́ bel rɩ peɓala nɛ́, nyɩ́sɛ garkɛ ɓɩɛ mɛ́, túí sɩɛrʋ. Ɛ́ nɛ́ Abɩrahaŋ mʋ́ ka peɓala ná kaa ko ɔsɛ vʋkfísi pá Wɩɩsɛ, ʋ bio ná nyúú mí. 14 Abɩrahaŋ pá ɛ́ dɩhɩ̃́ yɩr bʋlɛ́: <<Nyuutɩna Wɩɩsɛ nɩ́ɩ́ tɛɛ́.>> Ɛ́ nɛ́ tɛ arɩ́ zaa wuu ɓaá bʋlɛ́: <<Nyuutɩna Wɩɩsɛ paalɔ nyúú, ʋ nɩ́ɩ́ tɛɛ́.>>
15 Nyuutɩna Wɩɩsɛ malɩ́ka baa cɛ́ bána nyúú ká yɩ́rɛ Abɩrahaŋ bʋllɛ mɛ́, 16 a bʋlɛ́: <<Nyuutɩna Wɩɩsɛ sɛ́: ɩ há wɩ́ŋ vɔ́mɛ́ arɩ́rɩ́ bio ná há kɛ́ɩ́ bibala léŋ, ŋ ŋmɩ́ɛ́sɔ́ ŋ tɩɩ yɩr mɛ́, 17 ŋ sɩ́ hé bárka kɩ́ŋkáŋ pɛ́ɩ́, ká a rɩ́ɩ́ duo nɩɛ pul anɛ bána nyúú caŋwʋllɛ rɩ́ mʋʋ nʋɔ hɩɛla. Ɩ duo nɩɛ sɩ́ wóllíwó dɩŋdɔma tɛ́ŋ wuu mí. 18 Tíé nyúú duo wuu nɩɛ sɩ́ tɩ́ŋɩ́ duo nɩɛ mɛ́ a ná bárka, bee wɩ́ɛ́ ɩ há sáŋɛ́ zílíŋ nʋɔ.>> 19 Ká Abɩrahaŋ bɩrɛ kóú tʋtʋnna ná rɩ́, ɓa isi ɓa hé náŋá a mʋ́ Bɛɛrɩsɩba, Abɩrahaŋ tɔ́kéni. Nahɔrɛ duo nɩɛ
20 Ɛ́ wɩ́ɛ́ har mɛ́, ɓa kúó bʋl pá Abɩrahaŋ bʋlɛ́: <<Ɩ maábio Nahɔrɛ háálɔ Milika má lʋ́llɛ́ bɛlɛ pɔ́ʋ́: 21 Ɓa ɓɔhɔ̃́ nɛ́ ká Utisi, ʋ maábio ní ká Buuzi, ʋ má lɩkápáwa ní ká Aramɛ áná Kɩmʋɛl, 22 rɩ́ Kɛsɛdɛ rɩ́ Hazo rɩ́ Pɩldasɛ rɩ́ Yɩdɩlafɛ arɩ́ Bɩtʋɛl.>> 23 Milika há lʋ́l bɛlɛ ná córí pá Abɩrahaŋ maábio Nahɔrɛ nɛ́ ɛ́. Bɩtʋɛl má nɛ́ lʋ́l Rebeka. 24 Milika dudoo, ɓaá yɩ́rɛ Rehuma, ʋ má lʋl bɛlɛ; ɓa nɛ́ ká: Teba rɩ́ Gahaŋ rɩ́ Tahasɛ arɩ́ Maaka.