Abɩrahaŋ há mɩŋ Gerarɛ mɛ́ wɩ́ɛ́
20
1 Abɩrahaŋ isi ráŋ a caasɛ Nɩgɛɛvɛ dɩtɩ́llɛ aá mʋ́, a mʋ́ ké Kadɛsɛ rɩ́ Suur pɛ́kɛ. A baa isi ráŋ a mʋ́ ké Gerarɛ mɛ́. 2 Abɩrahaŋ fa sʋ́ʋ́ háálɔ Saara kɔ́ʋ́ nátoló ní. Ɛ́ nɛ́ Gerarɛ kuóro Abɩmɛlɛkɛ a ɓa mʋ́ lɩ́sɛ Saara a kaa ko pɔ́ʋ́. 3 Ɛ́ nɛ́ tɔ́ɔ́ bíri, Wɩɩsɛ tɩŋ duose mí bʋl Abɩmɛlɛkɛ rɩ́ bʋlɛ́: «Ɩ sɩ́ sʋwɛ, háálɔ ná ɩ há lɩ́sɛ́ wɩ́ɛ́, bee wɩ́ɛ́ ʋ kéŋ bála rɛ́.» 4,5 Rɩ Abɩmɛlɛkɛ ha wɩ Saara mɛ́ tɩ́kɛ́. Ɛ́ nɛ́ ʋ sɛ́: «Nyuutɩna, ŋ rɩ́rɩ́ŋ tɔ́ɔ́ nɩɛ wɩ wɩ́ɩ́ zɔ́kɛ́. Abɩrahaŋ tɩɩ nɩ́ sʋ́ʋ́ nátoló ní, Saara má saŋ bʋlʋ́ nánʋɔlɔ nɛ́; ŋ wɩ ɛ̃ nɛ́ tɛ, ŋ a ɛ́, ŋ wɩ bɔ́ŋbɔ́ŋ bɩ́ɩ́nɛ́. Ɩ sɩɛ́ sɩ́ tɩŋ ɛ́ wɩ́ɛ́ a ɓʋ́ʋ́sɩ́rá, ŋ rɩ́rɩ́ŋ tɔ́ɔ́ nɩɛ, ká á wɩ wɩ́bɔŋ má ɛ́ɛ́?» 6 Wɩɩsɛ baa tɩŋ ɛ́ duose tɩɩ mɛ́ a bʋ́lʋ́ rɩ́ bʋlɛ́: «Ŋ má ɩ́ɔ̃́ rɩ́ɩ́ wɩ ɛ̃ rɛ́, ɩ wɩ bɔ́ŋbɔ́ŋ bɩ́ɩ́nɛ́ ká lɩ́sɛ ɛ́ háálɔ, ɛ́ nɛ́ ŋ wɩ lóé ɩ tɩ́kʋ́ mɛ́, rɩ́ɩ́ sɩ́ wɩ́ɩ́ áá zɔ́kɩ́ŋ mɛ́. 7 Ɛ́ wɩ́ɛ́, pi ɛ́ háálɔ pɔ́ʋ́ bála; ʋ bála ná ká Wɩɩsɛ wɩ́laabʋ́llʋ́ rɛ́, rɩɩ nɛ́ púú háálɔ pɔ́ʋ́, ʋ sɩ́ sʋl Wɩɩsɛ pɛ́ɩ́ rɩ́ɩ́ sɩ́ sʋ́wʋ́. Ká rɩɩ nɛ́ vɛ́ɛ́, ɩɩ́ sʋ́wʋ́ nɛ́ ɩ rɩ́rɩ́ nɩɛ wuu.» 8 Ɛ́ nɛ́ tɔ́ɔ́ pʋl, Abɩmɛlɛkɛ cɔŋ fól isi a yɩ́rʋ́ kílo nɩɛ wuu hé náŋá mɛ́, a bʋ́lʋ́ duose ná wɩ́ɛ́ pɔ́wɔ́. Héwíŋ kɛ́sɩ́wɔ́ wuu kɩ́ŋkáŋ. 9 Abɩmɛlɛkɛ sɩɛ́ a ɓa yɩ́rɛ Abɩrahaŋ ʋ ko, ʋ bɔ́sʋ́ bʋlɛ́: «Beé rí ɩ pii árá mɛ́ nyɛ? Ŋ zɔ́kɩ́ beé, ɩ yíkíŋ rɩ́rɩ́ŋ nɩɛ wuu ráá aa wɩzɔkɩ́ mɔ nyɛ? Ɩ á wɩ́ɩ́ ná há wɩ mɔhɛ̃́ rɩ́wɔ́ pii áŋ mɛ́.» 10 Beé rí kení ɩ a nyɛ wɩ́ɩ́ duo?» 11 Ɛ́ nɛ́ Abɩrahaŋ sɛ́: «Ŋ bɩ́ɩ́nɔ́ rɩ tɔ́ɔ́ né nɩɛ wɩ Wɩɩsɛ fá rɛ́, rɩ́wɔ́ ko ɓʋ́ŋ ká láŋ háálɔ. 12 Ʋ sɩɛ́ ɓɩɛ́na káŋ nátoló ní, bee wɩ́ɛ́ á tʋ́ŋ áná mɛ́ rɛ́, ká wɩ maá mɛ́ nɛ́ tʋ́mɛ́; ɛ́ nɛ́ ŋ wóllú aá ja. 13 Wɩɩsɛ há ɛ́ɛ́ ŋ lɩ́ŋ dunɩɛ sɩɛrʋ, ŋ bʋ́lɩ́ŋ háálɔ rɩ́ bʋlɛ́: <Raá mʋ́ tɔ́ɔ́ wuu, ɩ bʋlɩ́ nánʋɔlɔ nɛ́ káŋ, a pɛ́ŋ mɛ́.» 14 Ɛ́ nɛ́ Abɩmɛlɛkɛ pi Abɩrahaŋ háálɔ Saara pɔ́ʋ́. Ká lɩ́sɛ pieŋse, rɩ́ bʋnnɛ, rɩ́ nɛsɛ, a pɔ́ʋ́, a lɩ́sɛ yósi má, báála rɩ́ háála a pɔ́ʋ́. 15 Ká bʋl Abɩrahaŋ rɩ́ bʋlɛ́: «Ŋ tíé né wuu sɩɛrʋ, ɩ é há có ráŋ ná wuu, mʋ́ ké, ŋ pɛ́ɩ́ ŋmɛ́nɔ.» 16 A bʋl Saara má rɩ́ bʋlɛ́: «Ná wárɛ nyáŋ bʋ́ɩ́ ŋ há píé pɛ́ɩ́ nánʋɔlɔ, ɓa nɩ́ɩ́ makɛ́ rɩ́ nɩɛ wuu zɩŋ rɩ́ɩ́ wɩ wɩ́ɩ́ zɔ́kɛ́ wɩ́ɩ́ né sɩɛrʋ, rɩ́ɩ́ yɩr sɩ́ zɔ́kʋ́.» 17,18 Abɩrahaŋ háálɔ Saara laa jɛɛ ná wɩ́ɛ́, Nyuutɩna Wɩɩsɛ fa ɔ́ɔ́ Abɩmɛlɛkɛ jaa háála wuu pɩrɛ a waá lʋl. Abɩrahaŋ sʋl Wɩɩsɛ, ʋ dúóri Abɩmɛlɛkɛ rɩ́rʋ́ háálɔ, arɩ́rʋ́ tʋtʋŋháála wuu, ká ɓa baa wólli bɛlɛ lʋllɛ.